Ia Novema 1831, na faapotopoto ai se vaega o toeaina mo se konafesi faapitoa i Hairama, Ohaio. O se tasi o aitema na talanoaina i le konafesi o le lomiaina o faaaliga na maua e le Perofeta o Iosefa Samita. I le taimi o lenei sauniga, na tuuina mai ai e le Alii se faaaliga ia Iosefa Samita ma atofaina ai e avea ma faatomuaga o le tusi o faaaliga o le a faapea ona lolomiina. O lena faaaliga ua avea nei ma vaega muamua o le Mataupu Faavae ma Feagaiga. Mulimuli ane i le konafesi, na tuuina mai ai e le Alii se faaaliga lea ua tusia nei i le Mataupu Faavae ma Feagaiga 67. I lena faaaliga sa fetalai mai ai le Alii i le usoga o e sa i ai ni fesili e uiga i le gagana o faaaliga lea sa Ia tuuina mai i le Perofeta.
Pe sa i ai se taimi na e tuufesili ai, pe aisea e maua ai e nisi o tagata se molimau e uiga i mataupu faavae o le talalelei ae le maua e isi?
Ia Novema o le 1831, na faapotopoto ai se vaega o toeaina, e aofia ai le Perofeta o Iosefa Samita, e talanoaina le lolomiga o faaaliga na maua e le Perofeta. O nisi o toeaina na mauaina se molimau e moni faaaliga. Ae peitai, atonu sa moomoo pea isi ia maua se molimau faapena.
Mai mea ua e aoaoina i fuaiupu 1-2, faatumu avanoa i le mataupu faavae lenei: E faafofoga mai le Alii i a‘u ma silafia lo’u .
Ata
tamaitai o loo tatalo
Tali le fesili lenei i lau api talaaga mo le suesueina o tusitusiga paia: E mafai faapefea e le iloaina o lenei mataupu faavae ona fesoasoani e faaleleia atili ai au tatalo? Ona tusi lea e uiga i se aafiaga sa fesoasoani ia te oe po o se tasi e te iloa e maua ai se faamautinoaga faaleagaga o upumoni o le talalelei.
Faitau le Mataupu Faavae ma Feagaiga 67:3, ma vaavaai mo mafuaaga sa le maua ai e nisi o toeaina le faamanuiaga na ofoina mai e le Alii ia i latou. Atonu e te manao e faailoga fuaitau o loo tu ma e tulaga ese ia te oe.
Tali le fesili lenei i lau api talaaga mo le suesueina o tusitusiga paia: E mafai faapefea e le faatagaina o le fefe i lou loto, ona taofia oe mai le mauaina o faamanuiaga? Ona fai lea o se lisi o popolega e ono taofia ai oe mai le mauaina o faamanuiaga.
Mafaufau loloto i le mana o le Alii e fesoasoani ia i tatou e suia ai le fefe i le faatuatua. E mafai faapefea ona fesoasoani lenei malamalama i se tasi ia faaauau pea ona atiina ae se molimau?
E lu‘iina e le Alii i latou o e faitio i Ana faaaliga
Pe na e tuufesili ea pe aisea e tatau ai ona tatou mulimuli i taitai o le Ekalesia e ui lava e le atoatoa i latou?
Faitau le folasaga o le vaega mo le Mataupu Faavae ma Feagaiga 67 ma le fuaiupu e 5, ma vaavaai mo uiga faaalia eseese na i ai i nisi o toeaina e faatatau i faaaliga. (Ia manatua o le tuufaatasiga muamua o faaaliga a le Perofeta o Iosefa Samita na ta’ua o le Tusi o Poloaiga. Mulimuli ane, na sui le ulutala i le Mataupu Faavae ma Feagaiga.) Ia matau le folasaga o le vaega e faapea, “e toatele le au uso na tuuina mai le molimau faamaoni” i le moni o faaaliga. Ae ui i lea, “sa i ai ni talanoaga lē lelei na faia e faatatau i le gagana na faaaoga i faaaliga.” E tusa ai ma le fuaiupu e 5, sa manatu nisi o toeaina e mafai ona latou “faaupu ai ia sili atu i le gagana [a Iosefa Samita].” Ona o le faamaualuga i o latou lava atamai, sa latou manatu ai ua sili atu lo latou tomai e tusi faaaliga nai lo o le perofeta filifilia a le Alii (tagai i le 2 Nifae 9:28–29).
Faitau le Mataupu Faavae ma Feagaiga 67:4, ma toe faitau foi le fuaiupu e 5. Vaavaai mo auala na tali mai ai le Alii i popolega o toeaina e uiga i le gagana o faaaliga.
Aisea e te manatu ai na taua i toeaina ona malamalama, na silafia e le Alii sa galue o Ia e ala mai i auauna le atoatoa?
Faitau le Mataupu Faavae ma Feagaiga 67:6–9, ma vaavaai mo le luitau na tuuina mai e le Alii ia i latou o e sa popole e uiga i le gagana o faaaliga.
Sa tonu ia William E. McLellin e fai le lu’i a le Alii e tusi se faaaliga e faatusatusa i na [faaaliga] na maua e le Perofeta o Iosefa Samita. Na tusia e Iosefa Samita le faamatalaga lenei i lana talafaasolopito: “O William E. M‘Lellin, i le avea ai ma se tagata sili ona poto, i lona lava manatu, na sili atu mea na ia iloaina nai lo lona faautauta, sa taumafai e tusi se poloaiga e faapei o se tasi o poloaiga a le Alii, ae sa toilalo; sa o se tiutetauave mataga tele le tutusi i le suafa o le Alii. O toeaina ma i latou uma na auai sa molimauina lenei taumafaiga lē aoga a se tagata e faataitai i le gagana a Iesu Keriso, na faafouina ai o latou faatuatua i le atoatoaga o le Talalelei, ma i le moni o poloaiga ma faaaliga lea na tuuina mai e le Alii i le Ekalesia e ala mai i le avea o a’u ma se meafaigaluega; ma sa faaalia e Toeaina se naunautai e molimau atu i le moni [o nei mea] i le lalolagi atoa” (i le History of the Church, 1:226).
Ina ua mavae lenei mea, o toeaina uma o e sa i ai na autasi e saini se pepa o faamatalaga e tuuina atu ai se molimau aloaia i le moni o faaaliga na i ai i le Tusi o Poloaiga.
Tali fesili nei i lau api talaaga mo le suesueina o tusitusiga paia:
Aisea e te manatu ai o Iosefa Samita, o le sa utiutii ana aoaoga aloaia, na mafai ona tuuina mai nei faaaliga, ae sa le mafai e William E. McLellin, o le sa matua lelei ana aoaoga?
O le a se mea e mafai ona e aoaoina mai i lenei tala, e uiga i le faamasinoina o o tatou taitai ona o o latou le atoatoa?
Mafaufau loloto i lau tautinoga e mulimuli i ou taitai i le amiotonu, e tusa lava po o le atoatoa e te vaai pe vaaia foi e isi ia i latou.
Ua fautuaina e le Alii Ona soo i le auala e saunia ai e nonofo i le afioaga o le Atua
I lau api talaaga mo le suesueina o tusitusiga paia, tusi ai se siata e lua ni ona koluma. Faaigoa le koluma muamua Taui ma le koluma lona lua Auala e Maua ai le Taui. Faitau le Mataupu Faavae ma Feagaiga 67:10–14, ma vaavaai mo le taui na folafola mai e le Faaola i nei usoga ma faatinoga na manaomia mo lo latou mauaina o lena taui. Tusi au tali i koluma talafeagai.
E tusa ai ma nei fuaiupu, o le a le mea na manaomia ona fai e nei usoga ina ia nonofo ai i le afioaga o le Atua? (O le upu nonofo o lona uiga ia tumau po o le nonofo ai i se nofoaga faapitoa.) Afai latou te tafiesea i latou lava mai le fua ma atuatuvalega ma faamaualalo i latou lava, o le a mafai ona latou nonofo i le afioaga o le Atua.
E pei ona tusia i le Mataupu Faavae ma Feagaiga 67:13, sa uunaia nei usoga ia “faaauau pea i le onosai” seia oo ina faaatoatoaina i latou. Faitau le tala lenei, na faasoa mai e Peresitene Dieter F. Uchtdorf o le Au Peresitene Sili, lea o loo aoao mai ai e uiga i le taua o le onosai i le faagasologa o le avea ma tagata atoatoa:
Ata
Peresitene Dieter F. Uchtdorf
“I le vaitau o le 1960, sa amataina ai e se polofesa i le Iunivesite o Stanford se suesuega faigofie e suesue ai le naunautai o tamaiti e ta’i fa tausaga le matutua. Sa ia tuuina se masimelo [marshmallow] lapoa i o latou luma ona fai atu lea i ai, e mafai ona latou ‘aia loa, po o le, afai latou te faatalitali mo le 15 minute, o le a maua a latou masimelo tai lua.
“Ona ia tuua lea na o tamaiti ae matamata mai i se faata e itu lua i le mea na tupu. O nisi o tamaiti na ‘ai a latou masimelo i le taimi lava lena; o nisi sa na o ni nai minute na mafai ona faatalitali ai ona gauai atu loa lea i le faaosoosoga. Sa na o le 30 pasene na mafai ona faatalitali” (“Faaauau i le Onosai,” Ensign po o le Liahona, Me 2010, 56).
E te manatu e faapefea ona faatatau le suesuega ma taunuuga a lenei polofesa i le autalavou i aso nei?
Ona saunoa lea o Peresitene Uchtdorf e uiga i mea na maua mai le aafiaga o masimelo:
Ata
Peresitene Dieter F. Uchtdorf
“A o faagasolo pea aso, sa tulimataia [e le polofesa] ia tamaiti ma amata ai ona ia matauina se sootaga manaia lava: o tamaiti na le mafai ona faatalitali na mulimuli ane tauivi i le olaga ma sa tele ni faafitauli i a latou amio, ae o i latou o e na faatalitali na tele lava ina sili atu ona mautinoa ma lelei atu ona musuia, ua maualuluga atu o latou togi ma tupe maua, ma e lelei atu a latou fegalegaleaiga.
“O le mea na amataina o se suesuega faatauvaa i tamaiti ma masimelo, na avea ma se suesuega taua ua fautuaina mai ai e faapea, o le gafatia ona faatalitali—ia onosai—sa avea ma se uiga autu atonu e valoia ai le faamanuiaina i se taimi mulimuli ane o le olaga. …
“O le faatalitali e mafai ona faigata. Ua iloa e tamaiti, ma e faapena foi tagata matutua. Ua tatou ola i se lalolagi ua i ai meaai e saunia faavavave, feau tusitusi i telefoni feaveai, ma tifaga e vave maua, ma tali vave i fesili e sili ona leai se taua po o fesili loloto foi. Tatou te le mananao e faatalitali. …
“O le onosai—o le mafai lea ona taofiofi ou manaoga mo se taimi—o se uiga mama e faapelepele i ai ma e mauagata. Tatou te mananao i le mea tatou te mananao i ai, i le taimi lava lenei. O le mea lea, o le uiga tonu lava o le onosai, e ono foliga mai e le manaia ma, o nisi taimi, e oona.
“Ae ui i lea, a leai le onosai, e le mafai ona tatou faafiafiaina le Atua; e le mafai ona tatou atoatoa. E moni, o le onosai, o se faagasologa o le faamamaina e faaleleia ai le malamalama, faalolotoina ai le fiafia, taulai atu ai i amioga, ma ofoina mai ai le faamoemoe mo le filemu” (“Faaauau i le Onosai,” 56-57).
Tali le fesili lenei i lau api talaaga mo le suesueina o tusitusiga paia: Aisea e te manatu e manaomia ai le onosai i au taumafaiga ina ia agavaa ma tumau i le afioaga o le Alii? Ma le isi, ia faaalu ni nai minute e mafaufau loloto ai i vaega o lou olaga lea atonu e manaomia ona e onosai atili ai ia te oe lava po o isi. Afai e te lagona le lagolelei i le faia o lena mea, tusi se sini e aofia ai le, ia onosai atili i au taumafaiga ia mama i luma o le Atua.
Tusi le mea lenei i lalo o le galuega atofaina o le aso i lau api talaaga mo le suesueina o tusi tusiga paia: