Sa faatulagaina aloaia le Ekalesia a Iesu Keriso o le Au Paia o Aso e Gata Ai i le aso 6 o Aperila, 1830. Na toeitiiti atoa le 60 o tagata sa auai i le sauniga tapuai muamua. O le sauniga sa faia ai tatalo, lagolagoina, faauuina, ma le faataunuuga o le faamanatuga, ma faamauga. I le taimi o lenei sauniga na maua ai e le Perofeta o Iosefa Samita le faaaliga ua tusia nei i le Mataupu Faavae ma Feagaiga 21. I ni nai aso mulimuli ane, na faamanino mai ai e le Alii, e tatau ona faia le papatisoga e i latou ua i ai le pule tatau o le perisitua (tagai i le MF&F 22). Na Ia tuuina mai foi ni fautuaga patino i ni alii se toalima o e na mananao e iloa lo latou tiute (tagai i le MF&F 23).
Ua tofia e le Alii ia Iosefa Samita e avea ma uluai perofeta ma tagatavaai i le Ekalesia toefuataiina a Iesu Keriso
Faalogo pe faitau i upu o le viiga “Ia Viia Oe, Le Atua, mo se Perofeta” (Viiga, nu. 10). O a nisi o mafuaaga e te lagona ai le faafetai i le Atua mo se perofeta? A o e suesueina le lesona o le aso lenei, vaavaai mo upumoni e mafai ona faateleina ai lou loto faafetai mo perofeta.
Faitau le Mataupu Faavae ma Feagaiga 21:1, ma vaavaai mo faalagiga eseese o le a iloa ai Iosefa Samita. Atonu e te manao e faailoga na mea i au tusitusiga paia pe tusi foi i lau api talaaga mo le suesueina o tusitusiga paia.
Na aoao mai Elder John A. Widtsoe o le Korama a Aposetolo e Toasefululua e uiga i le uiga lautele o le faalagiga “perofeta” ma pe faapefea ona aofia ai isi faalagiga:
Ata
Elder John A. Widtsoe
“O se perofeta o se faiaoga. O le uiga taua lena o le upu. Na te aoao le tino o le upumoni, le talalelei, na faaalia mai e le Alii i le tagata; ma i lalo o musumusuga e faamatalaina ai ia malamalama tagata. …
“I le uiga o se perofeta o se tagata e mauaina faaaliga mai le Alii, o faalaniga ‘tagatavaai ma talifaaaliga’ ua na ona faalauteleina ai o le uiga telē atu ma aofia ai ma le uiga o le faalaniga ‘perofeta.’ …
“O se tagatavaai o se tasi e vaai i mata faaleagaga. Na te iloa le uiga o mea e foliga nenefu i isi; o le mea lea o ia o se tagata faaliliuupu ma faamalamalama o le upumoni e faavavau. Na te muai vaai i le lumanai mai le taimi tuanai ma le taimi nei. Na te faia lena mea e ala i le mana o le Alii e galue tuusao e ala mai ia te ia, pe lē tuusao mai foi e ala mai i meafaigaluega faalelagi e pei o le Urima ma le Tumema. A faapuupuu, o ia o lē e vaai, o lē e savali i le malamalama o le Alii a o pupula ona fofoga. [Tagai i le Mosaea 8:15–17.]
“O se talifaaaliga e faailoaina mai, faatasi ai ma le fesoasoani a le Alii, se mea sa le’i iloa muamua. Atonu o se mea e fou po o se upumoni ua galo, po o se faaaogaaga fou pe ua galo o se upumoni ua iloa e manaomia e le tagata. …
“I se aotelega: O se perofeta o se faiaoga o upumoni ua iloa; o se tagatavaai o sē e vaai i upumoni natia, o se talifaaaliga o sē e tauaveina le upumoni fou. O le faauigaga lautele, o le faalagiga e faaaoga so’o, peroteta, o loo aofia ai isi faalagiga ma avea ai le perofeta o se faiaoga, tagata vaai, ma se tagata e tauaveina le upumoni” (Evidences and Reconciliations, arr. G. Homer Durham, 3 vols. in 1 [1960], 257–58).
I le Taiala i Tusitusiga paia, ua tatou iloa ai o se perofeta o “se tagata ua valaauina e, ma talanoa mai mo le Atua. O le avea ai ma se avefeau a le Atua, o se perofeta na te mauaina poloaiga, valoaga ma faaaliga mai le Atua. O lona tiutetauave o le faailoa atu o le finagalo o le Atua ma lona uiga moni i tagata, ma faailoa atu le uiga o ana fesootaiga ma i latou. O se perofeta e ta’usalaina le agasala ma valoia atu lona taunuuga. O ia o se folafola o le amiotonu. I nisi taimi, e mafai ona musuia perofeta e valoia le lumanai mo le manuia o tagata. Ae peitai, o lona tiutetauave autu lava, o le fai ma molimau a Keriso” (“Perofeta,” scriptures.lds.org).
Tali le fesili lenei i lau api talaaga mo le suesueina o tusitusiga paia: O a ni auala e fesoasoani ai faalagiga na tuuina mai ia Iosefa Samita i le Mataupu Faavae ma Feagaiga 21:1 e te malamalama ai i le taua o lana matafaioi ma tiutetauave eseese sa ia umia i le toefuataiga o le atoatoaga o le talalelei ma le Ekalesia a Iesu Keriso i le lalolagi?
Faitau le Mataupu Faavae ma Feagaiga 21:2-3, ma vaavaai mo upu po o fuaitau ua faaalia ai na musuia e le Atua ia Iosefa Samita e toefuatai mai le Ekalesia a Iesu Keriso. Atonu e te manao e faailoga nei upu po o fasifuaitau i au tusitusiga paia.
I lau api talaaga mo le suesueina o tusitusiga paia, faamatala mai pe aisea e te manatu ai, e taua le iloa na valaauina Iosefa Samita e le Atua e toefuatai mai ma taitai le Ekalesia a Iesu Keriso.
Faitau le Mataupu Faavae ma Feagaiga 21:4–5, ma faailoa mai se savali taua na faaali mai e le Alii i le aso na faatulagaina ai le Ekalesia.
Tali le fesili lenei i lau api talaaga mo le suesueina o tusitusiga paia: Aisea atonu e manaomia ai i nisi o taimi le “onosai ma le faatuatua” e faalogo ai i upu a se perofeta?
Ata
Peresitene Wilford Woodruff
Na tuuina mai e Peresitene Uilifoti Uitilafi le faamautinoaga e mafai ona tatou faatuatua i taimi uma i le perofeta a le Alii: “O le a le faatagaina lava a’u e le Alii po o se isi lava alii e tu o se Peresitene o lenei Ekalesia e taitaieseina outou. Ua lē i ai lena mea i le polokalama. Ua lē o i ai i le mafaufau o le Atua. A faapea ou te taumafaia lena mea, o le a aveesea a’u e le Alii mai lo’u tulaga” (Aoaoga a Peresitene o le Ekalesia: Wilford Woodruff [2004], 207).
Ata
Peresitene Iosefa F. Samita
Na tuuina mai foi e Peresitene Iosefa F. Samita se molimau faapena: “Afai [o le Peresitene o le Ekalesia] ua le faamaoni, o le a aveesea e le Atua o ia mai lona valaauga. Ou te molimau atu i le suafa o le Atua o Isaraelu o le a la tuuina le ao o le Ekalesia, o la na Ia filifilia e tulai mai le ulu, e solia Ana tulafono ma liliuese; o se taimi lava na te faia ai se mea o le a tau atu ai i lea tulaga i se taimi, o le a aveesea e le Atua o ia. Aisea? Aua afai e nofoia e se tagata amioleaga lena tulaga, pe afai o le a faatagaina, o le a leaga le punavai, o se mea Na te le mafai ona faatagaina” (Aoaoga a Peresitene o le Ekalesia: Iosefa F. Samita [1998], 233).
Faitau le Mataupu Faavae ma Feagaiga 21:6, ma faanumera i au tusitusiga paia ia faamanuiaga e tolu na faasafua mai ia i latou o e talia upu a perofeta i le onosai ma le faatuatua.
E faapefea ona e aoteleina folafolaga ua tuuina mai ia i latou o e faalogo i upu a le perofeta? (O le vaega lenei o se tasi lea o auala e ta’u mai ai le mataupu faavae: Afai tatou te faalogo i upu a le perofeta, o le a puipuia i tatou mai le fili.)
I lau api talaaga mo le suesueina o tusitusiga paia, tusi e uiga i se taimi sa faamanuiaina ai oe po o se tasi e te iloa, ona o le usitai i fautuaga ma upu a perofeta soifua. O lenei mea e mafai ona aofia ai le mulimuli i fautuaga na tuuina mai i konafesi aoao ma le tamaitusi Mo le Malosi o le Autalavou .
Ata
Peresitene James E. Faust
Na saunoa Peresitene James E. Faust o le Au Peresitene Sili, e uiga i le taua o le lagolagoina o le perofeta soifua: “Ou te le talitonu e mafai ona lotogatasi atoa tagata o lenei Ekalesia ma le Faaola e aunoa ma le lagolagoina o Lana perofeta soifua i le lalolagi, o le Peresitene o le Ekalesia. Afai tatou te le lagolagoina le perofeta soifua, po o ai lava o ia, ua tatou oti faaleagaga. O le mea e ese ai, o nisi ua maliliu faaleagaga ona o le tautu lava e mulimuli i perofeta ua leva ona maliliu. O isi e le lagolagoina perofeta soifua, ae taumafai e faasili a’e i latou e ala i le ta’ufaatauvaaina o perofeta soifua, peitai ane e agapiopio” (“Continuing Revelation,” Ensign, Aug. 1996, 5).
Ua faaali mai e le Alii, o le papatisoga e ao ona faataunuuina i le pule tatau
O nisi tagata o e sa mananao e auai i le Ekalesia ia Aperila 1830, sa papatisoina i isi lotu ma sa mafaufau pe aisea e manaomia ai ona toe papatisoina i latou (tagai i le folasaga o le vaega o le MF&F 22). Sa fesili atu le Perofeta o Iosefa Samita i le Alii e uiga i le alagatatau o lo tatou toe papatisoina. I Lana tali atu, na fetalai mai ai le Alii e uiga i se faamoemoega taua mo le Toefuataiga o le talalelei ma le Ekalesia.
Faitau le Mataupu Faavae ma Feagaiga 22. O le a le fetalaiga a le Alii e uiga i le pogai e tatau ai ona papatiso i le pule tatau?
I le Mataupu Faavae ma Feagaiga 22:1, na fetalai mai ai le Alii e uiga “i se feagaiga fou ma tumau-faavavau.” I le faamalamalamaga lenei, ia faailoga soo se upu e mafai ona fesoasoani ia e malamalama ai i le uiga o lenei fuaitau:
O le feagaiga fou ma tumau-faavavau o “le atoatoa lea o le talalelei a Iesu Keriso (MF&F 66:2). E fou i taimi uma lava faatoa faaali mai ai, i le mavae ai o se periota o le liliuese. E tumau-faavavau i le uiga e faapea, o le feagaiga a le Atua ma sa olioli ai [tagata] i tisipenisione uma o le talalelei lea sa naunau ai tagata e mauaina. O le feagaiga fou ma le faavavau sa toe faaali mai i tagata i le lalolagi e Iesu Keriso e ala mai i le Perofeta o Iosefa Samita. O loo i ai sauniga paia e faia i le pule o le perisitua—e pei o le papatisoga ma le faaipoipoga i le malumalu—e saunia ai mo le faaolataga, tino ola pea, ma le ola faavavau o le tagata” (Guide to the Scriptures, “New and Everlasting Covenant,” scriptures.lds.org).
Pe a tatou malamalama i nei upumoni e uiga i le feagaiga fou ma tumau-faavavau, ua manino lava o le papatisoga e tatau ona faia e se tasi ua i ai le pule mai le Atua. Faitau le Mataupu Faavae ma Feagaiga 22:2–4, ma faailoa mai fuaitau ua faaalia ai e le talia e le Alii ia papatisoga e faia e aunoa ma le pule tatau o le perisitua. Atonu e fesoasoani le iloa o le fuaiupu e 2 na faatatau ai e le Alii le sauniga o le papatisoga o le ulufale atu “i le faitotoa vaapiapi” (tagai i le 2 Nifae 31:17).
Ua i ai i le Ekalesia a Iesu Keriso o le Au Paia o Aso e Gata Ai le pule o le perisitua e manaomia e faatino ai sauniga taua e pei o le papatisoga. Tali le fesili lenei i lau api talaaga mo le suesueina o tusitusiga paia: Na faapefea ona faamanuiaina oe e ala i le avea o oe ma se tagata o le Ekalesia toefuataiina a Iesu Keriso?
Ua valaauina ni soo se toalima e faamalosia le Ekalesia
Faailoga igoa nei i le Mataupu Faavae ma Feagaiga 23: Oliva, Ailama, Samuelu, Iosefa, ma Iosefa Knight. Faitau le folasaga o le vaega e iloa ai po o a mea na mananao ai nei alii mai le Alii.
Sa muamua ona fetalai mai le Alii e uiga ia Oliva Kaotui. Sa avea Oliva ma se fesoasoani tele i le Perofeta o Iosefa Samita i le vaitaimi na faatoa tupu ai le Toefuataiga, e aofia ai le oo mai o le Tusi a Mamona ma le faatulagaga o le Ekalesia. Sa ia te ia ni meaalofa e tele ma ni manaoga amiotonu. Sa valaauina o ia e avea ma toeaina lona lua o le Ekalesia (tagai i le MF&F 20:3) ma sa tofiaina, faatasi ai ma Tavita Uitimera, e fesoasoani i le filifilia o le au Aposetolo e Toasefululua. Ae paga lea, sa faataga e Oliva le tele o nei uluai avanoa e oo atu ai i le faamaualuga, ma sa ia tuua ai le Ekalesia mo se taimi. Sa iu ina ona toe iloaina ana mea sese ma sa toe papatisoina.
Faitau le Mataupu Faavae ma Feagaiga 23:1-2, ma vaavaai mo se lapataiga na tuuina mai e le Alii ia Oliva Kaotui. Ona tali lea o fesili nei i lau api talaaga mo le suesueina o tusitusiga paia:
E mafai faapefea ona oo atu le faamaualuga i le faaosoosoga?
I lou lava manatu, o a nisi o auala e mafai ona tatou aloese ai mai lagona o le faamaualuga lea e ono taitai atu ai i tatou i faaosoosoga?
Faitau le Mataupu Faavae ma Feagaiga 23:3-5, ma vaavaai mo mea e tutusa ai faatonuga na tuuina mai e le Alii ia Ailama Samita, Samuelu Samita, ma Iosefa Samita le Matua.
O le valaau e apoapoai atu e faatatau i le tiutetauave e aoao atu le talalelei i isi. Ia matau le ala na faataunuuina taitoatasi ai e Ailama, Samuelu, ma Iosefa Samita le Matua, lenei tiutetauave a o e faitauina le faamatalaga lenei e uiga ia i latou:
O Ailama Samita na fesoasoani i le lolomiga o le Tusi a Mamona e ala i le galue tonu lea i le masini lomitusi. Na papatisoina o ia ia Iuni 1829, a’o lei leva ona toefuatai mai le perisitua. Sa avea o ia ma peresitene o le paranesi muamua a le Ekalesia i Colesville, Niu Ioka. O le lauiloa i lona lotomaualalo ma le faamaoni, sa faamaoni ai Ailama i le Alii ma le Ekalesia i lona soifuaga atoa. Na maliu o ia, o se maturo faatasi ma lona uso o Iosefa i Karefasi, Ilinoi.
O Samuelu Samita, o se uso laitiiti o le Perofeta o Iosefa, sa papatiso ia Me 1829, a’o le’i leva ona toefuatai mai le Perisitua Arona. E masani ona faamamaluina o ia i le avea ma uluai faifeautalai a le Ekalesia. Ia Iuni 1830, sa alu ai o ia i se misiona ma tuuina atu se kopi o le Tusi a Mamona, lea na iu ina taitai atu ai i le liua o Polika Iaga ma le toatele o tagata o lona aiga. Sa faamaoni Samuelu i lona aiga ma le Ekalesia i lona soifuaga atoa.
O Iosefa Samita le Matua, o le tama o le Perofeta, sa auai i le Ekalesia i le aso na faatulagaina ai. O le taumafanafana na sosoo ai, sa la o atu ai ma lona atalii o Don Carlos i se misiona i [lona] aiga lautele i Niu Ioka. Na avea o ia ma se faitaulaga sili ma iu ai ina avea ma uluai peteriaka o le Ekalesia. I lona falelauasiga sa faamatalaina ai o ia o “se tagata faamaoni i lona Atua, ma i le Ekalesia i tulaga uma, ma i lalo o tulaga uma ia na valaauina ai o ia e uia” (Robert B. Thompson, i le History of the Church, 4:192).
O le tagata mulimuli na fetalai i ai le Alii i le Mataupu Faavae ma Feagaiga 23 o Iosefa Knight le Matua. O ia o se uo mamae a Iosefa Samita le Itiiti, ma sa ia faaali atu ia te ia le agalelei tele. Sa ia tuuina mai i le Perofeta ni sapalai, e pei o se pepa ma ni meaai, i le taimi o le faaliliuga o le Tusi a Mamona. I le taimi na maua mai ai le Mataupu Faavae ma Feagaiga 23, sa le’i papatisoina ia Iosefa Knight le Matua. Sa ia lagonaina se manao ina ia papatisoina faatasi ma isi i le aso na faatulagaina ai le Ekalesia, ae sa tolopoina ona sa manao e suesue atili i le Tusi a Mamona. Ae peitai, sa ia tusia mulimuli ane, “Na tatau [ona] lelei atu o’u faalogona pe ana ou alu atu i luma” ina ia papatisoina (tagai i le Larry Porter, “The Joseph Knight Family,” Ensign, Oke. 1978, 40; ua faalaugatasia le sipelaga ma mataitusi tetele).
Suesue i le fautuaga a le Alii ia Iosefa Knight le Matua i le Mataupu Faavae ma Feagaiga 23:6–7, ma vaavaai mo le mea na poloaiina o ia e le Alii e fai. O le fasifuaitau “ave i luga lau satauro” i le anotusi lenei o lona uiga o le faia o se mea e faigata ia te oe.
Tali fesili nei i lau api talaaga mo le suesueina o tusitusiga paia:
Aisea atonu e faatonu ai i tatou e le Alii i nisi o taimi e fai ni mea tatou te le fiafia e fai?
O a ni faamaoniga ua e vaaia i le Mataupu Faavae ma Feagaiga 23:7 e faapea na finagalo le Alii e faamanuia ia Iosefa Knight le Matua?
O se taimi e le’i mamao talu ona maua lenei faaaliga, na filifili ai Iosefa Knight le Matua e papatiso. Sa tumau lona tuuto i le Ekalesia i lona olaga, sa puipuia le Perofeta o Iosefa Samita i tulaga faalilolilo ma tulaga faalauaitele. Sa faamatala mulimuli ane e le Perofeta ia Iosefa Knight le Matua e “faamaoni ma tumau, ma amiotonu ma atoatoa ona lelei, ma amio mama ma agalelei, e le femoumouai i le itu taumatau po o le itu tauagavale” (Aoaoga a Peresitene o le Ekalesia: Iosefa Samita [2007],493).
Mai le Mataupu Faavae ma Feagaiga 23, ua tatou aoao ai a o tatou naunau e auauna atu i le Alii, e mafai ona tatou maua le taitaiga patino mai ia te Ia. Ua tatou iloa foi o le a faamanuia i tatou e le Alii a o tatou mulimuli i le taitaiga ua Ia tuuina mai ia i tatou. Mafaufau loloto i le taitaiga ua e maua mai le Alii e ala i le Agaga Paia, upu a perofeta soifua, ma tusitusiga paia. Fai se fuafuaga e te galue i le taitaiga ua e mauaina.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paiaa: