I le aso 17 o Aokuso, 1835, sa tauaofia ai se faapotopotoga aoao a le Ekalesia i Katelani, Ohaio, e mafaufau i anotusi na fautuaina atu o le lomiga muamua o le Mataupu Faavae ma Feagaiga. Talu ai ona sa asiasi atu le Perofeta o Iosefa Samita i le Au Paia i Michigan, o lea na pulefaamalumalu ai Oliva Kaotui i le faapotopotoga. I le fonotaga, sa autasi ai le palota a le Au Paia ina ia aofia ai se folafolaga sa tusia e Oliva Kaotui e faatatau i talitonuga o le Ekalesia e uiga i le malo ma tulafono.
O leMataupu Faavae ma Feagaiga 134 o loo i ai upu ma fasifuaitau e ono faigata ona malamalama i ai. Atonu e aoga le lisi lenei o faauigaga a o e suesue i le vaega lenei:
Faamalosia (fuaiupu e 2): Saogalemu, o le le soliaina
Taitai faalemalo (fuaiupu e 3, 6): Taitai faalemalo e faatautaia le tulafono
Malo faitele (fuaiupu e 3): O se malo e filifili e tagata ona taitai e fai ma sui mo i latou
Tupu (fuaiupu e 3): O se pule aoao, e pei o se tupu po o se masiofo
Vaai faalemafaufau e faapea o loo auai faatasi lou aiga ma isi aiga e fausia se atunuu fou ma se faigamalo fou. Tali fesili nei i lau api talaaga mo le suesueina o tusitusiga paia:
O le a lou manatu i le faamoemoega o se faigamalo?
A o a nisi o tulafono o le a e faatuina pe afai e avea oe ma taitai o le atunuu fou?
Toe faamanatu le faatomuaga o lenei lesona ma le folasaga o le vaega mo le Mataupu Faavae ma Feagaiga 134. Vaavaai mo le mafuaaga na manatu ai le Au Paia e tatau ona latou lolomia se folafolaga e uiga i malo ma tulafono.
Faitau le Mataupu Faavae ma Feagaiga 134:1, ma vaavaai po o ai na faavaeina le manatu o [le faiga o] malo. E faavae i luga o mea ua e aoaoina mai lenei fuaiupu, faauma le upumoni lenei: O faigamalo ua faavaeina e mo le manuia o .
Mai le fuaiupu 1 ua tatou aoao mai ai foi le upumoni lenei: O taitai o le malo e tali atu i le Atua ina ia galulue “mo le lelei ma le saogalemu o tagata.”
I lau api talaaga mo le suesueina o tusitusiga paia, ia fai mea nei:
Lisi ni nai auala e mafai ona galulue ai taitai o le malo “mo le lelei ma le saogalemu o tagata.”
Faitau le Mataupu Faavae ma Feagaiga 134:2, ma vaavaai mo aia tatau e tolu e tatau ona puipuia e malo. Fai se lisi o nei aia tatau.
Na molimau mai Peresitene Ezra Taft Benson e uiga i le taua o le mea na ia ta‘ua “o aia tatau maoae e tolu a le tagata.” I lana saunoaga lenei, o le fuaitau “Uluai Tama” ua faasino i tamalii o e na faavaeina le malo o le Iunaite Setete o Amerika.
Ata
Peresitene Ezra Taft Benson
“Ua faamautinoa mai e le Tautinoga o le Tutoatasi le talitonuga ma le faalagolago i le Atua o Uluai Tama i upu nei: ‘Matou te taofimau i nei Upumoni e avea ma faamaoniga moni lava, o Tagata uma, na foafoaina tutusa, ma ua faaeeina i latou e lo latou Foafoa i ni Aia Tatau faapitoa e le ma’aveeseina, ma o nei [Aia Tatau] e i ai le Ola, Saolotoga, ma le Sailiga o le Fiafia.’
“Ua fai mai le Mataupu Faavae ma Feagaiga, ‘Matou te talitonu e leai se malo e ola fīlemu, sei vagana ua faatuina ma tausia i ni tulafono e maua ai e tagata taitoatasi le faaaoga saoloto o lona mafaufau, le aia e maua ma pulea ai ana mea totino, ma le puipuiga o le ola’ (MF&F 134:2). O le ola, saolotoga, ma meatotino—o aia silisili ia a tagata“ (“O La Tatou Tulafono Faavae Paia,” Ensign, Nov. 1987, 4).
I lau api talaaga mo le suesueina o tusitusiga paia, tusi ai ni nai faataitaiga o ni auala e mafai ai e le malo ona puipuia aia tatau o loo lisiina i le Mataupu Faavae ma Feagaiga 134:2. Ona faitau lea o le Mataupu Faavae ma Feagaiga 134:3, ma vaavaai mo se mea e mafai ona fai e tagatanuu o nisi o atunuu ina ia mautinoa o le a faamalosia e o latou taitai faalemalo le tulafono.
Vaai faalemafaufau o loo e ola i se nofoaga e matele lava ina puipui e le malo aia tatau a ona tagatanuu, ae lata mai nei na faia ai se tulafono e te tetee i ai. O le fea o mea nei o se auala talafeagai lea e tali atu ai? (Lio le tasi.)
Faatuiese e ala i le filifili e le usitaia soo se tulafono a le malo.
Faamata‘u po o le faamanualia o taitai o le malo o e sa faatuina le tulafono ua e tetee i ai.
Faapotopoto mai isi e faatoilalo le malo.
Faaali atu i le auala faatulafonoina ou manatu ma popolega, ae ia lagolago ma faamalosia le malo e ala i le usitai i tulafono.
O le tasi o mataupu faavae o loo aoao mai i lenei fuaiupu o le, e tatau ona tatou lagolagoina ma faamalosia le malo i mea o loo tatou aumau ai.
O le fea le mataupu faavae o le faatuatua e faamanatu atu e lenei mataupu faavae ia te oe? (Vaai i le Mataupu Faavae o le Faatuatua i le Penina Tau Tele e siaki ai lau tali.)
Tali le fesili lenei i lau api talaaga mo le suesueina o tusitusiga paia: Aisea e te manatu e taua ai mo tagatanuu ona lagolago ma faamalosia le malo?
E tusa ai ma le Mataupu Faavae ma Feagaiga 134:6, E finagalo le Atua ina ia tatou faaaloalo ma usitai i tulafono faalelagi ma tulafono a tagata. O le a le mea e te manatu e tatau ona tatou faia, pe afai e feteenai se tulafono o le laueleele ma o tatou talitonuga?
A’o e mafaufau i lenei fesili, faitau le faamatalaga lenei mai ia Elder James E. Talmage o le Korama a Aposetolo e Toasefululua:
Ata
Elder James E. Talmage
“I se tulaga o se feteenaiga i le va o mea e manaomia na faia e ala i le afioga faaalia a le Atua, ma mea na na tuuina faamalosi mai e le tulafono faaletino, o le fea o nei pule e tatau ona noatia tagata o le Ekalesia e usitai i ai? O le tali, e mafai ona faaaoga i ai le afioga a Keriso—o le tiute o le tagata le avatu ia Kaisara o mea a Kaisara, ae avatu i le Atua mea a le Atua [tagai i le Luka 20:21-25] …
“O le faatalitali i le teena e le [Atua] ina ia lagolago i le saolotoga faalelotu, o le tiute o le au paia le gauai atu o i latou lava i tulafono o o latou atunuu. E ui i lea, e tatau ona latou faaaogaina uma metotia sa‘o, i le avea ai ma tagatanuu po o mataupu a nisi o o latou malo, ina ia faamautuina ai mo i latou lava ma mo tagata uma le faamanuiaga o le saoloto i auaunaga faalelotu. E le manaomia ona latou mafatia e aunoa ma le tetee atu [i le] tuuina mai faamalosi e faaoosala, pe e ala i le faagaoioia o tulafono amioletonu; ae o o latou tetee e tatau ona ofoina atu i se tulaga faatulafonoina ma talafeagai. Ua tele ina faaalia e le Au Paia lo latou taliaina o le aoaoga faavae e faapea, e sili atu le mafatia i le leaga nai lo le faia o se mea sese e ala i le tetee atoa o tagata i pulega le sa’o” (The Articles of Faith, lona 12 ed. [1924], 422–23).
Mafaufau i ni tagata e te iloa o e e lagolago ma puipuia o latou malo ma le tulafono. I lau api talaaga mo le suesueina o tusitusiga paia, tusi ai e uiga i se toatasi pe toalua o i latou na. O a ni mea na e vaaia o latou faia e lagolago ai ma puipuia ai le malo ma le tulafono?
I le Mataupu Faavae ma Feagaiga 134:8, tatou te faitau ai ua i ai i faigamalo se tiutetauave e faasala ai i latou o e faia ni soligatulafono, ma ua i ai i tagatanuu se tiutetauave e fesoasoani ai “i le aumaia i le faasalaga e ua solitulafono e faasaga i tulafono lelei.”
Tusi se parakalafa puupuu i lau api talaaga mo le suesueina o tusitusiga paia, e faamatala ai le mea o le a e faia e lagolago ai ma puipuia ai lo outou malo ma ona tulafono.
Ua faamatalaina mai le sootaga i le va o tapuaiga ma le malo
Ata
Peresitene Monson ma Peresitene Reagan
O Peresitene Thomas S. Monson ma le sa avea ma Peresitene o le Iunaite Setete i lena vaitaimi o Peresitene Ronald Reagan
I le Mataupu Faavae ma Feagaiga 134:7, 9-10, 12, tatou te faitau ai e tatau i malo ona faatuina ni tulafono e puipuia ai le tausia o tulaga i tapuaiga, ae e le tatau ona faapitoa se tapuaiga e fiafia i ai nai lo o isi. Tatou te faitau ai foi, ua i ai i faalapotopotoga faalelotu se aia tatau e faasala ai o latou tagata auai e le amio pulea e ala i le tape o o latou igoa po o le aveese o a latou fegalegaleaiga ma i latou, ae e le i ai i na faalapotopotoga le pule e faia ai ni faamasinoga pe tuuina atu ai ni faasalaga e ave ai meatotino a o latou tagata auai pe faamanualia i latou faaletino.
Ua faamalamalama mai le aia tatau e talosaga mo se fesoasoani mai le malo
E tusa ai ma le Mataupu Faavae ma Feagaiga 134:11, e tatau ona faatagaina tagatanuu e talosaga atu i o latou malo mo le fesoasoani pe afai sa sese ona taulimaina i latou. O lenei fuaiupu o loo aofia ai foi se folafolaga e faapea, e tauamiotonuina tagatanuu i le puipuia o i latou lava ma isi pe afai e i ai se manaomia faavavave ae ua le mafai ona fesoasoani atu i ai le malo.
Mafaufau e uiga i se mea e te talisapaia ai lou atunuu po o le nuu.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia: