Ina ua uma ona maua e Iosefa Samita le Uluai Faaaliga i le 1820, sa ia faamatalaina atu lona aafiaga i se failotu o le sa teenaina lana molimau. O isi i le lotoifale sa latou le toe amanaiaina ma sauaina le taulealea o Iosefa. O tamalii sa maoae o tulaga faaagafesootai sa latou faia mea uma e faitioina faalauaitele ai o ia. E ui lava i nei mea faafeagai, sa tumau faamaoni pea Iosefa Samita i lana molimau.
Sa faasoa mai e Peresitene Gordon B. Hinckley sona aafiaga a’o avea ma se faifeautalai talavou na auauna atu i Lonetona, Egelani. A o e faitauina lana tala, mafaufau loloto i se mea e te faia pe ana faapea sa e i ai i le tulaga o lenei alii talavou.
Ata
Peresitene Gordon B. Hinckley
“[Na sau se alii talavou] i lo ma potu mautotogi e ui lava i le timuga o le po. Na tuitui mai o ia i le faitotoa, ma sa ou valaauliaina o ia i totonu.
“Sa ia fai mai, ‘e tatau ona ou talanoa i se tasi. Ua tuua na o a’u. …’
“Ma sa ou fai atu, ‘O le a lou faafitauli?’
“Ma sa ia fai mai, ‘Ina ua ou auai i le Ekalesia i le toeitiiti atoa ai o se tausaga talu ai, sa fai mai lo’u tama ou te aluese ma lona fale ma aua ne’i o’u toe foi atu. Ma ou te lei toe foi atu lava.’
“Sa ia faaauau, ‘O ni nai masina mulimuli ane, na aveese ai a’u mai le lisi o le kalapu kirikiti lea sa ou auai ai, ma faasa a’u ona ou toe auai faatasi atu i isi tama o e sa matou tutupu a’e faatasi ma i latou o e sa ou latalata ma faauo i ai.’
“Ona ia fai mai lea, ‘O le masina ua te’a, na tuli ai a’u e lo’u pule ona ua avea a’u ma se tagata o lenei ekalesia, ma ua le mafai ona toe maua se isi a’u galuega. …
“’Ma o ana po na fai mai ai le teine sa ma feoai mo le tausaga ma le afa, o le a le faaipoipo ia te a’u ona o a’u o se Mamona’” (“The Loneliness of Leadership” [Nov. 4, 1969], 3, speeches.byu.edu).
Pe na i ai se taimi na e lagonaina ai le leaga o le faiga o oe, pe faitioina oe ona o ou talitonuga faalelotu? O a ni ou lagona i lena taimi?
Ata
O Le Uluai Faaaliga
E ui lava sa matuai faamanuiaina Iosefa Samita ona sa tumau faamaoni i lana molimau i le Uluai Faaaliga, ae sa matuai tofotofoina foi o ia. A o e suesue i le taimi nei, mafaufau i mea e mafai ona e aoao mai i le auala na tali atu ai Iosefa Samita i tetee i lana molimau, e mafai ona fesoasoani ia te oe i le tetee e ono feagai ma oe i le taimi nei po o se aso i le lumanai.
I le Iosefa Samita — Talafaasolopito, na faamatalaina ai e le Perofeta nisi o tetee na feagai ma ia ona o lana molimau. Faitau le Iosefa Samita—Talafaasolopito 1:21–23, ma vaavaai mo upu ma fasifuaitau o loo fesoasoani e te malamalama ai i le mea na tupu ia te ia. E tusa ai ma le fuaiupu 22, o ai sa matele ina aafia i le sauaina o Iosefa Samita? A o e mafaufau i tausaga o le matua ma tulaga o le olaga a Iosefa Samita, aisea e te manatu ai o sauaga mai nei tagata atonu na sili ona faigata ia te ia?
Matau le fasifuaitau i talane o le faaiuga o le Iosefa Samita—Talafaasolopito 1:20 lea e amata i upu “Sa foliga mai e peiseai. …” E amata atu i upu nei, ia faitau le toega o le fuaiupu, ma vaavaai mo le pogai na oo ai sauaga ia Iosefa Samita. E tusa ai ma le faamatalaga a Iosefa, aisea na ia oo ai i sauaga tetele a’o talavou lava?
E ui lava ina sa itagia ma sauaina Iosefa Samita, ae sa tumau faamaoni lava o ia i lana molimau
Mafaufau i le tele o tala eseese o le faatuatua ma molimau i tusitusiga paia. E i ai se isi tagata i tusitusiga paia o ona uiga po o le malosi o le molimau e te matuai faamemelo i ai?
Faitau le Iosefa Samita—Talafaasolopito 1:24, ma faailoa mai se tagata i totonu o tusitusiga paia na faamemelo ma ta’ua ai Iosefa Samita ona o sauaga na feagai ma ia. Tali fesili nei i lau api talaaga mo le suesueina o tusitusiga paia:
O a ni auala e te manatu atonu na aoga ai ia Iosefa Samita ona iloa mea na la tutusa ai ma le Aposetolo o Paulo?
O le a se lesona e mafai ona tatou aoao mai e uiga i le ala e taulima ai luitau faigata, mai le faataitaiga a Iosefa Samita o le suesue ma mafaufau loloto i aafiaga a Paulo?
O se lesona e tasi e mafai ona tatou aoaoina o le i taimi faigata e mafai ona tatou maua le malosi mai faataitaiga a tagata faamaoni o loo i tusitusiga paia. Atonu e te manao e tusi lenei mataupu faavae i le autafa o au tusitusiga paia i talane o le Iosefa Samita—Talafaasolopito 1:24.)
I lau api talaaga mo le suesueina o tusitusiga paia, tusi e uiga i se taimi na faamalosia ai oe e ala i le suesue i le aafiaga o se tagata faamaoni i totonu o tusitusiga paia.
I lau suesuega o le Mataupu Faavae ma Feagaiga i le tausaga lenei, o le a e tau ai i le tele o tagata e mafai ona e faailoa mai ma o a latou faataitaiga e mafai ona e maua mai ai le malosi e te manaomia.
Mafaufau loloto i le fasifuaitau lenei mai le molimau a le Perofeta i le Iosefa Samita—Talafaasolopito 1:25: “Sa ou vaai i se faaaliga vaaia; sa ou mautinoa lena mea, sa ou mautinoa sa silafia e le Atua lena mea, ma e le mafai ona ou faafitia lena mea.”
Tali le fesili e tasi po o fesili uma e lua nei, i lau api talaaga mo le suesueina o tusitusiga paia:
O le a se mea ua aoao mai e le fasifuaitau Iosefa Samita—Talafaasolopito 1:25 ia te oe i le molimau a Iosefa Samita e uiga i le Uluai Faaaliga?
E mafai faapefea ona e faamalosia lau molimau e uiga i le Uluai Faaaliga?
Toe faamanatu le Iosefa Samita—Talafaasolopito 1:24, ona suesue lea o le fuaiupu 25, e vaavaai mo ni aoaoga faavae ma ni mataupu faavae faaopoopo, e mafai ona fesoasoani ia te oe pe a e feagai ma ni mea faafeagai po o le lagonaina o le faaosoosoina e faavaivai i lau molimau. Tusi nei upumoni faaopoopo e te maua i lau api talaaga mo le suesueina o tusitusiga paia.
Filifili se upumoni se tasi na e faailoaina mai le Iosefa Samita—Talafaasolopito 1:24-25. I lau api talaaga mo le suesueina o tusitusiga paia, tali fesili nei e faavae i le upumoni ua e filifilia.
Na faapefea ona faaalia e le Perofeta o Iosefa Samita lenei upu moni i lona olaga?
E mafai faapefea ona fesoasoani lenei upumoni ia te oe?
E faapefea ona aafia au filifiliga i le ola ai i lenei upumoni, po o le, pe na aafia faapefea lou olaga ona o lou ola ai i lenei upumoni?
O nisi o aoaoga faavae ma mataupu faavae faaopoopo atonu ua e faailoaina i le Iosefa Samita—Talafaasolopito 1:24-25 o: O le malamalama tatou te maua mai le Atua e moni e tusa lava pe teena e le lalolagi. E tatau ona sili atu ona tatou popole i le mafaufau o le Atua e uiga ia i tatou nai lo o manatu o tagata. E tusa lava pe itagia ma sauaina i tatou ona o a tatou molimau, e tatau ona tatou tumau faamaoni ai.
Mafaufau i tua i le tala na faamatalaina e Peresitene Hinckley e uiga i le alii talavou i Lonetona, Egelani, o le na feagai ma mea faafeagai e tele ona o ona talitonuga faalelotu. Sa faaauau pea e Peresitene Hinckley lana tala:
Ata
Peresitene Gordon B. Hinckley
‘‘Sa ou fai atu, ’Afai la ua tele naua mea ua aveesea mai ia te oe, aisea la e te le tuua ai le Ekalesia ae toe foi atu i le fale o lou tama, ma lau kalapu kirikiti, ma le galuega ua taua tele ia te oe ma le teine lea ua e manatu ua e alofa i ai?’
“Sa leai sana upu na fai mai mo se taimi na foliga mai o se taimi umi lava. Ona, ifo ane lea o lona ulu i ona lima, ma tagi masusu ai lea. Mulimuli ane, sa ia tepa ae i luga ma ona loimata ma fai mai, ‘e le mafai ona ou faia lena mea. Ua ou iloa e moni lenei mea, ma afai lava e aveesea ai ma lo’u ola, e le mafai lava ona ou faafitiaina.’
“Sa ia tago ma uu mai lona pulou susu ma savali atu i le faitotoa ma alu atu i fafo i le timu, na o ia, gatete ma le fefe, ae sa mausali [lana faaiuga]. A o ou tilotilo atu ia te ia, sa ou mafaufau i le tuua toatasi o le mafaufau, i le tuua toatasi o le molimau, i le tuua toatasi o le faatuatua, ma le malosi ma le mafanafana o le Agaga o le Atua” (“The Loneliness of Leadership,” 3–4).
Filifili se upumoni se tasi na e lisiina, ma faatu se sini e faaaoga lena upumoni i lou olaga. (Atonu e te manao e tusi lenei sini i lau api talaaga mo le suesueina o tusitusiga paia.)
O le faaiuga, faitau le Iosefa Samita—Talafaasolopito 1:26, ma vaavaai mo le mataupu faavae lenei na faaalia e Iosefa Samita: O le faatinoina o mataupu faavae na aoaoina i tusitusiga paia, e mafai ona tatou maua ai se molimau i lo latou moni. A o e faatinoina le aoaoga faavae po o le mataupu faavae sa e tusia e uiga i ai, o le a faamalosia ai lau molimau ma o le a mafai ai ona e manumalo i mea faafeagai po o luitau e ono fetaiai ma oe.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia: