O le faatulagaina o le Ekalesia i le aso 6 o Aperila, 1830, na tuuina mai ai auala mo sauniga o le perisitua ina ia tuuina atu i fanau a le Tama Faalelagi i le lalolagi atoa i aso e gata ai. Na muamua atu i le faatulagaga o le Ekalesia, na amata faaali mai ai e le Alii ia tiute o tofi i le perisitua, i le Perofeta o Iosefa Samita i le amataga o le taumafanafana o le 1829. O le Mataupu Faavae ma Feagaiga 20 ua faatulaga mai ai le tele o nei tiute ma faatonuina ai e umia le perisitua i le faatinoina o sauniga ma leoleoina ma auauna atu i tagata o le Ekalesia.
E faapefea ona e tali atu pe a fesili mai se tagata, “O ai le faifeau o la outou ekalesia?” A o e suesueina le Mataupu Faavae ma Feagaiga 20:38–67, mafaufau pe o le a faapefea ona e tali i lenei fesili.
Kopi ia faalagiga ma mau nei i lau api talaaga mo le suesueina o tusitusiga paia. Ona faitau lea o mau nei, ma lisi ia tiute o tofi o le perisitua i lalo o ulutala talafeagai i lau api o talaaga. E fesoasoani ia te oe le iloa o le faaupuga “toeaina” i fuaiupu nei e faatatau ia i latou uma o e umia le Perisitua Mekisateko.
A uma ona e tusia ia tiute i lalo o ulutala talafeagai, vasevase ia eseesega e te matauina i tiute o se toeaina, se ositaulaga, se aoao, ma se tiakono. Li’o ia mea e tutusa ai.
O lea la ua e suesueina sina mea itiiti e uiga i tiute o le perisitua, i le siata o loo i lalo, tusi ni laina mai le tofi o le perisitua agai i tiute a i latou na ua umia le perisitua ma ua i ai le pule e faataunuu ai:
Toeaina
Pule e faaee atu ai le meaalofa o le Agaga Paia
Ositaulaga
Pule e faatautaia ai (faamanuia) le faamanatuga
Aoao
Pule e faauuina ai se tiakono
Tiakono
Pule e aoao atu ai
O tali i lenei gaoioiga faafetaui o loo maua i le faaiuga o le lesona lenei. Ia manatua o tofi maualuluga atu o le perisitua e aofia ai tiute ma le pule o tofi maualalalo.
I lau api talaaga mo le suesueina o tusitusiga paia, tusi ai se mataupu faavae e otooto ai le tiutetauave o e uma e umia le perisitua.
Faatusatusa lau mataupu faavae i le mataupu faavae lenei: O i latou uma e umia le perisitua ua i ai le tiutetauave e faatautaia ai sauniga ma ia puipui i tagata o le Ekalesia ma auauna atu ia te i latou. Atonu e te manao e tusi lenei upumoni i le laina o au tusitusiga paia i autafa o le Mataupu Faavae ma Feagaiga 20:38–59.
Ata
tapenaina o le faamanatuga
Ina ia fesoasoani ia e malamalama atili e uiga i le tiutetauave o le au perisitua uma e leoleo ma auauna atu i tagata o le Ekalesia, faitau le Mataupu Faavae ma Feagaiga 20:53–54, 59, ma faailoa mai auala na faatonuina e le Alii le au perisitua e auauna atu ai ma faamalolosia ai tagata o le Ekalesia. Atonu e te manao e faailoga mea e te maua. O a nai nisi o auala e mafai ai e se tasi e umia le Perisitua Arona ona “leoleo i luga o le ekalesia … ma faatasi ma faamalosi i latou”?
O tiute o e umia le Perisitua Arona e sili atu nai lo le faatinoina o sauniga. Mafaufau loloto i vaaiga nei, ma mafaufau i auala o loo faia ai e e umia le perisitua o latou tiute o le valaaulia o isi e o mai ia Keriso, ma auala latou te le o faia ai:
Ina ua uma ona fesoasoani se tasi e umia le Perisitua Arona i le faamanuia ma le tufatufaina atu o le faamanatuga i le sauniga faamanatuga, sa alu atu o ia i le Aoga Sa ma faaali atu ni uiga le mafaufau i le faiaoga ma isi tagata o le vasega.
Sa foi mai se tasi o talavou e umia le perisitua mai le asiasiga o faiaoga o aiga ma amata faasoa atu ni faamatalaga maaleale pe patino e uiga ia i latou sa ia aoaoina.
Ua feiloai se vaega o e umia le perisiua mo se galuega fesoasoani ma amata ona taufaalilili ma taufaifai i se uso o le korama.
Tali le fesili lenei i lau api talaaga mo le suesueina o tusitusiga paia: Aisea e taua ai i e umia le perisitua ona iloa o o latou tiute e sili atu mea e aofia ai nai lo na o le faatinoina o sauniga?
Ata
Richard G. Scott
Atonu e te manao e tusi le faamatalaga lenei mai ia Elder Richard G. Scott o le Korama a Aposetolo e Toasefululua i le laina i autafa o au tusitusiga paia po o lau api talaaga mo le suesueina o tusitusiga paia: “O le faamoemoega o le pule o le perisitua o le tuuina atu, ia auauna atu, ia siitia, ia musuia” (“Faamamalu le Perisitua ma Ia Faaaoga Lelei,” Ensign po o le Liahona, Nov. 2008, 46).
Mafaufau i se taimi na e vaai ai i alii talavou i lau uarota po o le paranesi o faamamaluina o latou perisitua e ala i le leoleoina, auauna atu, siitia, musuia, po o le faamalosia o isi. Afai o oe o se tasi e umia le perisitua, ia mafaufau e tusi se sini o le a fesoasoani ia te oe e faatinoina ai ma le faamaoni sauniga ma vaavaaia ma faamalosia le Ekalesia.
Na i ai sou aafiaga pe na e vaai i se faauuga i le perisitua? Mafaufau e uiga i lagona sa ia te oe a’o faauuina oe po o le molimauina o se isi tagata na faauuina.
Ata
Faauuga i le Perisitua Arona
Faitau le Mataupu Faavae ma Feagaiga 20:60, ma faailoa mai le mana e tatau i le tagata e faia le faauuga ona faaaoga e faaopoopo atu i le perisitua. I le fuaiupu lenei, o le a le mana e tatau ona faatonutonuina se tagata e umia le perisitua a o ia faaaogaina le perisitua?
E faapefea ona mautinoa e se tasi e umia le perisitua o ona faia ona tiute i lenei mana? Na faamalamalama mai e Peresitene Boyd K. Packer o le Korama a Aposetolo e Toasefululua, le mea e sau mai ai le mana o se e umia le perisitua:
Ata
Peresitene Boyd K. Packer
“O lou pule e maua mai e ala i lou faauuina; o lou mana e sau mai le usiusitai ma le agavaa.
“O le mana i le perisitua e sau mai le faia o lou tiute i mea e masani ai: auai i fonotaga, talia o tofiga, faitau o tusitusiga paia, ma le tausia o le Upu o le Poto.
“Na saunoa mai Peresitene Uitilafi: ‘Sa ou malaga i le faitau afe o maila ma talai atu le Talalelei o se Ositaulaga, ma, e pei ona ou fai atu i faapotopotoga i aso la, na lagolagoina a’u e le Alii ma faaali mai Lona mana i le puipuiga o lo’u olaga o le tele lava a’o ou umia lena tofi e pei ona sa Ia faia, a’o ou umia le tofi o se Aposetolo. E lagolago e le Alii soo se tagata e umia se vaega o le Perisitua, pe o ia o se Ositaulaga, se Toeaina, se Fitugafulu, po o se Aposetolo, afai na te faalauteleina lona valaauga ma fai lona tiute‘“ (“The Unseen Power,” New Era, May 2007, 7; tagai foi i le “The Aaronic Priesthood,” Ensign, Nov. 1981, 32–33).
Afai o oe o se alii talavou, ia mafaufau ma le agaga tatalo po o le a le mea o loo finagalo le Alii e te faia, e valaaulia ai le mana o le Agaga Paia e faatasi ma oe a o faatinoina ou tiute o le perisitua o loo i ai nei ma le lumanai. Afai o oe o se tamaitai talavou, ia mafaufau pe faapefea ona e fesoasoani i alii talavou i a latou taumafaiga ina ia maua le Agaga i o latou olaga ma le latou auaunaga faaleperisitua.
Faitau le Mataupu Faavae ma Feagaiga 20:65. Mai mea ua e aoaoina i lenei fuaiupu, aisea tatou te siilima ai i le Ekalesia e faaali atu ai se palota lagolago? O le poloaiga mo le Ekalesia ina ia ofoina atu faalauaitele se palota na sau mai le Alii.
O le a le uiga o le siilima ma faaali atu se palota lagolago mo se isi? Na faamalamalama mai e Elder Loren C. Dunn, o se tasi o le Au Fitugafulu, ia tiutetauave e o faatasi ma le faagasologa o le lagolagoina:
Ata
Elder Loren C. Dunn
“Pe a tatou lagolagoina taitai, ua tuuina mai ia i tatou le avanoa e lagolagoina ai i latou o e ua uma ona valaauina e le Alii e ala i faaaliga. …
“Ona tuu mai lea e le Alii ia i tatou le avanoa e lagolago ai le faatinoga o se valaauga paia ma faapea ona faaali atu ai o tatou lagona pe afai e i ai soo se mafuaaga tatou te manatu ai i se isi itu.
“O le lagolago o le noatia lea o i tatou lava i le faatinoga ma ia tautino atu i tatou lava e lagolago na tagata o e ua tatou lagolagoina. Pe a faia e se tagata le faatinoga paia o le sii o lona lima i le sikuea, e tatau ona ia manatua, ma le faamaoni a’ia’i, le mea na ia faia ma ia amata ona ogatasi ma lana palota lagolago i tulaga faitele ma tulaga e le faalauaiteleina” (“We Are Called of God,” Ensign, July 1972, 43).
Pe ua e i ai i se sauniga faamanatuga na lagolagoina ai e le faalapotopotoga se alii talavou ina ia faauuina i se tofi i le Perisitua Arona? Pe na siilima le faapotopotoga? E mafai faapefea e le aafiaga o se alii talavou le vaaia o lagolagoina e isi lona faauuga, ona fesoasoani ia te ia i le faataunuuina o ona tiutetauave?
Ata
lagolagoina i le sauniga faamanatuga
I lau api talaaga mo le suesueina o tusitusiga paia, tusi ni nai fuaiupu e faamatala ai pe aisea e te faafetai ai mo le pule o le perisitua. Faasoa atu mea ua e tusia i se tasi o ou matua po o ni taitai o le Ekalesia, sou tei, po o se uo. Fai atu i lena tagata e faasoa mai ia te oe ona lagona e faatatau i le uiga o le perisitua.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia: