I le faaaliga o loo faamaumauina i le Mataupu Faavae ma Feagaiga 30, na tuuina mai ai e le Alii faatonuga ia Tavita Uitimera, Pita Uitimera le Itiiti, ma Ioane Uitimera. Na maua e Thomas B. Marsh se valaauga e talai atu, e pei ona tusia i le Mataupu Faavae ma Feagaiga 31. I le faaaliga na faamaumauina i le Mataupu Faavae ma Feagaiga 32, na valaauina ai e le Alii ia Parley P. Pratt ma Ziba Peterson e auai i se misiona i sa Lamana. A o e suesue i nei vaega, ia matau fautuaga ma le folafolaga na tuuina mai e le Alii i nei faifeautalai.
Ua valaauina e le Alii ia Tavita Uitimera, Pita Uitimera le Itiiti, ma Ioane Uitimera e talai atu le talalelei
Vaai faalemafaufau pe o le a faapei le maua o se valaau e auauna atu i le Alii o se faifeautalai faamisiona. Tusi nisi o lagona e te manatu e te ono lagonaina i le mauaina o se valaauga faapena:
Na valaauina e le Alii le toatolu o le auuso tama Uitimera, o Tavita, Pita le Itiiti, ma Ioane e talai atu le talalelei ma tuuina mai ni fautuaga na patino ia i latou taitoatasi.
Faitau fuaiupu mai le Mataupu Faavae ma Feagaiga 30 o loo i le koluma muamua o le siata lenei, ona sue lea o se mataupu faavae i le koluma lona lua o loo aoao mai ai na fuaiupu. Tusi le mataitusi o le faamatalaga i luga o le laina e sosoo ma le mau. O tali sa’o o loo lisi atu i le faaiuga o le lesona lenei.
E tatau ona tatou auauna atu i le Alii ma o tatou loto atoa aua o le a faatasi o Ia ma i tatou.
Nai lo le fefe i tagata, e tatau ona tatou faalagolago i le Alii mo le malosi.
E tatau ona tatou lagolagoina ma fesoasoani ia i latou ua valaauina e le Alii e taitaia Lana galuega.
Filifili se tasi o mataupu faavae o loo matamata tetele i le siata na muamua atu. I lau api talaaga mo le suesueina o tusitusiga paia, tusi e uiga i se tulaga e ono tupu ia te oe, lea o le a faapitoa ona fesoasoani ai lenei mataupu faavae.
Ua valaauina e le Alii ia Thomas B. Marsh e talai atu le talalelei ma fesoasoani i le faatuina o le Ekalesia
Mafaufau i lou aiga ma ou lagona o loo i ai mo i latou. O i ai se tasi i lou aiga e le o se tagata o le Ekalesia, pe e le o tausia ana feagaiga ma le Alii? Afai o lea, o a ou faamoemoega mo lenei tagata? I le Mataupu Faavae ma Feagaiga 31 tatou te faitau ai i se faaaliga na fitoitonu i se tagata faatoa liliu mai, o Thomas B. Marsh. O se vaega o lea [faaaliga] sa faatatau i lona aiga. Sa faaipoipo Thomas ma i ai sana fanau laiti e toatolu i le taimi na tuuina mai ai lenei faaaliga. Faitau le Mataupu Faavae ma Feagaiga 31:1–2, ma vaavaai mo folafolaga na tuuina mai e le Alii ia Thomas e faatatau i lona aiga.
Tatou te aoao mai i nei fuaiupu, o tatou faamaoni, e mafai ai ona faamanuiaina tagata o o tatou aiga ia talitonu ma iloa le upumoni. Mafaufau pe faapefea ona fesoasoani lenei mataupu faavae ia te oe pe afai o i ai ni tagata o lou aiga e le o ni tagata o le Ekalesia, pe e le o tausia a latou feagaiga.
I lau api talaaga mo le suesueina o tusitusiga paia, tali ai fesili nei:
O a ni auala e mafai ona faamanuiaina ai tagata taitasi e ala i le faamaoni o tagata o o latou aiga?
Atonu sa le faigofie ia Thomas ona tuua lona aiga ae talai atu le talalelei, e pei lava foi ona le faigofie i faifeautalai i aso nei. Faitau le faamatalaga lenei, ma faailoga le folafolaga na faia e Peresitene Gordon B. Hinckley ia i latou e auauna atu i le Alii o ni faifeautalai: “O le a e faamanuiaina olaga o i latou e te aoaoina, faapea ma a latou fanau e mulimuli mai. O le a e faamanuiaina ai lou lava olaga. O le a e faamanuiaina ai olaga o lou aiga, o e o le a lagolagoina oe, ma tatalo mo oe” (“Of Missions, Temples, and Stewardship,” Ensign, Nov. 1995, 52).
Faitau le Mataupu Faavae ma Feagaiga 31:5-8, ma faailoa mai faamanuiaga o le a oo mai ia i latou o le a aoaoina e Thomas B. Marsh a o avea ma se faifeautalai. Ia vaavaai foi mo faamanuiaga o le a oo mai ia Thomas ma lona aiga. Atonu e te manao e faailoga mea e te maua.
Ua tuuina mai e Iesu Keriso ia fautuaga patino ia Thomas B. Marsh
I le Mataupu Faavae ma Feagaiga 31:9–13, na tuuina mai ai e le Alii ia fautuaga e fesoasoani ai ia Thomas B. Marsh i lana misiona, ma i lona lava olaga.
I lau api talaaga mo le suesueina o tusitusiga paia, faailoa mai se fautuaga se tasi na tuuina mai e le Alii ia Thomas B. Marsh, e te lagona e taua ona e mulimuli ai i lou olaga, ona tali lea o le fesili lenei: Aisea e te manatu ai ua taua lenei fautuaga mo oe, ma e faapefea ona e manuia ai mai le mulimuli i ai?
Toe faitau le Mataupu Faavae ma Feagaiga 31:13, ma faailoa mai le folafolaga na tuuina mai ia Thomas B. Marsh, pe afai o le a faamaoni i le usitaia o le fautuaga na tuuina mai e le Alii ia te ia.
I le faaaogaina o upu afai ma le ona, tusi le folafolaga i le faiga o se faamatalaga o le mataupu faavae.
Afai , o le a .
Tusi ni koluma se lua i lau api talaaga mo le suesueina o tusitusiga paia. Faaigoa le tasi koluma Mausa Amiotonu ae o le isi koluma Filifiliga Amiotonu. Lisi ni faiga masani ua e faaaogaina pe e tatau ona e faaaogaina, ma ni filifiliga ua e faia pe tatau ona e faia i le taimi nei ma i le lumanai, o le a faapea ona fesoasoani e te “faamaoni [ai] e oo i le iuga” (MF&F 31:13).
Ua valaauina e le Alii ia Parley P. Pratt ma Ziba Peterson e auai i le misiona i sa Lamana
O faaaliga ua e suesueina i le Mataupu Faavae ma Feagaiga 30–31 ma na o le a e suesueina i le Mataupu Faavae ma Feagaiga 32–34, ua faatatau i valaauga faamisiona, galuega faafaifeautalai, ma sauniuniga e aoao atu le talalelei toefuataiina a Iesu Keriso. Ia Oketopa 2012, na fofogaina mai ai e Peresitene Thomas S. Monson se suiga i tausaga o le galuega faafaifeautalai e faavae i luga o le usiusitai, faamaoni, ma le faatagata matua o le tupulaga faia‘e:
Ata
Peresitene Thomas S. Monson
Ou te fiafia e faasilasila atu ua amata nei lava, o alii talavou uma e agavaa ma gafatia, o e ua faauu mai aoga maualuga pe o isi aoga e tutusa ma le maualuga lena, tusa lava po o fea e nonofo ai, o le a maua le avanoa lena e fautuaina atu ai mo le galuega faafaifeautalai e amata i le 18 tausaga, ae le o le 19. Ou te le o faapea atu o alii talavou uma o le a—pe ua tatau—ona auauna atu i le vave lena. Ae, e faalagolago lava i tulaga o tagata taitoatasi, faapea foi ona faalagolago i le naunautaiga o taitai perisitua, ae ua i ai nei le avanoa lena.
A o matou manatunatu loloto ma le agaga tatalo i le matutua o alii talavou e mafai ai ona amata le galuega faafaifeautalai, sa matou mafaufau foi i le matutua e mafai ai ona auauna atu se tamaitai talavou. O le asō, ua ou fiafia e faasilasila atu, o tamaitai talavou e gafatia, ma agavaa ma ua i ai le manao e faamisiona, e mafai ona fautuaina atu mo le galuega faafaifeautalai e amata i le 19 tausaga, nai lo le 21.
“Matou te faamautu atu o le galuega faafaifeautalai o se tiute faaleperisitua—ma e matou te uunaia alii talavou uma o e ua agavaa ma gafatia i le tino ma le mafaufau, ina ia tali atu i le valaau e auauna atu. E toatele tamaitai talavou o loo auauna atu foi, ae e le o noatia i latou i lalo o le poloaiga lea e tasi e auauna atu e pei o alii talavou. Peitai, matou te faamautinoa atu o tuafafine talavou o le Ekalesia, ua latou faia se saofaga taua i le avea ai o ni faifeautalai, ma e matou te taliaina foi la latou auaunaga” (“Susu Mai Ia ma Maliu Mai i le Konafesi,” Ensign po o le Liahona, Nov. 2012, 4–5).
A o faaauau ona e suesue i nei faaaliga e uiga i le galuega faafaifeautalai, mafaufau e uiga i mea e tutusa ai ma eseesega i sauniuniga ma galuega a uluai faifeautalai ma faifeautalai o aso nei i le lalolagi atoa.
Su’e Feiete, Niu Ioka, ma Initipene, Misuri, i luga o le faafanua o loo auina atu faatasi ai (tagai foi i le talafaasolopito o le Ekalesia faafanua 6, “O le Solo Atu i Sisifo o le Ekalesia,” i au tusitusiga paia po o le LDS.org). E te manatu o le a le vavamamao o nei nofoaga mai le tasi i le isi?
Sa valaauina e le Alii ia Oliva Kaotui ma Pita Uitimera le Itiiti, e malaga mai Niu Ioka e agai atu i Misuri e talai atu le talalelei i sa Lamana i le tuaoi i sisifo o Misuri (tagai i le MF&F 28:8; 30:5). O lenei misiona i sa Lamana na faaosofia ai le fiafia tele o toeaiina o le Ekalesia, ma sa fia iloa e isi pe ono toe auina atu ni toeaiina faaopoopo e o faatasi ma Oliva ma Pita i lenei misiona. O le faaaliga i le Mataupu Faavae ma Feagaiga 32 o tali lea a le Alii.
Na papatisoina Parley P. Pratt ia Setema 1830, e na o le tasi le masina a o lei tuuina mai le faaaliga lenei. Sa ia iloa e uiga i le Tusi a Mamona a o malaga i Niu Ioka i le taimi o le taumafanafana o le 1830. Sa ia tusia mulimuli ane e uiga i lana tali ina ua uma ona ia maua se kopi o le tusi:
Ata
Parley P. Pratt
“Sa ou susueina ma le naunautai, ma faitau lona itulau autu. Ona ou faitauina lea o molimau a nisi o molimau e faatatau i lona mauaina ma le faaliliuina. Ina ua mavae lenei mea, sa ou amata faitauina ona anotusi mai le amataga. Sa ou faitau i le aso atoa; o le ai, sa o se avega mamafa, sa leai so’u manao i se meaai; o le moe sa o se avega mamafa pe a oo mai le po, aua sa sili atu ia te a’u le faitau i lo o le moe.
“A o ou faitauina, sa i o’u luga le agaga o le Alii, ma sa ou iloa ma malamalama ua moni le tusi, e pei lava lona manino ma le iloagofie o le malamalama ma le iloa e se tagata o loo i ai o ia” (Autobiography o Parley Parker Pratt, ed. Parley P. Pratt [1938], 37).
Sa malaga atu Parley i Palamaira, Niu Ioka, lea sa ia aoao atili ai e uiga i le Toefuataiga o le talalelei mai ia Ailama Samita. E lei umi, ae malaga atu Ailama ma Parley i Feiete, lea na auai ai Parley i le Ekalesia ma faauuina ai o se toeaina e Oliva Kaotui.
E itiiti se mea ua iloa e uiga i le liliu mai o Ziba Peterson nai lo o le, sa papatisoina o ia e Oliva Kaotui ia Aperila 1830 ma faauuina o se toeaina ia Iuni.
Faitau le Mataupu Faavae ma Feagaiga 32:1-5 ina ia iloa ai le mea na valaauina e le Alii ia Parley ma Ziba e fai, faapea foi ma le mea na folafola mai e le Alii ia i la’ua.
Tali fesili nei i lau api talaaga mo le suesueina o tusitusiga paia:
O le a se mea ua aoao mai e nei folafolaga ia te oe e uiga i lagona o le Alii mo i latou o e auauna atu ia te Ia o ni faifeautalai?
Ata
Faifeautalai i le kiona
I le taumalulu o le 1830–31, na malaga mai ai mai Faiete, Niu Ioka, ia Oliva Kaotui, Pita Uitimera le Itiiti, Parley P. Pratt, ma Ziba Peterson e agai atu i Initipene, Misuri, o se mamao e toeitiiti atoa le 1,500 maila (e tusa ma le 2,400 kilomita), o le tele lava o le ala sa savavali. Na latou onosaia le loloto o le kiona, maatiati o le malulu, savili malolosi, ma le lelavā, na matele lava ina ola i falaoa sana malo ma fasipuaa mata.
E ui lava i nei faigata, ae sa faamanuiaina faifeautalai i le faailoaina atu o le talalelei i Tagatanuu Moni o Amerika i Niu Ioka, Ohaio, ma Misuri. Sa latou talai atu foi le talalelei i Katelani, Ohaio, i se faapotopotoga o tagata o e sa sailiili mo se toefuataiga o le Faakerisiano o le Feagaiga Fou. O le toatele o na tagata na auai i le Ekalesia. O se tasi o na tagata liliu mai mai Ohaio, o Frederick G. Williams, na o faatasi ma faifeautalai i le vaega na totoe o le latou malaga i Misuri. Na faataunuuina e le Alii Lana folafolaga o le a faatasi o Ia ma nei faifeautalai ma e leai se mea o le a manumalo ia te i latou.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia: