I le folasaga o le lesona ua tea, na e aoaoina ai, ina ia mafai ona faamaonia le totogi o E. B. Grandin mo le lolomiina o le Tusi a Mamona, na saini ai e Matini Harisi se maliega o se mokesi [nonogatupe] i lana faatoaga. I le vaega lona lua o le faaaliga lenei mo Matini Harisi, Mataupu Faavae ma Feagaiga 19:23–41, na apoapoai ai le Alii ia Matini e foai fua atu ana meatotino i le lomiga o le Tusi a Mamona. Na iu lava ina faatau atu e Matini le 151 eka o lana faatoaga e totogi ai le tau o le lomitusi.
Ua molimau mai le Faaola e oo mai le filemu e ala i le aoao ia te Ia
O anafea na e faia ai se mea faigata na e iloaina sa sa‘o ae sa e le mautonu pe popole foi, po o le a se tulaga o le a oo i ai? (Mo se faataitaiga, atonu na e lagonaina le tatau ona e aloese mai nisi o uo ona sa avea i latou ma faatosinaga leaga ia te oe.) O le a se mea na fesoasoani ia te oe ia maua ai le faatuatua e fai ai le mea sa e iloa e sa‘o e ui lava ina sa faigata?
Tali fesili nei i lau api talaaga mo le suesueina o tusitusiga paia:
O a nisi o mea faigata sa faatonuina ai oe e fai pe atonu e i ai se taimi e ono faatonuina ai oe e fai, ona o oe o se tagata o le Ekalesia? Aisea na faigata ai, pe aisea o le a faigata ai ona e faia?
Mata o le a suia ou lagona ma [lau] tali e faalagolago lea i le po o ai le tagata e faatonuina oe e fai le mea faigata? Aisea pe aisea foi e leai ai?
Faitau le ulutala o le vaega mo le Mataupu Faavae ma Feagaiga 19, ma faailoga po o ai na tuuina mai le poloaiga o loo i lenei faaaliga ia Matini Harisi. Ana faapea sa e i ai i le tulaga o Matini, e mafai faapefea ona fesoasoani ia te oe le iloaina o lenei poloaiga na sau mai i le Atua?
Sa popole Matini Harisi i le faia o le nonogatupe i se vaega o lana faatoaga e totogi ai le lolomiina o le Tusi a Mamona. Sa tali mai le Alii i le popolega o Matini e ala i le faaalia mai o nisi o mea sa tatau ona ia faia ma nisi o mea sa tatau ona ia iloa. Faitau le Mataupu Faavae ma Feagaiga 19:23, ma faailoga le folafolaga a le Faaola ia Matini Harisi. (O leMataupu Faavae ma Feagaiga 19:23 o se mau tauloto.) Atonu e te manao e tusi le mataupu faavae lenei i lau api talaaga mo le suesueina o tusitusiga paia: Afai tatou te aoao ia Keriso, faalogo i Ana fetalaiga, ma savavali i le agamalu o Lona Agaga, o le a faapea ona tatou maua le filemu.
Tali le fesili lenei i lau api talaaga mo le suesueina o tusitusiga paia: O le a se taimi na e lagonaina ai le filemu ua folafolaina mai i lenei mataupu faavae a o e faia mea e pei o le suesueina o tusitusiga paia, faalogologo i lauga i le konafesi aoao ma isi sauniga a le Ekalesia, ma mafaufau loloto i le faamanuiaga o le talalelei?
Faitau le Mataupu Faavae ma Feagaiga 19:24, ma vaavaai mo mea na aoaoina e Matini Harisi e uiga ia Iesu Keriso. Mafaufau loloto pe faapefea ona fesoasoani le aoaoina o lenei mea e te lagona ai le filemu pe a faatonuina oe e fai se mea faigata mo le Alii.
Ina ia fesoasoani i lou taulotoina o lenei fuaitau o le mau tauloto, tusi mataitusi o le A–O i lau api talaaga mo le suesueina o tusitusiga paia. Ona faitau lea o le Mataupu Faavae ma Feagaiga 19:23 i ni taimi se tele e te mafaia ai i totonu o le 2 minute. A uma le taimi, tapuni au tusitusiga paia ma, i autafa o mataitusi A–I, lisi ai ni mea se tolu e ao ona tatou faia. Ona sosoo ai lea, i autafa o le mataitusi o le O, tusi ai le mea na folafola mai e le Alii, o le a tatou maua pe a tatou faia na mea e tolu.
Ua poloaiina e le Alii ia Matini Harisi e faatau atu lona fanua mo le lolomiina o le Tusi a Mamona
Ina ua uma ona folafola mai ia Matini Harisi le filemu e faalagolago lea i le aoao e uiga i le Faaola, ma le faalogo i Ana fetalaiga, na tuuina mai e le Alii ia te ia ni poloaiga ma ni fautuaga faaopoopo. Faitau le Mataupu Faavae ma Feagaiga 19:26, ma vaavaai mo le mea na poloaiina e le Alii ia Matini Harisi e fai. (Na mokesiina e Matini le 151 eka o lana faatoaga, lea na mafai ai ona lomia le Tusi a Mamona.)
Ata
Faatoaga a Matini Harisi
Suesue i le Mataupu Faavae ma Feagaiga 19:25–35, ma vaavaai mo poloaiga ma fautuaga na tuuina mai e le Alii ia Matini Harisi. A o e faitauina, vaavaai mo ma mafaufau e faailoga fasifuaitau “ou te poloai atu” ma le “aua e te.”
Sa alofa le Alii ia Matini Harisi ma tuuina mai ia te ia ni poloaiga patino mo ona tulaga faaletagata lava ia. E le lava ni faamatalaga ua tatou maua e malamalama ai i le pogai na tuuina mai ai ia Matini Harisi ia poloaiga faapitoa. Ae ui i lea, sa faamanino mai e le Alii le mea semanu e tupu pe ana fai e le amanaia e Matini na poloaiga. Faitau le Mataupu Faavae ma Feagaiga 19:33, ma vaavaai mo le fetalaiga a le Alii i le mea semanu e tupu pe ana “faatalale [Matini] i nei fautuaga.” I lenei tulaga, o le upu faatalale o lona uiga o le le ano i se mea ona e foliga mai e le talafeagai pe faaletaua foi. Atonu e te manao e tusi lenei faauigaga i au tusitusiga paia i autafa o le upu faatalale.
Mafaufau i nisi o poloaiga ma fautuaga ua e maua mai le Alii e ala i le upu a aposetolo ma perofeta, faamanuiaga faaleperisitua (e aofia ai lou faamanuiaga faapeteriaka pe afai ua uma ona fai lou faamanuiaga), ma taitai perisitua. I lau api talaaga mo le suesueina o tusitusiga paia, tusi ai pe aisea e taua ai le mulimuli i lenei taitaiga.
Ata
Elder Russell M. Nelson
Na tuuina mai e Elder Russell M. Nelson o le Korama a Aposetolo e Toasefululua le fautuaga lenei: “Tausi poloaiga uma a le Atua, ma ia iloa ua tuuina mai e faamanuia ai Lana fanau ma aumai ai ia i latou le olioli O le a [e] fetaui i ni tagata o le a latou filifili po o le fea poloaiga latou te tausia ae le ano i isi poloaiga latou te filifili e soli. Ou te ta’ua lenei mea o le ‘ai filifili i poloaiga e usitai i ai. O lenei faiga o le ilo ma filifili o le a le manuia. O le a oo atu ai i le faanoanoa. Ina ia saunia e fetaia’i ma le Atua, o lea e tausi ai e se tagata ia Ana poloaiga uma . E manaomia ai le faatuatua e usitaia ai, ma o le tausia o Ana poloaiga o le a faamalosia ai lena faatuatua,” (“Faasaga Atu ma le Faatuatua, i le Lumanai” Ensign po o le Liahona, Me 2011, 34).
Mafaufau pe o e matele i le faatalale, po o le le amanaia, o soo se poloaiga ua tuuina mai e le Alii ia te oe, ma po o i ai se poloaiga faapitoa e mafai ona e usitaia ma le tuuto sili atu.
Ua fautua mai le Alii ia Matini Harisi e faatatau i lana galuega
E faapei foi o Matini Harisi, e tatau ia i tatou uma ona filifili pe o le a gauai atu o tatou loto pe leai i le finagalo o le Tama, e tusa lava pe faigata le mea ua Ia faatonuina mai. Sa faasoa mai e Peresitene Thomas S. Monson le tala lenei i se alii talavou sa tatau ona ia filifili pe o le a gauai atu lona loto i le finagalo o le Tama. Faitau le vaega muamua o le tala lenei ma faatusatusa le aafiaga o lenei alii talavou ma le aafiaga a Matini Harisi.
Ata
Peresitene Thomas S. Monson
“O Jose Garcia mai Mekisiko Tuai [sa] fanau i le mativa ae sa faafaileleina i le faatuatua, na saunia Jose mo se valaauga faamisiona. Sa ou i ai i le aso na maua mai ai lana talosaga. Sa tuu mai ai le faamatalaga: ‘O le a faia e Uso Garcia se osigataulaga tele i lona aiga, aua o ia lea sa tele ina tausia lona aiga. E na o le tasi lava lana meatotino o loo i ai—o se faaputuga faailoga tusi taua tele—lea ua ia naunau e faatau atu, pe afai e manaomia ai, e fesoasoani e faatupe ai lana misiona.’
“Sa faafofoga ma le toto’a Peresitene Kimball a’o faitauina atu ia te ia lenei faamatalaga, ona ia tali mai lea: ‘Fai atu ia te ia e faatau atu lana faaputuga faailoga tusi. O se ositaulaga faapena o le a avea ma se faamanuiaga ia te ia’” (Profiles of Faith,” Ensign, Nov. 1978, 56).
Tali le fesili lenei i lau api talaaga mo le suesueina o tusitusiga paia: E faapefea ona faigofie atu, ia faaiuga faigata e pei o lena sa manaomia ona faia e Jose, pe afai ua tatou mauaina le filemu lea e maua mai i le usiusitai i poloaiga a le Alii?
Faitau le Mataupu Faavae ma Feagaiga 19:36–41, ma vaavaai mo upu po o fasifuaitau o loo aoao mai ai le mataupu faavae lenei: Afai tatou te faia le finagalo o le Alii, o le a Ia tuuina mai ia i tatou faamanuiaga e sili atu ona taua nai lo oa o le lalolagi.
O a faamanuiaga e sili atu ona taua nai lo oa o le lalolagi e te manatu o le a maua e Jose e ala i le auauna atu i se misiona? Faitau i le faaiuga o le tala, ma vaavaai mo se faamanuiaga faaopoopo o le a maua e Jose mo le faaaogaina o lenei mataupu faavae:
Ata
Peresitene Thomas S. Monson
“Ma se faaivi o lona mata ma se ataata i ona foliga, na fai mai ai lenei perofeta alofa [Peresitene Spencer W. Kimball], ‘O masina taitasi i le laumua o le Ekalesia, tatou te maua ai le faitau afe o tusi mai itu uma o le lalolagi. Vaai ia tatou teuina nei faailoga tusi ma tuuina atu ia Jose i le faaiuga o lana misiona. O le a ia mauaina, e aunoa ma se tau, se faaputuga faailoga tusi aupito i manaia i lo soo se alii talavou i Mekisiko’” (“Profiles of Faith,”56).
Mafaufau loloto pe faapefea ona fesoasoani ia aoaoga faavae ua e aoaoina mai lenei lesona, e faamalosia lou naunautai e gauai atu i le finagalo o le Atua.
Sa usitai Matini Harisi i le poloaiga e foai atu lona fanua e totogi ai mo le lolomiina o le Tusi a Mamona. Ona o le filifiliga a Matini, ua faitau miliona soifua ua, ma o le a faaauau pea ona faamanuiaina. Mafaufau loloto i mea e mafai ona e faia e gauai lelei atu ai lou loto i le finagalo o le Tama Faalelagi.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia: