E oo atu ia Novema 1831, ua silia ma le 60 faaaliga na faamaumauina e le Perofeta o Iosefa Samita. Ae peitai, o le toatele o tagata o le Ekalesia latou te le’i mauaina ni kopi o ia faaaliga. Na taloina e le Perofeta se konafesi i Hairama, Ohaio, e talanoaina ai le lolomiina o faaaliga i se tusi lea o le a ta’uaina o le Tusi o Poloaiga. Sa mamanuina e se komiti o toeaina se faatomuaga o le tusi. O le le malilie ai i lenei tusiga, na talosagaina ai e i latou sa auai i le konafesi ia ole atu Iosefa Samita i le Alii mo se upu tomua. Ina ua mavae ona talosagaina le Alii e ala i le tatalo, sa maua e Iosefa se faatomuaga e ala i se faaaliga. O le faatomuaga a le Alii i le Tusi o Poloaiga ua avea nei ma le vaega 1 o le Mataupu Faavae ma Feagaiga.
Ua lapatai mai le Alii e uiga i faamasinoga o le a oo mai i luga o e fouvale i le Afio Mai Faalua
Ata
Tama e toa 3 i le vao
Mafaufau i le aafiaga lenei o se auuso tama e toatolu o e na puipuia mai mea matautia ona sa latou faalogo i se lapataiga mai lo latou tama:
“E fiafia Mika ma ona uso laiti, o Erika ma Toma, e o e savavali sopo ma lo latou tamā. Sa masani ona fai mai tama, na te iloa lelei ia mauga e pei lava o le patua o lona lava lima. Sa ola ae o ia ma savavali i na lava auala e tasi ma lona tama, o le sa avea o se leoleo mamoe. …
“… I se tasi aso o le taumafanafana, sa fiafia lava [le aualii] i le oo atu i le pito i luga o le alasopo—o se laufanua maualuga na tumu i le vao lanulauava fou ma fugalaau na toetoe o lanu uma. Ma o lea sa latou taufetuli saoasaoa solo ai loa i lalo o laau, e ui lava ina sa latou lelavava mai la latou savaliga sopo o le taeao. Sa latou mananao e feosofi atu i luga o lena laufanua e pei o ni lapiti televavave.
“‘Taofi pe a tou oo atu i le laufanua,’ o le valaau atu lea a Tama ia i latou. ‘Tatou fetaui ai iina.’ Sa latou taufetuli i luma, sa taumafai le isi ia muamua atu i luma o le isi. …
“[Sa galo ia i latou] le faatonuga a Tama. Sa latou tamomoe faataamilo i le vao loloto, tulioso i luga ma lalafi i lalo, feei ma faataio ma tuli e le tasi le isi. …
“Ona oso a’e lea o se manatu o Erika. ‘Tatou mili e tau atu i le isi itu o le laufanua!’ Sa musu Toma. Sa le mafai ona latou iloa atu le itu mamao o le laugatasi ona o se maupuepue vaoa na punitia ai la latou vaaiga. Ae sa le’i popole Mika. ‘Pei lava o le laufanua lava lenei e tasi lea sa tatou o mai i ai i le taumafanafana talu ai,’ na ia faamautinoa atu ai i ona uso.
“Sa latou faapotopoto i tua o laau. ‘Sauni!’ O le alaga lea a Erika. ‘Seti! ALU!’ Sa fou ma malu faalogona o le savili i alafau o Mika ma lona lauulu, ma o le saoasaoa lava na ia tamoe ai, o le tele foi lena o le savili na ia maua. E lei umi ae ua ia taitaia le miliga. Sa ia lagona na pei e mafai ona ia tamoe pea e faavavau.
“‘TAOFI’ sa pa mai ai se leo e pei o se faititili i o latou tua. Sa vave le tutu a tama uma e toatolu. Sa latou faliu ma vaaia ai Tama o tamoe mai ia i latou mai le faatausiusiuga o le laufanua. ‘Foi mai iinei i o’u tafatafa,’ o le valaau lea a Tama, o le taimi lenei ua sili atu ona malu. Sa usitai tama. … [Ona] latou savavali faatasi atu lea i le laufanua. A’o latou oo atu i le pito i luga o le maupuepue, sa faafuasei ona tu Tama.
“Na o ni nai laa i o latou luma atu, e i ai se mato loloto tifato pe a ma le 20 pe 30 futu le maualalo. Ana faapea latou te tamomoe pea, sa leai se auala e mafai ona latou vaaia ai e taofi ai. …
“… ‘Semanu tatou te feoti,’ o le fai mai lemu lea a Mika.
“’Ia, masalo. Ae ua ou fiafia lava ina ua taofi la outou tamoega e ui ina sa leai so’u tami e faamalamalama atu ai. O nisi taimi e tatau ai ona tatou usitai muamua ae fai mai mulimuli ni fesili!’
“’Ae maise lava pe a iloa e se isi tagata le mea o le a tupu, ae e te le iloa,’ o le tala lea a Mika” (Ana Nelson Shaw, “Stop!” Friend, Iuni 2005, 47 – 48).
Ata
o le tama ma tama i le pito i luga o le mato
Mafaufau loloto i se taimi na taumafai ai se tasi ina ia e faalogo atu ia te ia ma lapatai oe e uiga i se mea. Na faapefea ona e tali atu? Pe e te lagona le faafetai mo taumafaiga a lena tagata e lapatai oe? Aisea pe aisea e leai ai?
I le Mataupu Faavae ma Feagaiga ua tuuina mai ai e le Alii lapataiga, poloaiga, ma faatonuga e taua mo lo tatou fiafia ma le faaolataga. E pei ona ta’ua muamua, na faaali mai e le Alii le vaega 1 o se faatomuaga i isi faaaliga i le Mataupu Faavae ma Feagaiga. O se faatomuaga e tapena ai se tagata faitau mo anotusi o se tusi e ala i le aoteleina o le savali ma le faamoemoega o le tusitala.
Faitau le Mataupu Faavae ma Feagaiga 1:1-3, ma faailoa mai upu po o fuaitau na faaaoga e le Alii e tata’i atu ai mafaufau o le au faitau. (Atonu e fesoasoani le iloa o le upu faalogo o lona uiga o le faalogo ma le totoa ma usiusitai.) I le avanoa ua saunia, tali i fesili nei:
O ai o loo fetalai i ai le Alii i fuaiupu nei?
O le a sou manatu o le a le uiga o le fuaitau “o le a alagaina a latou amioletonu i luga o tumutumu o fale, ma o le a faaalia a latou galuega lilo” (MF&F 1:3)?
I lau api talaaga mo le suesueina o tusitusiga paia, faamatala pe aisea e te manatu ai e taua le lapataia o tagata, o agasala e faia faalilolilo o le a faaalia lava.
Faitau le Mataupu Faavae ma Feagaiga 1:4–7, ma faailoa mai pe o le a faapefea ona momoli atu e le Alii Ana lapataiga i tagata uma.
E fofoga mai e le Alii Ana lapataiga i tagata uma e ala mai i Ona soo filifilia. E tuuina mai e le Alii ia lapataiga e ala i Ana auauna ma tusitusiga paia. Toe faamanatu nisi o lauga o konafesi aoao aupito lata mai mai le Au Peresitene Sili ma le Korama a Aposetolo e Toasefululua. O a ni fautuaga po o ni lapataiga na e faalogo na fofogaina lata mai nei e aposetolo ma perofeta a le Alii?
O se tasi o lapataiga ua tuuina mai e le Alii i le Mataupu Faavae ma Feagaiga 1:8-10 e faapea, o le a Ia faamasinoina tagata e tusa ma a latou amioga ma auala latou te faia ai isi [tagata]. Faitau le Mataupu Faavae ma Feagaiga 1:11–14, ma vaavaai mo nisi lapataiga na tuuina mai e le Alii. A o e tilotilo i le vaega e faatatau i ai le Taiala i Tusitusiga Paia mo le vaefaamatalaga 12e, mafaufau loloto po o le a le fuafuaga na faatatau atu i ai le Alii i le Mataupu Faavae ma Feagaiga 1:12.
Tali le fesili lenei i lau api talaaga mo le suesueina o tusitusiga paia: O le a sou manatu, o le a le uiga o le lapataiga a le Alii e faapea, o i latou o e le gauai i Ana perofeta e “vavae ese mai totonu o le nuu” (MF&F 1:14)?
Ona o le amioleaga ma le liliuese i le lalolagi atoa, o lea ua tatau ai lapataiga a le Alii. O i latou o e le faalogo i upu a Ana perofeta o le a vavae ese mai i e amiotonu ma le maua faamanuiaga o loo maua e ala i sauniga ma feagaiga o le talalelei.
Faitau le Mataupu Faavae ma Feagaiga 1:15–16. I lau api talaaga mo le suesueina o tusitusiga paia, lisi ai nisi o upu po o fasifuaitau o loo faamatala ai le amioleaga po o le liliuese lea na fetalai le Alii o le a i ai i aso e gata ai. Ona tali lea o le fesili lenei: O a ni auala o loo savavali ai tagata o o tatou aso “i [o latou] lava ala, ma tusa ai ma le faatusa o [o latou] lava atua”?
Na toefuatai mai le talalelei e ala i le Perofeta o Iosefa Samita a’o lei oo mai mala
Faailoa mai le upu na faaaogaina e le Alii i le Mataupu Faavae ma Feagaiga 1:17 e faatatau i taunuuga o le amioleaga, liliuese, ma le faatafunaga o le a oo i tagata o le lalolagi i aso e gata ai.
O leMataupu Faavae ma Feagaiga 1:17–33 o loo i ai vaifofo a le Alii e fesoasoani ia i tatou pe a oo mai mala o aso e gata ai. Faatumu le siata lenei e ala i le faitauina o mau faasino o loo i le koluma agavale ma faailoa mai vaifofo a le Alii e fesoasoani ia i tatou pe a oo mai mala o aso e gata ai. I le koluma ogatotonu, tusi ai ni faamatalaga pe tusi ni ata o mea e te maua i mau faasino. Atonu e te mafaufau foi e tusi se ata o nei faamatalaga i se itulau o lau api talaaga mo le suesueina o tusitusiga paia. I le koluma taumatau, tusi ai ni faamatalaga pupuu o auala e fesoasoani ai vaifofo a le Alii ia i tatou i mala o aso e gata ai.
Tusi o le mau
O le a le vaifofo na tuuina mai e le Alii mo mala o le a oo mai i le lalolagi?
E mafai faapefea ona fesoasoani lenei fofo ia i tatou e feagai ai ma le malaia o aso e gata ai?
Ina ia fesoasoani e te mafaufau loloto atili i le folafolaga a le Alii i le Mataupu Faavae ma Feagaiga 1:30, ia faailoga upu o loo i lenei fuaiupu o loo faamamafa ai le mea moni e faapea, O Le Ekalesia a Iesu Keriso o le au Paia o Aso e Gata Ai o le ekalesia moni ma ola e tasi i luga o le lalolagi.
Tali le fesili lenei i lau api talaaga mo le suesueina o tusitusiga paia: O le toe manatuaina o mea na e aoaoina i le lesona na muamua atu e uiga i le Liliuese Tele, e faapefea ona e faamalamalama atu i se tagata le mafuaaga ua avea ai le Ekalesia a Iesu Keriso o le au Paia o Aso e Gata Ai ma ekalesia moni ma ola e tasi i le lalolagi?
Ata
Elder David A. Bednar
Na faamalamalama mai e Elder David A. Bednar o le Korama a Aposetolo e Toasefululua le uiga o le avea ma se vaega o se ekalesia “ola”: “O lenei Ekalesia toefuataiina e moni aua o le Ekalesia a le Faaola; o Ia o ‘le ala, le upumoni, ma le ola’ (Ioane 14:6). Ma o se ekalesia ola ona o galuega ma meaalofa a le Agaga Paia. E maeu le faamanuiaina o i tatou e ola i se taimi ua i ai le perisitua i luga o le lalolagi, ma e mafai ona tatou maua le Agaga Paia” (“Talia le Agaga Paia,” Ensign po o le Liahona, Nov. 2010, 97).
E ala i le meaalofa o le Agaga Paia, ua mafai ai e le Alii ona taitai Lana Ekalesia i faaaliga faifai pea. O lenei faaaliga faifai pea o se faataitaiga o le auala ua avea ai le Ekalesia o se ekalesia ola.
Tali se fesili e tasi po o fesili uma i lau api talaaga mo le suesueina o tusitusiga paia:
Aisea e taua ai ia te oe le iloa ua e auai i le ekalesia moni ma ola e tasi i le lalolagi?
O le a sou manatu i le uiga o le Mataupu Faavae ma Feagaiga 1:30 ina ua fetalai mai le Alii sa fiafia i Lana Ekalesia “i le ekalesia atoa ae le’o tagata taitoatasi”?
Suesue i le Mataupu Faavae ma Feagaiga 1:31–33, ma faafetaui le fetalaiga a le Alii e uiga i le agasala ma le salamo i le fesili talafeagai i le siata lenei.
E le mafai faapefea ona le mafai ona vaai le Alii i luga o le agasala?
Afai e te le’i faia, atonu e te manao e faailoga upu po o fasifuaitau o loo aoao mai ai upumoni nei: E tatau ona tatou suesue i poloaiga ua tuuina mai e le Alii. O le a faataunuuina uma lava fetalaiga a le Alii. E moni fetalaiga a le Alii e tusa lava pe fetalaia mai e Ia pe ala mai i Ana auauna.
E faavae i mea ua e aoaoina i le aso, e mafai faapefea ona faamanuiaina oe pe afai e te suesue i poloaiga ma faaaliga ua tuuina mai e le Alii i le Mataupu Faavae ma Feagaiga? Tusi ou manatu i lau api talaaga mo le suesueina o tusitusiga paia.
I lau api talaaga mo le suesueina o tusitusiga paia, tusi ai se sini e suesue le Mataupu Faavae ma Feagaiga i aso taitasi i le aluga o le tausaga aoga. O se vaega o lau sini, mafaufau po o afea, po o fea, ma po o le a le umi pe fia ni itulau o le a e suesueina i aso taitasi.
Ina ia fesoasoani ia te oe i le taulotoina o le Mataupu Faavae ma Feagaiga 1:37, tusi le mataitusi muamua o upu taitasi i luga o se fasi pepa. Tauloto le Mataupu Faavae ma Feagaiga 1:37 (faaaoga au tusitusiga paia pe a manaomia) seia oo ina mafai ona e taulotoina le fuaiupu atoa e faaaoga ai na o mataitusi muamua. Ona tape ese lea po o le ufiufi o nisi o mataitusi ae toe tauloto le mau. Faaauau lenei faagasologa seia oo ina tapeina uma mataitusi, ma mafai ona e taulotoina le fuaiupu atoa mai lou manatua. Toe fai lenei faagasologa i le Mataupu Faavae ma Feagaiga 1:38.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia