Mai le ogatotonu o Aperila i le ogatotonu o Iuni 1828, sa faaliliuina ai e le Perofeta o Iosefa Samita ia papatusi auro a o nofo i Haramoni, Penisilevania. Sa avea se faifaatoaga mauoa ma o se alii faipisinisi e igoa ia Matini Harisi ma tusiupu a o faaliliuina e Iosefa le Tusi a Mamona. O Matini sa 22 tausaga na matua ai ia Iosefa, ma sa ia tuuina atu ia Iosefa ma Ema se $50 (sa o se aofaiga tupe tele i lena vaitaimi) ina ia toe siitia atu ai i Harmony, i le mea sa nonofo ai le aiga o Ema, ma faapea ona fesoasoani ai ia Iosefa a’o ia faaliliuina ia papatusi. Ia Fepuari i le 1828, na faatagaina ai e Iosefa ia Matini e ave ia kopi o togitogiga mai papatusi ina ia faamaonia le moni a’ia’i e ni polofesa se toalua i le Aai o Niu Ioka (tagai i le Iosefa Samita—Talafaasolopito 1:63–65). Sa faateteleina le popole o Lusi Harisi le toalua o Matini i le fiafia ma le aafiaga faaletupe o Matini i le faaliliuga o papatusi. O lea sa latou amataina ai ma isi ona faasoesa ia Matini mo le faamaoniga o le i ai o papatusi. Ina ia faamalieina o latou popolega, i le ogatotonu o Iuni na talosaga ai Matini ina ia faataga o ia e Iosefa e ave atu itulau e 116 o tusitusiga na ma’ea ona faaliliuina e faaali i ai e fai ma faamaoniga.
Na aoaoina e Iosefa Samita e le mafai ona taofia le galuega a le Atua
Mafaufau i ni tulaga atonu e faaosoosoina ai oe e faalogo atu i se uo nai lo le mulimuli i le fautuaga po o poloaiga a le Tama Faalelagi. Mo se faataitaiga, atonu e faaosoosoina oe e faataga se uo e kopi i lau meaaoga po o le faaosoosoina [o oe] e matamata ma au uo i se tifaga po o se vitio le talafeagai i luga o le Initoneti. Aisea e faigata ai i nisi o taimi ona tetee atu i uo pe a latou fai atu e te faia se mea e te iloa e sese?
E oo ane i le ogatotonu o Iuni i le 1828, ua faaliliuina e le Perofeta o Iosefa Samita, ma Matini Harisi na avea ma tusiupu, ia itulau e 116 o tusitusiga mai papatusi auro. Na talosagaina e Matini ia Iosefa e faataga atu o ia e ave ia tusitusiga e “faitau atu i ana uo [atonu] na te faatalitonuina ai i latou i le upumoni” (Histories, Volume 1: Joseph Smith Histories, 1832–1844, vol. 1 of the Histories series of The Joseph Smith Papers [2012], 15). Sa fesili atu Iosefa i le Alii mo le talosaga a Matini peitai sa faatonuina o ia e aua ne’i aveesea tusitusiga mai lana vaavaaiga. Sa tauanau e Matini ia Iosefa e toe fesili atu—lea na iu ai i se teena lona lua mai le Alii. Sa taumafai pea Matini ia Iosefa ina ia toe fesili tasi ma, i le talosaga lona tolu, na tuu mai ai e le Alii le faatagaga mo Matini e ave tusitusiga pe afai e ioe o ia, ia na o lona toalua lava ma nai tagata filifilia o lona aiga e faaali i ai tusitusiga. Ae peitai, sa soli e Matini lana tautoga ma leiloloa ai tusitusiga. Talu ai ona sa le’i taliaina e Iosefa le fautuaga muamua a le Alii ae ua tuu atu “lena mea ua paia i lima o se tagata amioleaga” (MF&F 3:12), o lea na aveese ai e Moronae ia papatusi ma le Urima ma le Tumema mai le Perofeta. E ui i lea, sa tau atu ia Iosefa e mafai ona ia toe mauaina ia mea pe afai o le a “lotomaualalo ma salamo” o ia (Lucy Mack Smith, History of Joseph Smith by His Mother, ed. Preston Nibley [1958], 134).
Ata
Matini Harisi
I le mafaufau atu i mea ua e iloa e uiga ia Matini Harisi ma mea uma na ia faia mo Iosefa Samita, aisea e te manatu ai na faaauau ai pea ona ole atu Iosefa i le Atua pe mafai ona ave e Matini ia tusitusiga, e ui lava ua uma ona tuuina mai e le Atua se tali manino i taimi muamua e lua na ia ole atu ai?
Ina ua leiloloa itulau e 116, na oo i le Perofeta se tiga maoae o le agaga. Ia Iulai 1828, na toe faafoi mai ai e Moronae mo sina taimi le Urima ma le Tumema ia Iosefa mo le faamoemoega o le mauaina o le faaaliga o loo maua i le Mataupu Faavae ma Feagaiga 3. Faitau le Mataupu Faavae ma Feagaiga 3:1-3, ma faailoga se upumoni na faaali mai e le Atua i le Perofeta o Iosefa Samita i na fuaiupu.
Mai nei fuaiupu ua tatou aoao ai, e le mafai ona taofia faamoemoega o le Atua. Atonu e aoga ona e malamalama, e pei ona faaaogaina i le Mataupu Faavae ma Feagaiga 3:1, o le upu taofia o lona uiga o le puipuia mai le faataunuuina.
I lau api talaaga mo le suesueina o tusitusiga paia, tusi pe mafai faapefea ona avea lenei upumoni ma faamafanafanaga ia Iosefa Samita i lena vaitaimi. Aisea e te manatu ai e taua foi ia i latou o loo galulue i le galuega a le Alii ona malamalama, e le mafai ona taofia faamoemoega a le Atua?
Ua aoai e le Alii ia Iosefa Samita ma apoapoai mai ia te ia e salamo
E ui lava ina sa faamafanafanaina e le Alii ia Iosefa, ae sa Ia finagalo i Lana perofeta talavou ia malamalama i mea sese na ia faia ma taunuuga o na mea sese. Faitau le Mataupu Faavae ma Feagaiga 3:4-6, ma faailoa mai upu ma fasifuaitau atonu na faigata i le faalogo a Iosefa Samita.
Ona faitau lea o le Mataupu Faavae ma Feagaiga 3:12–15, ma vaavaai mo mafuaaga na matuai ogaoga ai mea na faia e Iosefa i le silafaga a le Alii. Atonu e aoga le malamalama i le uiga o le fetalaiga a le Alii, ina ua faatatau atu ia Matini Harisi o se “tagata amioleaga” (MF&F 3:12). O Matini sa le o se tagata na fiafia i le agasala ma sa lei salamo pe le mama. Nai lo o lena, o ia o se tagata na agasala i le gauai atu i vaivaiga na i totonu o ia lava, e aofia ai le faamaualuga. I le Mataupu Faavae ma Feagaiga 3:13, matau mafuaaga na ta’u mai e le Alii e faamalamalama ai le auala na amioleaga ai Matini.
Sa faamanatu mai e le Alii ia Iosefa mea na tatau ona ia faia a’o faasoesa mai Matini Harisi ia te ia. Faitau le Mataupu Faavae ma Feagaiga 3:7, ma faauma le upumoni lenei e faavae i le fautuaga a le Alii ia Iosefa Samita: E tatau ona sili atu lo tatou fefefe i le Atua nai lo . Atonu e te manao e faailoga ia upu po o fasifuaiupu o loo i le fuaiupu e 7 o loo aoao mai ai lenei mataupu faavae.
O le faamalamalamaga lenei mai ia Elder D. Todd Christofferson o le Korama a Aposetolo e Toasefululua, e mafai ona fesoasoani e te malamalama lelei ai i le upumoni lenei:
Ata
Elder D. Todd Christofferson
“E tele vaega i tusitusiga paia o loo fautuaina ai tagata ia matatau i le Atua. I o tatou aso e masani lava ona tatou faaliliuina le upu mata’u o le ‘faaaloalo’ pe ‘migao’ po o le ‘alofa’; o lona uiga, o le mata’u i le Atua o le alofa i le Atua po o le faaaloalo mo Ia ma Lana tulafono. Atonu e masani ona sa’o lena faitauga, ae ou te mafaufau pe faapefea pe afai o nisi taimi e le faauigaina moni ai le fefe o le fefe, i le taimi foi lea e saunoa ai perofeta i le fefe e faatiga i le Atua e ala i le solia o Ana poloaiga.
“… E tatau ona tatou matua alolofa ma faaaloalo ia te Ia, lea tatou te fefefe ai e faia soo se mea sese i Lana silafaga, po o a lava manatu o, po o uunaiga mai isi” (“A Sense of the Sacred” [Faeasaite a le Ofisa o Aoga a le Ekalesia mo talavou matutua, 7 Nov. 2004], 6–7).
I lau api talaaga mo le suesueina o tusitusiga paia, faamatala mai pe mafai faapefea e le mata’u, o lona uiga o le alofa ma le faaaloalo ma le fefe e faatiga le Atua, e pei ona faamalamalama mai e Elder Christofferson, ona fesoasoani ia i tatou e faia ni filifiliga sao e tusa lava pe tatou te lagonaina le uunai malosi mai isi.
Sa ta‘u atu ia Iosefa Samita mea na ono faia e le Atua pe ana faalogo Iosefa i Lana tali muamua i le talosaga a Matini Harisi. Faailoga lenei faamautinoaga i le Mataupu Faavae ma Feagaiga 3:8.
Mai mea ua e aoaoina i le Mataupu Faavae ma Feagaiga 3:8, faamaea le mataupu faavae lenei o le, “afai-ona” i lau api talaaga mo le suesueina o tusitusiga paia: Afai tatou te faamaoni i poloaiga a le Alii, ona …
Mafaufau i se taimi po o ni taimi na e filifili ai e mulimuli i poloaiga a le Alii nai lo o faatauanauga po o le uunaiga a isi tagata. O a ni auala ua e vaaia ai le faataunuuina o lenei folafolaga i lou olaga?
I le amataga o le lesona lenei, na fai atu ai e te mafaufau i ni tulaga atonu na faaosoosoina ai oe e faalogo atu i se uo nai lo le usiusitai i le Tama Faalelagi. I lau api talaaga mo le suesueina o tusitusiga paia, faamatala ai pe mata e faapefea ona fesoasoani upumoni ua e aoaoina i le Mataupu Faavae ma Feagaiga 3:8 ia te oe pe a faaosoosoina oe pe lagona le faamalosia o oe e fai se mea e te iloa e le sa‘o.
Faitau le Mataupu Faavae ma Feagaiga 3:9–11, ma vaavaai mo le folafolaga na tuuina mai e le Alii ia Iosefa Samita e ui lava i le matuia o mea sese na ia faia. Mafaufau i le auala e faatatau ai lenei folafolaga ia i tatou pe a tatou agasala pe faia ni mea sese.
Ua faamatala mai e le Alii ia Ona faamoemoega mo le Tusi a Mamona
O le Mataupu Faavae ma Feagaiga 3:16–20 o loo faamalamalama mai ai faamoemoega o le Alii mo le Tusi a Mamona. Faitau fuaiupu nei, ma saili pe aisea na matuai taua ai i le Alii ma Lona nuu le galuega sa faia e Iosefa Samita.
Ua toe fuatai mai e le Alii ia meaalofa a Iosefa e faaliliu ai
O se taimi ina ua uma ona toe faafoi ane papatusi o le Tusi a Mamona ma le Urima ma le Tumema ia te ia, na maua ai e le Perofeta o Iosefa Samita faatonuga mai le Alii e uiga i le mea e fai i le vaega o papatusi e fesootai ma itulau o tusitusiga ia na leiloloa. Na poloaiina e le Alii ia Iosefa e aua nei toe faaliliuina lea vaega, ma sa Ia faailoaina mai le taupulepulega a Satani e faaumatia le galuega a le Atua. Ona Ia poloaiina lea o Iosefa e faaliliu ia papatusi laiti a Nifae, o le a faapea ona faaaoga e sui ai mea mai itulau e 116 na leiloloa ma faamalamalama mai le faamoemoega o le Tusi a Mamona ma lona matafaioi i le faatuina o Lana Ekalesia.
I le Mataupu Faavae ma Feagaiga 10:1–2 na faamanatu mai ai e le Alii ia Iosefa le mafuaaga na aveese mai ai le mana faaliliu upu mai ia te ia, ma le mea na tupu o se taunuuga o lana mea sese. Faitau le Mataupu Faavae ma Feagaiga 10:3–4, ma vaavaai mo fautuaga na tuuina mai e le Alii ia Iosefa Samita ina ua amata ona toe faaliliu.
O a ni auala na aafia ai le naunau o Iosefa e galue malosi atu i ana taumafaiga o le faaliliuga, ona o lona faanoanoa i le leiloloa o tusitusiga? Sa silafia e le Alii na i ai isi mea e ave i ai le faamuamua a Iosefa Samita i le olaga, e pei o le tausiga o lona toalua ma le mauaina o se tupe e ola ai, o lea na fautuaina ai o ia e aua le galue pe faaliliu e sili atu nai lo le malosi na ia te ia. E mafai faapefea ona taialaina oe e lenei fautuaga e aua le momo’e televave atu nai lo le malosi ua ia te oe?
Faama’ea le mataupu faavae lea e faavae i mea o loo aoao mai i le Mataupu Faavae ma Feagaiga 10:5 e uiga i faamanuiaga e mafai ona maua mai i le tatalo: A tatou tatalo e le aunoa, . Atonu e te manao e faailoga upu ma fasifuaitau o le Mataupu Faavae ma Feagaiga 10:5 o loo aoao mai ai lenei mataupu faavae.
Na lapataiina e le Alii ia Iosefa e uiga i se mailei na faatulaga e Satani e faaumatia ai le Perofeta ma le galuega a le Atua. Faitau le Mataupu Faavae ma Feagaiga 10:6, 10–19, ma faailoa mai fuafuaga a tagata amioleaga taitoatasi o e na i ai i lena taimi tusitusiga ia na ave e Matini Harisi i le fale.
I le Mataupu Faavae ma Feagaiga 10:20–29 o loo fetalai ai le Alii e uiga i faatosinaga a Satani i tagata o e na gaoia itulau e 116 o tusitusiga. Sa Ia faaali mai foi faamoemoega a Satani. Mai nei fuaiupu ua tatou aoao ai e manao Satani e faaumatia le galuega a le Alii ma o tatou agaga.
E mafai faapefea e le nofouta i faamoemoega ma metotia a Satani ona fesoasoani ia te oe, e aloese mai ma sola ese mai i ana mailei? I lau api talaaga mo le suesueina o tusitusiga paia, tusi se fuafuaga o se mea e mafai ona e faia e aloese ai pe sola ese mai ai i ana mailei, e pei o le aloese mai le matamata i ata le mama pe afai e faafuasei ona oso a’e i ou luma po o le o foi i nofoaga ua e iloa e tatau ona aloese mai ai.
I le Mataupu Faavae ma Feagaiga 10:30–37 ua tatou aoao ai ona o le fuafuaga a na tagata amioleaga e faaumatia le galuega a le Atua ma le igoa tauleleia o Iosefa Samita, na poloaiina ai e le Alii le Perofeta, e aua le toe faaliliuina le vaega o papatusi na i ai i itulau na leiloloa.
Ua poloaiina e le Alii ia Iosefa Samita e faaliliu papatusi a Nifae
Faitau le Mataupu Faavae ma Feagaiga 10:38–42, ma vaavaai mo mea na ta‘u atu e le Alii i le Perofeta o Iosefa Samita e faaliliu, nai lo le vaega o papatusi ia na faaliliuina i tusitusiga na leiloloa.
O faamaumauga na leiloloa na i ai faaliliuga o le tusi a Liae, lea sa i ai i le otootoga a Mamona o papatusi lapopoa a Nifae (e aofia ai le 600 T.L.M. i le 130 T.L.M.). Na musuia Nifae e tusia papatusi laiti a Nifae ma sa musuia Mamona e faaaofia ai papatusi laiti a Nifae i lana faamaumauga mo se “faamoemoega poto,” i lena taimi na te le’i malamalama atoatoa i ai (tagai i le 1 Nifae 9:5; Upu a Mamona 1:3–7). O papatusi laiti a Nifae na aofia ai le tusa o le vaitaimi lava lea e tasi (mai le 600 T.L.M. i le 130 T.L.M.) e pei o le tusi a Liae.
E faapefea e le iloa na saunia e le Atua se auala i le fia afe tausaga na muamua atu, e toe suia ai itulau e 116 o tusitusiga na leiloloa a’o le’i leiloloa, ona fesoasoani e te faalagolago atoatoa ai ia te Ia?
Na faamalamalama mai e le Alii le faamoemoega mo le Tusi a Mamona ma lana matafaioi i le faatuina o Lana Ekalesia
I le Mataupu Faavae ma Feagaiga 10:46–70 tatou te iloa, na tali mai le Alii i tatalo faamaoni a Ona soo sa Nifae e ala i le faasaosaoina ma le aumaia o le Tusi a Mamona i o tatou aso. Sa aoao e le Alii le Perofeta o Iosefa Samita e faapea, o le Tusi a Mamona e “aumai i le malamalama matautu moni o [Lana] mataupu faaavae” (MF&F 10:62). O le atiina a’e i luga o na matautu moni o mataupu faavae, na faatuina ai e le Faaola Lana Ekalesia i aso e gata ai.
Toe faitau le Mataupu Faavae ma Feagaiga 10:5, ona tusi lea i lau api talaaga mo le suesueina o tusitusiga paia, e uiga i se taimi na fesoasoani ai le tatalo i lou mauaina o le manumalo ia Satani.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia: