Iunite 30: Aso 1

Soloa’iga i le Au Peresitene

Faatomuaga

Ina ua mavae le maliufasia o le Perofeta o Iosefa Samita i le aso 27 o Iuni, 1844, e toatele tagata na le mautonu po o ai o le a taitaia Le Ekalesia a Iesu Keriso o le Au Paia o Aso e Gata Ai. Ae a o lei maliu o ia, sa saunia le Perofeta mo lenei siitia atu o le taitaiga e ala i le faaeeina atu o ki uma ma mana o le perisitua i luga o le Korama a Aposetolo e Toasefululua. Ina ua saunoa atu Polika Iaga, o le sa avea ma Peresitene o le Korama a Aposetolo e Toasefululua, i le Au Paia i le aso 8 o Aokuso, 1844, e toatele tagata o le Ekalesia na maua se molimau faaleagaga sa valaauina ma saunia o ia e le Atua e taitai le Ekalesia.

Faasologa o Mea na Tutupu i le Soloa’iga i le Au Peresitene ina ua mavae le Maliufasia o Iosefa Samita
Aso	Mea na Tupu
27 Iuni, 1844	Ua maliufasia Iosefa ma Ailama Samita i Karefasi, Ilinoi.
29 Iuni, 1844	Maimoaina e tagata lautele o tino maliu o Iosefa ma Ailama Samita.
27 Iuni–7 Iulai, 1844	Ua na’o Willard Richards ma Ioane Teila o le na manu’a o le au Aposetolo i Navu, Ilinoi.
8 Iulai, 1844	Ua toe foi mai Pale P. Palate i Navu e fesoasoani ia Willard Richards ma Ioane Teila i le faamaopoopoina o le Ekalesia.
3 Aokuso, 1844	Taunuu Sini Rikitone i Navu mai Pittsburg, Penisilevania.
4 Aokuso, 1844	Ua ta’u atu e Sini Rikitone i se vaega o le Au Paia, e tatau ona avea o ia ma tagata e vaaia le Ekalesia, ma ua manao e talo se fonotaga faapitoa i le aso 6 o Aokuso, e faamaonia ai lona tofiga. O le fonotaga sa faia tonu i le Aso Tofi, 8 o Aokuso.
6 Aokuso, 1844	O le toatele o isi Aposetolo uma, e aofia ai ma Polika Iaga, ua toe foi mai i Navu mai a latou misiona.
7 Aokuso, 1844	I le taeao, sa fono ai le au Aposetolo ma Sini Rikitone i le maota o Ioane Teila o le na manu’a. I se fonotaga i le aoauli a le au Aposetolo, fautua maualuga, ma le faitaulaga sili, sa toe fai atu ai Sini Rikitone e tatau ona avea o ia ma tagata e vaaia le Ekalesia. Sa faapea atu Polika Iaga, o loo ia umia ki, ma e manao e fai le finagalo o le Alii i le mataupu.
Aso 8 o Aokuso, 1844	I le taimi o se sauniga i le 10:00 i le taeao, na saunoa atu ai Sini Rikitone mo le itula ma le afa i le faitau afe o tagata o le Au Paia na potopoto, e faamalamalama mai ai le mafuaaga e tatau ai ona avea o ia ma tagata e vaaia le Ekalesia. Sa saunoa foi Polika Iaga ma valaau ai le Au Paia e toe potopoto ane mo se fonotaga i le 2:00 i le aoauli. I le aso atoa, na maua ai e le toatele o tagata o le Ekalesia se molimau o le tiutetauave, po o le pule a le Perofeta o Iosefa Samita na pau i luga o Polika Iaga. I le taimi o le sauniga i le 2:00 i le afiafi, na lagolago ai e le Au Paia ia Polika Iaga ma le au Aposetolo e Toasefululua o ni taitai o le Ekalesia. I le taimi o sauniga uma e lua, e toatele le Au Paia na molimau, mo se taimi le tumau sa foliga ma pei ai le leo o Polika Iaga o le Perofeta o Iosefa Samita.

Ina ua Mavae le Maliufasia o le Perofeta o Iosefa Samita, na Taumafai Nisi o Tagata ia Maua le Aia Tatau e Taitai ai le Ekalesia

Vaai faalemafaufau e faapea, na e maua le [tala] na maliu le Peresitene o le Ekalesia anapo. O ai o le a avea ma Peresitene e sosoo ai o le Ekalesia? E faapefea ona filifilia o ia? E faapefea ona tuufaasolo atu ki o le perisitua e pulefaamalumalu ai i le Ekalesia, i le isi Peresitene e sosoo ai o le Ekalesia?

Ina ua mavae le maliufasia o le Perofeta o Iosefa Samita, sa oo le Au Paia i faanoanoaga loloto, ma e toatele tagata o le Ekalesia sa le mautonu po o ai o le a taitaia le Ekalesia. I le taimi lea, na i ai ni tagata eseese o e na fai mai sa ia i latou le aia tatau e taitai ai le Ekalesia. O nisi o i latou ia o Sini Rikitone, James Strang, ma Polika Iaga.

A o e faitau i parakalafa nei, vaavaai mo mafuaaga na fai mai ai Sini Rikitone, o le sa avea ma se taitai iloga i le Ekalesia mo le tele o tausaga, o ia e tatau ona taitaia le Ekalesia:

“O Sini Rikitone, Fesoasoani Muamua i le Au Peresitene Sili, na taunuu mai [i Navu] mai Pittsburgh, Penisilevania, i le aso 3 Aokuso, 1844. I le tausaga a’o lumanai le taimi lenei, sa amata ai ona ia aveina se mataupu sa ese mai i le fautuaga a le Perofeta o Iosefa Samita ma faapea ona motuese ai [vavaeeseina] mai le Ekalesia. Sa musu o ia e feiloai ma sui e toatolu o le Toasefululua na i ai i Navu, ae na alu talanoa atu i se vaega toatele o le Au Paia sa faapotopoto mo la latou sauniga tapuai o le Aso Sa” (Our Heritage: A Brief History of The Church of Jesus Christ of Latter-day Saints [1996], 66).

Sa talo e Sini Rikitone se fonotaga faapitoa e faia i le aso Lua, 6 o Aokuso, ina ia mafai ona filifili e tagata o le Ekalesia se tagata e vaaia le Ekalesia. Sa foliga mai e pei sa taumafai o ia e faia lenei fonotaga, ina ia mafai ona faamaonia e tagata o le Ekalesia lona tofiga o se e vaaia le Ekalesia a o lei toe foi uma ifo le au Aposetolo e Toasefululua mai a latou misiona i le itu i sasae o le Iunaite Setete. Na lagona e nisi o taitai o le Ekalesia e faapea, atonu sa fafau Uso Rikitone “e faaaoga le tulaga [faanoanoa] o le Au Paia [ia fai ai o ia ma taitai o le Ekalesia]” (History of the Church, 7:225). O le mea e lelei ai, ona o taumafaiga a Elder Willard Richards ma Elder Pale P. Palate, sa faapea ona tolopoina ai le fono i le aso Tofi, 8 o Aokuso, e oo ane la i le taimi lea, ua toatele le au Aposetolo ua toe foi mai i Navu.

Na fai mai uso Rikitone ona sa valaauina ma faauuina o ia i se taimi na muamua atu e avea ma failauga mo Iosefa Samita, o lona tiutetauave la le “vaai o pulea le ekalesia i le ala e tatau ai” (i le History of the Church, 7:229). Sa ia fai mai foi, o ia e tatau ona “avea ma tagata e vaaia tagata” ma o le faataunuuina o lenei tiutetauave, sa ia faia ai le mea sa poloaiina ai o ia e le Atua e fai (tagai i le History of the Church, 7:230).

Sini Rikitone

Sini Rikitone

1. Tali fesili nei i lau api talaaga mo le suesueina o tusitusiga paia:

   1. Afai na e i ai i Navu i lena taimi, mata o a ni ou lagona e uiga i faamatalaga a Sini Rikitone?

   2. O a ni popolega e ono i ai ia te oe e uiga ia Uso Rikitone?

A o e faitau i le palakalafa lenei, vaavaai mo mafuaaga na fai mai ai James Strang o ia e tatau ona taitaia le Ekalesia:

O James Strang, o le na papatiso ia Fepuari 1844, sa sailiili se isi nofoaga e mafai ona maua mo le Au Paia i Wisconsin i le tautotogo o le 1844. Ina ua mavae le maliufasia [o le Perofeta] sa faapea mai Uso Strang na ia mauaina se faaaliga i se tusi mai ia Iosefa Samita e ta’u mai ai na filifilia o ia e sui ia Iosefa. O le tusi a Uso Strang, lea sa ia faaali atu i tagata o le Ekalesia, sa foliga mai sa i ai le saini a Iosefa Samita. Sa fai mai Uso Strang o ia o le perofeta e sosoo ai ma sa faasilasilaina lona tofiga i se konafesi a le Ekalesia i Michigan i le aso 5 o Aokuso, 1844.

2. Tali fesili nei i lau api talaaga mo le suesueina o tusitusiga paia:

   1. Afai sa e i ai faatasi ma le Au Paia i Michigan, o le a se mea, pe afai sa i ai, e te manatu na ono talitonuina ai faamatalaga a James Strang?

   2. O a ni ou popolega e ono i ai e uiga i ana faamatalaga?

A o e faitau i le parakalafa nei, vaavaai mo mea na ta’u atu e Polika Iaga i isi taitai perisitua, e aofia ai sui o le Korama a Aposetolo e Toasefululua o e sa i ai i Navu, e uiga i le e tatau ona taitaia le Ekalesia:

Na i ai lava Elder Ioane Teila, Willard Richards, Pale P. Palate i Navu i le taimi na taunuu atu ai Sini Rikitone. O le toatele o le isi vaega o le au Aposetolo, e aofia ai Polika Iaga, na toe foi atu i Navu i le afiafi o le aso 6 o Aokuso, 1844. O le aso na sosoo ai, 7 o Aokuso, na fono ai le au Aposetolo i le maota o Ioane Teila. Mulimuli ane i le aso lena, i se fonotaga i le aoauli, sa fono faatasi ai le Au Aposetolo e Toasefululua, o le au fautua maualuga, ma faitaulaga sili i Navu. Sa saunoa atu Peresitene Iaga, le Peresitene o le Korama a Aposetolo e Toasefululua, ia Sini Rikitone e tuuina atu lana savali i le Au Paia. Sa folafola atu ma le to’a e Sini Rikitone e faapea, sa ia vaai i se faaaliga vaaia, ma e leai se tagata e mafai ona sui ia Iosefa Samita i le avea ma Peresitene o le Ekalesia. Ona ia fautuaina atu lea e tofia o ia e vaaia tagata.

Ina ua uma le tautalaga a Sini Rikitone, sa faapea atu Polika Iaga:

Peresitene Polika Iaga

“Ou te le popole po o ai e taitaia le Ekalesia, … ae tasi le mea e tatau ona ou iloa, ma o lena mea e faapea po o le a le finagalo o le Atua i ai. O loo ia te a’u ki ma mea e maua mai ai le finagalo o le Atua e uiga i le mataupu. …

“Na faaee mai e Iosefa i luga o o tatou ulu [e faatatau i Aposetolo e Toasefululua] ia ki uma ma mana e anaina e le au Aposetolo lea sa ia umiaina a’o le’i maliu o ia. …

“Ua tele taimi na saunoa mai ai Iosefa i le Toasefululua, ‘ua ou faataatia le faavae ma e tatau ona outou atiae ai i luga, aua ua taatia atu i luga o o outou tauau le malo’” (i le History of the Church, 7:230).

3. Tali fesili nei i lau api talaaga mo le suesueina o tusitusiga paia:

   1. O le a le eseesega o manaoga o Peresitene Polia Iaga mai manaoga o Sini Rikitone ma James Strang?

   2. Aisea na taua ai le molimau a Polika Iaga e uiga i ki o le perisitua?

Na aoao mai e Peresitene Polika Iaga ma isi sui o le Korama a Aposetolo e Toasefululua le upumoni lenei: O le au Aposetolo e umia ki uma o le perisitua e alagatatau ai ona pulefaamalumalu i le Ekalesia.

O na lava foi mana ma ki o le perisitua o loo umia e Aposetolo i aso nei. Pe a faauuina se Aposetolo, e tuuina atu ia te ia ki uma o le perisitua i luga o le lalolagi (tagai i le MF&F 112:30–32), ae ua na o le Aposetolo sinia, o le Peresitene o le Ekalesia, o loo i ai le pule e faaaogaina uma ai na ki o le perisitua.

Ia Ianuari 1836, i le silia ma le valu tausaga a o lei maliu o ia, na aoaoina ai e le Perofeta o Iosefa Samita le Korama a Aposetolo e Toasefululua e faapea, “o le Toasefululua e le i lalo o le pule a se isi lava tagata nai lo o le au Peresitene Sili,” ona ia saunoa mai lea, “Pe a ou le i ai, e leai foi se Au Peresitene Sili e pulea le Toasefululua” (i le History of the Church, 2:374).

E faavae i lenei aoaoga mai le Perofeta o Iosefa Samita, o le a le mea e tupu i le Au Peresitene Sili pe a maliu le Peresitene o le Ekalesia?

O ai e mafai ona taitai le Ekalesia pe a soloia le Au Peresitene Sili?

Faitau le Mataupu Faavae ma Feagaiga 124:127–28, e vaai po o ai sa avea ma Aposetolo sinia ma le Peresitene o le Korama a Aposetolo e Toasefululua i le taimi na maliu ai le Perofeta o Iosefa Samita.

O Polika Iaga sa Peresitene o le Korama a Aposetolo e Toasefululua aua o ia o le Aposetolo sinia. Ina ua faatoa faatulaga le korama i le 1835, sa filifilia le tulaga sinia i tausaga o le soifua. A o faaopoopo mai sui [o le Korama], sa iloiloina ai le tulaga sinia i le aso na faauuina ai. O le mea lea, i o tatou aso, e fuafua le tulaga sinia i le aso ma le faasologa na faauuina ai se Aposetolo. Pe a maliu le Peresitene o le Ekalesia, e soloia le Au Peresitene Sili, ae o le Korama a Aposetolo e Toasefululua e avea ma korama pulefaamalumalu i lalo o le taitaiga a le Aposetolo sinia.

O le tagata e sui i le Au Peresitene o le Ekalesia na faatulagaina e le Alii ina ia le i ai se taimi e leai ai se taitaiga musuia i le Ekalesia, ma e leai foi se pogai mo ni masalosaloga po o ni feeseeseaiga i le po o ai o le a avea ma Peresitene e sosoo ai o le Ekalesia. Na faamalamalama mai e Peresitene Harold B. Lee: “Ua silafia [e le Alii] o ai e finagalo e pulefaamalumalu i lana ekalesia, ma o le a na le faia lava se mea sese. E le faafuasei ona faia e le Alii ni mea. Na te le’i faia faafuaseia lava se mea” (i le Conference Report,Ooke. 1970, 153).

I se aotelega, e faaee atu ki o le malo i luga o sui taitoatasi o le Korama a Aposetolo e Toasefululua i le taimi o lona faauuga i le tofi faaaposetolo. O le Aposetolo sinia, o le e pulefaamalumalu i le Korama a le Toasefululua, e filifili i le aso ma le faasologa o lona faauuga. Pe a maliu le Peresitene o le Ekalesia, e soloia le Korama a le Au Peresitene Sili ma o fesoasoani, afai sa latou i ai muamua i le Korama a Aposetolo e Toasefululua, e toe foi atu i o latou tulaga o le leva ona i ai i lena korama. Ona avea lea o le Korama a Aposetolo e Toasefululua ma korama e pulefaamalumalu i le taitaiina o le Ekalesia. O le Aposetolo sinia, i le avea ai ma Peresitene o le au Aposetolo e Toasefululua, e otometi lava ona ia umia ma faaaoga i le taimi lea ia ki uma o le Perisitua ma pulefaamalumalu ai i le Ekalesia atoa. I le avea ai ma taitai pulefaamalumalu o le Ekalesia, o le Peresitene o le Korama a le Toasefululua ua i ai le aia tatau e maua ai faaaliga e faatatau i le taimi e toefaatulaga ai le Au Peresitene Sili. O mea uma i totonu o le Ekalesia a le Alii e faia i le poto ma le faatulagaga lelei.

E Toatele na Maua se Molimau o Peresitene Polika Iaga e Tatau Ona Taitaia le Ekalesia

I le aso 8 o Aokuso, 1844, na faapotopoto ai le Au Paia i Navu, Ilinoi, i le 10 i le taeao e faalogologo atu ia Sini Rikitone a’o faia lana tautalaga i le avea ai ma tagata e vaaia le Ekalesia. Ona sa agi le matagi agai atu i le tulaga [pulelaa], o lea na tu ai Uso Rikitone i totonu o se taavaletoso i tua atu o le faapotopotoga ina ia mafai ona lagona lelei atu e tagata lona leo. Sa faliu atu i ai tagata ina ia mafai ona latou vaai atu ia Uso Rikitone a’o lauga o ia. Sa ia saunoa atu i le faitau afe o le Au Paia na faapotopoto ai mo se itula ma le afa, i le faamalamalamaina atu o le pogai e tatau ai ona avea o ia ma tagata e vaaia le Ekalesia. Na faamatalaina e nisi o tagata ia lana tautalaga e leai se agaga musuia na i ai.

Sa o mai Peresitene Polika Iaga ma isi taitai o le Ekalesia ma alala i luga o le tulaga e faafeagai ma le pito na saunoa mai ai Sini Rikitone. E oo ane i le taimi lea ua pe le matagi. Ina ua uma le tautalaga a Sini Rikitone, sa saunoa loa Peresitene Iaga. Sa faliu mai le aofia e faalogologo i le saunoaga a Polika ma u atu o latou papatua i le taavaletoso na i ai Sini Rikitone. (Tagai i le “Discourse by President Geo. Q. Cannon,“ Deseret News, 21 Fep., 1883, 67.) Sa puupuu le saunoaga a Peresitene Iaga ma fai mai, sa sili atu ia te ia le foi mai i Navu e faanoanoa mo le Perofeta nai lo le tofia e avea ma se taitai fou. Sa ia faasilasilaina atu e faapea, o le a faia i se taimi mulimuli ane i lena aso se faatasiga a taitai o le Ekalesia ma tagata o le ekaesia i le 2:00 i le aoauli. A’o saunoa o ia, sa vaaia e nisi o tagata o le Ekalesia le suia o foliga vaaia ma le leo o Polika Iaga sa pei lava o foliga ma le leo o le Perofeta o Iosefa Samita. O lenei mea faavavega na tupu sa fesoasoani i le toatele o le Au Paia e iloa, na finagalo le Alii ia Polika Iaga e taitaia le Ekalesia.

A o e faitau i aafiaga nei, vaavaai mo auala na faamanuiaina ai e le Alii le Au Paia ina ia iloa po o ai na Ia tofia e taitai le Ekalesia. O le upu “tiutetautave” e faatatau i le pule e tuufaasolo mai i le perofeta ma le Peresitene o le Ekalesia (Iosefa Samita) i lona sui (Polika Iaga).

Benjamin F. Johnson

Sa faamatalaina e Benjamin F. Johnson, “sa tulai Peresitene Polika Iaga ma saunoa atu. Sa ou vaai o tu o ia i luga, ae o le taimi lava na ia saunoa ai, sa vave ona ou tu i luga, ona sa pei uma lava o le siufofoga o Iosefa, ma lona tagata, i foliga, uiga faaalia, lavalava ma foliga vaaia, o Iosefa lava, i lona tino mai; ma sa ou iloa i le taimi lava lea, sa i ona luga le tiutetauave o Iosefa” (My Life’s Review [1947], 103–4).

Na faamatalaina e William C. Staines ia Polika Iaga o saunoa “ma le leo e pei o le leo o le Perofeta o Iosefa. Sa ou faapea lava o ia lea, na faapena foi i le faitau afe sa faalogo i ai” (i le History of the Church, 7:236).

Peresitene Wilford Woodruff

Na tusia e Uilifoti Uitilafi, “Ana faapea ou te le’i vaai ia te ia i o’u lava mata, semanu e leai se tasi e mafai ona faatalitonuina a’u, sa le o Iosefa Samita, ma e mafai ona molimau soo se tasi i lenei mea, o e sa masani i nei tamalii e toalua” (i le History of the Church, 7:236).

Sa saunoa Peresitene Polika Iaga ma isi sui o le Korama a Aposetolo e Toasefululua i le taimi o le fonotaga i le aoauli. E toatele isi na ta‘ua sa foliga ma pei le leo o Polika Iaga o Iosefa Samita a o saunoa o ia i lena aso. Na manatua e George Q. Cannon, o le sa 17 ona tausaga i le 1844, “Afai na toetu mai Iosefa mai le oti ma latou faalogo o toe saunoa mai o ia, o le a le sili atu ona faateia le aafiaga nai lo le mea sa i ai i le toatele na auai i lena fonotaga; sa o le leo lava o Iosefa; ma sa le gata i le faalogoina o le leo o Iosefa, ae na foliga mai i le vaai a tagata, na pei lava o Iosefa lava le tagata na tu mai i o latou luma. … Sa tuuina mai e le Alii i lona nuu se molimau lea na leai se avanoa na i ai mo se masalosalo i le, po o ai le tamalii ua filifilia e taitaia i latou” (i le History of the Church, 7:236).

E le gata i lenei vavega, e toatele le Au Paia na lagonaina le molimau a le Agaga Paia ia i latou o Polika Iaga ma le Korama a Aposetolo e Toasefululua na valaauina e le Atua e taitaia le Ekalesia. I le faaiuga o lenei sauniga, na malosi le palota a le Au Paia i Navu e lagolago le Korama a Aposetolo e Toasefululua, ma Polika Iaga e faaao, e taitaia le Ekalesia. Ae peitai, e le o tagata uma o le Ekalesia na iu ina filifili e mulimuli i Aposetolo. O nisi o tagata sa filifili e mulimuli i tagata taitoatasi e pei o Sini Rikitone ma James Strang, o e na faatutuina a laua lava lotu.

Afai sa e i ai i se tasi o nei fonotaga i le aso 8 o Aokuso, 1844, o a ni faaiuga e te ono faia i le po o ai na valaauina e le Atua e taitaia le Ekalesia?

Ina ua maliu le Perofeta o Iosefa Samita, sa vave lava ona mafai ona faaaogaina e le Aposetolo sinia (Polika Iaga) ia ki uma o le perisitua. Sa ia te ia le aia tatau e maua ai faaaliga e faatatau i le taimi e faatulaga se au Peresitene Sili fou. I le 1847—e silia ma le lua tausaga talu ona mavae le maliufasia—sa musuia ai Peresitene Polika Iaga e toefaatulaga le Au Peresitene Sili, nai lo le faaauau pea ona taitai le Ekalesia o se Peresitene o le Korama a Aposetolo e Toasefululua. A o faaauau pea ona tuputupu ae ma faatoateleina atu le Ekalesia, e taua le manatua e ala i le Agaga Paia, e mafai ai ona tatou maua se molimau o i latou e taitaia le Ekalesia ua valaauina e le Atua.

Tusi a le Au Peresitene Sili, 2013

O Le Au Peresitene Sili, 2013

4. Tali fesili nei i lau api talaaga mo le suesueina o tusitusiga paia:

   1. Aisea e taua ai le mauaina o se molimau o o tatou taitai o le Ekalesia ua valaauina e le Atua?

   2. Mafaufau i se taimi na e mauaina ai se molimau o se taitai o le Ekalesia na valaaulia e le Atua. Afai na e mauaina se aafiaga lena, o le a se mea na e faia e maua ai lena molimau? Afai e te le’i mauaina se molimau e uiga i taitai o le Ekalesia, tusi e uiga i ni mea e mafai ona e faia ina ia maua ai [se molimau].

5. Fai atu i se tasi o lou aiga po o se tasi o au uo e faasoa atu lo latou aafiaga i le mauaina o se molimau mai le Agaga Paia, o se taitai o le Ekalesia sa valaauina e le Atua. E mafai foi ona e faasoa atu ia i latou mea na e tusia muamua atu i lau api talaaga. I lau api talaaga mo le suesueina o tusitusiga paia, tusi ai se mea ua e aoaoina mai i le aafiaga o lea tagata.

6. Tusi le mea lenei i le pito i lalo o le galuega atofaina o le aso i lau api talaaga mo le suesueina o tusitusiga paia:

   Ua ou suesueina le lesona “Faasologa i le Au Peresitene” ma faamaeaina i le (aso).

   O fesili, mafaufauga ma manatu faaopoopo ou te fia faasoa atu i lo’u faiaoga: