Ia Setema 1831, sa le’i leva ona foi atu le Perofeta o Iosefa Samita ma se vaega o toeaina i Ohaio mai la latou malaga e faapaia le laueleele ma le tulaga o le malumalu i Siona, po o Initipene, Misuri. I lenei malaga, sa i ai nisi o feeseeseaiga ma ni lagona le lelei o toeaina, ae o le tele lava sa mafai ona faaleleia ma le tasi ma le isi. I le aso 11 o Setema, na maua ai e le Perofeta le faaaliga ua faamaumauina i le Mataupu Faavae ma Feagaiga 64.
Na faamautinoa mai e le Alii i toeaina e uiga i Lona naunautaiga e faamagalo atu
Mafaufau i se taimi na e tiga ai i ni upu po o ni mea na fai e se isi tagata, ma pe na faapefea ona e tali atu i lena tulaga.
Na maua e le Perofeta o Iosefa Samita le faaaliga ua faamaumauina i le Mataupu Faavae ma Feagaiga 64 pe tusa o le tasi le masina talu ona foi atu le vaega o toeaina i Ohaio mai Initipene, Misuri. Sa oo nei alii faifeautalai ma isi tagata o le Ekalesia i faigata ona o feeseeseaiga ma lagona le lelei i totonu lava o le latou vaega. I le faaaliga lenei na fetalai mai ai le Alii, “E i ai ni isi o i latou o e o i totonu o outou ua agasala” (MF&F 64:3). O tuleiga a le Faaola o i lenei faaaliga, ua aoao ai i tatou i le ala tatou te tali atu ai pe afai ua faatiga mai isi ia i tatou.
Faitau le Mataupu Faavae ma Feagaiga 64:1–4, ma vaavaai mo fuaitau o loo faamatala ai le ala na tali atu ai le Alii ia i latou o e ua agasala. Ia tusi i le siata lenei. (Atonu e te manao e faailoga i tusitusiga paia.)
Ua aoao mai leMataupu Faavae ma Feagaiga 64:1–4 e faapea, o le Alii e agaalofa, loto faamagalo, ma alofa mutimutivale. I lau api talaaga mo le suesueina o tusitusiga paia, tusi ai pe aisea e taua ai ia te oe lenei mataupu faavae e uiga i le Faaola.
I le taimi na maua mai ai le faaaliga lenei, o nisi o tagata o le Ekalesia, e aofia ai nisi o toeaina o e na malaga faatasi ma Iosefa Samita, sa faapea ona faitio e uiga i le Perofeta. I le Mataupu Faavae ma Feagaiga 64:6, na ta’ua e le Alii le faitioina o le Perofeta e ala i le faaaogaina o le fuaitau “saili ni mea e faasaga ia te ia.” Faitau le Mataupu Faavae ma Feagaiga 64:5–6, ma vaavaai mo le mea na aoao mai e le Alii.
Manatunatu loloto i fesili nei:
O le a le fetalaiga a le Alii e uiga ia Iosefa Samita?
O a ni mea e mafai ona tatou aoaoina mai nei fuaiupu?
Na faamalamalama mai foi e le Alii ni isi tulaga o le faamagaloga. E tusa ai ma le Mataupu Faavae ma Feagaiga 64:7, o le a se mea e tatau ona tatou faia e maua ai le faamagaloga a le Alii?
Ua poloaiina e le Alii Ana auauna ina ia faamagalo atu e le tasi le isi
Ata
gatauogo
E faaopoopo atu i le tiga faaletino, o a ni lagona e te manatu o le a e lagonaina pe afai e ‘ai pe u oe e se meaola e ‘ona lana u? O gatauogo o ni gata e ‘ona a latou u e taatele i laueleele o Amerika. O u a gatauogo e mafua ai le tiga, fufula, gase, ma sui ai le lanu o le tino. Afai e le togafitiaina, e iu ina faaleagaina tumau ai aano o le tino pe oo lava foi i le oti.
Ata
Elder Marion D. Hanks
Na saunoa Elder Marion D. Hanks o le Fitugafulu, e uiga i filifiliga e feagai ma se tagata pe afai ua utia i latou e se gatauogo: “E lua ni faatinoga e mulimuli ai pe a ua utia se tasi e se gatauogo. O le tasi e mafai, i le ita tele, fefe, po o le fia tauimasui, ona taumafai lava ia maua le meaola ma fasi mate ai. Po o le e mafai ona ia faanatinati loa e aveese le ‘ona mai lona tino” (“Forgiveness: The Ultimate Form of Love,” Ensign, Jan. 1974, 21).
O le fea o nei faatinoga e lua e te manatu e sili atu ona atamai? Aisea?
Ata
Elder Marion D. Hanks
Fai mai Elder Hanks, “Afai tatou te tulitulimatagauina le ala [lona lua] o le a ono faasaoina ai i tatou, ae afai tatou te taumafai e mulimuli i le [muamua], atonu tatou te le ola umi mo lona faaumaina” (“Forgiveness,” 21).
E mafai ona faatusatusa filifiliga a se tagata pe a uma ona utia e se gatauogo i a tatou filifiliga pe a tatou lagona le tiga ona o upu po o amioga a se isi tagata. Faitau le Mataupu Faavae ma Feagaiga 64:8, ma vaavaai mo iuga na feagai ma nisi o soo o le Alii ona sa latou mumusu e faamagalo atu i le tasi ma le isi.
Tali fesili nei i lau api talaaga mo le suesueina o tusitusiga paia:
E mafai faapefea ona afaina (pe tiga) se tagata e ala i le le faamagalo atu i isi?
E faapefea ona pei lenei mea o taunuuga o se tagata e tulia se gatauogo ua uina o ia?
Ua tatou aoao mai le Mataupu Faavae ma Feagaiga 64:9 e faapea afai tatou te le faamagalo atu i isi, tatou te tutu i le tausalaina i luma o le Alii.
O le lesona sili ona aoga tatou te aoao mai i lenei fuaitau o le, ia faamagalo atu. Tatou te maua le filemu tele i o tatou olaga pe a tatou faamagalo atu i isi. A o e faitau i le saunoaga lenei a Elder David E. Sorensen o le Fitugafulu, mafaufau i le auala e faatatau ai i lenei upumoni: “E mafai ona faigata tele ona faamagalo se tasi ona o le leaga ua latou faia ia i tatou, ae a tatou faia, ua tatou faaavanoaina i tatou lava i se lumanai sili atu ona lelei. E le toe pulea lo tatou ala i se sese e fai mai e se isi tagata. A tatou faamagalo atu i isi, ona faasaolotoina lea o i tatou e filifili pe faapefea ona tatou ola. O le faamagalo atu o lona uiga, e le toe faatonuina o tatou taunuuga e faafitauli ua te’a, ma ua mafai ona tatou tulimatai atu i le lumanai, ma le alofa o le Atua i o tatou loto” (“O Le Loto Faamagalo E Suia ai le Oona Matuitui i le Alofa,” Ensign po o le Liahona, Me 2003, 12).
Suesue ma le toto’a le Mataupu Faavae ma Feagaiga 64:10–11, ma faailoa mai nisi mataupu faavae na aoao mai e le Alii e uiga i le faamagaloga.
I lau api talaaga mo le suesueina o tusitusiga paia, faamatala pe faapefea e mataupu faavae ua e aoaoina mai le, Mataupu Faavae ma Feagaiga 64:10–11 ona fesoasoani i se tagata i tulaga nei:
Ua tiga ma maasiasi se tamaitai talavou ina ua ona iloaina na faasalalau e nisi o lana tupulaga ni tala e uiga ia te ia. Mulimuli ane, sa faatoese atu nisi o nei tagata, ao o isi sa le’i faatoese atu. Ua faamagalo e le tamaitai talavou i latou o e na faatoese atu, ae sa i ai pea lava ni ona lagona le fiafia faasaga i isi.
Ua le usitaia e se alii talavou se poloaiga. Ua ia tatalo mo le faamagaloga, ma ua talanoa atu i lona epikopo i le faafitauli. Ae peitai, e ui lava ina faamautinoa atu e le epikopo i le alii talavou e faapea ua salamo atoatoa o ia, ae sa faaauau pea ona lagona e le alii talavou le le agavaa ona o lenei agasala ua tuanai.
Ua lagona e se tamaitai talavou le faanoanoa ma le le mautonu ona o amioga a lona tama. Ua ia tuulafoaiina lona aiga. A o le‘i aluese o ia, sa seasea ona ia faaalia le alofa mo le aiga ma sa masani ona agaleaga. Sa le malamalama o ia pe aisea sa faapea ai lona tama, ma sa ia tauaveina ni lagona o le ita i [lona tama]. Ua ia iloa e tatau ona ia taumafai e faamagalo o ia, ae e leai sona manatu e mafai ona ia faia.
Mafaufau pe o i ai se isi e manaomia ona e faamagaloina atu. E i ai taimi e matuai faigata ai lava ona faamagalo atu i se isi tagata. A o e faitauina le fautuaga lenei mai ia Peresitene Gordon B. Hinckley, vaavaai mo mea e mafai ona e faia pe afai o loo e tauivi e faamagalo atu i se tasi: “Afai o i ai nisi o teu i o latou loto se ava oona o le feitagai o le tasi i le tasi, ou te aioi atu ia te outou ia ole atu i le Alii mo se malosi e faamagalo atu ai. … Atonu o le a le faigofie, ma atonu foi o le a le vave ona oo mai. Peitai afai tou te sailia ma le faamaoni ma atiina ae lena uiga, o le a e maua” (A o Outou e Ao Ina Outou Faamagalo Atu,” Liahona, Novema 1991, 5).
Tali le fesili lenei i lau api talaaga mo le suesueina o tusitusiga paia: O le a lou manatu, e faapefea e le tatalo mo le malosi ona fesoasoani ia te oe e te faamagalo atu ai?
Suesue le Mataupu Faavae ma Feagaiga 64:12–14. Ia matau na aoao mai le Alii, o a tatou filifiliga e faamagalo atu i isi, e le aveesea ai i latou mai le nafa ma a latou amioga. Latou te tali atu lava i le Alii mo mea sese na latou faia.
Faitau le Mataupu Faavae ma Feagaiga 64:15–17, ma matau, na fetalai patino mai le Alii, o le a Ia faamagalo le toalua o Ana auauna, o Isaako Morley ma Eteuati Paterika, aua o le a salamo i la’ua i a laua agasala.
I le amataga o le lesona lenei, ua e aoaoina ai o le Alii e agaalofa, loto faamagalo, ma alofa mutimutivale. A e faamagalo atu, e mafai ona avea atili oe e faapei o Ia. Filifili pe faapefea ona e faaaogaina mataupu faavae o le faamagaloga ua e aoaoina i le aso.
Faaalu ni nai minute e faitau leotele ai le Mataupu Faavae ma Feagaiga 64:9–11. O le taimi lava e te taulotoina ai le mau e le itiiti ifo ma le faalima, ona su’e lea o sou tei, se matua, po o se uo o le a fesoasoani ia te oe e faataitai le taulotoina o le mau. Fai atu le mau i lenei tagata seia oo ina mafai ona e taulotoina mai lou manatua. Faamalamalama atu i le tagata auala e mafai ona fesoasoani ai mataupu faavae o loo i nei fuaiupu ia te oe i lou olaga atoa. Ona fai atu lea i le tagata e saini le faamatalaga o le aso lenei i lau api talaaga mo le suesueina o tusitusiga paia.
Tusi le faamatalaga lenei i lalo o le galuega atofaina o le aso i lau api talaaga mo le suesueina o tusitusiga paia: