I le aso 8 o Mati, 1833, na tuuina mai ai e le Alii le faaaliga ua faamaumauina i le Mataupu Faavae ma Feagaiga 90, lea o loo i ai faatonuga i le Au Peresitene o le Perisitua Maualuga. “O lenei faaaliga o se laasaga faaauau pea i le faatuina o le Au Peresitene Sili” (MF&F 90 folasaga o le vaega). O le aso na sosoo ai, sa ole atu ai le Perofeta o Iosefa Samita pe tatau ona ia faaliliuina le Apokalifa o se vaega o lana faaliliuga musuia i le Tusi Paia. Sa tali mai le Alii i lana fesili e ala i le faaaliga ua faamaumauina i le Mataupu Faavae ma Feagaiga 91 ma ta’u mai ia Iosefa sa le manaomia ona ia faaliliuina. Na o ni nai aso mulimuli ane, i le aso 15 o Mati, 1833, na maua ai e le Perofeta se faaaliga (MF&F 92) lea na faatonuina ai Feterika G. Viliamu, o se tasi o fesoasoani i le Perofeta, i ona tiute i le Kamupani Tuufaatasi, lea sa faatuina e vaaia le uelefea ma mataupu faapisinisi a le Ekalesia.
Ua faatonu e le Alii le Au Peresitene o le Perisitua Maualuga e faatatau i o latou tiutetauave
O le a le meaalofa aupito sili ona taua na e mauaina? Aisea e taua ai?
Faitau le Mataupu Faavae ma Feagaiga 90:1–3, ma vaavaai mo mea taua na tuuina mai i le Perofeta o Iosefa Samita. E tusa ai ma nei fuaiupu, o le a le mea na umia e le Perofeta?
O le fuaitau “ki o le malo” e faatatau i aia tatau o le au peresitene, po o le pule ua tuuina mai e le Atua i le tagata e pulefaamalumalu ai, pulea, ma taitai ai Lona malo i luga o le fogaeleele.
Faitau le Mataupu Faavae ma Feagaiga 90:4–5, ma faailoa mai le lapataiga na tuuina mai e le Alii i le Au Paia. E pei ona faaaogaina i nei fuaiupu, o le faaupuga faaaliga e faatatau i faaaliga mai le Atua e ala i Ana perofeta.
Ata
Peresitene Thomas S. Monson i le pulelaa
Atonu e te manao e tusi le mataupu faavae lenei i autafa o au tusitusiga paia i talane o le fuaiupu e 5: Afai tatou te taulimaina ma le manatu mama ia faaaliga e tuuina mai e le Atua e ala i Ana perofeta, o le a tatou tautevateva ma pauu.
Tali fesili nei i lau api talaaga mo le suesueina o tusitusiga paia:
O le a sou manatu i le uiga o le taulimaina “e pei o se mea māmā” o faaaliga e tuuina mai e le Atua e ala i Ana perofeta (MF&F 90:5)?
O a nisi o faataitaiga o faaaliga e ono faaosoosoina tagata e manatu i ai e pei o se mea mama?
Faitau le Mataupu Faavae ma Feagaiga 90:6, ma vaavaai po o ai le isi na fetalai mai le Alii o le a umia ki o le malo. Atonu e te manao e faailoga upu po o fuaitau i lenei fuaiupu o loo aoao mai le upumoni e faapea, o le Au Peresitene Sili e umia ki o le malo. (O sui o le Korama a Aposetolo e Toasefululua o le a tuuina foi i ai ki o le malo ina ua faatulagaina lena korama i le 1835. O le latou faaaogaina o nei ki o le a i lalo o le taitaiga a le Peresitene o le Ekalesia.)
I le aso 18 o Mati, 1833, i le 10 o aso talu ona uma ona tuuina mai le faaaliga o loo i le Mataupu Faavae ma Feagaiga 90, na vaetofia ai e Iosefa Samita ia Sini Rikitone ma Feterika G. Viliamu e avea ma fesoasoani i le Au Peresitene o le Perisitua Maualuga, lea na ta‘ua mulimuli ane o le Au Peresitene Sili o le Ekalesia.
O leMataupu Faavae ma Feagaiga 90:7–10 o loo i ai faatonuga i le Au Peresitene Sili mo le saunia o tagata o le Aoga a Perofeta e talai atu le talalelei i le lalolagi atoa. Faitau le Mataupu Faavae ma Feagaiga 90:11, ma mafaufau pe o faapefea ona faataunuuina lenei fuaiupu i aso nei.
O leMataupu Faavae ma Feagaiga 90:12–18 o loo faamatala mai ai nisi o tiutetauave o le Au Peresitene Sili, lea e aofia ai le faatulagaina tatau o mataupu uma o le Ekalesia. Ona o le Au Peresitene Sili e umia ki o le malo, o le a faamanuiaina oe a o e mulimuli i a latou aoaoga.
O le a lau mea e fai pe a oo ina matuai faigata tulaga i lou olaga?
Ina ua maua e le Perofeta o Iosefa Samita le faaaliga i le Mataupu Faavae ma Feagaiga 90, sa i ai o ia ma isi taitai o le Ekalesia i se tulaga faigata ona o le leai o ni punaoa tautupe a le Ekalesia. O leMataupu Faavae ma Feagaiga 90:19–37 o loo i ai faatonuga a le Alii i uluai taitai o le Ekalesia i le auala e taulima ai tulaga faigata na latou feagai.
Faitau le Mataupu Faavae ma Feagaiga 90:24, ma faailoa mai fautuaga e mafai ona faamafanafanaina ai soo se tasi atonu o feagai ma se tulaga faigata.
Faauma le mataupu faavae lenei e faavae i luga o le folafolaga a le Alii i le fuaiupu e 24: Afai tatou te ma le filiga, i taimi uma, ia , ma tausia a tatou , o le a galulue faatasi mea uma mo lo tatou lelei.
O le saili ma le filiga, e tele atu mea e aofia ai nai lo na o le faitauina o tusitusiga paia. Na saunoa mai Peresitene Harold B. Lee: “O le filiga o lona uiga ia galulue malosi, o le faafeagai o le paie po o le faatamala po o le le manatu popole. I se isi faaupuga, e tatau ona latou saili ia iloa aoaoga faavae o le Ekalesia” (Stand Ye in Holy Places: Selected Sermons and Writings of President Harold B. Lee [1974], 198).
O le a sou manatu i le uiga o le, “o le a galulue faatasi mea uma mo lo outou lelei” (MF&F 90:24)?
E le faapea e leai se mea leaga o le a tupu ia i tatou. Nai lo lena, o lona uiga o le a faamalosia e le Atua i tatou i taimi o faigata, pe afai tatou te faamaoni ma o o tatou luitau e mafai ona aumaia ia i tatou aafiaga ma faamanuiaga e manaomia.
I lau api talaaga mo le suesueina o tusitusiga paia, tusi e uiga i se aafiaga na tupu ia te oe pe na [e] molimauina i le olaga o se isi tagata e faaalia ai le moni o lenei mataupu faavae.
O se tasi o tagata o le Ekalesia na faaalia le maoae o le faamaoni i taimi faigata o Vienna Jaques. Suesue i le Mataupu Faavae ma Feagaiga 90:28–31, ma faailoa mai faatonuga faapitoa na tuuina mai e le Alii ia te ia. Suesue i le faamatalaga lenei e uiga ia Tuafafine Jaques, ma vaavaai mo auala sa faamaoni ai o ia i faatonuga a le Alii. A o e suesue i lenei mea, atonu e te manao e vase lalo o nisi o tulaga faigata sa oo ia Vienna (taumafai e saili ia le itiiti ifo ma le tolu).
Ata
Vienna Jaques
Vienna Jaques
O Vienna Jaques o se faataitaiga o le faamaoni o le toatele o uluai Au Paia o Aso e Gata Ai. Sa fanau o ia i le aso 10 o Iuni, 1787. Ina ua uma ona ia feiloai atu i faifeautalai i Boston, Massachusetts, ISA, sa malaga atu o ia i Katelani, Ohaio, i le 1831. E ono vaiaso sa nofo ai iina ma sa papatisoina ai. Ina ua toe foi atu i Boston, na fesoasoani Vienna e aumai nisi o tagata o lona aiga i le Ekalesia. Ona ia “faatau atu lea o lana pisinisi ma toe foi atu i Katelani e tuufaatasia ai lona fiafia e faavavau ma le Ekalesia” (“Home Affairs,” Woman’s Exponent, July 1, 1878, 21). I le 1833, na tuuto atu ai e Vienna ana meatotino uma, e aofia ai le $1,400, i le Ekalesia i se vaitaimi sa matuai manaomia ai lava le tupe. Ona malaga atu ai lea o ia i Misuri ina ia maua lona tofi i Siona. Ae peitai, e lei umi ona taunuu ae mafatia o ia i sauaga faatasi ma le Au Paia. Ina ua uma ona tuli ese mai lona fale i Misuri, sa tausima’i o ia i tagata mamai i le Tolauapiga a Siona. Na tusia e Heber C. Kimball, “Na ou mauaina le agalelei tele … mai ia Sister Vienna Jaques, o le na tali mai i o’u manaoga ma faapea foi i o’u uso—talosia ia tauia o [ia] e le Alii mo [lona] agalelei” (“Extracts from H. C. Kimball’s Journal,” Times and Seasons, Mat. 15, 1845, 839–40).
A’o i ai i Misuri, sa faaipoipo ai Vienna Jaques ia Daniel Shearer. I le 1847, i le 60 o ona tausaga, sa malaga atu ai o ia i sisifo i Iuta, na tosoina lana lava taavaletoso e sopoia ai laufanua valevalenoa. Sa faamautu o ia i le Aai o Sate Leki ma mo aso na totoe o lona olaga, sa galue malosi ai e tausi o ia lava ma filiga i le suesueina o tusitusiga paia. Na maliu Sister Jaques i le aso 7 o Fepuari, 1884, i le 96 o tausaga o lona soifua. Na ta’ua i le talaaga o lona soifuaga: “Sa faamaoni o ia i ana feagaiga ma manatu i le toefuataiga o le Talalelei o se oa tautele” (“In Memoriam,” Woman’s Exponent, Mat. 1, 1884, 152; tagai foi i le Susan Easton Black, “Happiness in Womanhood,” Ensign, Mar. 2002, 12, 14).
I lau api talaaga mo le suesueina o tusitusiga paia, tusi se mea ua e aoaoina e uiga i puapuaga ma le faamaoni mai le faataitaiga a Vienna Jaques.
Ua faatonu e le Faaola ia Iosefa Samita e aua le faaliliuina le Apokalifa
E mafai faapefea ona e iloa e sa’o se mea e te faitauina i luga o le initoneti po o se nusipepa po o se mekasini? O le faaaliga o loo tusia i le Mataupu Faavae ma Feagaiga 91 na faatonuina ai le Perofeta o Iosefa Samita i le auala e iloatino ai pe sa moni se mea sa ia faitauina. Faitau le folasaga o le vaega, ma vaavaai mo le mea na fai e Iosefa Samita i le taimi na ia mauaina ai le faaaliga lenei.
O le Apokalifa o se tuufaatasiga o tusi e paia a tagata Iutaia. Sa le’i aofia ai muamua i latou i le Tusi Paia faa-Eperu, ae sa faaaofia ai i le faaliliuga faa-Eleni o le Tusi Paia i le taimi o Keriso. O nisi o tusi e faafesootai ai le vaitau i le va o le Feagaiga Tuai ma le Feagaiga Fou. Ina ua tuufaatasi e uluai tagata Kerisiano ia tusi o le Tusi Paia i seneturi mulimuli ane, sa latou faaaofia ai ma tusi o le Apokalifa, ae sa i ai ni fesili pe sa latou i ai o se vaega o tusitusiga paia. O le kopi o le Tusi Paia sa faaaoga e Iosefa Samita a o galue ai i lana faaliliuga musuia sa i ai le Apokalifa. Ae peitai, talu ai ona sa fesiliga le aoga o le Apokalifa, na ole atu ai Iosefa i le Alii pe e tatau ona aofia ai nei tusi i lana faaliliuga o le Tusi Paia.
Faitau le Mataupu Faavae ma Feagaiga 91:1–3, ma vaavaai mo le mea na aoaoina e le Perofeta o Iosefa Samita e uiga i le Apokalifa. OFaaopoopoga [Interpolations] o ni faaopoopoga i se tusitusiga lea e i ai nisi o taimi e suia ai le uiga ma faaleagaina ai le uluai tusiga.
Faitau le Mataupu Faavae ma Feagaiga 91:4–6, ma faailoa mai pe faapefea ona iloa e i latou o e e suesue ai po o a mea na moni i le Apokalifa.
Mai nei fuaiupu e mafai ona tatou aoao mai le upumoni lenei: O le Agaga Paia e mafai ona fesoasoani tatou te iloa ai pe sa’o mea tatou te faitau i ai.
Na aoao mai Peresitene Dieter F. Uchtdorf o le Au Peresitene Sili:
Ata
Peresitene Dieter F. Uchtdorf
“E lei i ai lava i le talafaasolopito o le lalolagi se taimi na faigofie ai lo tatou mauaina o le tele o faamatalaga—o nisi e sao, o nisi e sese, ma o le tele lava e i ai ni nai mea moni.
“O le taunuuga la, e le’i i ai lava i le talafaasolopito o le lalolagi le sili atu ona taua o le aoao ia iloa ona iloatino moni le va o le upumoni ma le mea sese. …
“O le Agaga Paia o se talifaaaliga. O Ia o le Fesoasoani, o loo aoao mai ia i tatou ‘le moni o mea uma.’ …
“O le Molimau o le upumoni mai le Agaga Paia e avanoa mo tagata uma, i soo se mea, ma i le kelope atoa. O i latou uma o e saili ia iloa le upumoni, o e suesue i ai i o latou mafaufau, ma o e e ‘ole atu ma le loto faamaoni, ma le manatu moni i ai, ma le faatuatua ia Keriso, [o le a iloa] le moni … i le mana o le Agaga Paia.’ [Moronae 10:4.]” (“O Le A Le Upu Moni?” [lauga i le faigalotu a le Ofisa o Aoga a le Ekalesia, 13 Ian. 2013], 3, 6; speeches.byu.edu).
I lau api talaaga mo le suesueina o tusitusiga paia, tusi e uiga i se aafiaga na e lagona ai le faamautu atu e le Agaga Paia o se mea na e faitauina, ua moni.
E tatau ona taliaina ia Feterika G. Viliamu i totonu o le Kamupani Tuufaatasi
O le faaaliga o loo i ai i le Mataupu Faavae ma Feagaiga 92 na faatonuina ai taitai o le Ekalesia o e na avea o se vaega o le Kamupani Tuufaatasi (lea sa ta’ua foi o le Faatulagaga Tuufaatasi) ia talia Feterika G. Viliamu i le kamupani. Faitau le Mataupu Faavae ma Feagaiga 92:1–2, ma faailoa mai pe na faapefea ona finagalo le Alii ia Uso Viliamu e galue o se tasi o sui o le kamupani.
“O se tagata toaga” o se vaega o se tasi e toaga ma tuuto. Filifili ni tulaga nei se lua pe sili atu, ma i lau api talaaga mo le suesueina o tusitusiga paia, tusi ai po o a ni mea e ono faia e “se tagata toaga” o le Ekalesia i nei tulaga.
Ua tofia se alii talavou e avea ma se faiaoga o aiga.
Ua valaauina se tagata o le autalavou e avea ma se peresitene o se vasega a Tamaitai Talavou po o le korama a le perisitua.
O se tagata talavou o se tagata aoga i se vasega o le Aoga Sa.
O se tagata talavou o se tuaoi a se ulugalii matutua.
Mafaufau loloto i se mea e mafai ona e faia e avea ai ma se tagata toaga o le Ekalesia i aso nei.
I le Mataupu Faavae ma Feagaiga 92:2, na aoaoina foi e le Alii ia Feterika G. Viliamu i le mea e ao ona ia faia ina ia “faamanuiaina e faavavau.” Atonu e te manao e faailoga le faatonuga lenei i au tusitusiga paia.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia: