E le’i leva ona mavae le toefuataiga o le Perisitua Arona ia Me 1829, ae asiasi mai le uso o Iosefa Samita o Ailama ma Iosefa Knight le Matua, i le Perofeta i Heremoni, Penisilevania. Sa tau fai faailoa atu e nei alii lo la manao e auauna atu i le Atua ma fesoasoani i le Toefuataiga. O le Mataupu Faavae ma Feagaiga 11 ma le 12 o loo i ai le afioga a le Alii ia Ailama Samita, ma le afioga a le Alii ia Iosefa Knight le Matua, e uiga i le auala e mafai ona la fesoasoani ai e aumai i luma le galuega a le Atua.
Ua iloa e Ailama Samita le auala e mafai ona ia fesoasoani ai e aumai i luma le galuega a le Alii
Pe sa e manao ea e auai i se faamoemoega aoga sa e manatu o le a manuia ai olaga o tagata ma le lalolagi? O le lagona lena sa i ai i le toatele o tagata e uiga i le Ekalesia i aso popofou o le Toefuataiga. O le mea moni, o le lagona lena sa i ai i le toatele e uiga i le auauna atu i le Ekalesia—le malo o le Atua i le lalolagi—i aso nei. I le vaega 11 ma le 12 o le Mataupu Faavae ma Feagaiga, na fautuaina ai e le Alii ia Ailama Samita ma Iosefa Knight le Matua e uiga i lo laua auai i le galuega a le Alii. Faitau le Mataupu Faavae ma Feagaiga 11:27 ma le 12:7 e iloa ai po o ai isi na faatatau i ai le Alii i nei faaaliga.
Ata
Ailama Samita
E masalo sa silafia lava e Ailama Samita, le uso matua o Iosefa, ia mea e le’i leva atu ona tutupu, e pei o le faagasologa o le faaliliuina o le Tusi a Mamona ma le toefuataiga o le Perisitua Arona. Sa ia fia iloa pe mafai faapefea ona fesoasoani atu ia Iosefa i le galuega a le Alii. Sa ole atu Iosefa i le Alii ma maua mai ai le faaaliga o loo i le Mataupu Faavae ma Feagaiga 11 mo Ailama. Faitau le Mataupu Faavae ma Feagaiga 11:3, 8, 10, 14, 17, 21, ma le 27, ma matau ia upu manao, manaoga, ma ua manao. Mafaufau e uiga i lagona faamaoni e tatau ona i ai i se tagata ua manao moni e fesoasoani i le galuega a le Alii.
Fai ni koluma se lua i lau api talaaga mo le suesueina o tusitusiga paia. Faaigoa le [koluma] muamua Faamanuiaga folafolaina, ona o ona manaoga amiotonu. Faaigoa le lona lua O mea sa tatau ona ia faia na te maua ai na faamanuiaga. Faitau le Mataupu Faavae ma Feagaiga 11:5–8. I le koluma muamua, fai se lisi o faamanuiaga na folafola mai e le Alii ia Ailama Samita e faatatau i lona manao e fesoasoani i le galuega a le Alii. I le koluma lona lua, lisi ai mea na manaomia ona faia e Ailama ina ia maua ai na faamanuiaga faalelagi.
A o e suesueina nei fuaiupu, atonu ua e mauaina ai upumoni nei: E mafai ona tatou maua faamanuiaga mai le Atua e tusa ai ma o tatou manaoga amiotonu. Afai tatou te mananao e fai le galuega a le Atua, o le a avea i tatou ma ala o le faia o mea lelei e tele.
Faauma gaoioiga nei i lau api talaaga mo le suesueina o tusitusiga paia:
Tusi ni nai tali i le fesili lenei: O le a se mea e mafai ona e faia e “avea ai ma ala o le faia o mea lelei e tele” i lau tupulaga?
Faitau le Mataupu Faavae ma Feagaiga 11:9–14, ma vaavaai mo le fautuaga na tuuina mai e le Alii, o le a faapea ona fesoasoani ia Ailama i le ausiaina o mea lelei e tele. Tusi le fautuaga a le Alii ia Ailama i lau api talaaga mo le suesueina o tusitusiga paia, ma vaai pe tutusa Lana fautuaga ma nisi o manatu na e tusia i lalo.
Mai le fautuaga na maua e Ailama, ua tatou aoao ai o le Agaga o le Alii e taitaia i tatou e fai mea lelei, ia lotomaualalo, ma ia faamasino ma le amiotonu. E faamalamalamaina foi e le Agaga o tatou mafaufau ma faatumulia o tatou loto i le olioli. Atonu e aoga le fefaasinoa’i o nei upumoni i le Mataupu Faavae ma Feagaiga 11:12–13 ma le fuaitau o le mau tauloto i le Mataupu Faavae ma Feagaiga 8:2–3.
Faaalu sina taimi e mafaufau ai i tulaga ia na e lagonaina ai le Agaga. I lau api talaaga mo le suesueina o tusitusiga paia, tusi e uiga i se tasi pe sili atu o aafiaga nei na e oo i ai:
O se aafiaga na faapea ona taitaiina ai oe e le Agaga e fai mea lelei
O se aafiaga i se taimi na uunaia ai oe e le Agaga ia e lotomaualalo
O se aafiaga i se taimi na fesoasoani ai le Agaga ina ia e faamasino ma le amiotonu
O se aafiaga i se taimi na faamalamalamaina ai oe e le Agaga e uiga i se mataupu po o se tulaga patino
Ua poloaiina e le Alii ia Ailama Samita e saunia mo lona valaauga e talai atu
Vaai faalemafaufau i le maimoaina o amataga o mea ua e lagonaina o le a avea ma se faamoemoega silisili i le lalolagi, ma le iloa e mafai ona avea oe ma sona vaega. O le a le tele o lou taimi o le a e faaaluina e mafaufau ai i le faamoemoega ma le fuafuaga ma sauniuni e auai ai? Faitau le Mataupu Faavae ma Feagaiga 11:15–16, ma vaavaai mo le mea na finagalo le Alii ia Ailama Samita e fai.
Aisea e te manatu o le a poloai ai le Alii ia Ailama e “faatali umi laitiiti atu”? Mafaufau i mea moni e faapea, o le a le faatulagaina aloaia le Ekalesia mo nai nisi masina ma sa le’i maea i le taimi lea le lomiaina o le Tusi a Mamona. O a ni auala, e te manatu o le a faia e nei mea o le a tutupu i le lumanai, se aafiaga i tapenapenaga a Ailama e fesoasoani ai i le galuega a le Alii?
Faitau le Mataupu Faavae ma Feagaiga 11:18–20, ma vaavaai mo le mea na fetalai mai le Alii o le a manaomia ona fai e Ailama, ina ia avea ai ma se meafaigaluega tauaogaina i aao o le Alii.
Tali se fesili e tasi pe sili atu o loo i lalo, i lau api talaaga mo le suesueina o tusitusiga paia:
E mafai faapefea e se tagata talavou o loo sauniuni mo se misiona ona “aioi atu i [le] Agaga”?
O le a sou manatu i le uiga o le “pipii i [le Alii] ma lou loto atoa”?
O le a le mea ua fetalai mai le Alii e te “fesoasoani i le aumaia i le malamalama”?
I le faaaogaina o le Mataupu Faavae ma Feagaiga 11:18–20, tusi se mataupu faavae o loo ta’u mai ai ni nai auala taua e mafai ona e sauniuni ai e auauna i le malo o le Alii:
Faitau le Mataupu Faavae ma Feagaiga 11:21–22, ma faailoa mai se isi mea na fetalai mai le Alii, o le a manaomia ona fai e Ailama Samita e fesoasoani ia avea ai o ia ma se faiaoga mataalia o le talalelei. O le a le mea na ta’u mai e le Alii ia Ailama o le a manaomia ona ia faia, ina ia mafai ona ia folafola atu Lana upu?
Ata
faifeautalai o loo faitauina tusitusiga paia
O le a sou manatu, o le a le mea e eseese ai le suesue i tusitusiga paia ina ia “maua [le] upu [a le Alii]” mai le na o le faitauina o tusitusiga paia? O i latou o e suesue i le upu a le Alii, o le a maua Lona Agaga ma le mana e faatalitonu ai isi i le moni o le talalelei.
Ina ia vaai pe na tausia e Ailama poloaiga a le Alii ma mulimuli i Lana fautuaga, vaai i le folasaga o le vaega o le Mataupu Faavae ma Feagaiga 11 ma matau le aso na maua mai ai lena faaaliga. Ona su’e atu lea i le folasaga o le vaega o le Mataupu Faavae ma Feagaiga 23 ma matau le aso o lena faaaliga. O le fia o masina mulimuli ane na maua ai e le Porofeta o Iosefa Samita le faaaliga o loo i le Mataupu Faavae ma Feagaiga 23?
Mafaufau i le fautuaga a Elder David A. Bednar o le Korama a Aposetolo e Toasefululua, na tuuina atu i alii talavou i le taimi o se sauniga perisitua o le konafesi aoao: “O lo’u faamoemoe moni mo outou alii talavou o le aua ne’i na ona outou o i se misiona—ae ia avea outou ma ni faifeautalai a o lei taitai ona auina atu a outou pepa o le misiona, a o lei taitai ona e maua se valaauga e auauna atu, a o lei taitai ona vaetofia oe e lau pereistene o le siteki, a o lei taitai ona e ulufale atu i le MTC” (“Avea ma se Faifeautalai,” Ensign po o le Liahona, Nov. 2005, 45).
I lau api talaaga mo le suesueina o tusitusiga paia, tusi e uiga i nisi o mea ua uunaia oe e faataunuu pe suia i masina a sau, ina ia fesoasoani ai ia te oe ina ia e maua lelei le upu a le Atua.
Ua fautua mai le Alii ia Iosefa Knight le Matua, i le auala e mafai ona ia fesoasoani ai e faatu le faamoemoe o Siona
Mafaufau i igoa o ni nai tagata lauiloa i le talafaasolopito. O a ni uiga auaumama ua lauiloa ai i latou mo le mauaina?
Faitau le folasaga o le vaega o le Mataupu Faavae ma Feagaiga 12 e te aoao ai e uiga ia Iosefa Knight le Matua, ma se faataitaiga o lona sao i le malo o le Atua.
Atonu e te matauina o fetalaiga a le Alii i le Mataupu Faavae ma Feagaiga 12:1–6 e tutusa lava ma Ana fetalaiga i le Mataupu Faavae ma Feagaiga 11:1–6. E masani ona toe fofoga mai e le Alii ia ana lava faatonuga i ni tagata eseese—“ou te fai atu ai i le toatasi Ou te fai atu ai i tagata uma” (MF&F 82:5). E faapena le tulaga o Ailama Samita (MF&F 11) ma Iosefa Knight le Matua (MF&F 12); o nisi faatonuga e tutusa lava.
E ui lava e Iosefa Knight le Matua sa le o se tagata lauiloa o le Ekalesia anamua, ae sa ia faia mea lelei e tele i le fausiaina o le malo o le Atua. Sa ia lagolagoina le Perofeta i mea taumafa ma isi sapalai i le taimi o le galuega taua o le faaliliuga. Faitau le Mataupu Faavae ma Feagaiga 12:6–8, ma faailoga uiga amiotonu na fetalai mai le Alii e manaomia mo i latou o e e mananao e fesoasoani i le galuega a le Alii. Mafaufau loloto i auala o loo e atiina ae ai nei uiga i lou olaga.
Sa taumafai pea lava pea ia Iosefa Knight le Matua e ola i nei uiga amiotonu. Sa ia fesoasoani i le Perofeta i lana auaunaga atoa i le faaletino ma le faaleagaga. E tele ni tausaga na mavae talu ona maua e le Perofeta o Iosefa Samita le faaaliga i le Mataupu Faavae ma Feagaiga 12, na ia faamaumauina le faamatalaga lenei: “O Iosefa Knight le Matua, … sa faamaoni ma amio sao, ma fai mea tutusa [fea] ma se faataitaiga lelei, e amio mama ma agalelei, e le matele i le lima taumatau po o le tauagavale. … O ia o se tagata amiotonu” (i le History of the Church, 5:124).
Ina ia fesoasoani e te toe mafaufau i, ma faaaoga mea ua e aoaoina i le aso, ia faauma le fasifuaitau lenei i lau api talaaga mo le suesueina o tusitusiga paia: Ina ia mafai ona fesoasoani i le Alii i Lana galuega, o le a ou …
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia: