O lesona lenei o loo aofia ai le vaega na totoe o se tusi na tusia e le Perofeta o Iosefa Samita i le Au Paia i le amataga o Setema 1842. I le vaega lenei o le tusi, na aoao mai ai le Perofeta e uiga i le faaolataga o e ola ma e oti. Sa ia uunaia foi le Au Paia ina ia faamaoni i a latou galuega mo e ua maliliu, ma faailoa mai lona olioli i le Toefuataiga o le talalelei.
Ua aoao mai Iosefa Samita e uiga i le faaolataga o e ola ma e oti
Ata
faatanoa o le vai papatisoga o le malumalu
Vaai faalemafaufau e faapea, o loo oulua o atu ma se uo e le auai i le Ekalesia i se fale tatala o le malumalu. A o oulua savavali solo i le potu mo papatisoga, na fesili atu lau uo, “Aisea tou te papatiso ai mo tagata ua maliliu?” E fesili atu foi lau uo, “O ta’u mai le papatisoga mo e ua maliliu i totonu o le Tusi Paia?”
A o e suesueina le lesona o le aso, o le a e iloa ai mataupu faavae e mafai ona fesoasoani ia te oe e tali ai fesili nei.
Atonu e te manatuaina mai lesona na muamua atu, ia Setema 1842, sa lafi ai le Perofeta o Iosefa Samita mai tagata o e sa su’eina faasolitulafono o ia e taofia. A’o lafi [o ia], sa ia tusia se tusi i le Au Paia. I lenei tusi sa ia aoaoina ai i latou e uiga i le papatisoga mo e ua maliliu.
I lau api talaaga mo le suesueina o tusitusiga paia, tusi ni nai laina e faamatala ai ni auala e mafai ona e faaaogaina ai aoaoga o loo i fuaiupu 12-13 e fesoasoani ai i se tasi ia malamalama i le mafuaaga e faatofu ai le faiga o papatisoga.
A o e faitauina le Mataupu Faavae ma Feagaiga 128:14, ia matau le auala na faamamafa mai ai e Iosefa Samita le taua o le tausia o se faamaumauga lelei i luma o le Alii, e faatatau i le galuega o le faaolataga mo e ua maliliu.
I le fuaiupu e 15, o le fuaitau “e lē mafai ona faaatoatoaina o i latou e aunoa ma i tatou” o lona uiga o tatou tuaa ua maliliu e aunoa ma le talalelei e le mafai ona alualu i luma i le atoatoa seiiloga e uma ona faia sauniga faaola o le talalelei mo i latou.
Faitau le faamatalaga lenei, ma maka fuaitau o loo ta’u mai ai le auala e mafai ona e fesoasoani ai i ou tuaa o e ua maliliu ae le’i mauaina le talalelei:
“O ou tuaa ua maliliu o loo nonofo i se nofoaga e ta’ua o le lalolagi o agaga. O iina o loo latou maua ai le avanoa e faalogo ma talia ai le talalelei a Iesu Keriso. Ae peitai, e le mafai ona latou maua sauniga o le talalelei mo i latou lava, ma e le mafai ona latou alualu i luma seiiloga e faia e isi nei sauniga mo i latou.
“O lou avanoa ma le tiutetauave o le tuuina atu i ou tuaa o lenei meaalofa e ala i le sueina o i latou ma faamautinoa ua faia sauniga mo i latou i le malumalu. E mafai lea ona latou filifili pe talia le galuega ua faia” (Member’s Guide to Temple and Family History Work [2009], 2).
Tali le fesili lenei i lau api talaaga mo le suesueina o tusitusiga paia: O le a sou manatu, o a ni lagona atonu e oo i ou tuaa pe a e papatiso mo i latou? Afai na e maua le avanoa e auai ai i papatisoga mo e ua maliliu, ia tusi foi e uiga i ou lagona sa i ai i le taimi o lena aafiaga.
Toe faamanatu le Mataupu Faavae ma Feagaiga 128:15, ma vaavaai mo se isi mafuaaga tatou te faia ai papatisoga mo e ua maliliu. E faavae i mea ua e aoaoina, faauma le mataupu faavae lenei: O le faaolataga o o tatou tuaa ua maliliu e i lo tatou faaolataga.
A o faaauau ona e suesue i le Mataupu Faavae ma Feagaiga 128, mafaufau loloto pe aisea e taua ai i lo tatou faaolataga le faia o galuega o talafaasolopito o aiga ma galuega faalemalumalu mo o tatou tuaa ua maliliu.
Faitau le Mataupu Faavae ma Feagaiga 128:16–17, ma vaavaai mo aoaoga mai se Aposetolo i le Feagaiga Fou ma se perofeta i le Feagaiga Tuai. Aisea atonu e aoga ai le iloa o le aofia i le Tusi Paia o aoaoga e uiga i le galuega mo e ua maliliu?
Pe ua e vaai lelei lava i se filifili uamea? Ina ia malosi se filifili, o sooga taitasi e uelo faamau pe a uma ona sosoo i se isi sooga.
Ata
sootaga o le filifili
Faitau le Mataupu Faavae ma Feagaiga 128:18, ma vaavaai pe faapefea ona fesootai sooga o se filifili i aoaoga a le Perofeta o Iosefa Samita e uiga i le papatisoga mo e ua maliliu. (Manatua o se tisipenisione o se periota o taimi e faaali mai ai e le Alii ia Ana aoaoga faavae, mataupu faavae, sauniga, ma le perisitua [tagai Bible Dictionary, “Dispensations”]. I le fuaiupu lenei, o le upu fanau e faatatau ia i tatou ae o le upu tamā e faatatau i o tatou tuaa.)
Atonu e te manao e tusi le aoaoga faavae lenei i totonu o au tusitusiga paia i tafatafa o le fuaiupu e 18: O papatisoga mo e ua maliliu e fesoasoani e fesootai atu ai i tatou e faavavau i o tatou tuaa.
E faaopoopo atu i le papatisoga, o isi sauniga faaola—o le faamauga, faauuina i le perisitua Mekisateko (mo alii), o le faaeega paia i le malumalu ma le sauniga o le faamauga—e taua foi e faamau lelei ai le sosooga o le sooga i le va o o tatou tuaa ma i tatou lava.
Ina ia faateleina lou malamalama i upumoni i le Mataupu Faavae ma Feagaiga 128, suesue i le saunoaga lenei a Peresitene Iosefa Filitia Samita:
Ata
Peresitene Iosefa Filitia Samita
“Ua mafaufau nisi o tagata o le Ekalesia po o le a tonu le uiga o le saunoaga a le Perofeta, e faapea, a aunoa ma o tatou aiga ua maliliu e le mafai ona faaatoatoaina i tatou. Mata e maua e se tagata o le e tausia poloaiga a le Alii, o le e faamaoni ma amiosao e tusa ai ma ia lava, le atoatoa? Ioe, pe afai lena e maua foi e ona tuaa ua maliliu ia lava avanoa e tasi, aua e ao lava ona i ai se faalapotopotoga o le aiga, se iunite o le aiga, ma e ao lava ona sosooina tupulaga taitasi i le filifili na i ai muamua ina ia mafai ona aumaia le atoatoa i le faalapotopotoga o le aiga. O le iuga la, o le a avea i tatou o se aiga tele e tasi faatasi ma Atamu i le ulu, ma Mekaeli, le agelu sili e pulefaamalumalu i lana fanau” (Doctrines of Salvation, tuufaatasia Bruce R. McConkie, 3 vols. [1954–56], 2:175).
E tusa ai ma le Mataupu Faavae ma Feagaiga 128:18, aisea e taua ai le avea ma se vaega o lenei filifili o tagata o e ua sosooina pe faamauina faatasi?
O faamatalaga nei e mafai ona fesoasoani e te malamalama ai po o le a le mea e faatatau i ai le fetuu o loo i le fuaiupu e 18:
Ata
Peresitene Iosefa Filitia Samita
Na saunoa mai Peresitene Iosefa Filitia Samita: “Afai e leai se sootaga mau i le va o tama ma le fanau—o le galuega lea mo e ua maliliu—ona lona uiga o le a teenaina i tatou uma; o le a toilalo le galuega atoa a le Atua ma matuai maimau lava” (Doctrines of Salvation, 2:122).
Ata
Elder L. Tom Perry
Na aoao mai Elder L. Tom Perry o le Korama a Aposetolo e Toasefululua: “O le aiga faavavau o le totonugalemu lea o le talalelei a lo tatou Faaola. O le a leai se mafuaaga mo Ia e toe foi mai ai i le lalolagi ma nofotupu ai i Lona malo sei vagana ai ua faavaeina le iunite faaleaiga e faavavau mo fanau a lo tatou Tama o i le Lagi. Afai tatou te malamalama i le matafaioi e faavavau o le aiga, o le faafaileleina ma le fausiaina o ni sootaga malolosi faaleaiga e faaauauina pea i ni tulaga sili atu ona taua” (“Tupulaga o le Tofi Tautupu,” Ensign, Nov. 1998, 74).
Tali le fesili lenei i lau api talaaga mo le suesueina o tusitusiga paia: E faavae i mea ua e aoaoina i au suesuega o le Mataupu Faavae ma Feagaiga 128, aisea e taua ai galuega o talafaasolopito o aiga ma galuega faalemalumalu mo lo tatou faaolataga?
Ua faailoa atu e Iosefa Samita le olioli i le Toefuataiga o le talalelei ma uunaia le Au Paia ina ia faamaoni, a o latou galulue mo le faaolataga o e ua maliliu
Mafaufau i se taimi na e fiafia ai i le faalogoina o se tala sili ona fiafia. Ina ua e faalogo i ai, sa e manao e faasoa atu lena [tala fiafia] i isi? Aisea?
Faitau le Mataupu Faavae ma Feagaiga 128:19. O le upu tala i lenei fuaiupu o le isi upu mo tala fou. Vaavaai mo le tala na fai mai le Perofeta o Iosefa Samita ua tatou maua.
O a ni auala ua avea ai le talalelei a Iesu Keriso ma se leo o le fiafia mo e o ola ma e ua oti?
I le Mataupu Faavae ma Feagaiga 128:20–21, tatou te faitau ai e uiga i nisi o aafiaga o Iosefa Samita ma avefeau faalelagi a o toefuataiina le talalelei e ala mai ia te ia.
O le tasi o upumoni tatou te aoaoina mai i nei fuaiupu o le o ki, mana, ma le pule o tisipenisione ua mavae ua toefuatai mai i le tisipenisione o le atoaga o taimi. Mafaufau e tusi lenei upumoni i au tusitusiga paia po o lau api talaaga mo le suesueina o tusitusiga paia.
Ata
Peresitene Ioane Teila
Na saunoa mai Peresitene Ioane Teila: “Afai e te fesili ia Iosefa po o le a le ituaiga tagata e i ai Atamu, o le a ia ta’u atu ia te oe i le taimi lava lena; na te faamatalaina atu lona fuaitino ma ona foliga ma mea uma e uiga ia te ia. Atonu a na e fesili ia te ia po o a ituaiga tagata e i ai Peteru, Iakopo ma Ioane, semanu e mafai foi ona ia tauina atu ia te oe. Aisea? Aua na ia vaai ia te i latou” (i le Aoaoga a Peresitene o le Ekalesia: Iosefa Samita [2007], 109).
Tali le fesili lenei i lau api talaaga mo le suesueina o tusitusiga paia: E faapefea ona aafia lou faatuatua ma lau molimau e uiga i le Toefuataiga, i le iloa sa toefuatai mai le talalelei i le lalolagi e ala i ni avefeau faalelagi?
O leMataupu Faavae ma Feagaiga 128:22-23 o loo i ai le faailoaga o le olioli na lagonaina e le Perofeta o Iosefa Samita, ona ua toefuatai mai ki o le perisitua ma ona o le mafai e le Au Paia ona fesoasoani e togiola e ua maliliu. A o e suesueina nei fuaiupu, atonu e te manao e faailoga fuaitau e taua ia te oe.
Faitau le Mataupu Faavae ma Feagaiga 128:24, ma vaavaai mo se taulaga na faatonuina e le Perofeta le Au Paia e fai i le Alii. O le a se mea e mafai ona e faia e saofaga ai i lenei “tusi”?
Mafaufau loloto i le upumoni lenei: A tatou faia galuega o talafaasolopito o aiga ma maua sauniga o le malumalu mo o tatou tuaa, ua tatou osia se taulaga amiotonu i le Alii. A o e mafaufau e uiga i lenei upumoni, faitau le faamatalaga lenei, lea na faamatalaina ai e Elder David A. Bednar o le Korama a Aposetolo e Toasefululua, lau matafaioi i le galuega mo le faaolataga o e ua maliliu:
Ata
Elder David A. Bednar
“O le toatele o outou atonu e manatu o le galuega o talafaasolopito o aiga e tatau lava ona faatinoina e tagata matutua. Ae ou te iloa e le o faatapulaaina mai se matua i tusitusiga paia po o taiala o loo fofogaina mai e taitai o le Ekalesia faapea ua patino lenei auaunaga taua i tagata ua matutua. O outou o atalii ma afafine o le Atua, o fanau o le feagaiga, ma o tufuga o le malo. Tou te le tau faatalitali seia aulia se tausaga tuufaitalia e faataunuu ai lou tiutetauave e fesoasoani ai i le galuega o le faaolataga mo le aiga o tagata. …
“E le o se mea na faafuaveta ona oo mai … meafaigaluega i se taimi ua matua masani lelei ai tupulaga talavou ma se vaega tele o faamatalaga ma fesootaiga tau tekinolosi. … O tomai ma taleni ua molimauina i le toatele o tupulaga talavou i ona po nei, o se tapenapenaga e saofagā ai i le galuega o le faaolataga.
“Ou te valaau atu i tupulaga talavou o le Ekalesia ina ia aoao ma ia iloa le Agaga o Elia. Ou te faamalosiau atu ia te outou ia suesue, ia sailia o outou augatama, ma ia sauniuni outou lava e faia papatisoga sui i le maota o le Alii mo o outou aiga ua maliliu (tagai i le MF&F 124:28–36). Ma ou te uunaia outou ia fesoasoani atu i isi tagata ia iloa o latou talafaasolopito o aiga” (“O Le a Liliu Atu Loto o Fanau i o Latou Tama,” Ensign po o le Liahona, Nov. 2011, 26).
Ata
tagata talavou o loo savavali agai atu i le malumalu
Ina ia faaaoga mea ua e aoaoina i le aso, fai se fuafuaga ina ia fesoasoani atu i nisi o ou tuaa ia maua sauniga o le malumalu. Atonu e te manao e galulue faatasi ma ou matua po o se faufautua a le uarota po o le paranesi mo talafaasolopito o aiga a o e faia lenei fuafuaga. Tusi faapenei lau fuafuaga i lau api talaaga mo le suesueina o tusitusiga paia:
O la’u fuafuaga ia su’e mai igoa o tuaa o e manaomia sauniga o le malumalu:
O la’u fuafuaga e faataunuu ai galuega faalemalumalu mo o’u tuaa: (Afai e mafai, fai se fuafuaga e auai atu i le malumalu ina ia faia papatisoga ma faamauga mo tuaa e te maua mai.)
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia: