O Faalapotopotoga ma Polokalama a le Ekalesia

Faatomuaga

A o faaauau pea ona faatoateleina le Ekalesia, na musuia e le Alii ia taitai ma tagata o le Ekalesia e faaaoga faalapotopotoga ma polokalama i totonu o le Ekalesia e faamanuia ai le Au Paia. O le taimi muamua na faatuina ai nei faalapotopotoga ma polokalama, sa le’i matuā manaomia tele i latou e pei o le taimi nei, ae ona ua faatuputeleina le Ekalesia, ua faapea ona taua ai i latou i le galuega a le Ekalesia mo le faaolataga o le fanau a le Atua.

O Faalapotopotoga ma Polokalama a le Ekalesia e Fesoasoani Ia i Tatou e Saunia ma Alualu ai i Luma i le Ola e Faavavau

Mafaufau pe ua faapefea ona faamanuiaina lou olaga e faalapotopotoga ma polokalama a le Ekalesia.

O le a sau tala o le faamoemoega o faalapotopotoga a le Ekalesia e pei o Alii Talavou ma Tamaitai Talavou? E mafai faapefea e le iloa o le faamoemoega o faalapotopotoga ona fesoasoani ia i latou o e auai i ai?

Faitau le Moses 1:39, ma vaavaai mo le faamoemoega a le Tama Faalelagi i mea uma na te faia. Ia manatua o le tino ola pea e faatatau i le ola e faavavau i se tulaga o le toetu. E ala i le Togiola a Iesu Keriso, o le a toetutu ai tagata uma, e tusa lava pe latou te amioleaga pe amiotonu i lenei olaga. O le ola e faavavau e faatatau i le ola e faavavau o ni aiga i le afioaga o le Tama Faalelagi ma avea e faapei o Ia.

Pe a mafaufau i le faamoemoega o le Tama Faalelagi o le aumaia o le tino ola pea ma le ola e faavavau o Lana fanau, o le a la le faamoemoega o le Ekalesia?

Ona o le faamoemoega o le Tama Faalelagi o le aumaia o le tino ola pea ma le ola e faavavau o Lana fanau, o le faamoemoega o Lana Ekalesia e tutusa lava lea. Na faatuina e le Tama faalelagi Le Ekalesia a Iesu Keriso o le Au Paia o Aso e Gata Ai e fesoasoani i Ana fanau ia maua le ola e faavavau.

I lau api talaaga mo le suesueina o tusitusiga paia, lisi ai nisi o auala o loo fesoasoani ai le Ekalesia i le Tama Faalelagi ia aumaia le tino ola pea ma le ola e faavavau o Lana fanau.

O le Ekalesia e i ai se vaega o faalapotopotoga—e ta‘ua o ausilali i le perisitua—ma isi polokalama e fesoasoani ia i tatou e alualu ai i luma i le ola e faavavau. Taumafai e ta‘u mai nisi o ia faalapotopotoga ma polokalama.

Atonu e te ta’uina mai ia Alii Talavou, Tamaitai Talavou, Peraimeri, Aualofa, ma le Aoga Sa ma polokalama e pei o le Seminare ma Inisitituti o Mataupu Faalelotu ma afiafi faaleaiga.

Ina ia vaai pe faapefea ona fesoasoani faalapotopotoga ma polokalama a le Ekalesia ia i tatou e aoao ma alualu i luma i le talalelei ina ia mafai ona tatou maua le ola e faavavau, faitau le saunoaga lenei a Peresitene Boyd K. Packer o le Korama a Aposetolo e Toasefululua. O le faamatalaga lenei e faatatau i polokalama o le seminare ma le inisitituti, ae o le mataupu faavae o loo aoao mai ai e mafai foi ona faaaoga i isi ausilali ma polokalama o le Ekalesia.

Ata
Peresitene Boyd K. Packer

“I le talafaasolopito o le Ekalesia, e leai se isi faaalia sili atu ona lelei o le sauniuniga faaperofeta o lenei nuu nai lo le amataga o le polokalama o le seminare ma le inisitituti. Sa amataina nei polokalama i taimi sa manaia ai ae sa le’i matuā manaomia tele. Sa tuuina atu i ai se vaitau e tutupu ma ola ae ai e avea ma se malutaga [puipuiga] mo le Ekalesia. Ua avea nei i latou o se faamanuiaga mai le Atua mo le faaolataga o Isaraelu o ona po nei i lenei vaitaimi sili ona faigata” (“Teach the Scriptures” [saunoaga i faiaoga o mataupu faalelotu a le OAE, 14 Oke., 1977], 3; si.lds.org).

Ua musuia e le Alii Ona taitai e faavae le tele o polokalama ma faalapotopotoga i le Ekalesia e saunia ai i tatou mo tofotofoga ma luitau tatou te feagai i lenei olaga faaletino, ma fesoasoani ia i tatou ia alualu i luma i le ola e faavavau.

A o e faitau i aotelega taitasi nei o talafaasolopito, vaavaai mo tali i fesili nei:

Na faapefea ona amata le faalapotopotoga po o le polokalama? (Mafaufau e faailoga tali i lenei fesili.)
O le a sou manatu, e faapefea ona saunia ai i tatou e fetaiai ma tofotofoga ma luitau o o tatou aso?
O le a sou manatu, e faapefea ona fesoasoani tatou te alualu ai i luma i le ola e faavavau?

Aoga Sa

Ata

vasega o le Aoga Sa

I le 1849 na manatu ai se tagata o le Ekalesia na igoa ia Richard Ballantyne e manaomia e fanau se nofoaga e aoao ai le talalelei i le aso Sapati. Na uma lava ona faia e le Au Paia i Peretania Tele ni vasega o le Aoga Sa, ma sa amatalia e Uso Ballantyne le uluai vasega o le Aoga Sa i Iuta i lana uarota i le Aai o Sate Leki ia Tesema 1849. E le’i leva lava lena mea, ae amata ona fai e isi uarota lea lava faiga e tasi, ae faaaoga e uarota taitasi ana lava mataupu aoaoina. I le 1867, sa faatuina ai e taitai o le Ekalesia le Deseret Sunday School Union [Iuni o le Aoga Sa a le Deseret], lea sa uunaia ai le laugatasia o mataupu aoaoina. E oo ane i le 1870, ua silia ma le 200 ni vasega o le Aoga Sa ua faia. I le taimi nei, ua tele vasega o le Aoga Sa a uarota ma paranesi.

Tamaitai Talavou

Ata

tamaitai talavou e toatolu

Sa feiloai Peresitene Polika Iaga ma ona afafine i lona maota i le aso 28 o Novema, 1869, ma talosagaina i latou e avea ma taitai e fesoasoani i tamaiti o la latou tupulaga ia maua ni molimau e uiga i le talalelei, ia tauagafau i o latou lavalava ma a latou amioga, ma ia aloese mai taiga ma amioga o le lalolagi. I le 1870 na faatulagaina ai se faalapotopotoga aloaia a tamaitai talavou e faalauiloa atu ai nei faamoemoega. O lenei faalapotopotoga na iu lava ina ta’ua o le Young Women Mutual Improvement Association (YWMIA), lea na suia mulimuli ane i Tamaitai Talavou. I le amataga o le vaitau o le 1970, na faalauiloa mai ai e taitai le polokalama o le Alualu i Luma o le Tagata Lava Ia. I le 1985 sa latou faalauiloa mai ai tulaga faatauaina ma le autu a Tamaitai Talavou.

Alii Talavou

Ata

alii talavou e toalua

Na faatulagaina le Young Men’s Mutual Improvement Association (YMMIA) i le aso 10 o Iuni, 1875, i lalo o le taitaiga a Peresitene Polika Iaga. O lenei faalapotopotoga sa faamoemoe e fesoasoani i alii talavou e atinae [o latou] faaleagaga ma faaleatamai ma faapea foi ona tuuina atu ia i latou ni gaoioiga faafiafia. I le 1913, sa paga faatasi ai le Ekalesia ma Tama Sikauti a Amerika i le Iunaite Setete. I le faavaomalo, na faatuina ai le faiga faapaaga ma isi polokalama a le Sikauti i vaega na fautuaina ai. Sa faapea foi ona sui ai ma le igoa o le faalapotopotoga, sa muamua sui i le Perisitua Arona-MIA, sosoo ai ma le Perisitua Arona, faapea ai ma Alii Talavou. I le 2001, sa faalauiloa mai ai e taitai o le Ekalesia le polokalama o le Tiute i le Atua.

Peraimeri

Ata

tamaiti e toafa o loo pepese

I le 1877, sa oo ai ia Aurelia Spencer Rogers “se lagona malosi e tatau ona faia se mea e uiga i amioga a tama o le pitonuu o e sa taufetuli sa’oloto i le taulaga i le ao atoa ma le po. Sa ia lagonaina o le toatele o nei fanau sa le’i aoaoina i mataupu faavae autu ma tulaga faatauaina [e saunia ai i latou] a le i le malamalama po o amioga e avatu ai i luma le talalelei, po o le avea ma ni matua po o ni tagatanuu lelei” (“History of Primary,” lds.org/callings/primary/getting-started/history-of-primary). Sa feiloai atu o ia i a Eliza R. Snow, o le i lena taimi sa avea ma peresitene aoao o le Aualofa, ma sa laua maua le faatagaga mai ia Peresitene Ioane Teila e faatulaga ai se Peraimeri i Farmington, Iuta, i lalo o le taitaiga a Epikopo John Hess. O le fonotaga muamua a le Peraimeri, sa faia i le aso 25 o Aokuso, 1878, sa aofia ai le 224 o tamaiti ma teineiti. I le 1880, sa valaauina ai se peresitene aoao o le Peraimeri, ma sa amata ona faatulaga ia vasega i totonu o le tele o uarota.

Seminare ma Inisitituti o Mataupu Faalelotu

Ata

vasega o le autalavou

I le 1888 sa faatuina ai e le Ekalesia se Faatonu aoao o Aoaoga ma aoga o le Ekalesia ma faia ni vasega faalelotu e tuuina atu ai se faavae faaleagaga mo aoaoga o le poto salalau mo i latou o e sa le’i auai i aoga a le Ekalesia. I le 1912, sa tuuina atu ai e Joseph F. Merrill, o se polofesa ma se tagata o le Ekalesia, se fuafuaga e mafai ai e tagata aoga i a‘oga a le malo ona auai i vasega faalelotu o se vaega o a latou aso aoga. Sa ta‘ua o le seminare, ma o vasega muamua sa faia e latalata i le Aoga Maualuga a Granite i le Aai o Sate Leki, Iuta, ma e 70 tagata aoga sa lesitala ai. A o salalau atu le polokalama o le seminare, sa faapea ona faavaeina foi se polokalama tai faapena mo le autalavou o le vaitausaga o tagata aooga i le kolisi. Sa ta’ua o le Inisitituti o Mataupu Faalelotu a le Au Paia o Aso e Gata Ai, ma sa amatalia vasega inisitituti i le 1926 i Moscow, Idaho. I le amataga o le vaitau o le 1950, na amata ai se polokalama o le seminare i taeao i Kalefonia, sa amata le polokalama o le seminare e suesue i le fale i le vaitaimi o le 1960, ma o loo faaauau pea ona salalau atu seminare ma inisitituti o aoaoga faalelotu i le lalolagi atoa.

Afiafi Faaleaiga

Ata

o le aiga o loo i ai ni tusitusiga paia

Na aoao mai Peresitene Iosefa F. Samita, o polokalama a le Ekalesia e tatau ona avea “ma ni faaopoopoga i a tatou aoaoga ma aoaoga faamasani i le aiga. E leai se tamaitiiti e toatasi i le selau e se ese, pe afai e o faatasi le siosiomaga i le aiga, faataitaiga ma aoaoga faamasani, ma upumoni i le Talalelei a Keriso” (“Worship in the Home,” Improvement Era, Tes. 1903, 138). I le 1909 sa amata ai e le Siteki a Granite i le Aai o Sate Leki, Iuta, se polokalama o le afiafi i vaiaso taitasi, lea na saunoa mai Peresitene Samita sa musuiaina. I le 1915, sa fautuaina mai ai e le Au Peresitene Sili, ia faia afiafi faaleaiga faalemasina i le Ekalesia atoa. Na folafola mai e le Au Peresitene Sili: “Afai e usiusitai le Au Paia i lenei fautuaga, [ia faia afiafi faaleaiga], matou te folafola atu o le a maua ai faamanuiaga silisili. O le a faateleina le alofa i le aiga ma le usiusitai i matua. O le a atiina ae le faatuatua i loto o le autalavou o Isaraelu, ma o le a latou maua le malosi e teena ai uunaiga a le tiapolo ma faaosoosoga e oo mai ia i latou” (i le James R. Clark, tuufaatasia., Messages of the First Presidency of The Church of Jesus Christ of Latter-day Saints, 6 vols. [1965–75], 4:339) O le limasefulu tausaga mulimuli ane, na lomia ai e le Ekalesia tusi lesona mo aiga e faaaoga i aoaoga faalevaiaso o le talalelei. I le 1970, sa atofaina ai e taitai o le Ekalesia afiafi o Aso Gafua mo afiafi faaleaiga ma faasilasila mai ai, e leai nisi lava gaoioiga a le Ekalesia e tatau ona faia i lena po.

O faalapotopotoga ma polokalama taitasi a le Ekalesia sa muai faagaoioia taitasi. A o faateteleina le faalauteleina o le Ekalesia i le vaitaimi o le 1950, sa vaaia ai e taitai o le Ekalesia se manaomia ona toe iloilo pe o faapefea ona ausia e faalapotopotoga a le Ekalesia ia faamoemoega o le Ekalesia. Sa latou filifili ai e tuufaatasia ma faamaopoopo uma faalapotopotoga ma polokalama a le Ekalesia i le taitaiga ma i le filifilia o mataupu aoaoina. Sa fesoasoani nei suiga i faalapotopotoga ma polokalama ina ia faafetaiaia lelei ai manaoga faigata o le Ekalesia ua faatupulaia ma ia faamalosia ai le aiga. I lalo o lenei taumafaiga faamaopoopo, e galulue ai faalapotopotoga uma o le Ekalesia i lalo o le taitaiga a taitai perisitua, o e o loo umia ki e pulefaamalumalu ai.

E le gata i lea, i lalo o le taitaiga a le Au Peresitene Sili ma le Korama a Aposetolo e Toasefululua, sa faatuina ai se Matagaluega Faamaopoopo e toe tagai, iloilo, ma faamaopoopo uma mea na lomia e le Ekalesia. Sa faia lenei mea ina ia fesoasoani ia tausisia ai pea le mama o aoaoga faavae ina ia le ave seseina aoaoga a le Ekalesia.

Mafaufau loloto pe faapefea ona fesoasoani le tuufaatasia ma le faamaopoopoina o ausilali a le Ekalesia i lalo o le taitaiga a le Perisitua, ina ia ausia lelei ai faamoemoega a le Tama Faalelagi mo Ana fanau.

Mafaufau loloto i le mataupu faavae lenei: A o tatou auai i faalapotopotoga ma polokalama a le Ekalesia, tatou te maua faamanuiaga o loo avanoa e ala mai ia i latou. Ona tali lea o fesili nei i lau api talaaga mo le suesueina o tusitusiga paia:
1. Ua faapefea ona faamanuiaina lou olaga i faalapotopotoga ma polokalama a le Ekalesia?
2. Na faapefea ona faamanuiaina lou olaga i le polokalama o le Tiute i le Atua po o le Alualu i Luma o le Tagata Lava Ia?
I lau api talaaga mo le suesueina o tusitusiga paia, tusi ai se sini se tasi pe lua e faaleleia atili ai lou auai i ausilali ma polokalama a le Ekalesia. E mafai ona fesoasoani ia fesili nei e te mafaufau ai po o a ni sini e faatutu: O le a faapefea ona e auai atoatoa i Alii Talavou po o Tamaitai Talavou? I le Aoga Sa? I le afiafi faaleaiga? I le seminare?
Tali le fesili lenei i lau api talaaga mo le suesueina o tusitusiga paia: E mafai faapefea i le auai i nei ausilali ma polokalama ona fesoasoani e saunia oe ia maua le perisitua Mekisateko po o le suiga atu i le Aualofa?
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le lesona “O Faalapotopotoga ma Polokalama a le Ekalesia” ma faamaeaina i le (aso).

O fesili, mafaufauga ma manatu faaopoopo ou te fia faasoa atu i lo’u faiaoga: