I le aso 16 ma le 17 o Tesema, 1833, na maua ai e le Perofeta o Iosefa Samita se faaaliga e faatatau i puapuaga sa feagai ma le Au Paia i Misuri. O lenei faaaliga, o loo tusia i le Mataupu Faavae ma Feagaiga 101, o le a talanoaina i ni lesona se tolu. O lenei lesona muamua e aofia ai le fetalaiga a le Alii i le pogai na Ia faatagaina ai le Au Paia ina ia puapuagatia. O loo aofia ai foi Ana afioga o fautuaga ma faamafanafanaga i le Au Paia mafatia.
Mai mea ua e aoaoina i le taimi o au suesuega o le Mataupu Faavae ma Feagaiga 98, faailoa mai po o le fea o faigata nei na oo i ai le Au Paia i le Itumalo o Jackson, Misuri, ia Iulai 1833. E mafai ona e tagai i le lesona mai le aso 1 e fesoasoani e te manatua ai.
Na faaleagaina le ofisa lomitusi a le Au Paia.
Sa faaleagaina le faleoloa a Sini Gilbert, ma na gaoia oloa.
Sa tele fale ma meatoto a le Au Paia sa susunuina i lalo.
E toalua tagata o le Au Paia, o Eteuati Paterika ma Charles Allen, sa faataina ma faafulumanuina i se nofoaga o tagata lautele.
Ona o le faatupu faalavelave o tagata leaga i le Itumalo o Jackson, Misuri, ia Iulai 1833, na faapea ona malilie ai taitai o le Ekalesia e tuua le itumalo. Ae peitai, ia Aokuso 1833, na fautuaina ai e le Perofeta o Iosefa Samita le Au Paia e aua ne’i faatauina atu o latou fanua iina. Sa talosagaina e taitai o le Ekalesia le malo ma faaaogaina ala faaletulafono e faatumauina ai o latou laueleele i Misuri ma saili le faamasinoga tonu mo e na nafa ma le vevesi. Ina ua uma ona faalogo e uiga i nei amioga, ma le talitonu sa le’i fuafua le Au Paia e o ese e pei ona sa manatu ai, sa faapea ona toe osofai ai foi tagata sa nonofo ai iina sa le o ni Au Paia o Aso e Gata Ai. I le po o le aso 31 o Oketopa, 1833, sa osofaia ai e se vaega leaga tietie solofanua pe a ma le 50 le nofoaga o Uitimera, i sisifo o Initipene. Sa latou talepeina taualuga o fale e 13 ma sasa maini ni alii, lea na toetoe lava a fasiotia ai i latou. Sa faaauau pea mo po e lua na sosoo ai nei osofaiga i Initipene, ma isi nofoaga sa nonofo ai le Au Paia. Sa fasia tamaloloa, ae o fafine ma tamaiti sa faaatuatuvaleina. E silia ma le 1,000 le Au Paia na tutuli ese mai o latou aiga i le Itumalo o Jackson.
Mata o a ni fesili e te manatu atonu sa i ai i le Au Paia i Misuri i lea taimi? Pe ua e mafaufau ea, pe aisea e faataga ai e le Alii ia mea leaga ia tupu ia te oe po o tagata e te iloa?
Faitau le folasaga o le vaega o le Mataupu Faavae ma Feagaiga 101 e iloa ai le aso na tuuina mai ai le faaaliga lenei, ma nisi o tofotofoga na feagai ma le Au Paia i Misuri i lea taimi.
Ina ua mafatia le Au Paia i Misuri i nei tofotofoga, na faaali mai e le Alii upumoni i le pogai ua Ia faataga ai Lona nuu e oo i puapuaga. Faitau le Mataupu Faavae ma Feagaiga 101:1–2, ma vaavaai mo se mafuaaga na faataga ai e le Alii le Au Paia i le Itumalo o Jackson e mafatia i sauaga ma puapuaga.
Mai le fuaiupu e 2 tatou te aoao ai pe a tatou solia poloaiga, e faataga i tatou e le Alii ina ia mafatia.
Tali le fesili lenei i lau api talaaga mo le suesueina o tusitusiga paia: Aisea e te manatu e taua ai le malamalama i lenei upumoni?
E ui lava ina e toatele le Au Paia i Misuri sa faamaoni ma usiusitai, ae sa latou puapuagatia lava ona o sauaga. Faitau le Mataupu Faavae ma Feagaiga 101:3–5, ma vaavaai mo se mafuaaga e faataga ai e le Alii e oo lava i le Au Paia amiotonu ina ia puapuagatia. Ia matau o le upu aoaiina o lona uiga ia aoai pe faasa‘o, ae o le upu tofotofoina o lona uiga ia suesue, ae o le upu faapaiaina o lona uiga o le faia o se tasi po o se mea ia mama po o le paia.
Tagai i le fuaiupu e 5 e faauma ai le faamatalaga lenei o le upumoni: Afai o le a tatou lē onosaia le aoaiga, e le mafai ona tatou .
Ata
Elder D. Todd Christofferson
Na aoao mai e Elder D. Todd Christofferson o le Korama a Aposetolo e Toasefululua, i le auala e fesoasoani ai le aoaiina ma le tofotofoina ina ia faapaiaina ai i tatou: “E le gata i le faaosofia o lo tatou salamo, o le aafiaga tonu lava o le onosaia o le a‘oaiga e mafai ona faamamaina ai i tatou ma saunia ai i tatou mo avanoa sili atu faaleagaga” (“Ou te Aoai Atu ma Sasa ia i Latou Uma Ou te Alofa I Ai,” Ensign po o le Liahona, Me 2011, 98).
Ata
Aperaamo, Isaako, ma le agelu
I le Mataupu Faavae ma Feagaiga 101:4, na ta‘ua ai e le Alii ia Aperaamo o se faataitaiga o se tasi sa aoaiina ma tofotofoina. Ina ua poloaiina e le Alii ia Aperaamo e ofo atu lona atalii o Isaako e fai ma taulaga, sa faamaonia e Aperaamo lona faamaoni ma faaali atu, sa saunia o ia e maua faamanuiaga silisili faaleagaga (tagai i le Kenese 22:1-18).
Tali le fesili lenei i lau api talaaga mo le suesueina o tusitusiga paia: E mafai faapefea e le malamalama i le upumoni o loo aoaoina i le Mataupu Faavae ma Feagaiga 101:5 ona fesoasoani ia te oe i taimi o faigata?
Faitau le Mataupu Faavae ma Feagaiga 101:6–8, ma faailoa mai ni mea patino na faia e nisi o le Au Paia i Misuri, na mafua ai ona oo mai puapuaga ia i latou. Ona tali lea o fesili nei, i lau api talaaga mo le suesueina o tusitusiga paia:
E tusa ai ma le fuaiupu e 7, o le a le taunuuga o le “gese ona latou faalogo i le siufofoga o le Alii”?
E tusa ai ma le fuaiupu e 8, o a mea e amata ona fai e nisi o tagata i le taimi o puapuaga? O le a sou manatu i le uiga o le “tautagotago [tapatapa]” i le Alii?
Mafaufau loloto i se aafiaga na e lagonaina ai le aoaiina ma e saili atu ai i le Alii.
A o e faitauina le Mataupu Faavae ma Feagaiga 101:9, vaavaai mo se savali o le faamoemoe na tuuina mai e le Alii i le Au Paia o e na pagatia i Misuri. Atonu e te manao e faailoga upu ma fasifuaitau o loo aoao mai ai le aoaoga faavae lenei: E tusa lava pe ua tatou agasala, o le a lotoalofa lava le Alii ia i tatou.
Tali le fesili lenei i lau api talaaga mo le suesueina o tusitusiga paia: E mafai faapefea e le malamalama i lenei aoaoga faavae ona aumai ia te oe le faamoemoe?
I le Mataupu Faavae ma Feagaiga 101:10–11, tatou te aoao ai, e ui lava ina faataga e le Alii le Au Paia ina ia sauaina, ae na Ia fetalai, o le a Ia faasalaina tagata o e na sauaina i latou.
Ata
vaaiga i le au faatupu faalavelave
A o e faitau i parakalafa e sosoo ai, faailoga faamatalaga o mafatiaga ia atonu e sili ona faigata ia te oe ona e molimauina pe oo foi i ai:
Na faaauau pea ona faasaunoa le vaega faatupu faalavelave i le Itumalo o Jackson, Misirui, i le Au Paia seia oo ina tutuli ese uma tagata o le Ekalesia mai le itumalo. Na lipotia mai e Laimani Wight, “sa ou vaai i le selau ivasefulu o fafine ma tamaiti na tutuli ese i le tolusefulu maila agai atu i laufanua, ae na o le toatolu ni toeaiina i la latou vaega, i le masina o Novema, o le eleele na manifi ai le timu aisa; ma sa faigofie ona ou mulimuli atu i la latou auala e ala i le toto na tafe mai i o latou vae mafoefoe i luga o tagutugutu o saito na susunu o le fanua!” (i le History of the Church, 3:439).
O le toatele o le Au Paia na sosola atu i matu, lea sa latou sopoia ai le Vaitafe o Misuri. Sa laina faaituala lua le gataifale o le vaitafe e lata ane i le vaa i tagata sulufai. O nisi sa laki i le sosola mai ma mea aoga a o latou aiga, ae o le toatele na aveesea mea uma. Na tusia e Pale P. Palate: “E faitau selau tagata sa vaaia i itu uma, o nisi i faleie ae o nisi sa i fafo lava ma siomia a latou afi, a’o maligi mai timuga. Sa fesilisili tane mo a latou ava, o ava mo a latou tane; o matua mo fanau, ma fanau mo matua. … O le vaaiga sa le mafaamatalaina, ma, ou te mautinoa, e liusuavai ai loto o soo se tagata i le lalolagi, sei vagana ai o o tatou faaoosala tauaso, ma se nuu tauaso ma le valea” (Autobiography o Pale P. Palate, ed. Paley P. Pratt Jr. [1938], 102).
O le a sou manatu i sau tali e te tali atu ai pe afai e te oo i na ituaiga puapuaga?
Faitau le Mataupu Faavae ma Feagaiga 101:12–16, ma vaavaai mo folafolaga a le Alii i le Au Paia amiotonu. (Atonu e fesoasoani lou iloa i le fuaiupu e 12, o le fuaitau “o laʼu Isaraelu uma” e faasino ia i latou o e faamaoni i le feagaiga o le talalelei.)
Atonu e te manao e tusi le mataupu faavae lenei i au tusitusiga paia i tafatafa o le Mataupu Faavae ma Feagaiga 101:16: Pe a tatou ola amiotonu, e mafai ona tatou maua le mafanafana i le malamalama e i ai tagata uma i aao o le Alii.
I lau api talaaga mo le suesueina o tusitusiga paia, tali i fesili nei e faavae i ou lava aafiaga, pe e mafai ona e talanoaina nei fesili ma se tagata o le aiga po o uo, ma tusi mea ua e aoaoina mai le talanoaga: