E te tuufesili pe aisea ua poloaiina ai i tatou e le Atua e fai nisi mea ae aua le faia isi mea? O se vaaiga aoao o le fuafuaga a le Tama Faalelagi mo lo tatou faaolataga, o nisi taimi e ta‘ua ai o le fuafuaga o le fiafia, e mafai ona fesoasoani ia i tatou e malamalama lelei ai i le faamoemoega o Ana poloaiga. Na saunoa mai peresitene Boyd K. Packer, Peresitene o le Korama a Aposetolo e Toasefululua, “O se malamalama i le ata o le fiafia, e tusa lava po o lona auivi, e mafai ona tuuina ai i mafaufau mu’amu’a se ‘aisea’” (“O Le Fuafuaga Sili o le Fiafia” [saunoaga i faiaoga o mataupu faalelotu, 10 Aok., 1993], 3, si.lds.org).
O lenei lesona e tuuina atu ai se aotelega puupuu o le ata o le faaolataga. O loo taulai atu i le Togiola a Iesu Keriso, o lea, pei ona aoao mai e Elder Jeffrey R. Holland o le Korama a Aposetolo e Toasefululua, o le mea moni tutotonu, o le faavae taua tele, ma le aoaoga faavae autu o le ata maoae ma faavavau o le faaolataga” (“Galuega Faafaifeautalai ma le Togiola,” Ensign, Mar. 2001, 8).
Fuafuaga a le Tama faalelagi mo lo Tatou Fiafia
Na faaalia e le Atua le faamoemoega o Lana ata o le faaolataga ia Mose a’o la talanoa faafesagai i luga o se mauga. Faitau le Mose 1:39, ma vaavaai mo mea na ta‘ua e le Atua i Lona faamoemoega.
E te iloa le eseesega i le va o le “tino ola pea” ma le “ola e faavavau”? O le tino ola pea o le ola e faavavau i se tulaga o le toetu. E ala i le Togiola a Iesu Keriso, o tagata uma o e o mai i le lalolagi e maua se tino faaletino o le a maua lenei meaalofa. Ola e faavavau, po o le faaeaga, o le ola e faavavau o ni aiga i le afioaga o le Atua. O lenei meaalofa e maua foi e ala i le Togiola, ae o le a mo na o i latou o e agavaa ai.
Na faamalamalama mai e Elder Bruce R. McConkie o le Korama a Aposetolo e Toasefululua: “E pei ona faaaogaina i tusitusiga paia, o le ola e faavavau, o le igoa e tuuina atu i le ituaiga olaga o loo soifua ai lo tatou Tama Faavavau. … O le soifuaga o le Atua o le ola e faavavau; o le ola e faavavau o le soifuaga o le Atua—o ia faaupuga e uiga tutusa lava” (Mormon Doctrine, 2nd ed. [1966], 237).
Na aoao mai Elder Joseph B. Wirthlin o le Korama a Aposetolo e Toasefululua:
Ata
Elder Joseph B Wirthlin
“O le tino ola pea e faatatau i le aofai. O le ola e faavavau e faatatau i le tulaga lelei. …
“O le ola e faavavau o le faatumutumuga lea o le olaga. I le avea ai ma fanau faaleagaga a le Atua, o oe ma au o ni suli i lenei tamaoaiga taugata, o le au lagolagosua i se lumanai matagofie, o e mauaina le alofa tunoa.
“Afai o le tino ola pea o le galuega lea a le Atua, o lona uiga la o le ola e faavavau o le mamalu lea o le Atua” (“What Is the Difference between Immortality and Eternal Life?” New Era, Nov. 2006, 8).
Ola e faavavau e aofia ai le ola i le afioaga o le Atua, avea e faapei o Ia i le tino ma uiga auaumama, ma maua mea uma ua ia te Ia, e aofia ai le mauaina o se aiga e faavavau.
Mai mea ua e aoaoina mai le Mose 1:39, faatumu le faamatalaga lenei faaleaoaoga faavae e faatatau i le fuafuaga a le Tama Faalelagi: O le faamoemoega o le fuafuaga a le Tama Faalelagi o le, ia tatou mauaina .
I o tatou olaga i le muai-olaga sa tatou nonofo o ni agaga i le afioaga o lo tatou Tama Faalelagi. O iina na tatou aoao ai e uiga i Lana fuafuaga mo lo tatou fiafia ma pe faapefea ona fesoasoani le mulimuli i lena fuafuaga tatou te faataunuu ai Ona faamoemoega mo i tatou. (Tagai i le MF&F 138:55–56; Aperaamo 3:22-28.)
Tali fesili nei i lau api talaaga mo le suesueina o tusitusiga paia:
Mai lou malamalamaaga, na faapefea ona ese i tatou mai lo tatou Tama Faalelagi i le olaga i le muai-olaga?
O a mea na faailoa mai ma faatulaga e le Tama Faalelagi ina ia fesoasoani ia tatou avea faapei o Ia?
O le fuafuaga a lo tatou Tama Faalelagi, e manaomia ai ona tatou tuua Lona afioaga ma ia ola i le olaga i le lalolagi. E masani ona ta‘ua lo tatou olaga i le lalolagi o le olaga i le tino. Mafaufau loloto mo sina taimi pe aisea na tatau ai ona tatou tuua le afioaga o le Atua, ma le auala e fesoasoani ai le olaga faaletino ia tatou tuputupu ae ma avea atili e faapei o lo tatou Tama Faalelagi. Tusi ou manatu i lau api talaaga mo le suesueina o tusitusiga paia
E faatatau i lo tatou olaga faaletino i le lalolagi, na saunoa ai Peresitene Spencer W. Kimball: “Ua tuuina mai e le Atua ia i tatou se fuafuaga. Ua Ia auina mai i tatou uma i le lalolagi ia maua ni tino, ma maua le potomasani ma tuputupu ae“(O Aoaoga a Spencer W. Kimball, ed. Edward L. Kimball [1982], 25; faaopoopo le faamamafa). E faapefea ona fesoasoani le mauaina o se tino faaletino ma le mauaina o le potomasani iinei i le lalolagi, ia tatou avea atili ai faapei o le Tama Faalelagi? O le a le matafaioi a nei luitau e pei o faaosoosoga, ma‘i, faanoanoa, tiga, lotovaivai, manaoga faapitoa, ma isi faigata faaletino, e faia i a tatou taumafaiga ia maua le ola e faavavau ma avea atili faapei o le Tama, Faalelagi?
O le tasi o faafitauli tele tatou te feagai i le olaga nei o le agasala. O le agasala e taofia ai i tatou mai le avea e faapei o lo tatou Tama Faalelagi ma le toe foi atu e nonofo faatasi ma Ia. (tagai i le MF&F 20:18–20; Mose 6:57). E le gata o le agasala tatou te lē mamā ai, ae o le faia foi o le agasala e feteenai lea ma le natura o le Atua—e le mafai ona tatou faaauau pea i le agasala ma ausia lava lo tatou faamoemoega o le avea e faapei o le Tama Faalelagi (tagai i le Alema 41:10–11).
O le mea moni e faapea, na puapuagatia Iesu Keriso ma sa faasatauroina mo agasala a tagata uma o se aoaoga faavae tutotonu i le fuafuaga a le Tama Faalelagi mo i tatou, ma e mafai ona aumaia ai le faamoemoe i fanau uma a le Tama Faalelagi. Faaalu sina taimi e mafaufau ai po o le a le uiga o le taulaga a le Faaola ia te oe.
Ae peitai, i le totogiina o le tau mo a tatou agasala, sa le’i aveesea ai e Iesu Keriso o tatou tiutetauave faaletagata lava ia. Faitau le Mataupu Faavae ma Feagaiga 18:22-23; 25:13, 15, ma vaavaai mo le mea e manaomia ina ia tatou maua le mana faamama o le Togiola ma toe foi atu e nonofo i le afioaga o le Tama Faalelagi. Atonu e te manao e faailoga mea ua e maua.
E tusa ai ma le Mataupu Faavae ma Feagaiga 18:22-23; 25:13, 15, o a mea e tatau ona tatou faia e o mai ia Iesu Keriso ma maua ai faamanuiaga o Lana taulaga togiola? Tusi lau tali i lau api talaaga mo le suesueina o tusitusiga paia.
Afai tatou te usiusitai i mataupu faavae ma sauniga o le talalelei, e mafai ona tatou faatoilaloina agasala e ala i le alofa tunoa ma le Togiola a Iesu Keriso (tagai i le Moronae 10:32–33). Ona o le Togiola, pe a tatou tausia le feagaiga tatou te faia i le papatisoga, e mafai ona tatou salamo ma faamagaloina a tatou agasala ma maua le taitaiga a le Agaga Paia e taitaiina i tatou i le ala e agai atu i le ola e faavavau.
E faaopoopo atu i le agasala, o loo i ai se isi faafitauli e tatau ona faatoilaloina ina ia mafai ona maua le ola e faavavau. Faitau le Alema 12:24, ma faailoa mai le faafitauli.
A tatou oti o le a tuueseeseina o tatou agaga ma o tatou tino. Afai e tuueseeseina e faavavau o tatou agaga ma tino, o le a le mafai lava ona avea e faapei o le Atua. E le mafai ona tatou avea faapei o le Tama Faalelagi e aunoa ma se tino o aano ma ivi (tagai i le MF&F 93:33–34; 130: 22).
Faitau le Alema 11:42–45, ma faailoa mai pe faapefea ona faatoilalo le tuueseeseina o o tatou agaga ma tino i le oti.
Ata
O Maria ma le Alii Toetu
Tali fesili nei i lau api talaaga mo le suesueina o tusitusiga paia:
Aisea ua avea ai le Toetu o Iesu Keriso o se tala lelei mo tagata uma?
E faapefea ona aumai e le faamoemoe o le Toetu le olioli ia te oe?
E pei ona e faitauina muamua atu, o le tino ola pea o se meaalofa o le Togiola a Iesu Keriso o le a maua e tagata uma, tusa lava pe latou te faia le lelei po o mea leaga i le olaga lenei (tagai i le Alema 11:42–45; MF&F 138:14–17). Ona o le Toetu o Iesu Keriso, o le a toetutu ai tagata uma ma o le a ola e faavavau. Ae peitai, o le ola e faavavau, o le meaalofa lea a le Atua mo na o i latou o e usitai i tulafono ma sauniga o Lana talalelei (tagai i le MF&F 14:7).
I lau api talaaga mo le suesueina o tusitusiga paia, fai se aotelega o mea ua e aoaoina e uiga i le fuafuaga a le Tama Faalelagi mo lo tatou fiafia. Sue se taimi e aoao atu ai faafesagai i se tagata o le aiga po o se uo ia mea ua e aoaoina e uiga i le fuafuaga a le Tama Faalelagi mo lo tatou faaolataga. Atonu e mafai ona e tusia le ata o loo i ai faatasi a’o e faamatalaina atu i ai. Ia e saunia e faasoa atu ou aafiaga i lou faiaoga.
Ua na o se aotelega puupuu o le ata o le faaolataga ua tuuina atu i le lesona lenei. I au suesuega o le Mataupu Faavae ma Feagaiga i le tausaga lenei, o le a e aoao ai i le tele ma le anoannoa’i o upumoni e faatatau i le ata o le faaolataga. A o e aoao atili e uiga i le fuafuaga, vaavaai mo mea ua faia e le Atua mo oe, ma ia nofouta i musumusuga a le Agaga e uiga i mea e tatau ona e faia e maua ai faamanuiaga atoatoa ua ofoina mai e le Tama Faalelagi.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia
Ua ou suesueina le lesona “O Le Ata o le Faaolataga” ma faamaeaina i le (aso).
O fesili, mafaufauga, ma manatunatuga faaopoopo ou te fia faasoa atu i lou faiaoga: