O le faaaliga o loo maua i le Mataupu Faavae ma Feagaiga 82 na maua i le aso 26 o Aperila, 1832, i le taimi o se fonotaga a faitaulaga sili ma toeaina o le Ekalesia i Initipene, Itumalo o Jackson, Misuri. I le faaaliga lenei ua faamagalo ai e le Alii le usoga i a latou solitulafono ma lapataia i latou e faasaga i le toe agasala. Na faatonuina foi e le Alii nei usoga i Misuri i le auala e pulea ai mataupu faaletino o Siona. O le fa o aso mulimuli ane, na maua ai e le Perofeta o Iosefa Samita le faaaliga ua faamaumauina i le Mataupu Faavae ma Feagaiga 83, lea na faatonuina ai e le Alii ia taitai o le Ekalesia i le auala e tausia ai fafine ua oti a latou tane ma fanau ua leai ni matua.
Ua lapataia e le Alii i latou o e ua mauaina mea e tele mai ia te Ia
Mafaufau i se taimi na oulua feeseeseai ai ma se uo po o se tagata o le aiga lea sa iu ina foia. O a ni ou lagona ina ua uma ona foia le lua feeseeseaiga?
Mo ni nai masina, na aliae ai ni lagona le lelei i le va o Sini Rikitone i Ohaio ma Epikopo Eteuati Paterika i Misuri. Ia Aperila, 1832, na malaga atu ai le Perofeta o Iosefa Samita ma isi taitai o le Ekalesia i Misuri i le usiusitai i le poloaiga a le Alii ina ia latou “fono faatasi ma le Au Paia o e o i Siona” (MF&F 78:9). Ina ua latou taunuu atu, sa faia loa se fonotaga a faitaulaga sili ma toeaina o le Ekalesia. I le va o le fonotaga i le taeao ma le afiafi, na faalelei ai e Sini Rikitone ma Eteuati Paterika o laua eseesega. O le faaaliga i le Mataupu Faavae ma Feagaiga 82 na maua mai i le taimi o le fonotaga i le afiafi.
Faitau le Mataupu Faavae ma Feagaiga 82:1, ma vaavaai mo le mea na ta’u mai e le Alii ia Sini Rikitone ma Eteuati Paterika e uiga i le foiaina o o laua eseesega.
E faavae i luga o mea ua e iloaina i le fuaiupu 1, faauma le mataupu faavae lenei i le faamatalaina o le sootaga i le va o le faamagalo atu o isi ma le mauaina o le faamagaloga a le Alii: o se vaega taua o le mauaina o le faamagaloga a le Alii mo a tatou agasala. (Faatusatusa i le MF&F 64:9–11.)
E ui lava ina sa tuuina mai e le Alii Lana faamagaloga i le taimi lenei, ae sa Ia tuuina atu foi ia i latou lapataiga. Faitau le Mataupu Faavae ma Feagaiga 82:2, ma vaavaai mo le lapataiga na tuuina mai e le Alii i nei Au Paia.
A o siitia atu tagata o le Ekalesia mai Ohaio i Misuri, e toatele i latou sa le usitai i fautuaga a taitai o le Ekalesia, ma o nisi sa mumusu e ola i le tulafono o le faapaiaga. O se taunuuga, o nisi o nei tagata o le Ekalesia na tausalaina i le lotoleaga, manaolasi, ma le faatamala i tiute.
Faitau le Mataupu Faavae ma Feagaiga 82:3–4, ma vaavaai mo se mafuaaga o le a oo mai ai faamasinoga a le Alii i luga o i latou o e e faaauau pea i le agasala.
I lau api talaaga mo le suesueina o tusitusiga paia, tusi ai se mataupu faavae na aoao mai e le Alii i le Mataupu Faavae ma Feagaiga 82:3. Ona tali lea o le fesili lenei: Aisea e te manatu ai o i latou o e ua tele mea ua latou mauaina mai i le Alii, o le a tele foi mea e manaomia mai ia i latou?
I lau api talaaga mo le suesueina o tusitusiga paia, lisi i le tele e te mafaia ai i totonu o le lua minute ni faamanuiaga ua e mauaina mai le Alii. Ia aofia ai faamanuiaga ua oo mai ia te oe i le avea ai o se tasi o le Ekalesia. Ona filifili lea o se tasi o faamanuiaga na e tusia i lalo, ma tali i fesili nei:
O le a sou manatu i le mea e finagalo le Alii e te faia i lenei faamanuiaga? (Mo se faataitaiga, afai e te iloa ua faamanuiaina oe i le mauaina o upumoni o le talalelei i lou olaga, atonu o se tasi o faamoemoega o le, ia e faasoa atu nei upumoni i isi.)
O le a se mea e mafai ona e amata faia e faataunuu ai lena faamoemoega?
I le Mataupu Faavae ma Feagaiga 82:5–6, sa lapataiina ai e le Alii le Au Paia e faapea, ua faateteleina le pule ma le malosi o Satani i luga o le lalolagi. Faitau le Mataupu Faavae ma Feagaiga 82:7, ma vaavaai mo se lapataiga faaopoopo na tuuina mai e le Alii i nei tagata o le Ekalesia e uiga i le agasala. Mai lenei fuaiupu ua tatou aoao ai, e taua le lafoai atoa o a tatou agasala aua, afai tatou te toe agasala ae ua uma ona salamo, e toe foi mai a tatou agasala sa i ai muamua.
I lau api talaaga mo le suesueina o tusitusiga paia, tusi ai pe aisea e te manatu ai, e toe foi mai a tatou agasala muamua pe a tatou toe agasala ma le iloa lelei, ina ua uma ona tatou saili atu mo le faamagaloga a le Alii.
Ua poloaiina e le Alii ni tamalii se toaiva e faia se kamupani e pulea ai mataupu faaletino o le Ekalesia
Mafaufau i se tulaga sa manaomia ai e oe po o se tasi e te iloa, se faamautinoaga e tausia e le Atua ia Ana folafolaga. I le taimi o le fonotaga a le au faitaulaga sili ma toeaina i Misuri, sa tuuina mai e le Alii se folafolaga faamalosiau ia i latou o e usitai i Ana poloaiga. A o faaauau au suesuega o le Mataupu Faavae ma Feagaiga 82, vaavaai mo mataupu faavae e mafai ona maua mai ai faamautinoaga i se tasi i se tulaga e pei o lea sa e mafaufau i ai o loo i luga.
Faitau le Mataupu Faavae ma Feagaiga 82:8–9, ma vaavaai po o le a le mea na fetalai mai le Alii o le a Ia tuuina mai i le Au Paia i le taimi o le fonotaga lenei. Atonu e te manao e faailoga mafuaaga a le Alii mo le tuuina mai ia i latou o lenei poloaiga fou. Mafaufau loloto pe faapefea ona faaaoga nei mafuaaga i poloaiga uma e tuuina mai e le Alii ia i tatou.
Faitau le Mataupu Faavae ma Feagaiga 82:10 (o se fuaitau o mau tauloto), ma vaavaai mo mataupu faavae e mafai ona tuuina mai ia i tatou le lototele a’o tatou taumafai e usitai i poloaiga a le Alii. (Atonu e te manao e faailoga lenei mau i se ala e iloagofie ai ina ia faigofie ai ona maua i se taimi mulimuli mai.) Ona tusi lea o galuega atofaina nei i lau api talaaga mo le suesueina o tusitusiga paia:
Faauma le mataupu faavae lenei: Afai tatou te usitai i le Alii, o Ia e …
Mafaufau loloto i aafiaga na e oo i ai, na faaalia atu ai ia te oe e moni lenei mataupu faavae, ona tusi lea e uiga i se tasi o na aafiaga.
E pei ona e aoaoina i le Mataupu Faavae ma Feagaiga 78, na poloaiina e le Alii ia taitai o le Ekalesia i Katelani, Ohaio, e fausia se kamupani, o se faalapotopotoga faapisinisi a le Ekalesia na ta’ua o le Kamupani Tuufaatasi. O ni punaoa mai le faagaoioiga o le pisinisi a le kamupani o le a faaaoga e tausia ai e matitiva ma tuuina atu ai le faatupeina o manaoga o le Ekalesia. E pei ona tusia i le Mataupu Faavae ma Feagaiga 82:11, 15–17, na poloaiina e le Alii ia taitai o le Ekalesia i Misuri ina ia auai faatasi ma le Kamupani Tuufaatasi e ala i le feagaiga.
Faitau le Mataupu Faavae ma Feagaiga 82:12, ma vaavaai po o le a le faamoemoega o le Kamupani Tuufaatasi. A o e faitauina, atonu e mafai ona fesoasoani ia te oe e toe manatua, o se tasi o tiute o le epikopo o le lagolago atu lea i manaoga faaletino o tagata o le Ekalesia.
Ata
epikopo i [lana] kesi
Faitau le Mataupu Faavae ma Feagaiga 82:14, 18–19, ma vaavaai mo upu ma fuaitau o loo faamalamalama atili mai ai le pogai na poloaiina ai e le Alii ia taitai o le Ekalesia e faatulaga le Kamupani Tuufaatasi. Atonu e te manao e faailoga upu po o fuaitau e te maua.
E pei ona tusia i le Mataupu Faavae ma Feagaiga 82:20–24, na faaiuina e le Alii lenei faaaliga i le lapataia o taitai o le Ekalesia, ina ia faamaoni i le feagaiga o le a latou osia o ni tagata o le Kamupani Tuufaatasi.
O leMataupu Faavae ma Feagaiga 82:10 o se mau tauloto. Taumafai e tauloto e ala i le fai pea mo ni nai taimi. A uma ona e taulotoina, fai atu i se tagata o le aiga po o se uo ma faasoa atu mea na oo ia te oe, ua faamautuina atu ai, e tausia e le Alii Ana folafolaga ia i tatou pe a tatou faia mea e finagalo i ai o Ia.
I lau api talaaga mo le suesueina o tusitusiga paia, tusi e uiga i le mea na e faasoa atu i le tagata o lou aiga po o se uo.
Ua faaali mai e le Alii le ala e tausia ai fafine ua oti a latou tane ma fanau ua leai ni matua
O le fa o aso talu ona uma ona maua le faaaliga o loo i le Mataupu Faavae ma Feagaiga 82, na maua ai e le Perofeta o Iosefa Samita se faaaliga e uiga i le taulimaina atili o manaoga faaletino o le Au Paia. Faitau le Mataupu Faavae ma Feagaiga 83:1, ma vaavaai po o manaoga o ai na faailoa mai i lenei faaaliga.
Ina ia malamalama i le vaega lenei, ia manatua o le toatele o le Au Paia sa ola i le tulafono o le faapaiaga, ma na maua se “tofi”, po o se fanua mai le Ekalesia. I le faaaliga lenei na faaali mai ai e le Alii, le mea e tatau ona tupu i le tofi o se aiga pe afai e maliu se tane po o le tama.
Faitau le Mataupu Faavae ma Feagaiga 83:2–3, ma vaavaai mo faatonuga a le Alii e uiga i le tausiga o fafine ua maliliu a latou tane. (Atonu e fesoasoani le iloaina i lena taimi, o le toatele o tamaitai sa faalagolago i a latou tane mo lo latou tausiga faaletino. “Ina ia maua le faaaumeaina i le ekalesia” o lona uiga, ona ua leai se tagata sa tuuina mai mea e manaomia e le ava, o lea o le a nafa ai le Ekalesia ma le vaaiga o mea na te manaomia.) Ona faitau lea o le Mataupu Faavae ma Feagaiga 83:4–6, ma vaavaai po o le a le auala e tatau ona tausia ai e le Ekalesia ia fanau ua leai ni matua ma fafine ua oti a latou tane.
Ata
tamaitai talavou i le taoofu sasama o loo vali
I lau api talaaga mo le suesueina o tusitusiga paia, tusi ai mea ua aoao mai e le Mataupu Faavae ma Feagaiga 83 ia te oe, e uiga i le finagalo o le Alii i fafine ua oti a latou tane, fanau ua leai ni matua, ma i latou uma e manaomia le fesoasoani?
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia: