I le usiusitai i faatonuga a le Alii, na faatuina ai e le Perofeta o Iosefa Samita ma isi e tusa ma le 200 o volenitia ma e na lesitala i le fitafita le mea na ta’ua o le Tolauapiga a Siona e o atu e fesoasoani i le Au Paia o e na faate’a ese mai le Itumalo o Jackson, Misuri. I le aso 22 o Iuni, 1834, a o tolauapi i tafatafa o le Vaitafe o Fagotaga i Misuri, na maua ai e Iosefa Samita le faaaliga o loo i ai i le Mataupu Faavae ma Feagaiga 105. I le faaaliga lenei na tuuina mai ai e le Alii faatonuga e faatatau i le laveaiina o Siona.
Ua faatonu e le Alii le Au Paia e faatalitali mo le laveaiina o Siona
Ata
ta vaiolini
Vaai faalemafaufau i le avea ma se tagata o se au faili toatele. I le ogatotonu o se faafiafiaga, na tonu ai i ni ta vaiolini toaitiiti e ta se itulau musika e ese nai lo le toatele o le aufaili. A o latou sauni e amata ona faia o lea mea, sa tonu i nisi o ili foafoa ia vave atu ona feula a latou mea fai faili. O le taimi lava foi lea e tasi, ua filifili ai le vaega atoa o pu apamemea e taofi le tataaga.
I le avea ai ma se tasi o le aufaili lenei, o a ni auala o le a e aafia ai i nei faaiuga? O le a le taunuuga o le faafiafiaga? Aisea e manaomia ai le lotogatasi i le faamoemoe ma galulue faatasi mo se aufaili ina ia maua ai ni musika matagofie?
Ia manatua ia Fepuari 1834, na faatonuina ai e le Alii le Perofeta o Iosefa Samita ma isi e faaputuputu mai punaoa faaletino ma ia maua mai ni volenitia e fesoasoani i le Au Paia o e sa tutuli ese mai i fafo o le Itumalo o Jackson, Misuri, i le toe mauaina o o latou fanua. A o e suesue i le Mataupu Faavae ma Feagaiga 105, vaavaai mo le matafaioi na faia e le lotogatasi i taumafaiga a le Au Paia ia toe maua mai le laueleele o Siona.
I se faaaliga na muamua atu (tagai i le MF&F 103:30–34), na fofoga mai ai e le Alii Lona finagalo ina ia auai ni volenitia se 500 i le Tolauapiga a Siona. Afai e le mafai ona maua se 500, o le 100 le fuainumera aupito maualalo o volenitia sa Ia manaomia. O le tali atu i taumafaiga a le Perofeta o Iosefa Samita ma isi ia maua mai ni volenitia ma ni punaoa mo le Tolauapiga a Siona, sa le’i faamanuiaina i le mea sa faamoemoe i ai. E oo ane i le taimi na amata ai ona savavali le tolauapiga i le amataga o Me 1834, sa na o le toa 122 tagata sa volenitia e o. Sa maua e le Tolauapiga a Siona ni volenitia faaopoopo a’o agai atu i le ala i Misuri. Ina ua fetaui le vaega sa maua mai e Ailama Samita ma Laimani Wight mai le Teritori o Michigan ma le vaega a Iosefa i le amataga o Iuni 1834, sa na o le 200 alii, 12 tamaitai, ae toa 9 tamaiti o le Tolauapiga a Siona (tagai Alexander L. Baugh, “Joseph Smith and Zion’s Camp,” Ensign, Jun. 2005, 45).
O le averesi o le matutua o alii i le Tolauapiga a Siona o le 29 tausaga le matua. O le tagata aupito laitiiti o le tolauaiga sa 14 tausaga le matua, ae o le tagata aupito matua sa 79. O Iosefa Samita, o le na filifilia e avea ma “taitai au o autau a Isaraelu” (i le History of the Church, 2:39), sa na o le 28 ona tausaga.
Faitau le Mataupu Faavae ma Feagaiga 105:7–8, ma vaavaai mo le mafuaaga e tasi na ala ai ona filifili nisi o tagata o le Ekalesia e le fesoasoani atu i o latou uso a Au Paia i Misuri.
Sa faatalitali nisi o tagata o le Ekalesia e vaai pe o le a faasalavei mai le Atua ma fesoasoani i le Au Paia i Misuri ona faatoa latou fesoasoani lea pe tuuina atu fesoasoani tau tupe i o latou uso a tagata o le Ekalesia. O le a le mea e te manatu e sese ai lenei uiga faaalia?
Faitau le Mataupu Faavae ma Feagaiga 105:1–6, ma vaavaai mo auala na aafia ai tagata o le Ekalesia ona o le le usiusitai ma le leai o se lotogatasi. Atonu e aoga le malamalama e faapea “o le tulafono o le malo selesitila” o loo ta‘ua i fuaiupu e 4–5 e aofia ai tulafono ma mataupu faavae uma e tatau ona tatou usitaia, o sauniga e tatau ona tatou maua, ma feagaiga e tatau ona tatou tausia ina ia mautofi ai i le malo selesitila.
Tali fesili nei i lau api talaaga mo le suesueina o tusitusiga paia:
O le a se mataupu faavae e mafai ona tatou aoao mai i nei fuaiupu e uiga i le mea e tatau ona tatou faia ina ia mafai ona atiina a’e Siona?
Aisea e te manatu ai e manaomia le lotogatasi ma le usiusitai i le atiina ae o Siona?
O a ni aafiaga ua fesoasoani ia te oe e te malamalama ai i le taua o le lotogatasi o tagata o le Ekalesia?
O i latou o e na volenitia mo le Tolauapiga a Siona sa feagai ma le tele o luitau ma vavega i la latou malaga umi. Mafaufau loloto po o le a sau tali atu i nisi o luitau nei:
Sa savavali le Tolauapiga a Siona i le tusa ma le 900 maila (1,450 kilomita) e ui atu i setete e fa, malaga i le va o le 20 ma le 40 maila (32 ma 64 kilomita) i le aso mo aso e 45. Sa aafia tagata o le tolauapiga i faafitauli o le mafoefoe o vae, vevela ma le susu o tulaga o le tau, lelava o meaai, ma meaai le maloloina. (Tagai Alexander L. Baugh, “Joseph Smith and Zion’s Camp,” 44; Church History in the Fulness of Times Student Manual, 2nd ed. [Church Educational System manual, 2003], 143–44.) I nisi taimi, o le galala i le fia feinu na faaosofia ai nisi tagata o le tolauapiga e feinu i vaivaito’a lea na vaimama ese ai ia tugatuga (o nisi taimi e faaaoga ai o latou nifo) po o le feinu i vai mai tulagavae o solofanua ina ua mavae se timu afa. I le malaga atoa, sa masani ona faamatauina ai le Tolauapiga a Siona i le faasaua mai o isi. (Tagai i le Church History in the Fulness of Times,144–45.)
E ui lava i o latou luitau, sa faamanuiaina le Tolauapiga a Siona e iloa le tele o vavega i la latou malaga atoa. Mo se faataitaiga, i se tasi aso vevela ia Iuni 1834, na aso atoa o malaga le tolauapiga ma sa leai ni vai talu mai le taeao. Ina ua mavae le matauina o mafatiaga o alii ma a latou manu, na talosaga atu le Perofeta mo se suo, filifilia se nofoaga, ma eliina se vaieli papau. Sa vave ona faatumuliaina i le suavai, ma sa tumau pea le tumu seia oo lava ina maua le faasiligamalosi o tagata uma o le tolauapiga ma a latou manu.
I le ogatotonu o Iuni 1834, sa api ai le Tolauapiga a Siona i se alavai o le Vaitafe o Fagotaga i Misuri. E toalima tagata Misuri faaauupegaina sa tietie mai i totonu o le tolauapiga ma tauto e faapea o le a “vaai le [Tolauapiga a Siona] ia seoli a’o le’i oo i le taeao” (i le History of the Church, 2:103). Sa latou fai mai, na aufaatasi se vaega faatupu faalavelave e silia ma le 300 o alii mai itumalo eseese ma sa sauni e sopoia le Vaitafe o Misuri e faaumatia i latou. Sa mananao nisi o alii i le Tolauapiga a Siona e tau, ae na folafola atu e le Perofeta o le a puipuia i latou e le Alii. Na folafola atu e le Perofeta, “Ia tutu ma le mautinoa ma vaai i le faaolataga a le Atua” (sii mai i le Joseph Holbrook, “History of Joseph Holbrook, 1806–1885,” 15, i le Church History in the Fulness of Times,148.)
Ata
Vaitafe o Fagotaga
Vaitafe o Fagotaga, Misuri
I ni nai minute talu ona tuumuli tagata Misuri, na faaali mai se ao uliuli laitiiti i le lagi. Sa see atu agai i sasae, ma talatala ai e pei o se tusitaai, ma faatumulia ai le lagi i le pogisa. Sa palasi mai se afa tele o timuga, timuaisa, matagi, faititili, ma uila. Sa lafoai e le Tolauapiga a Siona o latou faleie ae sulu i se falelotu tuai o le lotu Papatiso sa lata ane. Ina ua sau i totonu Iosefa, sa ia alaga, “Alii, e i ai se uiga o lenei mea. O loo i ai le Atua i le afa.” Sa taofi e le afa ia le vaega faatupu faalavelave o e sa taumafai e sopoia le Vaitafe o Misuri. O matagi saua na susu pala ai ututau a le au faatupu faalavelave, ma na leai ma se aoga. Sa faapea foi ona fefefe ma taapeape solo ai a latou solofanua ma siisii ai i luga le loloto o le Vaitafe o Fagotaga i ni futu, ma taofia ai i latou mai le osofaia o le Tolauapiga a Siona. (Tagai i le Church History in the Fulness of Times,148; tagai foi History of the Church, 2:104–5.)
O nei aafiaga e faapupula mai ai auala taua ma le ofoofogia, na fesoasoani ai le Alii i le Tolauapiga a Siona. Sa Ia fesoasoani foi ia te i latou i ni auala laiti. I lau api talaaga mo le suesueina o tusitusiga paia, tusi e uiga i se taimi na fesoasoani ai le Alii ia te oe, po o se tasi e te iloa ia ausia Ona faamoemoega.
A o lei tuua e le Tolauapiga a Siona ia Katelani, Ohaio, na maua e taitai o le Ekalesia se folafolaga mai ia Daniel Dunklin, le kovana o Misuri, e faapea, afai o le a le faamautinoa mai e le alii ofisa e tausisia le filemu o le Itumalo o Jackson, le saogalemu o le Au Paia, o le a ia faaaogaina isi auala e faamalosia ai le tulafono. Sa ia fai mai foi o le a manaomia se vaegaau a le setete e fesoasoani i le Au Paia ia toe foi atu ai i o latou aiga. Ina ua taunuu atu tagata o le Tolauapiga a Siona i Misuri, na latou iloa ai o le a le tausia e Kovana Dunklin lana folafolaga e fesoasoani i le Au Paia. (Tagai i le Church History in the Fulness of Times, 135, 146–47.) E ui lava i lenei tala faavaivai loto, sa faaauau pea ona agai atu le Tolauapiga a Siona i le Itumalo o Jackson, ma faatalitali mo se faatonuga faaopoopo mai le Alii.
O lenei taitaiga manaomia na oo mai i se faaaliga mai le Alii i le aso 22 o Iuni, 1834, ina ua toeitiiti atoa le fitu vaiaso o malaga pea le Tolauapiga a Siona ma sa na o le 10–20 maila (16–32 kilomita) mai le Itumalo o Jackson. O lenei faaaliga o loo tusia i le Mataupu Faavae ma Feagaiga 105. Faitau le Mataupu Faavae ma Feagaiga 105:9–14, ma vaavaai mo le mea na fetalai mai le Alii na tatau ona latou faia e uiga i le laveaiga o Siona.
Ata
o alii o loo tosoina taavaletoso
Vaai faalemafaufau i le avea ma se tagata o le Tolauapiga a Siona. Ina ua oo mai i lenei mamao, ua e iloa o le a manaomia ona e faatalitali mo “se vaitau itiiti” ona laveaiina ai lea o Siona. O le a sou lagona o le a i ai?
I lau api talaaga mo le suesueina o tusitusiga paia, lisi ni mafuaaga se lua na tuuina mai e le Alii i le Mataupu Faavae ma Feagaiga 105:9–14 pe aisea o le a le laveaiina ai Siona i lena taimi. Mo nei mafuaaga taitasi, ia faamalamalama mea o le a manaomia ona faasa’oina pe tutupu a’o le’i mafai ona laveaiina Siona ae aisea foi.
Ia manatua o le laveaiina o Siona e le faatatau i le na o le toe mauaina o le laueleele o Siona. E ui o Siona o se nofoaga faaletino, ae o se faapotopotoga foi na i ai ni ituaiga tagata faapitoa. E tatau ona faapaiaina tagata o le Alii ma agavaa ia toe maua ma atiina a’e le aai o Siona.
O le toatele o tagata o le Tolauapiga a Siona na taliaina faatonuga a le Alii i lenei faaaliga, ae o isi sa muimui ma sa le’i faaauau ona faamaoni ina ua latou iloaina o le a latou le tau i Misuri. Sa le mafai ona latou malamalama o le faamoemoega loloto o le Tolauapiga a Siona, ia le auai i se taua po o le toe mauaina o meatotino o fanua o le Au Paia i le Itumalo o Jackson e ala i le malosiaga faalefitafita. Sa saunia alii o le tolauapiga e tau pe afai e faamatauina o latou ola, ae sa le’i fuafua le Alii e laveai Siona e ala i le malosi o le tagata (tagai i le MF&F 103:15–18; 105:14). O se taunuuga o lenei faaaliga o le poloaiina o i latou e faatali ae aua le tau, sa fouvale faaaliali ai nisi o alii ma mulimuli ane, liliuese ai.
Faitau le Mataupu Faavae ma Feagaiga 105:18–19, ma vaavaai mo le mafuaaga na aumai mamao ai e le Alii le Tolauapiga a Siona i Misuri, ona faaali mai lea i le taimi na latou taunuu ai, e le tatau ona latou galulue e toe faafoi le Au Paia i o latou fanua i Siona i lena taimi. (Atonu e aoga le malamalama o le tofotofoga o le faatuatua e mafai ona ta’ua o le suega pe o le a tatou filifili e talitonu ma usitai i le Alii pe leai, e tusa lava po o a tulaga e i ai.)
Mafaufau e faailoga fuaitau i fuaiupu e 18–19 lea e aoao mai ai upumoni e faapea, ua saunia e le Atua faamanuiaga mo i latou o e faamaoni i o latou tofotofoga.
Tali fesili nei i lau api talaaga mo le suesueina o tusitusiga paia:
O le a se taimi na tupu ai ia te oe po o se tasi e te iloaina se tofotofoina o le faatuatua?
Na faapefea ona avea le tofotofoina o le faatuatua o se sauniuniga mo faamanuiaga o le lumanai?
O se tasi o faamanuiaga na maua e le toatele o tagata o le Tolauapiga a Siona na oo mai o ni avanoa e auauna atu ai i le malo o le Alii. Ia Fepuari 1835, na faatulagaina ai le Korama a Aposetolo e Toasefululua ma le Korama Muamua a Fitugafulu. O le toaiva o uluai Aposetolo ma sui uma o le Korama a Fitugafulu sa auauna atu i le Tolauapiga a Siona. (Tagai i le Church History in the Fulness of Times,151.)
Ata
Iosefa Samita
Na aoao mai le Perofeta o Iosefa Samita e uiga i le matafaioi na i ai a le Tolauapiga a Siona i le sauniaina o nei alii mo o latou tulaga faaleautaitai: “Sa le’i finagalo le Atua tou te tau. Sa le mafai ona Ia faatulagaina Lona malo i ni tamalii e toasefululua e tatalaina faitotoa o le Talalelei i atunuu o le lalolagi, ma i ni tamalii e toa fitusefulu i lalo o la latou taitaiga ia mulimuli i o latou tulagaaao, seiiloga na Ia aveina i latou mai se tino o alii o e na ofoina atu o latou ola, ma o e na faia se osigataulaga maoae e pei ona sa faia e Aperaamo” (i le History of the Church, 2:182).
Na faailoa mulimuli atu e taitai o le Ekalesia le agaga faafetai mo aafiaga na latou oo i ai o ni tagata o le Tolauapiga a Siona. Mo se faataitaiga, ina ua toe foi atu Polika Iaga i Katelani, Ohaio, sa fesiligia o ia e se tagata, “Ia, o le a se mea na e maua mai i lenei malaga le aoga i Misuri faatasi ma Iosefa Samita?” Sa tali atu Polika Iaga, “O mea uma sa matou o ai.” Sa ia faaopoopo atu, “O le a ou le faafesuiaia le aafiaga sa ou maua i lena malaga mo le oa uma o le itumalo o Geauga” (i le B. H. Roberts, “Brigham Young: A Character Sketch,” Improvement Era, Iuni 1903, 567). I lena vaitaimi, sa avea ai Katelani o se vaega o le Itumalo o Geauga.
Ua aoao mai e le Alii le Au Paia i le mea e tatau ona latou faia a’o le’i laveaiina Siona
I le Mataupu Faavae ma Feagaiga 105:20–37, tatou te faitau ai, na ta’u atu e le Alii i le Au Paia i Misuri le auala na tatau ona latou tali atu ai i sauaga sa latou oo i ai a’o faatalitali mo le laveaiga i le lumanai o Siona. Sa Ia fautuaina i latou e lotomaualalalo ma le aloese mai le faaosoina o finauga. Sa Ia fetalai mai na manaomia lo latou faapaiaina e sauniuni ai mo le laveaiga mulimuli ane o Siona. E pei ona Ia fofogaina muamua atu i le faaaliga lava lea e tasi, sa tatau “ona aoaoina atili atoatoa [i latou], ma maua le poto masani, ma iloa atili atoatoa e faatatau i lo latou tiute, ma mea ua Ou manaomia mai i o latou lima” (MF&F 105:10).
Sa faaiuina e le Alii lenei faaaliga e ala i le faatonuina o le Au Paia e fai se mea e le gata mo i latou o e na sauaina i latou ae mo le lalolagi atoa. Faitau le Mataupu Faavae ma Feagaiga 105:38–41, ma vaavaai mo le mea na Ia faatonuina i latou e fai. (A o e faitau, atonu e aoga le iloa e faapea, o le aioi o lona uiga ia saili ae o se tagavai o se fu‘a po o se faailo.)
Faauma galuega atofaina nei i lau api talaaga mo le suesueina o tusitusiga paia:
E faavae i aoaoga a le Alii i le Mataupu Faavae ma Feagaiga 105:38–41, tusi se mataupu faavae e uiga i le faamanuiaga e mafai ona oo mai pe a tatou saili e tausi le filemu ma isi.
Lisi ni mea se fa pe lima e mafai ona fai e tagata o le Ekalesia i o tatou aso e saili ai ia tausia le filemu ma isi, aemaise lava ma i latou o e atonu e sauaina i latou.
Filifili se mea se tasi na e lisiina, ma tusi se sini e faaaoga ai i lou olaga.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia: