I le tautotogo o le 1829, na oo ai i le Perofeta o Iosefa Samita se lagona o le faanatinati e uiga i le faaliliuga o le Tusi a Mamona. Sa ia iloa na utiuti tele lona taimi e faaliliu ai ona o le tatau ona faigaluega e tausi ai lona aiga. Sa fesoasoani Ema ma Samuelu, le uso o Iosefa e ala i le avea ma ni tusiupu, ae sa le mafai ona latou faia lenei mea i le taimi atoa. Na silia i le tausaga ma le afa talu ona tuuina mai ia Iosefa ia papatusi ma, faatasi ai ma le leiloloa o itulau e 116 o tusitusiga, ae sa na o ni nai itulau o mea na faaliliuina e faaalia ai. Sa tatalo Iosefa ina ia auina mai e le Alii se tasi e mafai ona fesoasoani ia te ia i le galuega o le faaliliuga. O le tali i le tatalo a Iosefa, na auina mai ai e le Alii ia Oliva Kaotui e avea ma se tusiupu.
O faaaliga i le Mataupu Faavae ma Feagaiga 6–7 sa tuuina mai i se taimi ae le’i leva ona taunuu atu ia Oliva Kaotui. O leMataupu Faavae ma Feagaiga 6 o loo i ai fautuaga ia Oliva e faatatau i lana matafaioi i le galuega a le Alii. O leMataupu Faavae ma Feagaiga 7 o loo i ai se lomiga ua faaliliuina o nisi o tusitusiga a Ioane le Soo Pele, o loo aoao mai ai, na talia e le Alii le manao o Ioane ia ola e aumai tagata ia Iesu Keriso seia oo i le Afio Mai Faalua.
Ua avea Oliva Kaotui ma se tusiupu ia Iosefa Samita
O faaaliga mai le Atua, e faatusaina i nisi o taimi i le malamalama. Afai la o faaaliga mai le Atua po o se tali i tatalo ua pei o le malamalama, faatusatusa faamatalaga nei ma mafaufau po o le fea e sili atu ona faatusa i ai [ou] lagona i le taimi na e maua ai se faaaliga po o ni tali i au tatalo:
O le malamalama vave lea e oo mai pe a e kiina se matauila
O le malamalama faifai malie lea e oo mai i le oso a’e o le la
Ata
matauila susulu, la oso puaoa
Sa faaaoga e Elder David A. Bednar o le Korama a Aposetolo e Toasefululua, lenei faatusatusaga e aoao mai ai e uiga i faaaliga faaletagata lava ia:
Ata
Elder David A. Bednar
“O se malamalama e ki i se potu pogisa e faapei o le mauaina vave i le taimi e tasi o se feau atoa mai le Atua. E toatele i tatou ua silafia lenei mamanu o faaaliga a o tuuina mai ia i tatou ia tali i tatalo ma le loto faamaoni, po o le tuuina mai foi o faatonuga ma le puipuiga tatou te manaomia, e tusa ai ma le finagalo ma le taimi a le Atua. O faamatalaga o faaaliga e vave ona maua ma malolosi o loo maua i tusitusiga paia, o loo toe faamatalaina i le talafaasolopito o le Ekalesia, ma molimauina i o tatou lava olaga. E moni, e tutupu nei vavega ofoofogia. Peitai, o lenei mamanu o faaaliga e foliga mai e tau le maua ma e le taatele.
“O le faateleina faifai malie o le susulu o le malamalama mai le oso a’e o le la, e pei lava o le mauaina o se feau mai le Atua i lea ‘upu ma lea upu, o le fuaiupu ma le fuaiupu’ (2 Nifae 28:30). O le tele lava o taimi, e oo mai faaaliga i nai faaopoopoga laiti mo sina taimi, ma e tuuina mai e tusa ai ma o tatou manaoga, agavaa, ma tapenapenaga. O na fesootaiga mai le Tama Faalelagi e faasolosolo malie mai ma le le gaoiā ma ‘toto ifo [i o tatou agaga] e pei o le sau mai le lagi’ (MF&F 121:45). O lenei mamanu o faaaliga e foliga mai e taatele nai lo le seāseā tupu” (“O Le Agaga o Faaaliga,” Ensign po o le Liahona, Me 2011, 88).
Mafaufau loloto i taimi na tali mai ai le Alii i au tatalo i le taimi lava lena ma taimi na Ia tali faasolosolo malie mai ai. Tusi i lau api talaaga mo le suesueina o tusitusiga paia e uiga i se tasi o ou aafiaga.
A o e suesue i le Mataupu Faavae ma Feagaiga 6, vaavaai mo upumoni o le a fesoasoani e te iloa ai le taimi e tuuina mai ai e le Atua se faaaliga ia te oe.
Faitau le Iosefa Samita—Talafaasolopito 1:66–67, ma vaavaai pe na faapefea ona iloa e Oliva Kaotui ia Iosefa Samita ma le galuega na ia faia. Na malaga mai Oliva mai Palamaira, Niu Ioka, e feiloai ia Iosefa i Haramoni, Penisilevania, e silia ma le 140 maila le mamao (tagai i le Church history map 1, “Northeastern United States”).
E lei leva ona galue ia Oliva i le avea ma se tusiupu mo Iosefa, ae maua e Iosefa se faaaliga lea na fetalai mai ai le Alii ia Oliva. O lenei faaaliga na talanoa mai ai e uiga i manaoga o Oliva ma faapea ona taliina ai fesili sa ia tatalo e uiga i ai, ae na te le’i faailoaina atu ia Iosefa. Faitau le Mataupu Faavae ma Feagaiga 6:5–6, 8, ma vaavaai mo faailoga na silafia e le Alii manaoga o Oliva.
I lau api talaaga mo le suesueina o tusitusiga paia, tali ai le fesili lenei: O le a se mea o ta’u mai ia i tatou e le Mataupu Faavae ma Feagaiga 6:5-6, 8 ma le taumafaiga a Oliva Kaotui e malaga i le 140 maila, e uiga ia te ia?
I lau api talaaga mo le suesueina o tusitusiga paia, tusi ai ni upumoni se lua pe tolu e te tau i ai i le Mataupu Faavae ma Feagaiga 6:14–17, 20 e mafai ona fesoasoani e te malamalama ai i le auala e maua ai pe iloa ai faaaliga.
Faatusatusa mea na e tusia i lau api talaaga mo le suesueina o tusitusiga paia i nisi o upumoni nei o loo i ai i nei fuaiupu:
A o tatou saili atu i ni tali mai le Tama Faalelagi, o le a Ia tuuina mai ia i tatou faatonuga (tagai i le MF&F 6:14). O “faatonuga” e mafai ona faasino i manatu po o le malamalama lea e oo mai i o tatou mafaufau faapea foi ma aafiaga lea e mafai ona taitai atu ai i tatou, saunia ai i tatou, po o le fesoasoani ia i tatou e oo atu i le faaiuga sa‘o.
O le a faapupulaina e le Alii o tatou mafaufau e ala i le Agaga Paia. O le fasifuaitau “faapupulaina lou mafaufau” (MF&F 6:15) o lona uiga, o le a tuuina mai e le Alii ia i tatou ni manatu ma le malamalama, e ala mai i le Agaga Paia. Atonu e te manao e faailoga le fasifuaitau lenei i au tusitusiga paia.
E silafia e le Atua o tatou mafaufauga ma faamoemoega o o tatou loto (tagai i le MF&F 6:16).
Pe a tatou maua faaaliga, e tatau ona teuina i o tatou loto. O le “teu” o afioga a le Alii (MF&F 6:20) o lona uiga, ia faatauaina afioga a le Alii—ia suesue, mafaufau loloto, ma galue i mea ua faaalia mai e le Alii, ma ia faatuatuaina faaaliga tatou te maua.
Faatumu le avanoa i mea na maua: E fetalai mai le Alii i o tatou mafaufau o se molimau o le mea moni. Atonu e te manao e faailoga le fasifuaitau o loo aoao mai ai lenei upumoni i le Mataupu Faavae ma Feagaiga 6:23.
Mafaufau loloto i le fesili lenei: O a ni auala tatou te le amanaiaina ai i nisi o taimi pe le ano ai i tali a le Alii i a tatou tatalo?
Sa toe faalautele mai e Elder Bednar le faafaatusa o le la oso, ina ia fesoasoani e faamanino mai ai auala e masani ona oo mai ai fesootaiga mai le Alii:
Ata
Elder David A. Bednar
“O nisi taimi e oso a’e le la i se taeao e puaoa ma pe ufitia i le ao. Ona o tulaga faamalumalu mai, o le a faigata ai ona iloa le malamalama, ma o le a le mafai ona faailoa le taimi tonu e oso a’e ai le la i le tafailagi. …
“I se auala foi faapena, e tele taimi tatou te mauaina ai se faaaliga e aunoa ma le iloa tonu pe faapefea ae pe o afea foi tatou te maua ai le faaaliga” (“O Le Agaga o Faaaliga,” 89).
Ana le mavae lava le maua mai o le faaaliga o loo i le Mataupu Faavae ma Feagaiga 6, e le faamatala e Oliva Kaotui i le Perofeta e uiga “i le po” lea na faatatau i ai le Alii i le fuaiupu 22. Na tusia e Iosefa Samita, “Ina ua uma ona ma maua lenei faaaliga, ona faamatala mai lea e Oliiva Kaotui ia te a’u e faapea, ina ua alu atu o ia i le fale o lo’u tama e malolo, ma ina ua uma ona talanoa atu le aiga ia te ia e uiga i lo’u aumaia o papatusi, o lena po e tasi ina ua alu e moe, sa valaau atu ai o ia i le Alii ina ia iloa pe e moni nei mea, ma o lea na faaali mai ai e le Alii ia te ia ua moni, ae sa ia faia faalilolilo lea tulaga, ma sa leai se tasi na ia tauina i ai; o lea la, ina ua uma ona tuuina mai lenei faaaliga, na ia iloaina e moni le galuega, aua e leai se tagata ola na iloaina le mea na ta’ua mai i le faaaliga, ae ua na o le Atua lava Ia” (i le History of the Church, 1:35).
Mafaufau i ni taimi i lou olaga na e lagonaina ai i lou mafaufau le faamalamalamaina po o le lagonaina o le toafilemu e uiga i se mea sa e tatalo ai. Tusi e uiga i se aafiaga i lau api talaaga mo le suesueina o tusitusiga paia; ona mafaufau lea e tusi nisi o nei mea e manatua i lalo i lau api talaaga o le tagata lava ia.
Mafaufau pe faapefea e le manatuaina o nei aafiaga ma le faatuatuaina o le faaaliga faaletagata lava ia na e maua i le taimi ua tuanai, ona fesoasoani ia te oe i le lumanai pe a e manaomia se faaaliga po o se taitaiga.
Ua fautua mai le Alii ia Iosefa ma Oliva e faaliliu ma ia le masalosalo pe matatau foi
I le Mataupu Faavae ma Feagaiga 6:25–31 tatou aoao ai, na ta’u mai e le Alii ia Oliva Kaotui afai e manao i ai, e mafai ona ia maua le meaalofa o le faaliliu. Sa valaauina foi o ia e le Alii e tutu faatasi ma le Perofeta o Iosefa Samita ma “aumai ai i le malamalama lenei auaunaga” i le avea ai ma se molimau lona lua o le Toefuataiga. Ana faapea o oe o Oliva, o a ni lagona atonu e te maua ina ua e faalogo i le tiutetauave na tuuina mai e le Alii i ou luga?
Mafaufau i ni tulaga atonu na e lagonaina ai le masalosalo po o le fefe e uiga i se mea na finagalo le Alii e te faia, e pei o se taimi na e saofai ai i luga o le tulaga i se sauniga a le Ekalesia ma faatalitali e tuuina atu se lauga, lagona le uunaiina e faasoa atu le talalelei i se uo, po o le iloaina sa tatau ona e faatoese atu i se tagata o le aiga mo se mea sa e faia po o se faamatalaga na e faia.
Faitau le Mataupu Faavae ma Feagaiga 6:32–37, ma saili mo le fautuaga a le Alii na tuuina mai ia Iosefa Samita ma Oliva Kaotui e faatatau i masalosaloga ma atuatuvalega i le faia o le galuega sa valaauina i laua e fai.
O se mataupu faavae e tasi e mafai ona tatou aoao mai i lenei fautuaga o le, a o tatou vaavaai atu ia Iesu Keriso, e mafai ona tatou faatoilaloina ai le masalosalo ma le fefe. (O leMataupu Faavae ma Feagaiga 6:36 o se mau tauloto.)
I lau api talaaga mo le suesueina o tusitusiga paia, tusi ai se tautalaga puupuu (ia itiiti ifo ma le tasi le itulau) e faatatau i le Mataupu Faavae ma Feagaiga 6:36. E mafai ona e faamatalaina i ni auala lelei e mulimuli ai i fautuaga o loo i lenei fuaitau o le mau tauloto. E mafai ona e faaaogaina punaoa e pei o le Taiala mo Autu po o le Taiala i Tusitusiga paia, Faamaoni i le Faatuatua, po o tagata foi o le aiga e fesoasoani ia te oe i le tusiga o lau lauga. Ia aofia ai se faataitaiga patino a le Faaola ua fesoasoani ia te oe e faatoilalo ai le masalosalo po o le fefe. Fai atu i ou matua pe mafai ona e faasoa atu le lauga na e saunia i le taimi o se afiafi faaleaiga.
Ua folafola mai ia Ioane o le a ola pea o ia ma aumai agaga ia Keriso seia oo i le Afio Mai Faalua
I se vaitaimi ia Aperila 1829, a’o fesoasoani Oliva Kaotui i le Perofeta o Iosefa Samita i le faaliliuga o le Tusi a Mamona, sa oo ina i ai “se eseesega o o laua manatu” ma Iosefa … e uiga i le tala a le Aposetolo o Ioane, na ta’ua i le Feagaiga Fou [tagai i le Ioane 21:20–23; lea na ta’ua ai e le Faaola le talosaga a Ioane ina ia nofo ai pea i le lalolagi seia oo i le Afio Mai Faalua] pe na maliu o ia pe na faaauau pea ona soifua” (Joseph Smith, i le History of the Church, 1:35–36).
Faitau le Mataupu Faavae ma Feagaiga 7:1-3 ina ia iloa ai le tali i le fesili a Iosefa ma Oliva. Afai e i ai se faafitauli i le faailoaina mai o le tali, faitau le vaega o le otootoga mo fuaiupu 1–3.
E ese mai i mea ua faamatalaina i nei fuaiupu, e leai se mea ua faaalia mai e uiga vaega faapitoa o le auaunaga a Ioane, po o fea o i ai, po o mea na ausia i le avea ai o se tagata liua, o lea la, e le o se mea talafeagai le taumatemate o ia mea.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia: