O leMataupu Faavae ma Feagaiga 121 o loo i ai ni vaega o se tusi musuia na tusia e le Perofeta o Iosefa Samita i le Au Paia, i le aso 20 Mati, 1839, mai le Falepuipui o Liperate. O leMataupu Faavae ma Feagaiga 121:11–33 o loo i ai le faamatalaga a le Faaola o le faamasinoga lea o le a oo mai i luga o e amioleaga ma Lana folafolaga o faaaliga i e lotototoa.
Ua faamatala e le Faaola ia faamasinoga o le a oo mai i luga o i latou o e sauaina le Au Paia
Vaai faalemafaufau e faapea, i se tasi taeao a o e tuua lou fale, na e matauina ai le faamatalaga lenei na faapipii i fafo o le faitotoa o lou fale: “O Mamona e tatau ona avea o ni fili ma e tatau ona fasiotia.”
Mata o le a e fefe e tuua lou fale? O fea o le a e liliu i ai mo se fesoasoani? O a ni ou lagona e i ai, pe afai e te iloa ane, o le faamatalaga sa faaosoina e nisi sa avea muamua ma ni au uo?
A o lei tuuina le Perofeta o Iosefa Samita i le falepuipui, sa faapea ona faasagatau atu ai ia te ia, ia nisi o ana uo o e sa avea ma ni ana uo faamaoni . O le toalua o nei tagata sa avea muamua ma ana uo, o Thomas B. Marsh ma Orson Hyde, sa avea ma ni sui o le Korama a Aposetolo e Toasefululua. Sa sainia uma e nei alii e toalua se faamatalaga (o se faamatalaga sa tauto ai) ma tuuaia sese ai Iosefa Samita ma isi tagata o le Ekalesia, e faapea na fuafua e tutuliese o latou fili e ala i le susunuina ma le faaleagaina o a latou meatotino. O lenei faamatalaga na tauto ai, sa uunaia ai le kovana o Misuri e tuuina atu se faamatalaga, sa ta’ua o le poloaiga o le fasiotiga [o Mamona], ma folafola atu e tatau ona fasiotia uma Mamona pe tutuliese mai le setete. O le faamatalaga na e vaai faalemafaufau o faapipii i luga o lau faitotoa, o se upusii sa’o lava mai lena poloaiga o le fasiotiga [o Mamona] (tagai i le History of the Church, 3:175).
Ia manatua o le Mataupu Faavae ma Feagaiga 121-23 o ni vaega o se tusi musuia na tusia e le Perofeta o Iosefa Samita i le Au Paia ia Mati, 1839, a’o faafalepuipuiina o ia i le Falepuipui o Liperate. Faitau le Mataupu Faavae ma Feagaiga 121:11–17, ma vaavaai mo le mea na aoaoina e le Perofeta mai le Alii e faatatau i le mea o le a tupu ia i latou o e na tuuaia le auauna a le Alii i solitulafono.
O le fuaitau “o le a lepetiaina lo latou faamoemoe, ma lo latou faamoemoega o le a liusuavai ese” (MF&F 121:11) ua faailoa mai ai o i latou o e tau faasaga i auauna a le Alii o le a i ai se aso e le manuia ai a latou fuafuaga.
Suesue i le Mataupu Faavae ma Feagaiga 121:18–22, ma vaavaai mo taunuuga faaopopo o le a oo mai ia i latou o e tuuaia sese ma tau faasaga i auauna a le Alii. (I le fuaiupu e 19, o le fuaitau “vavae ese … mai sauniga o le fale [o le Alii]” o lona uiga o le aveesea po o le vavaeeseina mai i faamanuiaga e o mai faatasi ma sauniga o le malumalu.)
Tali fesili nei i lau api talaaga mo le suesueina o tusitusiga paia:
I fuaiupu e 13 ma le 17, o a mafuaaga na tuuina mai e le Alii na mafua ai ona tuuaia e nisi tagata ia Ana auauna i agasala?
E tusa ai ma fuaiupu 19–22, o a tulaga e matautia ai le fai o faamatalaga sese e faasaga i auauna a le Atua?
O faamatalaga sese mai tagata liliuese o le Ekalesia ma isi, faatasi ai ma le poloaiga o le fasiotiga [o Mamona] mai le kovana, na faaosoina ai vaega faatupu faalavelave e faateteleina lo latou sauaina o le Au Paia i Misuri.
Ata
vaaiga i le au faatupu faalavelave
Na faaleaga e tagata faatupu vevesi meatotino a tagata o le Ekalesia i Misuri.
A o e faitau i le tala lenei, faailoga faataitaiga o auala sa taulimaina ai ma le le tonu le Au Paia:
I le aso 30 o Oketopa, 1838, i le na o le tolu o aso talu ona tuuina mai le poloaiga o le fasiotiga [o Mamona], e tusa ma le 240 alii na o atu i se nofoaga na nofoia e tagata Mamona i se nofoaga na ta’ua o le Fale Vili Falaoamata a Hawn (po o le Fale Vili Falaoamata a Haun). Sa sosola fafine ma tamaiti i le vao, a’o saili e alii le puipuiga i le fale uamea. O se tasi o taitai o le Au Paia, o David Evans, sa talotalo atu lona pulou ma alaga atu mo le filemu. Sa tali mai le pao o fana e selau ia te ia, o le tele lava sa ta’i atu i le fale uamea. Sa tafana ma le le alolofa e tagata faatupu faalavelave i soo se tasi na iloa atu, na aofia ai fafine, toeaiina, ma tamaiti. Sa tatoso mai e Amanda Smith lana fanau teine laiti e toalua ma taufetuli faatasi ma Mary Stedwell i le vaituloto o le vilivai i luga o se auala savali. Na faamatalaina e Amanda, “E ui lava o i matou o ni tamaitai, ma ni fanau laiti, sa sosola mo o matou ola, ae sa faasolo mai e temoni ia lea pulufana ma lea pulufana e fasioti ai i matou” (i le Andrew Jenson, “Amanda Smith,” The Historical Record, Iulai 1886, 84).
Sa ulufale atu tagata o le vaega faatupu faalavelave i totonu o le fale uamea ma maua ma fasioti ai Sardius Smith e 10 tausaga le matua, o le tama tama a Amanda Smith, a’o lafi o ia i lalo o masini feula ea a le fai uamea. Sa faapea mai mulimuli ane le alii, “O lia o le a maua ai utu, ma ana fai e ola o ia, o le a avea o ia ma se Mamona” (i le Jenson, “Haun’s Mill Massacre,” Historical Record, Dec. 1888, 673; tagai foi i le B. H. Roberts, Comprehensive History of the Church, 1:482). Sa vaaitino Alma Smith, o le uso o Sardius e fitu tausaga le matua i le fasiotiga o lona tama ma lona uso, ma sa lavea foi lona suilapalapa i le fana. Sa le’i maua o ia e le vaega faatupu faalavelave ma sa faamaloloina mulimuli ane o ia i se tulaga faavavega e ala i le tatalo ma le faatuatua. E ui lava ina sa mafai ona sosola atu i le vaitafe ma agai atu ai i mauga ia ni nai alii faatasi ma tamaitai ma tamaiti, ae e le itiiti ifo ma le 17 tagata na fasiotia, ma e tusa ma le 13 sa manunua. (Tagai i le Church History in the Fulness of Times Student Manual, 2nd ed. [Church Educational System manual, 2003], 201, 203–4; tagai foi i le History of the Church, 3:183–86.)
E leai se tasi o le vaega faatupu vevesi leaga sa faia i ai se faamasinoga mo a latou solitulafono i faamasinoga a Misuri po o pulega faalemalo.
O a ni lagona atonu e oo ia te oe pe ana e aafia i nei faiga le alofa? Mata o a ni ou lagona e i ai ina ua e iloa o le a le faamasinoina i latou na osofaia oe mo a latou gaoioiga?
Faitau le Mataupu Faavae ma Feagaiga 121:23–25, ma vaavaai mo fuaitau o loo ta’u mai ai o le a faamasinoina e le Atua ia fili o le Au Paia mo a latou gaoioiga. (Tatou te le iloa pe o afea o le a oo mai ai i luga o fili o le Au Paia ia nei faamasinoga. O nisi o taunuuga e ono le oo mai seia oo i le olaga a sau.)
Faauma faamatalaga o upumoni nei e faavae i luga o mea ua e aoaoina mai fuaiupu e 24-25.
O Le Alii ma a tatou galuega uma.
O i latou o e tau faasaga i le Alii ma Lona nuu o le a maua i Lona taimi atofaina.
Mafaufau i ni taimi na e vaai ai i ni tagata o faia ni mea sese ma e foliga mai ua aloese mai taunuuga. I lau api talaaga mo le suesueina o tusitusiga paia, tali le fesili lenei: E mafai faapefea e mataupu faavae ua e faailoaina mai i le Mataupu Faavae ma Feagaiga 121:24–25 ona faatatau i tulaga i aso nei pe a foliga mai ua sao tagata mai taunuuga mo o latou mea sese?
Ua folafola mai le Atua e faaali mai upumoni e faavavau e ala i le Agaga Paia
Ata
totonu o le Falepuipui o Liperate
fogafale pito i lalo o le Falepuipui o Liperate
Faitau le Mataupu Faavae ma Feagaiga 121:26, ma vaavaai mo se upumoni na faamaumauina e le Perofeta o Iosefa Samita a’o faafalepuipuiina o ia i le Falepuipui o Liperate.
Faaaoga mea ua e aoaoina i le fuaiupu e 26 e faauma ai le faamatalaga lenei: O le Atua o le a e ala i le .
Ata
Elder Jeffrey R. Holland
A o e mafaufau pe faapefea ona fesootai lenei upumoni ia te oe pe a e oo i faigata, mafaufau loloto i le saunoaga lenei mai ia Elder Jeffrey R. Holland o le Korama a Aposetolo e Toasefululua: “E mafai ona e maua se aafiaga paia, faafaaaliga, ma loloto le aoaoga faatasi ma le Alii i aafiaga aupito sili ona faanoanoa o lou olaga—i nofoaga sili ona leaga, a o onosaia faamasinoga le sa’o aupito sili ona tiga, a’o feagai ma mea e sili ona matautia le faigata ma le tetee na e oo i ai” (“Lessons from Liberty Jail” [Brigham Young University fireside, Sept. 7, 2008], 4; speeches.byu.edu).
O le tala lenei a Lusi Maka Samita ua tuuina mai ai se faataitaiga o le auala e mafai e le Atua ona faaali mai le malamalama ia i tatou e ala i le Agaga Paia. A o e faitauina lenei tala, ia matau pe na faapefea e le malamalama na ia maua e ala i le Agaga Paia ona faamafanafanaina o ia e uiga i le faafalepuipuiina o lana fanau tama i le Falepuipui o Liperate, ina ua ave faapagotaina ia Iosefa ma Ailama ma faamata’uina i le oti.
Ata
Lusi Maka Samita
“Mo se vaitaimi sa faatumulia ai lo matou fale i le faanoanoa, tagiauē, ma faafitauli; ae, i le totonugalemu o lo‘u faavauvau, sa ou maua le mafanafana lea sa sili atu i faamafanafanaga faalelalolagi uma. Sa faatumulia a’u i le Agaga o le Atua, ma maua ai le mea lenei e ala i le meaalofa o valoaga: ‘Ia faamafanafanaina lou loto e uiga i lau fanau, o le a le faaleagaina i laua e o laua fili. …’ O lenei mea na to’a ai lo’u mafaufau, ma sa ou saunia e faamafanafana i la’u fanau. Sa ou ta’u atu ia i latou le mea na faaali mai ia te a’u, lea sa matuai faatoafilemuina ai i latou” (History of Joseph Smith by His Mother, ed. Preston Nibley [1958], 291).
Tali se fesili e tasi po o fesili uma i lau api talaaga mo le suesueina o tusitusiga paia:
E mafai faapefea e le mauaina o le malamalama e ala mai i le Agaga Paia, ona fesoasoani ia te oe pe a e feagai ma ni faigata?
O le a se taimi na e maua ai le malamalama e ala mai i le Agaga Paia lea sa faapea ona fesoasoani ia te oe i se taimi faigata?
I le Mataupu Faavae ma Feagaiga 121:26–33, na folafola mai le Alii e faaali mai le malamalama sa “lei faaalia lava talu ona i ai le lalolagi” (MF&F 121:26) ma tuuina mai ai faamanuiaga mamalu i luga o i latou uma o e “na tumau ma le lototoa mo le talalelei a Iesu Keriso” (MF&F 121:29).
I le Mataupu Faavae ma Feagaiga 121:33, sa faaaoga ai e le Perofeta o Iosefa Samita se tala faafaatusa e fesoasoani ai i le Au Paia ia malamalama, sa sili atu le malosi o le Alii nai lo o i latou o e sa sauaina le Au Paia ma taumafai e taofi le galuega a le Atua.
Faitau le fuaiupu e 3, ma vaavaai mo le faatusatusaga na tuuina mai e Iosefa Samita e faaalia ai le mana o le Atua. O le Vaitafe o Misuri o se vaitafe tele ma le malosi, ma e toatele le uluai Au Paia sa nonofo latalata i ai ma sa masani ai.
Ata
Vaitafe o Misuri
O Le Vaitafe o Misuri
O le a se lelei o le a i ai se tagata i le taofia o le tafe o se vaitafe tele ma malosi e ala i le faaaogaina na o se lima? O le a sou manatu i le mea na aoao mai e le Alii i le Perofeta e uiga i le faaaliga o le a Ia auina mai?
O se aoaoga faavae e tasi ua tatou aoao mai i le Mataupu Faavae ma Feagaiga 121:33 o le e leai se mea e mafai ona taofia le galuega a le Alii mai le alualu i luma.
Tali le fesili lenei i lau api talaaga mo le suesueina o tusitusiga paia: O a ni ou lagona i le iloaina o le a faaauau pea le galuega a le Alii e tusa lava po o a mea faafeagai?
Tusi le mea lenei i lalo o le galuega atofaina o le aso, i lau api talaaga mo le suesueina o tusitusiga paia: