I le aso 22 ma le 23 o Setema, 1832, na maua ai e le Perofeta o Iosefa Samita se faaaliga ua faamaumauina i le Mataupu Faavae ma Feagaiga 84. I le faaaliga lenei na aoao ai e le Alii le Au Paia i le taua o le faalogo atu i le afioga a le Atua, ma aoaiina i latou mo le manatu mama i le Tusi a Mamona ma poloaiga na i ai muamua. E le gata i lea, sa Ia faamamafa mai le tiutetauave o le Au Aposetolo ma isi e umia le perisitua, o le talai atu o le talalelei i le lalolagi atoa, ma sa Ia faamalamalama mai le auala e faataunuuuina ai lenei galuega.
Ua aoao mai e le Alii le taua o le faalogo atu i le afioga a le Atua
Mafaufau i au taumafaiga e suesue i tusitusiga paia i aso taitasi. O le a le lelei o loo e i ai i le faataunuuina o lenei sini?
O nisi taimi e faigata ai ona faatumauina se mausa o le suesueina o tusitusiga paia i aso taitasi. I lau api talaaga mo le suesueina o tusitusiga paia, lisi ai nisi o luitau e feagai ma oe i le taumafai ai e suesue i tusitusiga paia i aso taitasi. Tusi e uiga i se taimi na e filifili ai e suesue i tusitusiga paia, e tusa lava pe sa faigata. Na faapefea ona faamanuiaina oe mo le faia o lena mea?
A o faaauau au suesuega o le Mataupu Faavae ma Feagaiga 84, o le a e aoao ai i upumoni e mafai ona musuia ai oe e faaauau au taumafaiga e suesue i tusitusiga paia i aso taitasi. Faitau le Mataupu Faavae ma Feagaiga 84:43–44, ma faailoa mai upu ma fasifuaitau o loo aoao mai ai le taua o le suesue ma le faaaoga o afioga a le Alii. Atonu e te manao e faailoga mea e te maua.
Suesue le Mataupu Faavae ma Feagaiga 84:45–46. O nei fuaiupu e fesoasoani ia tatou malamalama afai tatou te faalogo atu ma le filiga i le afioga a le Atua, o le a faamalamalamaina i tatou e ala i le Agaga o Keriso.
Matau le fuaitau “o le Agaga o Iesu Keriso” i le fuaiupu e 45. O le isi fuaitau e tutusa lava le uiga “o le Malamalama o Keriso.” O le Malamalama o Keriso o “se uunaiga mo le lelei i olaga o tagata uma lava. … I tusitusiga paia, o le Malamalama o Keriso e masani ona taua i nisi taimi o le Agaga o le Alii, o le Agaga o le Atua, o le Agaga o Keriso, po o le Malamalama o le Ola.
“O le Malamalama o Keriso e le tatau ona fenumiaia ma le Agaga Paia. E le o se peresona, e pei ona i ai le Agaga Paia. O lana uunaiga e taitaiina atu ai tagata ina ia latou maua le talalelei moni, papatiso, ma mauaina le meaalofa o le Agaga Paia” (Faamaoni i le Faatuatua: O Se Tusitaiala o le Talalelei [2004], 101).
Na aoao mai Peresitene Boyd K. Packer o le Korama a Aposetolo e Toasefululua, o le Malamalama o Keriso e i totonu o tagata taitoatasi, ma “e tusa lava pe o lenei malamalama i totonu, o le iloa lea o le sa’o ma le sese, ua ta’ua o le Malamalama o Keriso, i le uiga po o le manatu, e mafai ona taitaiina i tatou e suia a tatou amioga—sei vagana ai ua tatou taofiofia pe le amanaiaina foi” (“O Le Malamalama o Keriso,” Ensign po o le Liahona, Ape. 2005, 8–9).
Faitau le Mataupu Faavae ma Feagaiga 84:47, ma faauma le mataupu faavae e autu i mea ua e mauaina: Afai tatou te faalogo i le Agaga, o le a tatou .
E faaopoopo atu i le mauaina o le Malamalama o Keriso, e mafai e tagata taitoatasi ona maua le mafutaga a le Agaga Paia pe a uma ona latou ulu atu i le feagaiga o le papatisoga. E ala i le meaalofa o le Agaga Paia, e mafai ai ona latou maua se malamalama faaopoopo ma taitaiina atu i le afioaga o le Tama ina ia maua le ola e faavavau.
Mafaufau i se taimi sa e taumafai ai e savali i se matuai pogisa faaletino. E i ai se eseesega i le ala e te savali ai pe a matuai pogisa atoa, e faatusatusa atu i le taimi e i ai le malamalama? E masani ona ta’ua i tusitusiga paia le pogisa e faatusa i se tulaga faaleagaga. Faitau le Mataupu Faavae ma Feagaiga 84:49–53, ma faailoa mai po o ai na fetalai mai le Alii o loo i le pouliuli, ma pe aisea ua latou i ai i lena tulaga.
Tali le fesili lenei i lau api talaaga mo le suesueina o tusitusiga paia: E faapefea ona pei le nofo i lalo o le pologa o le agasala i le nofo i le pouliuli?
Mafaufau loloto i mea e te lagona e tatau ona e faaleleia ina ia maua ai Lona siufofoga ma aloese ai mai le pologa o le agasala.
E faaopoopo atu i le faapea sa i ai le lalolagi i le pouliuli, na fetalai mai le Alii e faapea, na faapouliuligiaina mafaufau o tagata o le Ekalesia. Faitau le Mataupu Faavae ma Feagaiga 84:54–56, ma vaavaai mo mafuaaga e lua na faapouliuligia ai o latou mafaufau.
O le manatu mama i se mea, o lona uiga o le le amanaia po o le faia ma le le faaaloalo po o le faatalale. E mafai faapefea ona faapouliuligia le mafaufau o se tagata e ala i le manatu mama i se mea paia? I le Mataupu Faavae ma Feagaiga 84:54, o le fuaitau “sa outou manatu māmā i mea ua outou maua” e faatatau tonu lava i le Au Paia i le le faia o le mea na tusia i le Tusi a Mamona ma poloaiga na tuuina mai muamua.
Faitau le Mataupu Faavae ma Feagaiga 84:57–58 e iloa ai le mea na manatu mama i ai le Au Paia, ma o le a foi le mea na manaomia ona latou faia e aloese ai mai se sasa ma se faamasinoga. (O le upu sasa i nei fuaiupu e faatatau i faasalaga mai le Atua po o se tofotofoga.)
Ia matau na le ano le Au Paia i le Tusi a Mamona faapea foi ma “poloaiga muamua” na tuuina mai e le Alii ia i latou. Na saunoa mai Elder Dallin H. Oaks o le Korama a Aposetolo e Toasefululua: “O nei poloaiga muamua atonu o faaaliga muamua ia a le Alii, e pei ona i ai i le Tusi Paia (o le Feagaiga Tuai ma le Feagaiga Fou) ma i na faaaliga i ona po nei ua uma ona tuuina mai i le Au Paia (tagai i le History of the Church, 1:318,320)” (“Another Testament of Jesus Christ,” Ensign, Mar. 1994, 63).
Mai le Mataupu Faavae ma Feagaiga 84:57–58, tatou te aoao ai i le mataupu faavae lenei: Afai tatou te manatu mama i le afioga a le Atua, o le a faapouliuligia o tatou mafaufau ma o le a aumaia i tatou i lalo o tausalaga.
Faitau saunoaga nei mai ia Peresitene Ezra Taft Benson:
Ata
Peresitene Ezra Taft Benson
“Pe faalagolago ea taunuuga e faavavau i la tatou tali atu e uiga i le [Tusi a Mamona]? Ioe, a lē o faamanuiaina o i tatou, o le tausalaina.
“E tatau i tagata taitoatasi uma o le Au Paia ona aoao, ia avea lenei tusi e aoao ai i lona olaga atoa. A le o lena, ua ia tuuina atu lona agaga i le leaga ma le le faia o se mea, e mafai ona tuuuina atu ai le faaleagaga ma le faaletino atoatoa i lona olaga atoa. O loo i ai se eseesega i se tagata liliu mai o le e fausia lona faavae ia Keriso, e ala i le Tusi a Mamona, ma tumau ai i lena ai uamea nai lo le tagata e na te le faapea” (“O Le Tusi a Mamona o le Afioga a le Atua,” Ensign, Me 1975, 65; tagai foi “The Book of Mormon Is the Word of God,” Ensign, Jan. 1988, 5).
“Afai na aoaia le Au Paia o aso anamua i lo tatou manatu mama i le Tusi a Mamona, faamata ua mama mai ai ea la lo tatou faasalaga i lo tatou faia foi o lena mea? …
“… Aua tatou te tumau i lalo o le faasalaga ma lona mamafa ma lona faamansinoga, i lo tatou manatu mama i lenei meaalofa silisili ma ofoofogia ua tuuina mai e le Alii ia i tatou. A e ia tatou maua folafolaga ua o faatasi ma le faatauaina o lenei tusi i o tatou loto” (“O Le Tusi a Mamona—O Le Maa Auau o Lo Tatou Faatuatuaga,” Ensign, Ian. 1987, 6, 7).
Tali fesili nei i lau api talaaga mo le suesueina o tusitusiga paia:
E faapefea ona e faamatalaina lou taulimaina o le Tusi a Mamona?
O le a se mea e mafai ona e faia ina ia fai ai au suesuega o se taumafaiga i le olaga atoa?
O le a se mea o le a e faia ina ia e atili filiga ai i le suesueina o tusitusiga paia ma ola ai i upumoni e te aoaoina ai?
Ua tuuina mai e le Alii ia faatonuga ia i latou o e ua valaauina e talai atu Lana talalelei
Mafaufau i le faitau piliona o tagata o loo nonofo i le lalolagi. E manaomia e tagata taitoatasi ona maua le avanoa e aoao ai i le talalelei. Ae peitai, e le mafai e le Au Peresitene Sili ma le Korama a Aposetolo e Toasefululua, o e ua i ai le tiute e folafola atu le talalelei i atunuu uma, ona aoao i tagata uma.
Faitau le Mataupu Faavae ma Feagaiga 84:62, ma faailoa mai le taitaiga na tuuina mai e le Alii ia i latou o e ua i ai le tiutetauave e talai atu le talalelei.
Ia manatua, ona e le mafai ona o atu taitai o le Ekalesia i atunuu uma e talai atu ai le talalelei, o lea e tatau ai ona latou auina atu isi e fesoasoani ia i latou. O leMataupu Faavae ma Feagaiga 84:62 e mafai ona fesoasoani ia tatou malamalama ai ua i ai i tagata uma o le Au Paia o Aso e Gata Ai se tiutetauave e ave atu le talalelei i le lalolagi atoa.
Na saunoa mai Peresitene Spencer W. Kimball:
Ata
Peresitene Spencer W. Kimball
“a matuai manino lelei tusitusiga paia i le ta’uina mai e faapea, o tagata uma o le Ekalesia e nafa ma le faia o le galuega faafaifeautalai: ‘Ua tatau i tagata taitoatasi o e ua uma ona lapataia ona lapatai atu i lē la te tuaoi.’ (MF&F 88:81.)
“Ua manino foi ona aoao mai e perofeta o lenei tisipenisione le manatu e faapea, o le auaunaga faafaifeautalai o le tiutetauave lea a tagata uma [o le Ekalesia]. Na aoao mai e Peresitene Tavita O. MaKei le mataupu faavae i upu luitau, ‘O tagata uma o le Ekalesia o se faifeautalai!’ (Tagai i le Conference Report, Aperila 1959, p. 122.)” (“It Becometh Every Man,” Ensign, Oct. 1977, 3).
Tali le fesili lenei i lau api talaaga mo le suesueina o tusitusiga paia: E faavae i luga o mea na e faitauina i le Mataupu Faavae ma Feagaiga 84:64–75, e faapefea ona e aoteleina le taua o le aoao atu i isi o le talalelei a Iesu Keriso? Ona faauma lea o le faamatalaga lenei: O le a ou faataunuuina lo’u tiutetauave e faasoa atu le talalelei e ala i le …
I le lisi lenei, vase lalo o soo se atugaluga e ono mafua ai ona e musu e auauna atu i le Alii o se faifeautalai faamisiona: fefe i le tuua o le aiga, aiga, ma uo; fefe i le misia o le aoga ma avanoa faigaluega; fefe i le le mafai ona totogi se misiona; fefe i le talanoa atu i isi e uiga i le talalelei; ma le fefe i le aoaoina o se gagana fou.
Sa faamautinoa mai e le Alii i latou o e atonu e musuā pe na i ai le fefe i le auauna atu ia te Ia o se faifeautalai. Faitau le Mataupu Faavae ma Feagaiga 84:80, 85, 87–88, ma vaavaai mo tiutetauave ma faamanuiaga o le galuega faafaifeautalai. Faatumu le siata i mea e te maua:
Tiutetauave o le Galuega Faafaifeautalai
Faamanuiaga o le Galuega Faafaifeautalai
O fuaiupu ua e suesueina ua faamautu mai e faapea, ao tatou faasoa atu le talalelei, o le a faatasi le Alii ma i tatou, o le a puipuia i tatou, ma o le a faamalolosia i tatou.
I lau api talaaga mo le suesueina o tusitusiga paia, faamatala mai pe mafai faapefea e folafolaga o loo ta’ua i le Mataupu Faavae ma Feagaiga 84:80, 85, 88 ona faatosinaina lou manao ma le gafatia e faasoa atu le talalelei.
I le Mataupu Faavae ma Feagaiga 84:89–97, na faamautu mai ai e le Alii e faapea, o i latou o e talia Ana faifeautalai e talia foi o Ia ma o le a faamanuiaina. Sa Ia aoao mai foi, o i latou e teenaina Ana auauna ma Lana afioga o le a aveesea faamanuiaga ma fetuuina.
Faitau le Mataupu Faavae ma Feagaiga 84:98–102. O nei fuaiupu o loo i ai upu o se pese o le olioli ma le viiga e faatatau i le laveaiina o Siona. O le laveaiina o Siona e faatatau i le tulaga o le a fiafia ai tagata o le feagaiga a le Atua, pe a latou filifili e o mai ia te Ia ma maua sauniga ma faamanuiaga uma o le talalelei.
Ata
faifeautalai faatasi ma se alii talavou
Aisea e te manatu ua valaauina ai e le Alii ia faifeautalai e galulue o ni soa?
Mafaufau i nisi valaauga i le Ekalesia lea e galulue ai tagata ma se isi tagata e toatasi pe sili atu foi. Faitau le Mataupu Faavae ma Feagaiga 84:106, 109–10, ma faailoa mai mea na faatonuina e le Alii tagata o le Ekalesia e fai e faamalosia ai le tasi ma le isi.
Ua aoao mai leMataupu Faavae ma Feagaiga 106 e faapea, o i latou o e malolosi i le Agaga e tatau ona aoao atu ia i latou o e atonu o vaivai.
Tali fesili nei i lau api talaaga mo le suesueina o tusitusiga paia:
O le a se taimi na faagaeetiaina ai oe e ala i le galulue faatasi ma se tasi e malosi i le Agaga?
O le a se mea e mafai ona e faia e saili ai ni auala e uunaia ai ma faamalosia ai isi?
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia: