I le aso 8 o Mati, 1832, sa valaauina ai e le Alii ia Jesse Gause ma Sini Rikitone e avea ma fesoasoani o Iosefa Samita. E tasi le vaiaso mulimuli ane, i le aso 15 o Mati, 1832, na tuuina mai ai e le Alii le faaaliga ua faamaumauina i le Mataupu Faavae ma Feagaiga 81. I le faaaliga lenei na Ia faamalamalama mai ai le matafaioi o fesoasoani i le Au Peresitene Sili, ma folafola mai le ola faavavau ia Jesse Gause pe afai e tumau faamaoni o ia e oo i le iuga. Sa le’i tumau faamaoni Jesse Gause, ma sa sui atu e le Alii le valaauga e avea o se fesoasoani i le Au Peresitene Sili ia Feterika G. Viliamu, o lona igoa lea sa faapipii mulimuli ane ai i lenei faaaliga.
Ua faamatala mai e le Alii le matafaioi o fesoasoani i le Au Peresitene Sili
Aisea e tuuina mai ai e le Alii ia i tatou valaauga i Lana Ekalesia? O a ni faamanuiaga o le faataunuuina ma le faamaoni o se valaauga? Ae faapefea pe a filifili se tagata e le faataunuuina ma le faamaoni lona valaauga? E ui lava e mafai ona maua e se taitai o le Ekalesia se musumusuga e valaau se tagata o le Ekalesia i se tofiga faapitoa, ae e tuu atu lava i le tagata e mauaina le valaauga e tali atu ma le faamaoni i ai.
Faitau le folasaga o le vaega o le Mataupu Faavae ma Feagaiga 81, ma vaai po o ai na valaauina muamua e avea o se fesoasoani i le Au Peresitene o le Perisitua Maualuga (le Au Peresitene Sili) ma le mea na tupu ia te ia.
Na valaauina Jesse Gause e avea ma se fesoasoani i le Au Peresitene o le Perisitua Maualuga (le Au Peresitene Sili) ia Mati 1832. O le ono masina mulimuli ane, i le aso 1 o Aokuso, 1832, sa ia alu ai e auauna atu i se misiona faatasi ma Zebedee Coltrin. Sa asiasi atu Jesse i lona toalua ma taumafai e faatalitonu o ia i le moni o le Ekalesia toefuataiina, ae sa le manao o ia e auai. I se taimi puupuu mulimuli ane, sa ma’i tigaina ai le soa faifeautalai a Jesse, o Zebedee, ma sa tatau ai ona toe foi atu i Katelani, Ohaio. O le tuua ai na o ia, sa le’i faamaeaina ai e Jesse lana misiona ma sa le’i tumau faamaoni i le Ekalesia. Sa tape lona igoa [mai le Ekalesia] ia Tesema 1832.
Atonu e te manao e faailoga le fuaitau lenei o loo maua i le folasaga o le vaega: “O le faaaliga … e tatau ona manatu i ai o se laasaga agai i le faatulagaga aloa’ia o le Au Peresitene Sili.” Sa le’i faaalia mai e le Alii le faatulagaga atoa o Lana Ekalesia i le Perofeta i le taimi e tasi. Nai lo lena, sa Ia faaalia mai vaega eseese o le faatulagaga pe a manaomia, ma pe afai na saunia le Au Paia e maua ia mea. Ia Mati 1832, na faaali mai ai e le Alii, na oo i le taimi e faatulaga ai le Au Peresitene o le Perisitua Maualuga.
I le faaaliga ua faamaumauina i le Mataupu Faavae ma Feagaiga 81, na faamalamalama mai ai e le Alii se matafaioi taua e tasi o le Au Peresitene Sili. Faitau le Mataupu Faavae ma Feagaiga 81:1–2, ma faailoga le upu o loo aoao mai ai o le Au Peresitene o le Perisitua Maualuga e umia ki o le malo o le Atua i le lalolagi.
Ia manatua o ki o le perisitua o le pule e pulefaamalumalu ai i le Ekalesia ma taitaia ai le faaaogaina o le mana o le perisitua. Mulimuli ane, o le a faatulagaina ai le Au Peresitene Sili. O ki o le malo e umia i taimi uma e le Au Peresitene Sili, e pulefaamalumalu ai le Peresitene o le Ekalesia.
Ata
Peresitene Iosefa Filitia Samita
Na faamalamalama mai e Peresitene Iosefa Filitia Samita mea e mafai e le Au Peresitene Sili ona fai i o tatou aso ona o ki o le malo: “O nei ki o le aia tatau lea e pulea ai; o ia lava ki o le mana ma le pule e taitaia ai ma faatonutonu ai mea uma lava tau i le malo o le Alii i le lalolagi. O i latou uma lava o loo umia ia ki o loo i ai le mana e taitaia ai ma pulea ai le tulaga tatau ina ia mafai ai e isi tagata uma lava ona auauna atu i le perisitua” (“O Ki o le Faavavau ma le Aia Tatau e Pule Faamalumalu Ai,” (“O Ki o le Faavavau ma le Aia Tatau e Pule Faamalumalu Ai,” Ensign, July 1972, 87).
Ata
Au Peresitene Sili
O Le Au Peresitene Sili, 2013
O se tasi o auala e taitai ma pulea ai e le Au Peresitene Sili le Ekalesia, e ala lea i a latou aoaoga.
I lau api talaaga mo le suesueina o tusitusiga paia, tusi se faataitaiga o auala na faamanuiaina ai oe e ala i aoaoga a le Au Peresitene Sili.
Faitau le Mataupu Faavae ma Feagaiga 81:3, ma vaavaai mo le mea na ta’u mai e le Alii ia Feterika G. Viliamu e fai, i le avea ai o se fesoasoani i le Au Peresitene Sili.
Tusi le ulutala O Se Fesoasoani i le Au Peresitene Sili i lau api talaaga mo le suesueina o tusitusiga paia. I lalo o le ulutala lenei, lisi ai tiutetauave na e tau i ai i le fuaiupu e 3. Ma le isi, tusi ai lou manatu i le uiga o le, e tatau i se fesoasoani ona “faamaoni i le fautuaga” a lona peresitene.
Ina ia fesoasoani ia e malamalama lelei i le uiga o le, e tatau i se fesoasoani ona “faamaoni i le fautuaga” a le peresitene, mafaufau i le mea na aoao mai e Peresitene Gordon B. Hinckley e uiga i le auala e tatau ona fefautuaai faatasi ai se fesoasoani ma le peresitene.
Ata
Peresitene Gordon B. Hinckley
“[O se fesoasoani] o se lagolago i lona peresitene.…
“O le avea o se lagolagosua, o le fesoasoani e le o le peresitene. Na te le tauaveina le tiute ma fai ana lava fuafuaga e aunoa ma lona peresitene.
“I fonotaga a le au peresitene, e saoloto fesoasoani taitasi e faaali ona manatu i mataupu uma ua oo mai i luma o le au peresitene. Peitai, o le aia tatau a le peresitene le faia o le faaiuga, a o le tiute o fesoasoani o le lagolagoina o ia i lena faaiuga. Ona avea ai lea o lana faaiuga ma a latou faaiuga, e tusa lava po o a nisi manatu sa i ai muamua” (“O Loo I Ai i Fesoasoani le Saogalemu,” Liahona, Ian. 1991, 53).
Tali fesili nei i lau api talaaga mo le suesueina o tusitusiga paia:
E mafai faapefea e le malamalama i tiute o se fesoasoani ona fesoasoani i se tasi o loo auauna atu o se fesoasoani i soo se au peresitene o le Ekalesia?
Aisea e tatau ai i fesoasoani i se au peresitene ona lagolago ma faamalolosia le peresitene?
O le a se mea e mafai ona e faia e auauna atu ai ma le mataalia i se au peresitene pe afai, pe oo foi i se taimi e te maua ai lena avanoa?
Na tuuina mai e le Alii se folafolaga mamana ia Feterika G. Viliamu pe afai o le a faamaoni o ia i lona valaauga. Faitau le Mataupu Faavae ma Feagaiga 81:4, ma sue le folafolaga.
O le fuaitau “uunai lautele ai le mamalu o … lou Alii” i le tulaga lea ua faaalia ai e faapea, o le faamaoni i o tatou valaauga, e mafai ai ona tatou fesoasoani e taitai tagata ia ava ma tapuai i le Alii. O lenei folafolaga e faatatau foi ia i tatou. Atonu e te manao e tusi le mataupu faavae lenei i le laina o au tusitusiga paia: Afai tatou te faamaoni i o tatou valaauga, e mafai ona tatou faia mea lelei e tele mo isi ma faalauiloa ai le mamalu o le Atua.
Tali fesili nei i lau api talaaga mo le suesueina o tusitusiga paia:
E mafai faapefea e le auauna faamaoni i o tatou valaauga i le Ekalesia ona fesoasoani tatou te faia ai mea lelei e tele mo isi tagata?
O le a se taimi na e vaaia ai tagata o le Ekalesia o faia ni mea lelei se tele mo isi, aua sa latou faamaoni i o latou valaauga? Tusi e uiga i mea sa e matauina.
E mafai faapefea e le auauna faamaoni i ou valaauga i le Ekalesia ona fesoasoani e faalauiloa le mamalu o le Atua?
E faavae i mea na ta’u mai e le Alii ia Feterika i le fuaiupu e 5, o le a se mea e mafai ona tatou aoao mai e uiga i le faamaoni i o tatou valaauga i le Ekalesia, po o le avea ma ni tagata faamaoni o le Ekalesia?
Ata
Elder Marvin J. Ashton
O le saunoaga lenei mai ia Elder Marvin J. Ashton o le Korama a Aposetolo e Toasefululua, e mafai ona fesoasoani ia e malamalama i le fautuaga a le Alii: “I le Mataupu Faavae ma Feagaiga 81:5, e mafai ona faauigaina le fuaiupu e pei ona fautuaina ai Feterika G. Viliamu e le Alii ia faamalosi atu i e ua vaivai (‘fesoasoani i e vaivai’), faalototele atu i e ua faavaivai (‘sii i luga lima ua tautau i lalo’) ma tuu atu le faalaeiau ma le faamalosi i e ua maua i tulivae vaivai ma loto matatau” (“Faamalosia Tulivae Vaivai,” Ensign, Nov. 1991, 70).
Ata
o se tamaitai i le nofoa faataavalevale ma se tamaitai talavou
I lau api talaaga mo le suesueina o tusitusiga paia, tusi e uiga i se aafiaga lea sa siitia pe faamalosia ai oe e se isi tagata. Ona lisi lea ia le itiiti ifo ma le tolu ni mea e mafai ona e faia e “fesoasoani i e vaivai, sii i luga lima ua tautau i lalo, ma faamalosi tulivae ua vaivai” o isi. Tusi se sini e fesoasoani atu i se isi tagata i lenei vaiaso e ala i le faia o se tasi o aitema o loo i luga o lau lisi.
Faitau le Mataupu Faavae ma Feagaiga 81:6–7, ma vaavaai mo faamanuiaga na folafola mai e le Alii ia Feterika G. Viliamu, pe afai o le a faamaoni o ia e oo i le iuga.
O lenei lava folafolaga o loo avanoa foi mo oe. Afai e te filifili e faamaoni i le Alii, lea e aofia ai le faamaoni i ou valaauga ma fesoasoani ia i latou o loo siomia oe, o le a e agavaa foi mo faamanuiaga a le Alii.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia: