Ia Mati 1831, na maua ai e le Perofeta o Iosefa Samita faaaliga o loo faamaumauina i le Mataupu Faavae ma Feagaiga 47 ma le 48. I le Mataupu Faavae ma Feagaiga 47, sa tofia ai e le Alii ia Ioane Uitimera e sui ia Oliva Kaotui o se tusitalafaamaumau ma se tusitalafaasolopito o le Ekalesia. I le Mataupu Faavae ma Feagaiga 48, na faatonuina ai e le Alii le Au Paia i Ohaio e fesoasoani i na tagata o le Ekalesia na o mai mai Niu Ioka. Na faatonuina foi e le Alii ia tagata o le Ekalesia e sauni e faatau mai se fanua mo le fausiaina o le aai o Siona i Misuri.
Ua tofia e le Alii ia Ioane Uitimera e tausia se talafaasolopito faamaumauina o le Ekalesia
Mafaufau i se mea ua tuanai e i ai se taua faaleagaga sa e auai ai, ma lagonaina e taua le manatuaina (mo se faataitaiga: o le faapaiaga o se malumalu, se sauniga a le Ekalesia, po o se gaoioiga faaleaiga e pei o se faaipoipoga po o se maliu).
Afai e mafai, ta’u atu i se tagata o le aiga e uiga i lenei mea na tupu ma faasoa mai au tali i fesili nei. (Afai e le o maua se tagata o le aiga, tau lava o le mafaufau loloto i fesili nei.)
O le a se mea na sili ona faagaeetiaina ai oe i lenei mea na tupu?
O le a se taua o le manatuaina o lenei mea na tupu?
E faapefea ona faamanuiaina lau fanau i le iloaina o lenei mea na tupu i le 100 tausaga mai le taimi lenei?
Faitau le vaega o le folasaga o le Mataupu Faavae ma Feagaiga 47 ma fuaiupu 1-3 o le vaega lenei, e iloa ai le mea na valaauina e le Alii ia Ioane Uitimera e fai. Aisea e te manatu e taua ai ona tusia e se tagata le talafaasolopito o le Ekalesia?
Ata
Tusi o Faaaliga 1
Sa kopiina e Ioane Uitimera faaaliga na mauaina muamua e Iosefa Samita i totonu o se tusi ua ta’ua nei o le Tusi o Faaaliga 1. O lenei tusi o loo i ai le tele o uluai tusitusiga o nei faaaliga.
Mafaufau i se mea na tupu mai le talafaasolopito o le Ekalesia e musuia ia te oe. Na faapefea ona e iloa lena mea na tupu?
Tatou te iloa e uiga i mea ua tuanai na tutupu i le talafaasolopito o le Ekalesia, ona sa faia ma tausia e se tasi faamaumauga o ia mea, ina ia faasaoina mo o tatou aso ma augatupulaga i le lumanai. Manatua foi i se faaaliga na muamua mai, na fetalai mai ai le Alii, “ia i ai se tala faamaumau e tausia i totonu o outou” (MF&F 21:1). O loo i ai se tusitalafaasolopito ma tusitalafaamaumau i le taimi nei i le Ekalesia o le e tofia e le Au Peresitene Sili. Ae peitai, e le mafai e le tusitalafaasolopito ona matau ma faamaumau mea uma e tutupu i le Ekalesia, o lea ua faatonuina ai o ia e ao mai talafaasolopito mai isi. I se tulaga aoao, o aafiaga o tagata o le Ekalesia o se vaega o le talafaasolopito o le Ekalesia ma e mafai ona aafia ai augatupulaga i le lumanai.
Na aoao mai Elder Marlin K. Jensen o le Fitugafulu, o le sa avea o se tusitalafaasolopito ma tusitalafaamaumau mai i le 2005–12, “O le tele o tala maoae o le Ekalesia o loo i ai i talafaasolopito faaletagata lava ia ma faaleaiga, ma o vaega nei o o tatou talatofi faaletagata lava ia ma faaleaiga” (“O Le a I Ai se Tala Tusia Faamaumau e Tausia e Outou,” Ensign po o le Liahona, Tes. 2007, 31).
Tali le fesili lenei i lau api talaaga mo le suesueina o tusitusiga paia: Aisea e taua ai lau talafaasolopito faaletagata lava ia?
Mafaufau i mea taua faaleagaga na tutupu i lou olaga e te lagona e taua ona manatua. Vaai faalemafaufau e faapea, o le a faitau e lau fanau ma a latou fanau lau tala patino e uiga i se tasi o nei mea na tutupu. I lau api talaaga mo le suesueina o tusitusiga paia, faamatala ai po o le a lea mea na tupu, ma tali fesili nei:
O le a le vaega o le mea na tupu o le a e tusia e uiga i ai?
O a ni mea e te manao i lau fanau ia lagona ma iloa e uiga i le mea na tupu?
Faitau le Mataupu Faavae ma Feagaiga 47:4 e iloa ai le mea na folafola mai e le Alii ia Ioane Uitimera o le a tuu mai i ana taumafaiga ia “tausia e lē aunoa le talafaamaumau ma le talafaasolopito o le ekalesia” (MF&F 47:3).
E faavae i luga o mea na e faitauina i le Mataupu Faavae ma Feagaiga 47:4, faauma le mataupu faavae lenei: Afai tatou te , e mafai ona fesoasoani mai le Agaga ia i tatou .
E mafai e le Agaga Paia ona tuuina mai mea i lo tatou manatuaga (tagai i le Ioane 14:26) ma fesoasoani ia tatou tusia mea na tutupu ma tulaga i ala o le a faamanuiaina ai tagata o le aiga ma isi i augatupulaga i le lumanai. Tatalo mo le, ma ola agavaa mo le fesoasoani a le Agaga a o e faia se taumafaiga e tausia se talafaasolopito faaletagata lava ia.
Mafaufau loloto i isi auala e mafai ona faaleleia atili ai i au taumafaiga e tausia se api o talaaga, pe tusi se talaaga patino o mea taua e tutupu, sauniga, ma tagata i lou olaga.
E tatau i le Au Paia i Ohaio ona fesoasoani ia i latou e o mai mai Niu Ioka ma saunia mo o latou tofi i Siona
Vaai faalemafaufau e faapea, na aafia lata mai nei ia tagata o le Ekalesia i se eria taumamao i se faalavelave faalenatura ma na tatau ai ona aveese uma mai i latou mai o latou fale. Ua fai atu taitai o le Ekalesia ia te oe ma lou aiga e faanonofo nisi o tagata ua leai ni fale i lo outou fale mo ni nai masina. O a ni fesili ma ni atugaluga a oe ma lou aiga o le a i ai? O a ni atugaluga ma ni lagona e te manatu o le a i ai ia i latou o le a siitia atu i lou fale?
Vaai i le faafanua 3 o le talafaasolopito o le Ekalesia 3 i au tusitusiga paia: “O le Eria o Niu Ioka, Penisilevania ma Ohaio o le ISA.” Sue ai Palamaira, Niu Ioka, ma Katelani, Ohaio. Pe tusa e fia tonu maila po o kilomita e va ai nei aai?
Ia Fepuari 1831, na siitia atu ai le Perofeta o Iosefa Samita mai Palamaira, Niu Ioka, i Katelani, Ohaio. Na sosoo mai ai ma tagata o le Ekalesia i nai masina na sosoo ai. Sa tuua e nei tagata le tele o mea ma punaoa o le olaga nei, ina ia mulimuli i le poloaiga a le Atua ma o mai i Ohaio, ma sa latou manaomia le fesoasoani. O le a lou manatu i se mea e ono manaomia mai e le Alii ia te oe, pe afai sa e nofo i Ohaio ma molimauina nisi o nei Au Paia o siitia mai i le tou eria ma le leai o ni fale ma le utiuti o mea e ola ai?
Faitau le Mataupu Faavae ma Feagaiga 48:1–3 ina ia iloa ai le mea na ta’u mai e le Alii i tagata o le Ekalesia i Ohaio e fai mo tagata o le Ekalesia na siitia atu i le eria. O le tasi o mataupu faavae tatou te aoaoina mai i nei fuaiupu o le ua poloaiina e le Alii le Au Paia o Aso e Gata Ai e faasoa atu a latou mea o loo i ai ia i latou o loo manaomia le fesoasoani. Atonu e te manao e tusi lenei mataupu faavae i talane o le fuaiupu e 2.
Matau i le Mataupu Faavae ma Feagaiga 48:3 na faamoemoe le Alii ia i latou o e na siitia atu i Ohaio o e na i ai punaoa ma maua mea e faatau ni fanua iina. E faapena foi, ua faamoemoe le Alii ia i tatou e faaaoga a tatou punaoa pe a i ai ae aua le faalagolago i isi e tausia i tatou.
Tali le fesili lenei i lau api talaaga mo le suesueina o tusitusiga paia: O a nisi o auala e mafai ona tatou faasoa atu ai mea ua tatou maua i isi o loo i le Ekalesia i aso nei?
Mafaufau pe na faapefea ona faataunuuina e se alii talavou le poloaiga e faasoa atu ia i latou o loo manaomia le fesoasoani, a o e faitauina le tala lenei sa faamatalaina e Peresitene James E. Faust o le Au Peresitene Sili:
Ata
Peresitene James E. Faust
“I ni nai tausaga ua mavae sa tonu ai i se korama a ositaulaga e ao mai ni meaai mo e matitiva e avea o se galuega auauna atu. Sa fiafia lava Simi o se tasi o ositaulaga e auai, ma sa naunau foi ia tele atu ana meaai e ao mai nai lo o se isi lava tagata. Na oo i le taimi na feiloai ai le au ositaulaga i le falesa. Sa latou o ese uma i le taimi e tasi ma toe foi mai i le falesa i se taimi tuupoina i le afiafi. Sa faateia tagata uma, ona sa leai ma se mea na i ai i le taavale a Simi. Sa foliga mai sa fai si ona [filemu], ma sa ula nisi o tama ia te ia. O le vaaia o lenei mea ma le iloa sa fiafia Simi i taavale, sa faapea atu ai le faufautua, ‘Simi, sau i fafo. Ou te manao e te vaai i la’u taavale. Ua fai sina faalavelave ia te a’u.’
“Ina ua la oo i fafo, sa fesili atu le faufautua ia Simi pe sa le fiafia. Na fai mai Simi, ‘Leai, e le o se le fiafia tele. Ae ina ua ou alu e ao mai meaai, sa tele ni meaai na ou mauaina. Sa tumu la‘u taavale. A o ou toe foi mai i le falesa, sa ou afe i le fale o se tamaitai e le auai i le ekalesia ma ua tetea ma lona toalua, ae e nofo i totonu o le eria o le tatou uarota. Sa ou tuitui i le faitotoa ma faamatala atu i ai le mea sa tatou faia, ma sa ia valaauliaina a’u i totonu. Sa amata ona ia su’e solo se mea e tuu mai ia te a’u. Sa ia tatalaina le pusaaisa, ma na ou vaaia sa tau leai se mea na i ai i totonu. O kapoti sa gaogao. Mulimuli ane, sa ia maua ai se tamai apa pea.
“’Sa faigata ona ou talitonu i ai. Sa i ai nei tamaiti laiti uma sa taufetuli solo lea sa manaomia ona fafagaina, ma sa ia tuuina mai ia te au lenei apa pea. Sa ou tago i ai ma tuu i totonu o la‘u taavaletoso, ma ou alu atu i le auala. Pe a o le afa o le vaifale na ou oo i ai, ae ou lagonaina le mafanafana o lo’u tino atoa, ma na ou iloaina sa manaomia ona ou toe foi atu i lena fale. Sa ou tuuina atu ia te ia meaai uma.’
“Na fai mai le faufautua, ‘Simi, ia aua lava ne’i galo ia te oe le lagona na e lagonaina i le po nei, aua o le mea tonu lava lena e faatatau i ai’” (“Niuterene Faaleagaga,” Ensign po o le Liahona, Nov. 2006, 54).
Tali fesili nei i lau api talaaga mo le suesueina o tusitusiga paia:
E te manatu o le a le mea na tupu ia Simi ina ua ia lagonaina e tatau ona toe foi?
Ina ua fai atu le faufautua o le lagona na oo ia Simi o le “mea tonu lava lena e faatatau i ai,” o le a sou manatu i le uiga o lana tala?
Faailoa mai se auala se tasi e mafai ona e fesoasoani e faafetaia‘ia ai manaoga o se isi tagata, atonu e ala i le faasoaina atu o mea ua e maua. Mo se faataitaiga, e mafai ona e fesoasoani i se tagata o le aiga, se uo, se tagata e i ai i se tasi o au vasega i le Lotu po o le korama, po o se tasi i le tou pitonuu po o le aoga. I lau api talaaga mo le suesueina o tusitusiga paia, tusi i lalo se mea o le a e faia, e te fesoasoani ai i le tagata ua e mafaufau i ai, ona tulitatao lea o lau fuafuaga.
I le Mataupu Faavae ma Feagaiga 48:4–6 na faamalamalama mai ai e le Alii e faapea, sa Ia finagalo i le Au Paia e sauniuni e faatau mai ni fanua pe a Ia faaali mai le nofoaga o le aai o Siona, po o Ierusalema Fou. Sa fetalai mai le Alii ia i latou e sefe uma tupe latou te gafatia e sauniuni ai mo le faataatiaga o le faavae o lenei aai.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia: