O le faatulagaina o le Ekalesia i le aso 6 o Aperila, 1830, na mafai ai ona tuuina atu sauniga o le perisitua i fanau a le Tama Faalelagi i le lalolagi atoa i aso e gata ai. E muamua atu i lenei aso na leva ona faatalitali i ai, na amata faaali mai ai e le Alii i le Perofeta o Iosefa Samita tulaga manaomia ma le faiga o le papatisoga, o mea ua faamoemoeina mai tagata o Lana Ekalesia, ma faamatalaga auiliili i le faatinoina o le faamanatuga.
Ua tuuina mai tulaga manaomia ma le faiga o le papatisoga
O le a sau tala e fai atu i sau uo le lotu e fesili mai, “O le a se mea ou te faia ina ia ou papatiso ai i lau ekalesia?”
Faitau le Mataupu Faavae ma Feagaiga 20:37, ma vaavaai mo tulaga manaomia na tuuina mai e le Alii mo i latou e mananao e avea ma tagata o le Ekalesia. Atonu e te manao e faailoga ia tulaga manaomia taitasi e te maua i le mau.
Atonu e aoga ona e iloa, o le uiga o le faaali atu o se loto momomo ma se agaga salamo, o le lotomaualalo ma le gauai atu i le finagalo o le Atua. O lona uiga foi, ia lagona le faanoanoa loloto mo agasala ma se naunautaiga faamaoni ina ia salamo.
Ata
Elder D. Todd Christofferson
Na faamalamalama mai e Elder D. Todd Christofferson o le Korama a Aposetolo e Toasefululua: “I aso anamua, pe a mananao tagata e tapuai i le Alii ma saili Ana faamanuiaga, e masani ona latou aumaia se meaalofa. Mo se faataitaiga, a latou o i le malumalu, latou te avatu a latou taulaga e tuu i luga o le fata faitaulaga. Ina ua maea Lana Togiola ma le Toetu, sa fetalai le Faaola Na te le toe taliaina ni taulaga mu i manu. O le meaalofa po o le taulaga o le a Na taliaina nei o se ‘loto momomo ma se agaga salamo.’ [3 Nifae 9:20.] A o e sailia le faamanuiaga o le liua, e mafai ona e ofoina atu i le Alii le meaalofa o lou loto momomo po o le loto salamo, ma lou agaga nutimomoia po o le agaga usitai. O le mea moni lava, o le ofoina atu lea o oe lava—o le a lava le tulaga o e i ai ma pe o le a foi le ituaiga tagata ua avea ai oe“ (”Pe a Liua Mai Oe,“ Ensign po o le Liahona, Me 2004, 12).
Aisea e te manatu e manaomia muamua ai nei uiga ona faatoa papatiso ai lea o se tagata?
Mai mea ua e aoaoina i le Mataupu Faavae ma Feagaiga 20:37, faauma le mataupu faavae lenei: Pe a tatou papatiso, ua tatou molimau atu pe faaali atu .
Mafaufau loloto po o a mai oe i le ola e tusa ai ma au feagaiga o le papatisoga.
O le a sau tala e fai atu i lau uo le lotu pe a fesili mai i le fesili faaopoopo lenei: “E faapefea ona papatisoina tagata i la outou ekalesia?”
Faitau le Mataupu Faavae ma Feagaiga 20:72–74, ma faailoga le faiga o le papatisoga na faamatala mai e le Alii. Mai nei fuaiupu ua tatou aoao ai o le papatisoga e tatau ona faia i le faatofu, ma e tatau ona faia e se tasi o umiaina le pule tatau (tagai foi i le 3 Nifae 11:21–27).
E faapefea ona e tali atu pe a fesili mai lau uo i se fesili lona tolu: “O a tulaga e manaomia mai i tagata ina ua uma ona latou papatiso ma avea ma tagata o la outou ekalesia?”
Faitau le Mataupu Faavae ma Feagaiga 20:68–69, ma faailoa mai faamoemoega o loo i ai a le Alii mo i tatou taitoatasi ina ua uma ona tatou papatiso. Atonu e te manao e faailoga nei faamoemoega i au tusitusiga paia.
I le Mataupu Faavae ma Feagaiga 20:68 ua ta’u mai e le Alii ia i tatou, o tagata fou e tatau ona aoaoina e [alii] faifeautalai pe a uma ona papatisoina ma a’o lei faamauina. I o tatou aso, o le faiga masani o le aoaoina atu o lesona a faifeautalai i tagata sailiili a’o lei papatisoina, e mafai ai e tagata ona maua le meaalofa o le Agaga Paia i se taimi e le mamao talu ona uma o latou papatisoga.
Mai le Mataupu Faavae ma Feagaiga 20:69 tatou te aoao ai i auala e mafai ona tatou faailoa pe faaali atu ai lo tatou agavaa pe a uma ona papatisoina i tatou. O le faaaogaina o le faatonuga a le Alii ia i tatou i lena fuaiupu, faauma le mataupu faavae lenei: A uma ona papatisoina, tatou te faaali atu i le Alii lo tatou agavaa e ala i le .
Tali fesili nei i lau api talaaga mo le suesueina o tusitusiga paia:
Aisea e taua ai lou tumau i le agavaa pe a uma ona e papatiso?
O le a sou manatu i le uiga o le faailoa atu po o le faaalia “o se savali ma le tautala amio-atua”?
Faitau le vaega o le Mo le Malosi o le Autalavou ua faaautuina “Gagana” ([2011], 20 – 21), ma faailoa mai auala e mafai ona faaali mai ai e se tagata talavou “le savali ma le tautala amio-atua.” Tusi i lau api talaaga mo le suesueina o tusitusiga paia e uiga i aafiaga i ni taimi na e vaai ai o faia e isi na mea. E te manatu o a ni aafiaga o o latou amioga ma uiga faaalia i tagata o loo siomia i latou?
Mafaufau loloto pe faapefea ona e faaali atu “se savali ma le tautala amio-atua” i aso a sau.
Ua tuuina mai e le Alii ia faatonuga i le faataunuuina o le faamanatuga
Pe sa i ai sau uo e le auai i le Ekalesia sa oulua auai atu i se sauniga faamanatuga? Afai o lea, sa faapefea ona e faamatalaina atu le sauniga o le faamanatuga? Afai e te le‘i maua lenei avanoa, o le a sau tala e fai atu i se uo e fesoasoani ia malamalama ai o ia i le faamanatuga?
Faitau le Mataupu Faavae ma Feagaiga 20:75, ma faailoa mai mea na faatonuina e le Alii ia tagata uma o le Ekalesia ia faia e le aunoa.
I se faaaliga na mulimuli mai, sa faamalamalama mai ai e le Alii, “E lē afaina po o le a le mea tou te aina pe o le a foi le mea tou te inuina pe a outou taumamafa i le faamanatuga, pe afai tou te faia ma le manatu tasi i lo’u mamalu—e faamanatu ai i le Tamā lo’u tino sa tuu i lalo mo outou, ma lo’u toto sa faamaligi mo le faamagaloina o a outou agasala” (MF&F 27:2). O aso nei ua tatou faaaogaina ai le vai mo le faamanatuga, “i le faamanatuina o le toto o [Iesu Keriso], sa faamaligiina mo i [tatou]” (MF&F 20:79), nai lo o le uaina.
Aisea e te manatu ua faatonuina ai i tatou e aai ma feinu faatasi i le faamanatuga e le aunoa? Na saunoa mai Elder Melvin J. Ballard o le Korama a Aposetolo e Toasefululua, e uiga i se tasi o faamanuiaga faapitoa e maua mai i le taumamafa i le faamanatuga i vaiaso taitasi:
Ata
Elder Melvin J. Ballard
“Tatou te mananao i tagata uma o le Au Paia o Aso e Gata Ai e o mai i le laoai o le faamanatuga ona o se nofoaga lea mo le iloiloga faaletagata lava ia, mo le suesuega faaletagata lava ia, lea e mafai ona tatou aoao ai e faaleleia o tatou ala ma faasa’osa’o o tatou lava olaga, ma aumaia i tatou lava ia ogatasi ma aoaoga a le Ekalesia ma faatasi ma o tatou uso ma tuafafine. …
“… O le mea e tasi o le a faia mo le saogalemu o alii ma tamaitai uma o le, ia taumamafa i le faamanatuga i aso Sapati uma. O le a tatou le mamao tele lava i le vaiaso e tasi—e le mamao tele lea, e ala i le faagasologa o le iloiloga faaletagata lava ia, e le mafai ona tatou faasaoina ai mea sese tatou te faia. … O le aai ma feinu i le faamanatuga o le ala lea o le saogalemu mo le Au Paia o Aso e Gata Ai” (i le Bryant S. Hinckley, Sermons and Missionary Services of Melvin Joseph Ballard [1949], 150–51).
Ata
‘ai ma inu i le faamanatuga
Mafaufau loloto pe aisea e avea ai le ai ma inu i le faamanatuga i vaiaso taitasi o se puipuiga ia te oe.
Ina ia iloa pe aisea e avea ai le faamanatuga o se ala o le saogalemu mo oe, tusi ulutala nei e lua i lau api talaaga mo le suesueina o tusitusiga paia:
Pe a tatou aai ma feinu i le faamanatuga, tatou te molimau atu:
Pe a tatou faamaoni i folafolaga tatou te faia i le taimi o le faamanatuga, ua folafola mai e le Alii:
Faitau le Mataupu Faavae ma Feagaiga 20:77–79, ma vaavaai mo mea tatou te molimau atu pe tautino atu a’o tatou aai ma feinu i le faamanatuga. Tusi mea e te mauaina i lalo o le ulutala “Pe a tatou aai ma feinu i le faamanatuga …” i lau api talaaga. Ona toe faitau lea o fuaiupu, ma vaavaai mo mea na folafola mai e le Alii. Tusi mea e te mauaina i lalo o le ulutala “Pe a tatou faamaoni …” i lau api talaaga.
Toe faamanatu tulaga manaomia o le papatisoga na e faailoa mai i le Mataupu Faavae ma Feagaiga 20:37. O a ni tulaga e tutusa ai o loo e vaaia i le feagaiga na osia i le papatisoga ma folafolaga na faia i le taimi o le faamanatuga?
Pe a e tagofia le faamanatuga, ua e faafouina le feagaiga na e faia i le taimi sa papatisoina ma faamauina ai lou [papatisoga].
Tali fesili nei i lau api talaaga mo le suesueina o tusitusiga paia:
E mafai faapefea ona e faaalia lou naunau e tauave i ou luga le suafa o Iesu Keriso?
O a nisi o mea e mafai ona e faia e manatua ai le Faaola i le vaiaso atoa? (tagai foi i le Mosaea 18:8–10).
E fesoasoani faapefea lou ai ma inu i le faamanatuga e te faaalia ai “se savali ma le tautala amio-atua” (MF&F 20: 69)?
Faitau le faamatalaga lenei e uiga i le tausia ma le faafouina o a tatou feagaiga o le papatisoga: “O le a e mauaina na faamanuiaga silisili pe a e tausia feagaiga o le papatisoga. A o e faafouina na feagaiga, o le a faafouina foi e le Alii folafolaga o le faamagaloina o au agasala. O le mama mai agasala, o le a mafai ai ona e “maua pea lona Agaga e faatasi ma [oe]’ (MF&F 20:77). O le mafutaga faifaipea ma le Agaga o se tasi lea o meaalofa silisili e mafai ona e mauaina i le olaga faaletino. O le a taitaiina oe e le Agaga i ala o le amiotonu ma le filemu, e taitaiina atu ai oe i le ola e faavavau faatasi ma lou Tama oi le Lagi ma Iesu Keriso” (Faamaoni i le Faatuatua: O Se Tusitaiala o le Talalelei [2004], 148).
I lau api talaaga mo le suesueina o tusitusiga paia, tali ai le fesili lenei: E mafai faapefea e le malamalama i le faamanuiaga o le maua o le mafutaga a le Agaga Paia ona uunaia i tatou e faamamalu a tatou feagaiga o le papatisoga?
Na aoao mai Elder Dallin H. Oaks o le Korama a Aposetolo e Toasefululua e faapea, e mafai ona tatou fiafia i le faamanuiaga o le auaunaga a agelu a o tatou faafou a tatou feagaiga o le papatisoga e ala i le aai ma feinu ma le agavaa i le faamanatuga:
Ata
Elder Dallin H. Oaks
“O laasaga taua e faatatau i le faamagaloina o agasala e faatinoina e ala i le sauniga faaola o le papatisoga ma le sauniga faafouina o le faamanatuga. …
“… O nei sauniga o le Perisitua Arona e taua foi i le auaunaga a agelu. …
“… O savali a agelu e mafai ona auina mai e se leo pe na o ni mafaufauga po o lagona e fesootai ai i le mafaufau. …
“… O le tele o fesootaiga faaagelu e lagonaina pe faalogoina nai lo le vaaia. …
“I se tulaga lautele, o faamanuiaga o le mafutaga ma fesootaiga faaleagaga e na o i latou lava e mama e mafai ona avanoa ai. … E ala i le sauniga o le Perisitua Arona o le papatisoga ma le faamanatuga, e faamamaina ai i tatou i a tatou agasala, ma folafola atu afai tatou te tausia a tatou feagaiga o le a tatou maua pea Lona Agaga e faatasi ma i tatou. Ou te talitonu o lena folafolaga e le gata e faatatau i le Agaga Paia, ae faapea foi i le auaunaga a agelu, aua ‘e tautatala agelu i le mana o le Agaga Paia; o le mea lea, latou te fetalai mai afioga a Keriso’ (2 Nifae 32:3 O lea la, o i latou o e umia le Perisitua Arona e tatalaina le faitotoa mo tagata uma o le Ekalesia o e e fetagofi ma le agavaa i le faamanatuga e olioli ai i le mafutaga a le Agaga o le Alii ma le auaunaga a agelu” (“O Le Perisitua Arona ma le Faamanatuga,” Ensign, Nov. 1998, 38–39).
Mafaufau loloto pe o le a faapefea ona e saunia oe lava e ai ma inu i le faamanatuga i le vaiaso lenei.
E tatau ona sa’o le faamaumauina o pepa faamaumau o le Ekalesia
O leMataupu Faavae ma Feagaiga 20:81–84 o loo i ai faatonuga a le Alii, o toeaiina i aso popofou o le Ekalesia sa tatau ona faamaumauina igoa o tagata o e na auai i le Ekalesia. Sa ta‘u atu ia i latou e aumai nei lisi i le konafesi a le Ekalesia ina ia mafai ona teuina i totonu o se tusi. O igoa o i latou o e sa pauu ese mai le Ekalesia sa aveesea. E le gata i lea, o ni tagata o le Ekalesia e siitia mai i le tasi nofoaga i le isi, na tatau ona o ma ave se tusi faamaonia o lo latou auai [i le Ekalesia] e tuu atu i o latou taitai perisitua fou. I o tatou aso, o loo faaauau pea ona tausia e taitai o le Ekalesia ni faamaumauga sa’o o pepa faamaumau, ma o le auala o loo fai ai ua sili atu ona lelei.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia: