1 E a kan roko te mwakuri ae korakora ma ni kamiimi i buakoia natiia aomata.

2 Nooria, bon Ngai te Atua; ongo n au taeka, ae e maiu ma ni mwaaka, ao e kakang riki nakon te kai ni kabaang aika uaitera wiina, nakon bwenauaakin taian toma ma kanoan rii; ngaia are ongo nakon au taeka.

3 Nooria, e a mainaina n tawa ngkai te nne n aroka nakon te taiaki; mangaia are, ane e korakora nanona ni kan taia, e na karina ana biti ni koro wiita ma korakorana, ao man taia ni karokoa te kabanea ni bong, bwa e aonga ni kaikoa te kamaiuaki ae e aki totoki nakon tamneina n uean te Atua.

4 Eng, ane e karina ana biti ni koro wiita ao n taia, e bon weteaki iroun te Atua.

5 Mangaia are, ngkana ko bubutiai ao ko na bon karekea; ngkana ko karebwerebwe e na kaukaki nakoim.

6 Ngkai, ko a tia ni bubuti, nooria, I taku nakoim, kawakini au tua, ao ukoukora waakinan ao katean ana waaki Tion;

7 Tai ukoukora te kaubwai ma ukoukora te wanawana, ao nooria, a na kaotaki ana bwai te Atua aika raba nakoim, ao i mwina ko na kaubwai. Nooria, ane e karekea te maiu ae akea tokina e bon kaubwai.

8 E koaua, e koaua, I tuangko, are ko tangiria mai irou ao e na bon reke nakoim; ao ngkana ko tangiria, a na mwaiti baika raoiroi ae a na karaoaki rinanom n te roro aei.

9 Akea te bwai ae ko na taekinna ma ti te rairannano nakon te roro aei; kawakini au tua, ao ni buoka waakin au mwakuri, ni kaineti nakon au tua, ao ko na bon kakabwaiaaki.

10 Nooria iai te bwaintituaraoi iroum, ao ko na kakabwaiaaki ibukin te bwaintituaraoi anne. Uringnga bwa e tabu ao e bon roko mai eta—

11 Ao ngkana ko na titiraki, ko na atai bwaai aika a raba aika a korakora man kamiimi; mangaia are ko na kamwakura te bwaintituaraoi anne, bwa ko aonga ni kunei bwaai aika a raba akanne, bwa ko aonga ni kairiia aika a mwaiti nakon ataakin te koaua, eng, kamatoai nakoia kairuan aroia.

12 Ko na tai kaota te bwaintituaraoi anne ma tii nakoia naake titebo am onimaki ma ngaia. Tai bakanrerei bwaai aika a tabu.

13 Ngkana ko karaoa ae e raoiroi, eng, ao n reitinako ni kakaonimaki ni karokoa te toki, ko na bon kamaiuaki n uean te Atua, are bon ana bwaintituaraoi te Atua ae moan te korakora nakon bwaintituaraoi nako; bwa akea riki te bwaintituaraoi ae korakora nakon te bwaintituaraoi are te kamaiuaki.

14 E koaua, e koaua, I tuangko, ko na kakabwaiaki ibukin te bwai ae ko a tia ni karaoia; bwa ko a tia ni bubutiai, ao nooria, ni katoa tai ae ko bubutiai iai ko a tia ni karekei taian reirei mai iroun Tamneiu. Ngkana tiaki anne, ko na bon aki roko nakon te tabo are ko a mena iai n te tai aei.

15 Nooria, ko ataia bwa ko a tia n titirakinai ao I kaotaa am iango; ao ngkai I tuangko bwaai aikai bwa ko aonga n ataia bwa ko a tia ni kaotaki n Tamnein te koaua;

16 Eng, I tuangko, bwa ko aonga n ataia bwa akea riki ma tii te Atua ae e ata am iango ao ana kantaninga nanom.

17 I tuangko bwaai aikai bwa bwaai ni kakoaua nakoim—bwa te taeka ke te mwakuri ake ko korei a bon koaua.

18 Ngaia are ko na botumwaaka; boutokaa au tia mwakuri ae Iotebwa, ma te kakaonimaki, ni kangaanga nako ake e mena iai ibukin te taeka.

19 Kataetaea n ana kaairua, ao karekea naba te kaetieti mai irouna. Bwaina te taotaonakin nano; taua ma nanom; bwaina te taubaang; karekea te taotaonakin nano, te onimaki, te kantaninga ao te tangira ae kororaoi.

20 Nooria, ngkoe Oliver, ao I a tia n taetae nakoim ibukin am kantaninga; mangaia are kaawakin taeka aikai inanom. Bwaina te kakaonimaki ao te botumwaaka ni kawakinan ana tua te Atua, ao N na bon katobibiko ni bain au tangira.

21 Nooria, Ngai Iesu Kristo, Natin te Atua. Bon Ngai naba are I roko nakoia ake oin au aomata, ao ake oin au aomata aki butimwaeai. Bon Ngai te oota are e oota n te roo, ao te roo e aki kinaa.

22 E koaua, e koaua, I tuangko, ngkana ko tangira riki te kakoaua, kaoka am iango nakon te tairiki are ko tang iai nakoiu mai inanom, bwa ko aonga n ataa koauan bwaai aikai.

23 I aki tuangko te rau n am iango ni kaineti ma aio? Tera riki te kakoaua ae e korakora ae e na reke iroum nakon are mai iroun te Atua?

24 Ao ngkai, nooria, ko a tia ni karekea te kakoaua; bwa ngkana I tia n tuangko bwaai are akea te aomata ae e atai ko tuai ni karekea te kakoaua?

25 Ao nooria, I anganiko te bwai n tituaraoi, ngkana ko tangiria mai irou, n rairairi, n ai aron au tia mwakuri ae Iotebwa.

26 E koaua, e koaua, I tuangko, bwa iai tenaan rongorongo ake angiin iai taekan au euangkerio, ake a tauaki ibukin buakakaia aomata;

27 Ao ngkai I tuangko, bwa ngkana iai te nano ae raoiroi—te nano ni kan kaikoi kaubwaim nako karawa—ngkanne ko na buoka kaotin, ma te bwaintituaraoi iroum, mwakoron au koroboki aika a tabu ake a tia ni karabaaki ibukin te buakaka.

28 Ao ngkai, nooria, I anganiko, ao nakon naba au tia mwakuri ae Iotebwa, kiingin te bwaintituaraoi aei, are e na kaota te mwakuri n ibuobuoki; ao ni wiia uoman ke teniman taan kakoaua e na kamatoaki taian taeka nako.

29 E koaua, e koaua, I tuangko, ngkana a aki butimwaea au taeka, ao mwakoron au euangkerio aio ma te ibuobuoki, kam a kakabwaiaki, bwa akea te bwai ae a kona ni karaoia nakoimi nakon are a karaoia nakoiu.

30 Ao ngkana a karaoia nakoimi are a tia ni karaoia nakoiu, kam a kakabwaiaaki, bwa kam na maeka ma ngai n te mimitong.

31 Ma ngkana a butimwaai au taeka, are e na kamatoaki man te koaua are e na anganaki, a na kakabwaiaaki, ao ngkanne kam na kimwareirei ni uaan ami mwakuri.

32 E koaua, e koaua, I tuangkami, n aron are I taku nakoia au taan reirei, ike a botaki iai uoman ke teniman n arau, ibukin te kantaninga ae ti teuana, nooria, N na bon mena i buakoia—n aron are I mena naba irarikimi.

33 Tai maaku ni karaoa ae raoiroi, ngkami natiu, bwa bwaai ni kabane are ko unikia, ko na bon taia; ngaia are, ngkana ko unika ae raoiroi ko na bon taia ae raoiroi bwa ngaia kanuangam.

34 Mangaia are, tai maaku, ngkami te nanai ae e uarereke; karaoa ae raoiroi; kariaia te aonaba ma moone ni ikotaki ni kaaitaraingkami, bwa ngkana ko kateitei i aon au bwaa, a aki kona n tokanikai.

35 Nooria, I aki motika taekami; naako ni kawaimi ao tai manga bure; karaoa te mwakuri are I a tia n tuangngkami ma te taua n nano.

36 Tanimai nakoiu n ami iango n taai nako; tai nanououa, tai maaku.

37 Noori taian ikoaki aika i rarikiu, ao mwiin naba taian neera i baiu ma waeu; bwaina te kakaonimaki, kawakin au tua, ao ko na abaaba n abanuean karawa. Amen.