1 I na, te karanga atu nei au kia koe, no te anoano nei taku tavini ko Martin Harris i tetai kite papu mei konei atu iaku, koia oki, e taku tavini e Iosepha Timeti, Tamaiti, kua rauka oki ia koe te au papa taau i akapapu, e kua akakite mai koe e kua rauka ia koe mei konei atu iaku.

2 E teianei, i na, ko teia taau ka tuatua atu kiaia—ko tei tuatua mai kia koe, kua karanga atu kia koe e: Ko au te Atu ra ko te Atua, e naku i oronga atu i teia au mea kia koe, e taku tavini e Iosepha Timeti, Tamaiti, e kua akaue atu ia koe kia riro koe ei kite papu no teia au mea nei;

3 E kua akaue atu au ia koe kia tomo ki roto i tetai koreromotu kiaku, auraka rava oki koe e akaari atu i te reira, mari ua ra, ki te au tangata taku i akakite atu, e kare oki oou mana ki rungaʼo i te au papa, mari ua ra, kia oronga atu au kia koe.

4 E orongaanga oki taau kia akauri i te au papa, ko taku orongaanga mua teia taku i tuku ki rungaʼo ia koe; e kua akaue atu au e auraka rava koe e ariu ke atu ki tetai uatu orongaanga ke, e oti uatu tei akakoroia e au; e kare rai oki au e oronga atu i tetai orongaanga ke atu naau e oti uatu teia.

5 Tika tikai taku e karanga atu kia koe, ka tae mai oki te mii ki te tangata o te enua nei me kare ratou e akarongo mai ki taku tuatua.

6 No te mea, kare e roa atu ana ka akataongaia koe, e ka aere atu koe ka akakite i taku au tuatua ki te tamariki a te tangata nei.

7 E taku tavini e Iosepha; me kare ratou e irinaki mai ki taku au tuatua, kare katoa ratou e akarongo kia koe, e naringa e ka rauka kia akaari atu koe i teia au mea katoa nei taku i oronga atu kia koe.

8 Aue, teia uki irinaki kore e te marokiakia—kua riri tikai oki au ia ratou.

9 I na, tika tikai taku e karanga atu kia koe, kua akono oki au i te au mea taku i oronga atu kia koe, e taku tavini e Iosepha, no tetai akakoroanga pakari e vai nei i roto iaku, e ka akakiteia atu oki ki te au uki ka aru mai.

10 I na ra, ka rauka i teia uki nei taku au tuatua na roto ia koe;

11 E kia tauturu atu i toou kite, te kite o nga tavini noku e toru, taku ka kapiki e ka akataonga, e kia ratou ka akaari ei au i teia au mea nei, e ka aere oki ratou ma taku tuatua te ka orongaia atu na roto ia koe.

12 Ae, ka kite papu oki ratou e kua tika teia au mea nei, no te mea, no te rangi mai oki taku ka akakite atu kia ratou.

13 Ka oronga oki au i te mana kia ratou kia kite e kia akarakara ratou i te tu tikai o teia au mea.

14 E kare au e oronga atu i teia mana nei ki tetai uatu, kia rauka teia kite papu i roto i teia uki, na roto i teia te akamataanga o te tupuanga mai e te aereanga mai o taku akonoanga mei roto mai i te medebara—make mei te marama, kakā mei te rā, e te rikarika mei te pupu vaeau ma te au reva.

15 E ko te kite papu o nga kite e toko toru taku ka tono atu ma taku nei tuatua.

16 E i na, ko te ka irinaki mai i taku nei au tuatua, ko ratou rai taku ka atoro atu ma te akakiteanga o taku Vaerua; e ka akaanauia ratou ki roto iaku i te vai e te Vaerua—

17 E tiaki poto ua koe e tikaʼi, no te mea, kare ake rai oki koe i akataongaia ake—

18 E ka vai rai to ratou kite papu, no te akaapaanga o teia uki, me ka akaketaketa ua rai ratou i to ratou au ngakau i te patoi atu.

19 No te mea ka tae mai oki tetai maki mate e te akapouanga ki rotopu i te au tangata e noo i te enua nei, e ka tupu ua rai teia i tera tuatau e tera tuatau, me kare ratou e tataraara, e te openga iora kare e tangata akaou i runga i te enua, ka pou e ka takore takiri ia te aronga e noo i te enua nei e te kakā o toku aereanga mai.

20 I na, te akakite atu nei au i teia au mea kia kotou, mei taku katoa i akakite ki te au tangata i te takoreangaia o Ierusalema; e ka akapapuia oki taku tuatua i teia taime mei tei akapapuia i mua ake.

21 I teianei, te akaue atu nei au ia koe, e taku tavini e Iosepha, kia tataraara e kia aere tiratiratū mai ki mua iaku, e auraka e akarongo akaou atu ki te taparu a te tangata ua nei;

22 E kia tinamou koe i te akonoanga i te au akaueanga taku i akaue atu kia koe; e me rave koe i teia, i na, ka oronga atu au i te ora mutukore noou, noatu e ka tamateia koe.

23 E teianei, te tuatua akaou atu nei au kia koe, e taku tavini e Iosepha, no runga i te tangata tei anoano kia riro ei kite papu—

24 I na, te tuatua atu nei au kiaia, te akateitei nei rai aia iaia, e kare i rava meitaki tana taakaakaanga iaia ki mua iaku; i na ra, e me ka tupou mai aia ki mua iaku, ma te taakaaka iaia na roto i te pure akatenga e te akarongo, ma te ngakau tika tikai, ei reira au e oronga atu ei i te akara kiaia i te au mea tana e inangaro i te kite.

25 Ei reira aia ka tuatua atu ei ki te au tangata o teia uki e: I na, kua kite au i te au mea ta te Atu i akaari atu kia Iosepha Timeti, Tamaiti, e kua kite papu tikai au e kua tika te reira, no te mea, kua kite oki au i te reira, e kua akaariia mai oki te reira kiaku na roto i te mana o te Atua e kare i to te tangata nei.

26 E te akaue nei au ko te Atu iaia, i taku tavini ko Martin Harris, e auraka aia e tuatua akaou atu kia ratou no runga i teia au mea nei, mari ua ra, ka tuatua aia e: Kua kite ana au i te reira, e kua akaariia mai ana te reira kiaku e te mana o te Atua; e ko teia oki te au tuatua tana ka tuatua atu.

27 I na ra, me uuna aia i teia, ka aati aia i te koreromotu tana i papau ana i mua iaku, e i na, kua akaapaia aia.

28 E teianei, kia kore aia e taakaaka iaia uaorai ma te aaki mai kiaku i te au tarevakē tei raveia e ïa, e ma te koreromotu mai kiaku e ka akono aia i taku au akaueanga, e ma te taangaanga i tona akarongo ki roto iaku, i na, te karanga atu nei au kiaia, kare aia e kite i te reira, e kare au e akatika iaia kia akara i te au mea taku i tuatua ana.

29 E me ka tupu te reira, te akaue atu nei au ia koe, e taku tavini e Iosepha, kia karanga atu koe kiaia e, auraka aia e rave akaou, auraka oki aia e tamanamanata akaou mai iaku no teia au mea nei.

30 E me ka tupu te reira, i na, te karanga atu nei au kia koe e Iosepha, kia oti ia koe i te akauri i tetai atu nga kapi, ka akamutu koe no tetai tuatau, e kia akaue akaou rava atu au ia koe; ei reira koe e akauri akaou ei.

31 E me kare koe e rave i teia, i na, kare aau orongaanga akaou, e ka rave ke oki au i te au mea taku i oronga atu kia koe.

32 E teianei, kua kite takere ana au i te kino i te tapapaanga kia takore takiriia koe, ae, kua kite rai oki au e, me kare taku tavini ko Martin Harris e taakaaka iaia uaorai kia rauka tetai kite papu mei toku nei rima, ka topa aia ki roto i te aati ture;

33 E manganui oki te tiaki mai nei i te takore ia koe mei runga atu i te aro o te enua nei, e no teia tumu ra, kia akaroaia toou au rā, i oronga atu ei au i teia au akaueanga kia koe.

34 Ae, no teia tumu oki i karanga atu ei au e: Akamotu, e tiaki kia akaue roa atu au ia koe, e ka oronga atu au i te au ravenga e raukaʼi ia koe i te akatupu i te mea taku i akaue kia koe.

35 E me e akarongo tikai toou ma te akono i taku au akaueanga, ka akateiteiia koe i te rā openga. Amene.