Tuanga 110
Te au orama tei akaariia kia Iosepha Timeti te Peroveta e Oliver Cowdery i roto i te iero i Kirtland, Ohio, i te rā 3 o Aperira, 1836 (History of the Church, 2:435–436). Ko te akakoroanga, no runga i te uipaanga o te rā Sabati. Kua akamata te Peroveta i tana tataanga i te orama na roto i teia au tuatua: “I te ora aiai, kua tauturu au i tetai au Peresideni i te tuaanga i te Oroa a te Atu ki te Akonoanga, mei ko mai oki te reira i te Tino Ngauru Ma Rua, tei orongaia te tikaanga i taua rā ra kia angaanga ki te kaingakai tapu. I te otianga iaku i te rave i teia angaanga ki toku au taeake, kua aere atu au ki ko i te ngai akoanga, ki muri i te arai, e kua tupou ki raro, pera katoa a Oliver Cowdery, ma te tapu e te pure ngakau. I to maua tuanga mai mei te pure, kua akaariia mai teia orama kia maua.” (History of the Church, 2:435).
1–10, Kua mama mai te Atu a Iehova ma te kakā e kua ariki i te Iero Kirtland ei ngutuare nona; 11–12, Kua mama katoa mai a Mose e Elia e kua oronga mai i ta raua au taviri e te au tuatau; 13–16, Kua oki mai a Elia te peroveta e kua akaoki mai i te au taviri o tona tuatau mei tei taputouia mai e Malaki.
1 Kua kiriti ke ia te arai mei to maua manako, e kua akatueraia te mārama i to maua mata.
2 Kua kite maua i te Atu i te tu ua anga ki runga i te papa o te ngai akoanga, i mua ia maua; e i raro ake i tona nga vaevae kua arikiia ki te auro, e te kara mei te rengarenga rai.
3 Ko tona nga mata mei te mura aʼi tikai te reira; e ko te rauru o tona upoko e teatea te reira mei te kiona tikai te tu; e ko tona mata tikai e kakā atu ïa i te kakā o te rā, e ko tona reo mei te aruru rai ïa o te taeanga vai maata, koia te reo o Iehova i te na ko anga e:
4 Ko au te muatanga e te akaopenga; ko au teia tei vai ana, ko au oki teia tei tāia ana; ko au to kotou vaa tuatua ki te Metua.
5 I na, kua akakoreia ta kotou au ara; kua mā kotou i mua iaku; e no reira, e akateitei i to kotou upoko ma te rekareka.
6 Kia rekareka katoa te ngakau o to ai taeake, e kia rekareka katoa te ngakau o toku iti tangata, ko tei akatu i teia are nei, ma to ratou maroiroi, ki toku nei ingoa.
7 E i na, kua ariki au i teia are nei, e ka vai toku ingoa ki konei, e ka akakite au iaku uaorai ki toku iti tangata na roto i te aroa ua ki roto i teia are.
8 Ae, e ka tae katoa atu au ki taku au tavini, e ka tuatua atu kia ratou ma toku uaorai reo, mei te mea e ka akono toku iti tangata i taku au akaueanga, e kare oki e tanoanoa i teia are tapu.
9 Ae e ka rekareka oki te au ngakau o te tauatini e te ngauruanga o te tauatini no runga i te au akameitakianga te ka maringi mai, e te orongaanga tapu o te iero i akatapuiaʼi taku au tavini i roto i teia are.
10 E ka totoa oki te rongo o teia are nei ki te au enua mamao; e ko teia oki te akamataanga o te au akameitakianga te ka riringiia mai ki vao ki rungaʼo i te upoko o toku iti tangata. Koia ïa. Amene.
11 I muri ake i te topirianga o teia orama nei, kua tuera akaou te rangi kia maua; e kua mama mai a Mose ki mua ia maua, e kua oronga mai kia maua i te au taviri o te akaputuputuanga o Iseraela mei nga pore e ā o te enua nei, e te aratakianga mai o nga kopu tino ngauru mei te enua tokerau mai.
12 I muri ake i teia, kua mama mai a Elia, e kua oronga mai i te tuatau o te evangelia a Aberahama, ma te na ko mai e, i roto ia matou e ta matou uanga e akameitakiiaʼi te au uki katoatoa i muri ake ia matou.
13 I muri ake i te topirianga o teia orama nei, kua tae akaou mai tetai orama kakā ki rungaʼo ia maua; ko Elia te peroveta oki tei apainaia ana ki runga i te rangi ma te kore rava i tongi ana i te mate, kua tu mai ki mua ia maua, e kua na ko mai e:
14 I na, kua tae tikai ki te tuatau, tei tuatuaia ana e te vaa o Malaki—i te akapapuanga mai e ka tonoia mai aia [a Elia te peroveta], i mua ake ka tae ei taua rā maata e te mataku o te Atu—
15 Kia akaariu i te ngakau o te au metua ki te au tamariki, e to te au tamariki ki to ratou au metua, ko te tāia aea te enua nei ki te taumaa—
16 No reira, kua orongaia atu te au taviri o teia tuatau nei ki roto i to korua rima; e na teia oki e kite ei kotou e te vaitata mai nei te rā maata e te mataku o te Atu, tei te ngutupa ua.