Tuanga 113
Te au pauanga ki tetai au uianga no te au tataanga a Isaia, tei orongaia kia Iosepha Timeti te Peroveta, Mati 1838 (History of the Church, 3:9–10).
1–6, Ko te Tumu o Iese, te atava e ono maira, e te aka o Iese kua akatakaia mai; 7–10, E tikaanga to te toenga o Ziona tei akapueuia ki te kautaunga, e kua kapikiia ratou kia oki mai ki te Atu.
1 Koai te Atava o Iese tei tuatuaia mai i roto i te irava 1, 2, 3, 4, e te 5, o te pene 11 o Isaia?
2 Tika tikai te tuatua maira te Atu: Ko te Mesia ïa.
3 Eaa te tupu ou tei tuatuaia mai i roto i te irava mua o te pene 11 o Isaia, te ka tupu mai mei roto mai i te tumu o Iese?
4 I na, te tuatua maira te Atu: E tavini oki ïa i roto i te rima o te Mesia, no te uanga mai oki o Iese e to Epharaima katoa, e me kore ra no te ngutuare o Iotepa, e tei runga oki i reira te mana maata i te vairanga.
5 Eaa teia aka o Iese tei tuatuaia mai i roto i te irava 10 o te pene 11 o Isaia?
6 I na, te tuatua maira te Atu, e uanga oki ïa no Iese, e no Iotepa katoa, e no ratou tikai oki te kautaunga, e te au taviri katoa o te basileia, ei reva, e no te akaputuputuanga o toku iti tangata i te au rā openga.
7 E uianga na Elias Higbee: Eaa te aiteanga o te akaue i roto i te Isaia pene 52 irava 1, ko tei na ko mai e: Ka kakau ana i to ririnui, e Ziona—koai teia iti tangata ta Isaia e akatau nei?
8 Te akatau nei aia ki te aronga ta te Atua ka kapiki atu i te au rā openga, ko te ka mou i te mana o te kautaunga, kia akaoki mai ia Ziona, e te akaoraanga o Iseraela; e kia kakau i tona ririnui, koia oki kia tuku mai i te tikaanga o te kautaunga, no te mea e tikaanga tona, to Ziona, na roto i tona ai metua; e kia oki akaou ki te mana tei ngaro ana iaia.
9 Eaa ta matou ka mārama no runga ia Ziona i te tataraanga mai iaia mei roto mai i te au ri i runga i tona kaki ra; irava 2?
10 Kia mārama oki tatou e, ko te toenga o tei pueu aere, te akamaroiroiia nei ratou kia oki mai ki te Atu mei te ngai mai i ingaʼi ratou; me ka pera ratou, ko te taputou a te Atu koia oki ka tuatua aia kia ratou, me kore ra ka oronga atu i tetai au eeuanga kia ratou. Akara ki te irava 6, 7, e te 8. Ko te au ri i tona ra kaki, koia te taumaa a te Atua ki rungaʼo iaia, me kore ra ko te toenga o te ngati Iseraela i roto i to ratou totoa aereanga ki rotopu i te au Etene.