1 E pera katoa, te tamanako atu nei matou no ta kotou akarakaraanga mai no runga i te puapinga o te aronga tapu katoatoa i te kimikimianga mai kia kitea te au tupuanga o te au mea katoatoa, e te au tamamaeanga e te au tuatua akakino a te au tangata o teia Enua;

2 E pera katoa ki te au apinga katoatoa e te maata o te au mamae ta ratou i akakoromaki, ki to ratou ingoa e ki te kopapa katoa, e pera katoa ki te au apinga tikai;

3 E pera katoa kia kitea te au ingoa o te au tangata katoatoa tei ō ki roto i te reira angaanga kino, me ka rauka mai ia ratou te reira e kia kimiia atu.

4 E penei ake ka ikiia tetai kumiti kia kimi i teia au mea nei, e kia tata i te au tuatua e te au tuatua taputou; e kia koi katoa mai i te au tataanga pikikaa e vai nei;

5 E te au mea pouroa i roto i te au puka tua, e te au puka korero, e te au tua pikikaa tei neneiia, e te tataia nei, e naai, e kia akaariia atu teia akakoroanga diabolo e te angaanga tamateanga tei raveia ki rungaʼo i teia iti tangata nei—

6 Auraka oki tatou e tuku i te reira ki te ao nei anake ua, mari ra kia tuku katoa atu ki te au arataki o te kavamani i roto i to ratou tu poiri e te kamakura, e ko te maroiroi openga teia tei kapitiia ki runga ia tatou e to tatou Metua i te Ao ra, i mua ake ka kimi ei tatou i taua taputou ra te ka kapiki atu iaia mei tona ngai pipinianga; kia kore oki e kotoeanga a to te pa enua katoa i mua ake ka tuku mai ei aia i te mana o tona ra rima ririnui.

7 E angaanga tikai teia tei akaueia tatou kia rave ki te Atua, ki te au angela, ta tatou ka tu ki mua, e pera katoa kia tatou uaorai, ki ta tatou au vaine e te tamariki, tei tupou ki raro no te tumatetenga, te taitaia, e te manamanata, ki raro ake i te rima kino o te tā tangata, te akatereanga kino, e te takingakino, tei turuia mai e ma te akamaroiroi katoa ia e te mana o taua vaerua ra tei turu pakari mai i te au peu a te au metua tane, ko tei rauka te pikikaa, ki rungaʼo i te ngakau o ta ratou au tamariki, e tei akakī i te ao nei ki te tauetono, e te tupu maroiroi uatu nei rai, e kua riro i teianei e ko te tumu maata ïa o te viivii katoatoa, e te ngunguru nei oki te ao nei i raro i te teimaa tukituki o te ara.

8 E zugo auri oki ïa, e tapeka pakari oki; kua riro ratou ei au tapeka rima, ei au vivi, ei au turuturu ketaketa no ade.

9 No reira e angaanga teia tei akaueia mai kia tatou, kare e ki ta tatou au vaine ua e te au tamariki, mari ra ki te au vaine takaua e te tamariki metua kore, tei tāiaia ta ratou au tane e to ratou au metua ki raro ake i tona rima auri;

10 Tei riro te au angaanga kino poiri tangotango ei ruanga no ade, e kia tu mai ma te mataku e te moteteakā, e ka ruketekete oki te nga rima o te diabolo ma te akamate.

11 E pera katoa e angaanga teia na tatou e tikaʼi no te au uki katoatoa e tu mai nei, e ki te aronga ngakau mā katoatoa—

12 E manganui rai oki to runga i te ao nei i rotopu i te au tu tangata ravarai, te au pupu tangata, e te au akonoanga, ko tei akapoiriia e te au karaperape pikikaa o te tangata nei, e tiaki nei ratou no te akavare atu, e tapūia nei mei te tuatua-mou no te mea kare ratou i kite e teiea te ngai e kitea ei—

13 No reira, kia taangaanga tatou e kia akapou i to tatou oraanga i te apaianga mai ki te ngai atea i te au mea pouroa tei unaia i te poiri, ta tatou i kite; e mea akakite tika ia mai oki te reira no te rangi mai—

14 Kia raveia oki teia ma te maroiroi tikai.

15 Auraka tetai tangata kia tare i te reira ei au mea rikiriki; no te mea e manganui te au mea no te au tuatau ki mua, kia tau ki te aronga tapu, tei runga ua ra i teia au mea nei.

16 Kua kite kotou, e te au taeake e, ka ngari ake tetai oe meangiti roa ei akatika i tetai pai maatamaata i te tuatau o te uriia, i te akatanoanga kia aru i te matangi e te ngaru.

17 No reira, e te au taeake akaperepere, kia rave tatou pouroa i te angaanga e vai nei i roto i to tatou mana ma te rekareka tikai; e reira kia tu titika oki tatou, ma te tu tiratiratū tikai, kia kite i te akaoraanga a te Atua, e te eeuangaia mai o tona ra rima.