Tuanga 86
Te eeuanga tei orongaia mai na roto ia Iosepha Timeti te Peroveta, i Kirtland, Ohio, i te rā 6 o Titema, 1832 (History of the Church, 1:300). Kua rauka mai teia eeuanga i te Peroveta iaia i akarakara e i akatano ra i te akapapaanga i te puka o te akaurianga o te Bibilia.
1–7, Kua oronga mai te Atu i te aiteanga o te parabole no runga i te sitona e te au zizania; 8–11, Ko te au akameitakianga o te kautaunga, kia ratou ïa tei ariki i te ipukarea na roto i te ture e kia tau ki te pae kopapa.
1 Tika tikai, te tuatua maira te Atu kia kotou e taku au tavini, no runga i te parabole o te sitona e te zizania:
2 I na, tika tikai taku e karanga atu nei, ko te ao nei oki te kainga, e ko te au aposetolo oki te ruru ua;
3 E i muri ake i to ratou vareaangaia e te moe, kua tae mai te tangata takingakino maata o te akonoanga, te akarukeanga, te akaturi, koia a Babulonia, tei akaue i te au pa enua katoatoa kia inu i tana kapu, e tei roto i to ratou ngakau te enemi, koia a Satani, i te nooanga ei tutara—I na te ruru ra aia i te zizania; e no reira, kua ngaromia e te zizania te sitona e kua tuaru atu i te akonoanga ki roto i te medebara.
4 E i na ra, i roto i te au rā openga, i teia nei e akamata nei te Atu i te akatupu mai i te tuatua, e te tupu mai nei te rau e te vai maru nei rai—
5 I na, tika tikai taku e karanga atu kia kotou, te kapiki ra te au angela ki te Atu i te ao e te po, kua papa e te tiaki ua ra kia tonoia kia aere e kokoti i te au aua;
6 I na ra, kua karanga atura te Atu kia ratou, auraka e utiuti atu i te zizania i te mea e te vai maru ua ra te rau (tika tikai e paruparu oki to kotou akarongo) ko te takore aea katoa atu kotou i te sitona.
7 No reira, e akaruke kia tupu kapipiti te sitona e te zizania e tae uatu ki te tuatau tau tikai no te kokoti; ei reira kotou e akaputu mai ei i te sitona mei roto mai i te zizania, e i muri ake i te akaputuputuanga i te sitona, i na, ka ruruiaʼi te zizania, e ka vai te kainga no te tutungi atu.
8 No reira te tuatua maira te Atu kia kotou, ko tei mou i te kautaunga na roto tika mai i to kotou au metua tane—
9 E aronga ipukarea oki kotou kia tau ki te ture, i te pae kopapa nei, e kua uunaia mei te ao nei ma te Mesia i roto i te Atua—
10 No reira kua vai rai to kotou oraanga e te kautaunga katoa, e kia vai uatu rai na roto ia kotou e to kotou ai metua e tikaʼi, e tae uatu ki te akaokianga mai o te au mea katoatoa tei tuatuaia mai e te vaa o te au peroveta tapu mei te akamataanga mai o te ao nei.
11 No reira, ka akameitakiia kotou me rave tinamou kotou na roto i toku meitaki, ei mārama ki te au Etene, e na roto i teia kautaunga nei, ei akaora ki toku iti tangata ko Iseraela. Na te Atu i tuatua mai i teia. Amene.