Tuanga 6
Te eeuanga tei orongaia mai kia Iosepha Timeti te Peroveta e Oliver Cowdery, i Harmony, Pennsylvania, Aperira 1829 (History of the Church, 1:32–35). Kua akamata a Oliver Cowdery i tana angaanga kia tata i te akaurianga o te Puka a Momoni, i te rā 7 o Aperira, 1829. Kua tae takere mai oki kiaia te akakiteanga tapu e e tika te kite o Iosepha no runga i te papa tei kotikotiia te Puka a Momoni. Kua pati atura te Peroveta ki te Atu na roto i te Urima e te Tumima, e kua rauka mai i reira teia pauanga.
1–6, Ko te rave angaanga i roto i te kainga o te Atu ka rauka te akaoraanga; 7–13, Kare e orongaanga i maata atu i te orongaanga o te akaoraanga; 14–27, Ko te kite papu o te tika mei ko mai ïa i te mana o te Vaerua; 28–37, Akara ki te Mesia ma te rave tamou i te angaanga meitaki.
1 E angaanga maata e te umere te ka tae mai ki rotopu i te tamariki a te tangata nei.
2 I na, ko au te Atua; e akarongo mai ki taku tuatua, e mea ora oki ïa e te ririnui, e kokoi maata oki to te reira i to te koke matarua, i te vai ia anga i rotopu i te au paupauanga e te au roro o te au ivi katoa; no reira e akarongo mai ki taku au tuatua.
3 I na, kua teatea te kainga e kua mou; no reira, ko tei anoano i te kokoti, kia vero aia ki tana matipi ma tona maroiroi, e kokoti koi vai ake te rā, e raukaʼi iaia kia akaputuputu no tona vaerua i te akaoraanga mutukore i roto i te basileia o te Atua.
4 Ae, ko te ka vero ki tana matipi e ka kokoti, na te Atua aia e kapiki.
5 No reira, me ka pati mai korua kiaku, ka rauka ïa ia korua; me ka topapa mai korua, ka tuera ïa mai kia korua.
6 E teianei, mei ta korua i pati, i na, te karanga atu nei au kia korua, e akono i taku au akaueanga, ma te kimi kia rauka mai e kia akatumu i te akakoroanga o Ziona;
7 Auraka e kimi i te au mea e apinga nui ei, mari ra, ko te pakari, e i na, ka eeuia mai te au mea muna a te Atua kia korua, ei reira korua e apinga nui ei. I na, ko tei rauka iaia te ora mutukore, kua apinganui aia i reira.
8 Tika, tika tikai taku e karanga atu kia korua, mei ta korua oki e anoano iaku ra, ka pera rai kia korua; e me te anoano ra korua, na korua i reira e rave i te au mea memeitaki i rotopu i teia uki nei.
9 Auraka e tuatua atu i tetai mea ke ki teia uki, mari ra, ko te tataraara; e akono i taku au akaueanga, e ma te tauturu atu i te akatupuanga i taku angaanga kia tau ki taku au akaueanga, e ka akameitakiia mai korua.
10 I na e orongaanga taau, e kia akameitakiia koe no taau orongaanga. E akamaara e e mea tapu oki te reira, e no runga mai oki te raukaanga mai—
11 E me ka ui koe, ka kite koe i te au mea muna, te maata e te umere; e no reira, ka taangaanga koe i taau orongaanga, kia kitea oki e koe te au mea muna, e kia rauka oki ia koe kia arataki mai i te au tangata e manganui kia kite oki ratou i te tuatuamou, ae, e akamārama atu ia ratou i to ratou au tu tarevakē.
12 Auraka rava koe e akakite aere atu i teia orongaanga ki tetai uatu tangata, mari ua ra, ki te aronga o taau akonoanga. Auraka e tanoanoa i te au mea tapu.
13 Me rave koe i te mea meitaki, ae, e rave tamou uatu ma te akarongo e tae ki te openga, ka ora ïa koe i roto i te basileia o te Atua, e ko te mea maata rava atu ïa i te au orongaanga katoatoa a te Atua; kare atu oki e orongaanga maata atu i te orongaanga o te akaoraanga.
14 Tika, tika tikai taku e karanga atu kia koe, kia akameitakiia koe no taau i rave; no te mea, kua ui mai oki koe kiaku, e i na, ko te putuputu o taau i ui mai kiaku, ko te maata rai ïa o taau i kite mei toku Vaerua atu. Naringa oki e kare, kare koe i reira i tae mai ki te ngai taau e noo nei i teianei.
15 I na, kua kite oki koe e kua ui mai ana koe kiaku e kua akamārama atu oki au i toou manako; e teianei, te akakite atu nei au i teia au mea kia koe, kia kite oki koe e kua akamāramaia koe e te Vaerua o te tuatua-mou;
16 Ae, te akakite atu nei au kia koe e, kia kite oki koe e kare atu e tangata ke, mari ra, ko te Atua anake tei kite i toou au manako e te anoano o toou ngakau.
17 Te akakite atu nei au i teia au mea kia koe ei kite papu noou—ko te au tuatua e te au angaanga taau i tata, kua tika rava te reira.
18 No reira e akamaroiroi; e tu ki te pae i toku tavini ia Iosepha, ma te tu akarongo tikai, noatu e eaa te pakari o te au mea te ka tupu mai kiaia no teia tuatua nei.
19 E ako atu iaia i tona au tarevakē, e ma te ariki katoa mai i tana au akaueanga. Kia maru; kia akono meitaki; kia akamoraro; kia akakoromaki, kia akarongo, kia manakonako e kia aroa atu.
20 I na, ko Oliver koe, e kua tuatua atu au kia koe no taau i anoano; no reira, e akaputu i teia au tuatua ki roto i toou ngakau. Kia akarongo ma te maroiroi i te akonoanga i te au akaueanga a te Atua, e ka koropini au ia koe ki roto i toku nga rima aroa.
21 I na, ko Iesu Mesia au, te Tamaiti a te Atua. Ko au rai teia tei aere mai ana ki oku tikai, e kare oki ratou i ariki mai iaku. Ko au oki te mārama tei kakā mai ana i te poiri, e kare oki te poiri i ariki mai.
22 Tika, tika tikai taku e karanga atu kia koe, me ka inangaro akaou koe i tetai atu kite papu, e akaoki i toou manako ki te po i kapiki mai ei koe kiaku mei roto mai tikai i toou ngakau, kia kite oki koe i te tika o teia au mea nei.
23 Kare ainei au i tuatua atu kia pumaana toou manako no teia au mea nei? Eaa atu ïa ei kite maata atu noou i ta te Atua?
24 E teianei, i na, kua rauka ia koe tetai kite papu; me kua akakite au i tetai au mea kia koe tei kore rava tetai tangata i kite ana, kare ainei i reira i rauka ia koe tetai kite?
25 E, i na, te oronga atu nei au i tetai orongaanga naau, me kua anoano koe mei iaku atu nei kia akauri, mei ta taku tavini ko Iosepha.
26 Tika, tika tikai taku e karanga atu kia koe, te vai nei oki tetai au akapapaanga maata no runga i taku evangelia, ko tei vaioia no te kino o te tangata nei;
27 E teianei, te akaue atu nei au ia koe, me e au anoano meitaki toou—Koia oki, e anoano kia akaputu i te au apinga naau ki te rangi—ka rauka i reira ia koe kia tauturu i te apaianga mai ki te mārama, ma taau orongaanga, i tera au irava tapu naku tei uunaia no te ara.
28 E teianei, i na, te oronga atu nei au kia koe, e pera katoa ki toku tavini ko Iosepha, i te au taviri o teia orongaanga nei, e na te reira e tae mai ei teia angaanga ki te mārama; e na roto i te vaa o nga kite toko rua me kore ra e toko toru e akatinamouiaʼi te au tuatua katoa.
29 Tika, tika tikai taku e karanga atu kia korua, me patoi mai ratou i taku tuatua, e teia tuanga katoa o taku evangelia e te angaanga tapu, kia akameitakiia korua, no te mea, kare oki e rauka ia ratou i te takingakino maata atu ia korua mei i rave kiaku.
30 E me ka rave ratou kia korua mei ta ratou i rave kiaku, kia akameitakiia korua, e ka noo oki korua ki konei iaku ma te kakā.
31 I na ra, me kare ratou e patoi mai i taku nei au tuatua, ko te ka akatinamouia e te kite papu te ka orongaia atu, kia akameitakiia ratou, e ka kite oki korua i reira i te mataora na roto i te ua o ta korua au angaanga.
32 Tika, tika tikai taku e karanga atu kia korua, mei taku i tuatua atu ki taku au pipi, i te ngai e putuputu ei e toko rua me kore ra e toko toru i roto i toku nei ingoa, ma te taiku i tetai mea, i na, tei reira katoa au i rotopu ia ratou—mei iaku katoa i rotopu ia korua nei.
33 Auraka e mataku i te rave i te meitaki, e taku nga tamaroa, ko ta korua oki ka ruru, ko ta korua rai ïa e kokoti; e no reira me ruru korua e meitaki, e meitaki rai ta korua ka kokoti ei tutaki.
34 No reira, auraka e mataku, e te anana iti; e rave i te meitaki; auraka e manamanata me ka kapiti te enua e to ade i te patoianga mai ia kotou, no te mea, me kua patuia kotou ki runga i toku papa, kare ratou e autu.
35 I na, kare au e akaapa ia korua; e aere i to korua aereanga, e auraka e ara akaou; e rave ma te akono meitaki i te au angaanga taku i akaue atu kia korua.
36 Akara mai kiaku i te au manako ravarai; auraka e ekoko, auraka e mataku.
37 Akara i te au puta i toku kaokao, e pera katoa ki te puta naero i toku nga rima e toku nga vaevae; e tu akarongo, e akono i taku au akaueanga, e ka noo korua i reira ki te basileia o te ao ra. Amene.