Tuanga 111
Te eeuanga tei orongaia mai na roto ia Iosepha Timeti te Peroveta, i Salem, Massachusetts, i te rā 6 o Aukete, 1836 (History of the Church, 2:465–466). Tei roto te au akaaere o te Akonoanga i te kaiou maata i taua tuatau ra no ta ratou au angaanga i roto i te evangelia. I te akarongoanga e e tuanga moni maata tetai ka rauka mai ia ratou i Salem, kua aere atu te Peroveta, a Sidney Rigdon, a Hyrum Smith, e Oliver Cowdery ki reira mei Kirtland, Ohio atu, kia akarakara atu i te reira, e kia tutu katoa i te evangelia. Kua rave atu teia au taeake i tetai au angaanga na te akonoanga e kua tutu katoa atu i te evangelia. I te kiteaanga mai e kare e moni e rauka mai, kua oki atu ratou ki Kirtland. E maata te au tupuanga o taua taime ra te ka akaariia mai i roto i te tataanga o teia eeuanga.
1–5, Ka akara te Atu ki te au anoano o te pae kopapa o tona au tavini; 6–11, Ka akono meitaki aia ia Ziona e ma te rave i te au mea katoatoa ei meitaki no tona au tavini.
1 Kare au, ko te Atu ko to kotou Atua, i mareka kore i to kotou aerenga mai i teia tere nei, noatu oki to kotou au tarevakē.
2 E manganui oki taku au apinga nui i roto i teia oire nei na kotou, ei meitaki no Ziona, e kua manganui te tangata i roto i teia oire nei, taku oki ka akaputuputu mai a te tuatau ki mua ei meitaki no Ziona, na roto i ta kotou raveanga angaanga.
3 No reira, e mea tau rava kia akamatau kotou ki te au tangata o teia oire nei, mei te ka aratakiia kotou, e te ka orongaia atu kia kotou.
4 E ka tae akera, e ka tae mai oki te tuatau e oronga atu ei au i teia oire nei ki roto i to kotou au rima, kia mana oki kotou ki rungaʼo i te reira, e kare oki ratou e kite i ta kotou au ngai muna; e te au puapinga nui, mei te auro e te ario na kotou ïa.
5 Auraka e manatā no ta kotou au kaiou, ka oronga atu oki au i te mana kia kotou kia tutaki i te reira.
6 Auraka kotou e manamanata no runga ia Ziona, ka akono meitaki au iaia.
7 E noo ki teia ngai nei, e ki te au tuanga enua e pini uake;
8 E ko te ngai taku i anoano ia kotou kia noo, ko te ngai puapinga tikai, ka akaariia atu kia kotou na roto i te au e te mana o toku Vaerua, te ka tae atu kia kotou.
9 Ka rauka ia kotou teia ngai na roto i te oko. E kimikimi meitaki no runga i te au tangata taito tikai i noo ana ki reira e te aronga mua o te oire;
10 E maata atu oki i te mea okotai te au apinga nui no kotou i roto i teia oire nei.
11 No reira, kia pakari kotou mei te au ovi te tu e ma te ara kore; e ka oronga atu au i te au mea katoatoa ei meitaki no kotou, i te vivikianga kotou i te ariki mai i te reira. Amene.