Tuanga 103
Te eeuanga tei orongaia mai na roto ia Iosepha Timeti te Peroveta, i Kirtland, Ohio, i te rā 24 o Peperuare, 1834 (History of the Church, 2:36–39). Kua rauka mai teia eeuanga i muri ake i te taeanga o Parley P. Pratt e Lyman Wight ki Kirtland, Ohio, ko tei aere mai mei Missouri kia tuatua ki te Peroveta no runga i te tauturu e te akaoki akaou anga o te aronga tapu ki to ratou au enua i Jackson County.
1–4, Eaa i akatikaʼi te Atu kia tamanamanataia te aronga tapu i Jackson County; 5–10, Ka autu te aronga tapu me akono ratou i te au akaueanga; 11–20, Te akaoraanga o Ziona ka na roto i te mana, e ka na mua te Atu i tona iti tangata; 21–28, Kia akaputuputu mai te aronga tapu ki Ziona, e ko ratou te ka oronga i to ratou au oraanga ka rauka akaou ia ratou; 29–40, E maata te au tungane tei kapikiia kia akapapa i te Puakapa o Ziona e kia aere ki Ziona; kua taputouia kia ratou te re me akarongo ratou.
1 Tika tikai taku e tuatua atu kia kotou, e taku au taeake, i na, e oronga atu au i tetai eeuanga e tetai akaueanga kia kotou kia kite ei kotou e ka naea te raveraveanga i ta kotou au angaanga no runga i te akaoraanga e te akaokoanga o to kotou au taeake, tei pueurikiriki i runga i te enua ko Ziona;
2 Tei arumakiia e tei pāpāia e te rima o toku au enemi, e i runga ia ratou e riringi atu ei toku riri aiteanga kore i toku uaorai tuatau.
3 Kua akakoromaki oki au ia ratou e tae mai ki teia nei, kia kī rava ratou i te kino, e kia kī ta ratou kapu;
4 E ko te aronga tei kapikiia ki toku ingoa, ka pāpā au ia ratou no tetai tuatau poto ua ki tetai akoanga mamae tikai, no te mea kare ratou i akono katoatoa i te au tuatua e te au akaueanga taku i oronga atu kia ratou.
5 I na ra, tika tikai te tuatua atu nei au kia kotou, kua tuatua ana au i tetai akaue te ka kitea e toku iti tangata, me ka akarongo ratou mei teianei ora i te tuatua taku, ta te Atu to ratou Atua, ka oronga kia ratou.
6 I na, naku oki i akaue, ka akamata ratou i te autu ki rungaʼo i toku au enemi i teianei rai ora.
7 E na roto i te akonoanga i te au tuatua taku, ta te Atu to ratou Atua, ka tuatua atu kia ratou, kare rava ratou e akamotu i te autu, e kauraro uatu te au basileia o te ao nei ki raro i toku nga vaevae, e orongaia atu ei te enua ki te aronga tapu kia mou ratou e tuatau e tuatau uatu.
8 I na ra kia kore ra ratou e akono i taku au akaueanga, e kare oki e akono i taku au tuatua, ka autu te au basileia o te ao nei ki rungaʼo ia ratou.
9 Kua tukuia oki ratou ei mārama no te ao nei, e ei au akaora no te au tangata nei;
10 E me kare ratou e riro ei au akaora no te au tangata nei, kua aite ratou mei te miti tei mangaro, e kare i reira ona puapinga mari ra kia titiriia atu ki vao e kia takatakaiia ki raro i te vaevae o te tangata.
11 I na ra, tika tikai taku e karanga atu kia kotou, kua akaue ana au e ko to kotou au taeake tei pueurikiriki ka oki mai ratou ki te au enua o to ratou au ipukarea, e ka akatu ratou i te au ngai tanea o Ziona.
12 Na roto i te au tumatetenga e manganui, mei taku i tuatua atu kia kotou i te au akaueanga mua, e aere mai ei te akameitakianga.
13 I na, teia te akameitakianga taku i taputou i muri ake i to kotou au tumatetengaanga, e te tumatetenga o to kotou au taeake——ko to kotou akaoraanga, e te akaoraanga o to kotou au taeake, koia oki te akaokianga mai ia ratou ki te enua ko Ziona, kia akamou akaou ia, e kare no te inga akaou ki raro.
14 Kareka ra, me akaviivii ratou i to ratou ipukarea ka uriia ratou ki raro; kare rava au e akaperepere ia ratou me akaviivii ratou i to ratou ipukarea.
15 I na, te tuatua atu nei au kia kotou, ko te akaoraanga o Ziona kia aere mai ma te mana e tikaʼi.
16 No reira, ka akatu au i tetai tangata no toku iti tangata, te ka arataki ia ratou mei ia Mose rai i arataki i te tamariki a Iseraela.
17 Ko kotou oki te tamariki a Iseraela, e uanga oki no Aberahama, e mea tau ia kotou kia aratakiia mai ki vao mei te tuikaaanga ma te mana, e ma te rima oora ua.
18 E mei to kotou au metua tei arataki mua ia, koia katoa te akaoraanga o Ziona.
19 No reira, auraka to kotou au ngakau e apikepike, te tuatua atu nei au kia kotou mei taku i tuatua ki to kotou au metua: Ka aere taku angela na mua ia kotou, auraka ra toku aroaro.
20 I na ra, te karanga atu nei au kia kotou: Ka na mua oki taku au angela ia kotou i te aere, e pera katoa toku aroaro, e te vai ra te atianga e riro ei ia kotou te enua meitaki.
21 Tika, tika tikai taku e karanga atu kia kotou, e ko taku tavini ko Iosepha Timeti, Tamaiti, koia te tangata taku i akatau ki te tavini ta te Atu o te kainga vine i tuatua i roto i te parabole taku i oronga atu kia kotou.
22 No reira na taku tavini na Iosepha Timeti, Tamaiti, e tuatua atu ki tei maroiroi o toku ngutuare, te au mapu tane e te uki i rotopu—Ka akaputuputu mai ia kotou ki te ngai okotai ki te enua ko Ziona, ki te enua tei okoia e au ki te moni tei akatapuia mai kiaku.
23 E tono mai te au akonoanga i to ratou au tangata kite pakari e ta ratou au moni, e oko i te au enua mei taku i akaue atu kia ratou.
24 E me aere mai toku au enemi e tuaru ia kotou mei toku enua meitaki, tei akatapuia e au ei enua no Ziona, koia mei to kotou au enua tikai i muri ake i teia au kite papu, ta kotou i akaari mai ki mua iaku no ratou, e taumaa atu kotou ia ratou;
25 E ko ta kotou e taumaa ra, ko taku katoa ïa ka taumaa, e na kotou oki e tutaki atu i toku au enemi noku nei.
26 E noo rai toku tu ki o kotou i te tutakianga atu iaku no taku au enemi, kia tae ki te toru e te ā o te uki no ratou tei makitakita mai iaku.
27 Auraka rava tetai tangata e mataku i te tuku i tona ora noku; ko tei tuku i tona uaorai ora noku, ka kitea akaou mai te reira.
28 E ko tei kore i tuku i tona ora noku kare aia i te pipi naku.
29 Te anoano nei au e ko taku tavini ko Sidney Rigdon te ka akateitei i tona reo i roto i te au uipaanga ki te au enua i te itinga, i te akateateamamaoanga i te au ekalesia kia akono i te au akaueanga taku i oronga atu kia ratou no runga i te akaokianga mai e te akaoraanga o Ziona.
30 Ko toku anoano teia, e auraka taku nga tavini ko Parley P. Pratt, e Lyman Wight, e oki ki te enua o to raua au taeake, kia rauka rava to raua au pupu no te aere atu ki te enua ko Ziona, taki tai ngauru, me kore ra taki rua ngauru, me kore ra taki rima ngauru, me kore ra taki anere e tae uatu ki te numero e rima anere o te maroiroi o toku ngutuare.
31 I na, teia toku anoano; e pati e ka orongaia mai taau; i na ra, kare te tangata nei e akono ua rai i toku anoano.
32 No reira, me kare e rauka ia korua e rima anere, e kimi meitaki penei ake ka rauka mai ia korua e toru anere.
33 E me kare e rauka ia korua e toru anere, e kimi meitaki penei ake ka rauka mai ia korua e tai anere.
34 I na ra, tika tikai taku e karanga atu nei kia korua, e oronga atu au i tetai akaueanga kia korua, e auraka e aere atu ki te enua ko Ziona kia rauka rava ia korua e tai anere aronga maroiroi i toku ngutuare, no te aereanga ki te enua ko Ziona.
35 No reira, mei taku i tuatua atu kia kotou, e pati, e orongaia taau; e pure akatenga, kia raukaʼi i taku tavini ia Iosepha Timeti, Tamaiti, i te aere ma kotou, e kia akaaere i rotopu i toku iti tangata, ma te akamou i toku basileia ki runga i te enua tei akatapuia, e kia akanooia te tamariki o Ziona ki runga i te au ture e te au akaueanga tei orongaia ana e te ka orongaia atu kia kotou.
36 Ka rauka ia kotou te autu e te kakā na roto i to kotou akakoromakianga, te akarongo mou tikai, e te au pure akarongo.
37 E mea tau i taku tavini ko Parley P. Pratt kia aru i taku tavini ia Iosepha Timeti.
38 Kia aru taku tavini ko Lyman Wight ia Sidney Rigdon.
39 Kia aru taku tavini ko Hyrum Smith ia Frederick G. Williams.
40 Pera katoa kia aru taku tavini ko Orson Hyde ia Orson Pratt, mei ta taku tavini ko Iosepha Timeti, Tamaiti, ka tuatua kia ratou, no te raukaanga mai o te akatupuanga o teia au akaueanga tei orongaia atu e au kia kotou, e vaio i te toenga naku e rave. Koia ïa. Amene.