Tuanga 66
Te eeuanga tei orongaia mai na roto ia Iosepha Timeti te Peroveta, i Orange, Ohio, i te rā 25 o Okotopa, 1831 (History of the Church, 1:219–221). Ko te rā mua teia o tetai uipaanga puapinga tikai. Teia ta te Peroveta i tata i mua ake i teia eeuanga: “No te uianga a William E. McLellin, kua ui atu au ki te Atu, e kua rauka mai te ka aru mai” (History of the Church, 1:220).
1–4, Ko te koreromotu mutukore, koia te kīanga o te evangelia; 5–8, Kia tutu te au ereta ma te akapapu, e ma te uriuri ki rotopu i te au tangata; 9–13, Ko tei rave i te angaanga tutu evangelia ma te akarongo tikai, kua akapapuia mai te oraanga mutukore.
1 I na, te tuatua maira te Atu ki taku tavini ko William E. McLellin—kia akameitakiia koe, ko koe i uri ke mai mei toou au tarevakē, e kua ariki mai i taku tuatua-mou, i na te Atu ei toou Akaora, te Akaora o te ao nei, e pera katoa kia ratou ravarai tei irinaki i toku nei ingoa.
2 Tika tikai taku e karanga atu kia koe, kia akameitakiia koe no tei ariki mai i taku koreromotu mutukore, koia te kīanga o taku nei evangelia, tei tukuia mai ki te tamariki a te tangata nei, kia rauka oki ia ratou te ora e kia akariroia oki ratou ei au aronga ariki mai i te kakā te ka eeuia mai i teia au rā openga nei, mei tei tataia oki e te au peroveta ma te au aposetolo i te au rā i taito ra.
3 Tika tikai taku e karanga atu kia koe, e taku tavini e William, kua mā koe, kare ra e ko te katoatoa rava; e no reira e tataraara i te au mea taukore i mua i toku aroaro, i na te Atu ei, ka akaari mai oki te Atu i te reira kia koe.
4 E teianei, tika tikai ka akaari atu au, ko te Atu, kia koe i taku ka anoano no runga ia koe, me kore ra i toku manako no runga ia koe.
5 I na, tika tikai taku e karanga atu kia koe, ko toku inangaro ia koe kia akakite atu koe i taku evangelia mei tetai enua ki tetai enua, e mei tetai oire ki tetai oire, e na roto katoa i te au tapere e pini uake tei kore i akakiteia ana.
6 Auraka e noo kia roa te au rā ki roto i teia ngai nei; auraka e aere vave atu ki te enua ko Ziona i tenana; me ka rauka ra ia koe i te tono atu, e tono atu; e auraka oki e manako i toou au apinga.
7 E aere atu ki te au enua i te pae itinga, ma te akapapu atu i toou kite i roto i te au ngai pouroa, ki te au tangata e ki roto katoa i to ratou au sunago, ma te tuatua aere atu ki te au tangata.
8 E ka aru katoa taku tavini ko Samuel H. Smith ia koe, e auraka e akaruke atu iaia, e oronga katoa atu kiaia i taau akamāramaanga; e ko tei vai akarongo ra, ka akamaroiroiia aia i roto i te au ngai ravarai; e ka aru oki au, ko te Atu, ia koe.
9 E tuku i toou rima ki rungaʼo i te aronga maki, e ka ora oki ratou. Auraka e oki, kia tono rava atu au, ko te Atu, ia koe. Kia akakoromaki i te au tumatetenga. E pati, e orongaia mai kia koe; e topapa atu, e kiritiia mai kia koe.
10 Auraka e kimi i te au mea e apiapi mai ei. E kopae atu i te au mea tika kore ravarai. Auraka e akaturi—e timataanga teia tei tamanamanata ana ia koe.
11 E akono i teia au tuatua nei, e tika oki ratou e te akarongo mou; e ka akamaata oki koe i toou taonga, e ma te opara atu i te au tangata e manganui ki Ziona, ma te au imene o te mataora mutukore ki rungaʼo i to ratou upoko.
12 E rave uatu rai i teia au mea nei e tae uatu ki te openga, e ka rauka ia koe te korona o te ora mutukore i te rima katau o toku Metua, tei kī i te aroa ua e te tuatua-mou.
13 Tika tikai, te tuatua maira te Atu toou Atua, toou Akaora, koia a Iesu Mesia. Amene.