Tuanga 32
Te eeuanga tei orongaia mai na roto ia Iosepha Timeti te Peroveta, kia Parley P. Pratt e Ziba Peterson, Okotopa 1830 (History of the Church, 1:118–120). Kua kite oki teia au ereta nei i tetai anoano maata no runga i te ngati Lamana, no to ratou au akameitakianga tei taputouia mai i roto i te Puka a Momoni. Kua raveia atu tetai patianga ki te Atu kia kite e me ka tika ainei iaia kia aere atu tetai au ereta ki rotopu i te au Initia i te pae Opunga. Kua rauka mai te eeuanga.
1–3, Kua kapikiia a Parley P. Pratt e Ziba Peterson kia tutu ki te ngati Lamana e kia piri atu kia Oliver Cowdery raua ko Peter Whitmer, Tamaiti; 4–5, Ka pure ratou kia rauka ia ratou kia mārama i te au irava tapu.
1 I teianei, no runga i taku tavini ko Parley P. Pratt, i na, te karanga atu nei au kiaia, mei iaku e ora nei, ka inangaro au kia akakite aia i taku evangelia, e kia kimi katoa mai iaku, ma te maru e te akaaka o te ngakau.
2 E, ko taku i akataka kiaia, koia oki kia aere aia ma taku nga tavini, ko Oliver Cowdery e Peter Whitmer, Tamaiti, ki roto i te medebara ki rotopu i te ngati Lamana.
3 E ka aru katoa oki a Ziba Peterson ia ratou; e ka aru katoa au ia ratou, e ka noo oki au ki rotopu ia ratou; e ko au to ratou vaa tuatua ki te Metua, e kare rava e mea e autu mai ia ratou.
4 E ka akarongo mai oki ratou ki tei tataia, e ma te kore e akamea atu i tetai uatu eeuanga ke; e ka pure putuputu uatu rai oki ratou kia rauka oki iaku kia oronga atu i taua au mea rai kia mārama oki ratou.
5 E ka akarongo mai oki ratou ki teia au tuatua e kare e tanoanoa mai, e ka akameitaki oki au ia ratou. Amene.