Tuanga 72
Te eeuanga tei orongaia mai na roto ia Iosepha Timeti te Peroveta, i Kirtland, Ohio, i te rā 4 o Titema, 1831 (History of the Church, 1:239–241). Kua uipa mai tetai au ereta ma te au mema kia apii i ta ratou au angaanga e kia kite meitaki tikai i te au apiianga o te Akonoanga. Ko teia tuanga, e taokotaianga ïa o tetai nga eeuanga e rua tei arikiia i te rā okotai. I te irava 1–8 e akaariia mai te kapikianga o Newel K. Whitney ei episekopo. Kua kapikiia oki aia e kua akataongaia, e i muri ake kua orongaia mai te irava 9–26 i te akamaramaanga mai i te au angaanga a te episekopo.
1–8, Ka oronga te au ereta i tetai akakiteanga no ta ratou angaanga ki te episekopo; 9–15, Ka tiaki te episekopo i te are vairanga e ka takinga meitaki i tei putaua e tei ngere tikai; 16–26, Kia akapapu mai te au episekopo i te tu tiratiratū o te au ereta.
1 E ariu mai, e akarongo ki te reo o te Atu, e kotou ko tei akaputuputu mai ia kotou ki te ngai okotai, koia te au taunga teitei o taku akonoanga, tei orongaia atu te basileia e te mana.
2 E tika tikai te tuatua maira te Atu, kua tika rava oki iaku tetai episekopo kia ikiia kia kotou, me kore, no rotopu ia kotou, no te akonoanga i roto i teia tuanga o te kainga vine a te Atu.
3 E tika tikai, kua rave meitaki kotou ma te pakari i teia mea nei, ko ta te Atu oki ïa i anoano i te rima o te au tangata angaanga tatakitai, kia oronga atu i tetai akakiteanga o tana tuanga angaanga, i teia tuatau nei e mutukore uatu.
4 Ko tei tu akarongo tikai e te pakari katoa, kua tau aia kia ariki mai i te au nooanga tei akateateamamaoia nona e toku Metua.
5 Tika tikai taku e karanga atu kia kotou, ka oronga mai oki te au ereta o te akonoanga i roto i teia tuanga o te kainga vine i tetai akakiteanga o ta ratou angaanga ki te episekopo, ko te ka ikiia e au i roto i teia tuanga o toku kainga vine.
6 Ka vai teia au mea nei ki runga i tetai akapapaanga, e ka orongaia atu ki te episekopo i Ziona.
7 E ka kitea mai oki te angaanga a te episekopo na roto i te au akaueanga tei orongaia mai, e te reo o te uipaanga.
8 E teianei, tika tikai taku e karanga atu kia kotou, ko taku tavini ko Newel K. Whitney te tangata te ka ikiia e ka akataongaia oki teia mana nei. Ko te anoano teia o te Atu to kotou Atua, to kotou Akaora. Koia ïa. Amene.
9 Te tuatua a te Atu, tei kapiti atu ki te ture tei orongaia mai, i te akakiteanga mai i te angaanga a te episekopo ko tei akataongaia ki roto i te akonoanga i roto i teia tuanga o te kainga vine, e ko teia tikai—
10 Kia akono i te are vairanga o te Atu; kia ariki mai i te au moni a te akonoanga i roto i teia tuanga o te kainga vine;
11 Kia rave i tetai tataanga tuatua no te au ereta mei tei akaueia ana i mua ana; e kia rave i te angaanga i ta ratou i anoano, e ka tutakiia atu oki ki tei rauka mai ia ratou, mei te mea e kua rava ta ratou no te tutaki atu;
12 E kia akatapu katoa ia oki teia ei meitaki no te akonoanga, ki tei ngere e tei putaua.
13 E me kare a tetai moni kia tutaki mai, ka raveia tetai tataanga tuatua, e ka tukuia atu ki te episekopo o Ziona, nana e tutaki atu i te kaiou mei roto mai i ta te Atu ka tuku atu ki roto i tona rima.
14 E ko te angaanga a te aronga akarongo ko tei rave i te angaanga o te au mea vaerua, i te akaaereanga i te evangelia e te au mea katoa o te basileia no te akonoanga, e ki to te ao nei, ka tutaki katoa ratou i te kaiou ki te episekopo i Ziona;
15 E no roto mai oki ïa i te akonoanga, no te mea kia tau oki ki te ture, ko te au tangata katoatoa te ka aere atu ki Ziona ka tuku aia i te au mea katoatoa ki mua i te episekopo i Ziona.
16 E teianei, tika tikai taku e karanga atu kia kotou, pouroa te au ereta i roto i teia tuanga o te kainga vine, no te mea e ka oronga atu i tetai akakiteanga no ta ratou au angaanga e tikaʼi ki te episekopo i roto i teia tuanga o teia kainga vine nei—
17 Ei pepa akapapuanga mei konei atu i te akavanui, me kore ra i te episekopo, i roto i teia tuanga o te kainga vine, ki te episekopo i Ziona, ka riro ei akatikaanga ki te au tangata katoatoa, no te au mea ravarai, ei ipukarea, e ka arikiia mai oki ei akaaere meitaki e ei tangata angaanga akarongo tikai kia rauka tetai ipukarea;
18 Ko te kore aea aia e arikiia mai e te episekopo i Ziona.
19 E teianei, tika tikai taku e karanga atu kia kotou, ko te au ereta katoatoa te ka oronga atu i tetai akakiteanga ki te episekopo o te akonoanga i roto i teia tuanga o te kainga vine, kia akatikaia ratou e te akonoanga, me kore ra e te au akonoanga, tana i angaanga ana, kia akapapuia mai aia e tana au tataanga tuatua katoa i te au mea katoa.
20 E pera katoa, ko taku au tavini tei ikiia ei aronga tata i taku akonoanga kia pati ratou i tetai tauturu ki te episekopo me kore ra te au episekopo i te au mea te ka anoanoia—
21 Kia neneiia te au eeuanga, e kia tukuia atu ki te au ope o te enua nei; e kia rauka katoa ia ratou tetai moni te ka akapuapinga i te akonoanga i roto i te au mea ravarai;
22 E rauka katoa ia ratou i te akapapu ia ratou uaorai i te au mea ravarai, e kia kiteaia ei au tavini pakari.
23 E teianei, i na, ka riro teia ei akaraanga ki te au mangamanga o taku akonoanga, noatu e tei teea enua ratou te ngai i akatumuiaʼi. E teianei te akaoti nei au i taku tuatuaanga. Amene.
24 Tetai au tuatua ei kapiti atu ki te au ture o te basileia, no runga i te au mema o te akonoanga—ko ratou ko tei ikiia e te Vaerua Tapu kia aere atu ki Ziona, e ratou katoa tei manuia kia aere atu ki Ziona—
25 Kia apai atu oki ratou i tetai pepa akatikaanga ki te episekopo mei nga ereta e toko toru o te akonoanga, e me kore ra, e pepa no ko mai i te episekopo;
26 Ko te riro aea te aronga te ka aere atu ki te enua ko Ziona ei aronga kare e tuatuaia e e aronga angaanga meitaki. E akaraanga katoa oki teia. Amene.