Tuanga 129
Te au apiianga tei orongaia mai e Iosepha Timeti te Peroveta, i Nauvoo, Illinois, i te rā 9 o Peperuare, 1843, i te akakiteanga mai e toru au taviri puapinga e raukaʼi kia kite i te tu tika tikai no runga i te au angela matuapuru e te au vaerua (History of the Church, 5:267).
1–3, Te vai ra oki te au kopapa tuakaou e te au kopapa vaerua i te rangi; 4–9, Kua orongaia mai te au taviri e kiteaʼi te au karere mei tetai ke mei vao mai i te arai.
1 E rua oki tu tangata i te ao ra, koia oki: Te au angela, ko tei riro ei au tangata tuakaou, ma te au kopapa o te kiko e te au ivi—
2 Tetai akaraanga, kua karanga a Iesu e: Ka āā mai ana iaku e kia kite kotou, kare o te vaerua e kiko e te ivi mei ta kotou e kite mai nei iaku.
3 Te rua: Ko te au vaerua o te au tangata tuatua-tika tei apakore, ko ratou ko tei kore i tuakaou, i na ra, kua rauka ra oki taua kakā ra.
4 Me aere mai tetai karere ma te karanga mai e e tuatua tana mei ko mai i te Atua, e oronga atu i toou rima, e ma te pati atu kiaia kia ruru rima mai kia koe.
5 Mei te mea e e angela aia, ka ruru rima mai aia, e ka kite rai oki koe i tona rima me opara mai.
6 Me e vaerua aia no te tangata tuatua-tika tei apakore, ka aere mai aia na roto i tona kakā, ko te mataara ua ïa e kiteaʼi aia—
7 E pati iaia kia ruru rima mai kia koe, i na ra, kare oki aia e akapera, no te mea kare oki i tau ki te akanooanga o te rangi i tetai tangata tuatua-tika kia vavare; i na ra, ka akakite mai rai aia i tana tuatua.
8 Mei te mea e ko te diabolo tei akatutu mei te angela o te mārama, me pati koe iaia kia ruru rima, ka toro mai aia i tona rima kia koe, i na ra, kare koe e kite i tetai tu me opara atu; ka rauka i reira ia koe kia kite iaia.
9 Ko teia oki nga taviri mamaata e toru e kite ei koe e me no ko mai rai teia au angaanga nei i te Atua.