Tuanga 106
Te eeuanga tei orongaia mai na roto ia Iosepha Timeti te Peroveta, i Kirtland, Ohio, i te rā 25 o Noema, 1834 (History of the Church, 2:170–171). Ko teia eeuanga kia Warren A. Cowdery, te tuakana o Oliver Cowdery.
1–3, Kua kapikiia a Warren A. Cowdery ei opita akaaere i reira; 4–5, Kare te au tamariki o te mārama e autuia e te Oki Rua Anga Mai mei te keia; 6–8, E au akameitakianga puapinga te ka rauka me angaanga ma te akarongo i roto i te Akonoanga.
1 Ko toku anoano teia, e kia ikiia e kia akataongaia taku tavini ko Warren A. Cowdery ki te taunga teitei akaaere o taku akonoanga, i te enua ko Freedom e te au tuanga e pini uake ra;
2 E kia ako i taku evangelia openga kore, e kia akateitei oki i tona reo i te akamatakiteanga atu i te au tangata; auraka oki i tona uaorai ngai ua, mari ra ki te au tapere tei piri mai ki reira;
3 E kia uapou i tona taime ki teia kapikianga teitei e te tapu, taku ka oronga kiaia i teianei, i te makitoro marieanga i te basileia o te rangi e te tuatua-tika, e kapiti katoa ia te au mea ka inangaroia; e tau oki te rave angaanga i tana tutaki.
4 E pera katoa, tika tikai taku e karanga atu kia kotou, te vaitata maira te aerenga mai o te Atu, e rokonaia mai to te ao nei mei te keia i te po—
5 No reira, e tapeka i to kotou au taukupu, kia riro kotou ei tamariki no te mārama, kia kore oki taua rā ra e tae kia kotou mei te keia rai.
6 E pera katoa, tika tikai taku e karanga atu kia kotou, e rekareka maata to runga i te rangi i te tupouanga mai taku tavini a Warren ki raro i taku sepeta, e te akatakakeanga mai iaia mei te au karape o te au tangata;
7 No reira, kua akameitakiia taku tavini ko Warren, ka kitea aroaia aia e au; e noatu i te parau o tona ngakau, e apai ra au iaia, mei iaia ka taakaaka mai ki mua iaku.
8 E oronga oki au i te aroa ua kiaia e te akapapuanga no tona ngai e tu ei; e me ka tamou ua rai aia i te tu meitaki ei kite papu e ei mārama no te akonoanga, kua akateateamamao au i tetai korona nona i te au ngutuare o taku Metua. Koia ïa. Amene.