Scriptures
Te Apiianga E Te Au Koreromotu 57


Tuanga 57

Te eeuanga tei orongaia mai na roto ia Iosepha Timeti te Peroveta, i Ziona, i Jackson County, Missouri, i te rā 20 o Tiurai, 1831 (History of the Church, 1:189–190). Kia tau ki te akaueanga a te Atu (Tuanga 52), kua aere atu te au ereta mei Kirtland ki Missouri ma te au tupuanga tukeke e tetai manga patoianga. I te manakonakoanga i te turanga o te ngati Lamana, e te tu oraanga i rotopu i te tangata, tei ngere i te mārama e te evangelia, kua tuatua te Peroveta na roto oki i te pure akatenga: “Aea ra te medebara e puera mai ei mei te tiare roti te tu? Aea a Ziona e akatuiaʼi i roto i tona ra kakā, e ka tu oki toou ra iero kiea, ka aere mai ei to te au pa enua katoa i te rā openga?” (History of the Church, 1:189). Ko te tumu te reira i rauka mai ei teia eeuanga.

1–3, Ko Independence, Missouri, te ngai no te Oire o Ziona e te iero; 4–7, Kia oko mai te aronga tapu i te enua, ma te rauka mai te ipukarea i reira; 8–16, Ka akatu a Sidney Gilbert i tetai are toa, e ko W. W. Phelps te nenei tuatua, e na Oliver Cowdery e akateateamamao i te au pepa no te patupatuanga.

1 E akarongo mai, e te au ereta o taku akonoanga, te tuatua maira te Atu ra ko to kotou Atua, ko tei akaputuputu mai ia kotou ki te ngai okotai, kia tau oki ki taku au akaueanga i roto i teia enua, koia te enua ko Missouri, koia te enua taku i iki e i akatapu no te akaputuputuanga o te aronga tapu.

2 No reira, e enua taputou teia, e te ngai no te oire ko Ziona.

3 E te tuatua maira te Atu, to kotou ra Atua, me ka ariki kotou i te pakari, ko teia i reira te pakari. I na, ko te ngai tei karangaia e ko Independence ko te ngai pu ïa; e ko te ngai no te iero te vai ua ra te reira i te pae opunga, tei tetai ngai kare i mamao rava mei te are akavaanga.

4 No reira, e puapinga tikai kia okoia mai taua enua e te aronga tapu, e te au tuanga katoa i te pae opunga, mei te tiroaanga ki te kotinga o te ngati Iuda e te Etene;

5 E pera katoa te au tuanga katoatoa i te pae mai i te metepara mei te mea e kua rauka i taku au pipi i te oko enua. I na, e pakari teia, kia rauka mai oki ia ratou ei ipukarea mutukore no ratou.

6 E kia rave rai taku tavini a Sidney Gilbert i te taonga taku i akataka iaia, kia akono i te au moni, kia riro ei mata ki te akonoanga, kia oko mai i tetai au enua i roto i te au tuanga e pini uake, mei te mea e ka rauka i te rave na roto i te tuatua-tika, e ta te pakari ka arataki.

7 E kia rave rai taku tavini a Edward Partridge i te taonga taku i akataka iaia, e ma te tua atu ki te aronga tapu i to ratou ipukarea, mei taku i akaue atu; e pera katoa te aronga tana i iki kia tauturu iaia.

8 E pera katoa, tika tikai taku e karanga atu kia kotou, kia tika e kia noo rai taku tavini a Sidney Gilbert ki roto i teia ngai, e kia akatu katoa i tetai are toa, kia rauka oki iaia kia oko atu i te au apinga ma te kore e ravenga pikikaa, kia rauka mai iaia tetai moni ei oko enua ei meitaki no te aronga tapu, e kia rauka oki iaia kia oronga i tetai uatu apinga ta te au pipi e anoano kia akatupuia to ratou ipukarea.

9 E pera katoa kia rauka katoa i taku tavini ia Sidney Gilbert tetai pepa tikaanga no te okooko—I na, ko teia te pakari, e ko te ka tatau, kia mārama tikai aia—kia rauka katoa iaia kia tuku atu i te au apinga ki te iti tangata, na roto rai i tana au aronga angaanga tana i iki;

10 No reira kua orongaia i reira no taku aronga tapu, kia tutuia atu taku evangelia ki te aronga e noo i roto i te poiri e i roto i te au tuanga o te maru mate.

11 E pera katoa, tika tikai taku e karanga atu kia kotou, ka tika katoa kia noo taku tavini a William W. Phelps ki roto i teia ngai nei, e kia riro katoa oki aia ei tangata nenei pepa no te akonoanga.

12 E i na, me ariki mai te ao nei i tana au tataanga—I na, e pakari teia—kia rauka oki iaia te au mea ravarai te ka rauka iaia na roto i te tuatua-tika, ei meitaki no te aronga tapu.

13 E na taku tavini, na Oliver Cowdery e tauturu iaia, kia tau ki taku i akaue atu, i te au ngai uatu taku ka tuku iaia, kia tata mai, e kia akatika, e kia iki, kia tika oki te au mea katoatoa ki mua iaku nei, e ka akapapuia mai oki te reira e te Vaerua na roto iaia.

14 No reira ka tikaia teia aronga taku i tuatua atu ana kia noo ki runga i te enua ko Ziona, ma te viviki, ma to ratou au ngutuare tangata, ei rave oki i te au mea taku i tuatua atu ana.

15 E teianei, no runga i te akaputuputuanga—kia vave tikai te episekopo e te mata katoa i te akateateamamaoanga no te au ngutuare tangata tei akaueia ana kia aere mai ki teia enua nei, e kia noo ratou i to ratou ipukarea.

16 E ki te toenga o te au ereta ma te au mema katoa, ka orongaia atu tetai au akamāramaanga a muri ake. Koia ïa. Amene.