Tuanga 82
Te eeuanga tei orongaia mai na roto ia Iosepha Timeti te Peroveta, i Jackson County, Missouri, i te rā 26 o Aperira, 1832 (History of the Church, 1:267–269). Ko te angaanga koia oki e uipaanga maata na te Akonoanga, e i reira oki te Peroveta ko Iosepha Timeti i akatinamouiaʼi ei Peresideni no te Kautaunga Teitei, e ko taua taonga rai oki tei akataongaia kiaia i mua uake i roto i te uipaanga maata a te au taunga teitei, te au ereta, ma te au mema katoa, i Amherst, Ohio, i te rā 25 o Tianuare, 1832 (akara ki te upoko o te Tuanga 75). Ko teia au ingoa tuke uake rai kua akarukeia atu, mari ua ki te au ngai kare i kiteaia e koai (akara ki te upoko o te Tuanga 78).
1–4, Me e maata te ka orongaia atu, e maata rai te ka anoanoia; 5–7, Kua tutara te poiri i roto i te ao; 8–13, Kua tapekaia te Atu me rave tatou i tana ka tuatua mai; 14–18, Kia maata mai te manea e te tu tapu tikai i Ziona; 19–24, Kia kimi te tangata katoatoa i te meitaki no tona tangata tupu.
1 Tika, tika tikai taku e karanga atu kia kotou, e taku au tavini, mei te mea e kua akakore kotou tetai ki tetai i ta kotou au ara, te akakore katoa atu nei au, ko te Atu, i ta kotou.
2 Kareka ra, te vai nei oki tetai aronga i rotopu ia kotou e ara maata tikai ta ratou; ae, e pera katoa oki kotou pouroa kua ara anake; i na ra, e tika tikai taku e karanga atu kia kotou, kia matakite mei teianei, e akamotu mai mei te ara, ko te iri aea tetai akavaanga mamae ki rungaʼo i to kotou upoko.
3 E ko te tangata e maata tei orongaia atu tana, e maata katoa te ka anoanoia mei iaia; e ko tei ara ki te mārama maata, ka maata katoa tona akaapaanga ka rauka mai.
4 Kua kapiki mai kotou kiaku no te au eeuanga, e kua oronga atu au kia kotou; e me kare kotou e akono i taku au tuatua, taku i oronga atu kia kotou, kua riro kotou ei aronga aati ture; e ka raveia te akavaanga tika, te utunga tei akonoia e taku ture.
5 No reira, ko taku e tuatua nei ki tetai, te tuatua ra au ki te katoatoa rava: E akara, ka totoā oki te diabolo i tona mana, e ka tutara oki te poiri;
6 E ka tutungiia oki te riri o te Atua ki rungaʼo i te au tangata o te enua nei; e kare rava e tangata e rave i te meitaki, no te mea kua aere ke te katoatoa mei te mataara tikai.
7 E teianei, tika tikai taku e karanga atu kia kotou, kare rava au, ko te Atu, e tuku atu i tetai ara ei apa no kotou; e aere i to kotou aerenga e auraka e ara akaou; i na ra, ko te tangata tei ara ka oki mai rai tana ara mua ki rungaʼo iaia, te tuatua maira te Atu to kotou Atua.
8 E pera katoa, te karanga akaou atu nei au kia kotou, te oronga atu nei au i tetai akaueanga ou kia kotou, kia mārama oki kotou i toku anoano no runga ia kotou;
9 E me kore ra, te oronga atu nei au i tetai akaaereanga kia kotou e ka akapeea oki kotou me akatutu mai ki mua iaku, e kia uri atu rai oki ei akaoraanga no kotou uaorai.
10 Ka tapeka au ko te Atu iaku uaorai me rave kotou mei taku i tuatua atu; i na ra, me kore kotou e rave mei taku i akaue atu, kare ïa a kotou taputouanga.
11 No reira, tika tikai taku e karanga atu kia kotou, kua tau rava oki i taku nga tavini ko Edward Partridge e Newel K. Whitney, A. Sidney Gilbert e Sidney Rigdon, e taku tavini katoa ko Iosepha Timeti, e John Whitmer e Oliver Cowdery, e W. W. Phelps e Martin Harris kia taokotai ia ratou na roto i tetai tapekaanga e te koreromotu te ka kore rava e matara na roto i te aati ture, mari ua ra kia aru ua mai te akavaanga i muri ake, i roto i ta kotou au tuanga angaanga—
12 Kia akara atu i te oraanga o te putaua, e te au mea katoa tei tau ki te au episekopo i te enua ko Ziona e te enua katoa ko Kirtland;
13 Kua akatapu oki au i te enua ko Kirtland i roto i toku tuatau ei meitaki no te aronga tapu a Tei Teitei Roa, e no tetai titi ki Ziona.
14 Ka tupu oki to Ziona manea ki te maataanga e tikaʼi, e te tapu katoa; ka akamaataia tona au kotinga; ka akamaroiroiia tona au titi; ae, e tika tikai taku e karanga atu nei kia kotou, ka tu akaou mai a Ziona e ka aao mai i tona kakau manea tikai.
15 No reira, te oronga atu nei au i teia akaueanga, kia tapekaia kotou ki teia koreromotu, e ka raveia oki te reira kia tau ki te au ture a te Atu.
16 I na, e pakari katoa teia i roto iaku ei meitaki no kotou.
17 E kia aiteite oki kotou, e me kore ra, kia aiteite ta kotou ka rauka mai no runga i te au ngai, ei meitaki no te raveanga i te au mea no ta kotou au tuanga angaanga, te au tangata katoatoa kia tau ki tana i anoano e tana i inangaro, mei te mea oki e kua tika tona au anoano—
18 E ka riro teia ei meitaki no te akonoanga a te Atua ora, kia akapuapinga te au tangata tatakitai i tana taleni, e kia rauka akaou mai i te tangata tatakitai nei tetai au taleni ke atu, ae, tatakitai anere i te maata, kia tukuia atu ki roto i te are vairanga o te Atu, e kia riro mai ei apinga tikai na te akonoanga katoatoa—
19 Kia kimi oki te tangata tatakitai i te meitaki o tona tangata tupu, e ma te mata akara tinamou ki te kakā o te Atua.
20 Kua akataka oki au i teia akanooanga nei ei mea mutukore kia kotou, e ki to kotou au tangata te ka na muri mai, mei te mea e kare kotou e ara.
21 E ko te tangata te ka apa ki teia koreromotu nei, e tei akaketaketa atu i tona ngakau i te patoi atu i te reira, ka akaapaia aia kia tau ki te au ture o taku nei akonoanga, e ka tukuia atu oki ki te pāpāanga a Satani e tae uatu ki te rā o te akaoraanga.
22 E teianei, tika tikai taku e karanga atu kia kotou, teia te pakari, e rave mai i tetai au taeake no kotou uaorai mei roto i te mamona o te au mea tika kore, e kare oki ratou e takore ia kotou.
23 E akaruke i te akavaanga kiaku, naku oki te reira, e naku rai e tutaki atu. Ei au to kotou; ka vai uatu rai taku au akameitakianga kia kotou.
24 E ka riro mai oki te basileia ia kotou, e ka vai e tuatau uatu, mei te mea e kare kotou e inga mei to kotou mou pirianga tikai. Koia ïa. Amene.