Tuanga 27
Te eeuanga tei orongaia mai kia Iosepha Timeti te Peroveta, i Harmony, Pennsylvania, Aukete 1830 (History of the Church, 1:106–108). Kia akapapa no tetai uipaanga no te Akonoanga, e no te ka raveia oki te kaianga oroa i reira, koia te varaoa e te uaina, kua aere atu a Iosepha i te kimi uaina no taua akakoroanga ra. Kua araveiia mai aia e tetai karere rangi e kua ariki mai i teia eeuanga nei, ko tei tataia te tuanga mua i taua taime ra, e ko te toenga kua tataia te reira i tera mai Tepetema. Kua raveia te vai ei mono i te ngai o te uaina i teia nei i roto i te kaianga oroa o te Akonoanga.
1–4, Kua akaariia mai te apinga ka kai ei i te kaianga o te oroa tapu; 5–14, Ko te Mesia e tona au tavini i roto i te au tuatau ravarai, ka kai ratou i te oroa tapu; 15–18, E aao i te rakei katoa o te Atua.
1 E akarongo ki te reo o Iesu Mesia, toou Atu, e toou Atua, e toou Akaora, e tuatua ora oki tana e te mana maata.
2 E, i na, te tuatua atu nei au kia koe, auraka e manamanata i ta kotou ka kai, e ta kotou ka inu me kai kotou i te oroa, me rave ra kotou i te reira ma te akara tinamou ki toku kakā—i te akamaaraanga ki taku Metua no toku kopapa tei akamoeia ki raro no kotou, e toku toto tei akamaringiia no te akakoreanga i ta kotou au ara.
3 No reira, e akaueanga taku e oronga atu nei kia koe, e auraka rava kotou e oko mai i te uaina e tetai uatu vai kona a to kotou au enemi ra;
4 No reira, auraka rava koe e inu i tetai o teia au mea nei, mari ua ra ei mea ou tikai tei maaniia e kotou; ae, i roto i teia, te basileia o taku Metua te ka akatuia ki te enua nei.
5 I na, e pakari teia i roto iaku; e no reira, auraka e umere, te vaitata mai nei oki te ora e inu ei tatou i te ua o te vine i te enua nei, e Moronai katoa oki, taku i tono atu kia koe kia eeu mai i te Puka a Momoni, tei roto i reira te kīanga o taku nei evangelia mutukore, e taku katoa oki i oronga mai i te au taviri o te papaanga o te rakau a Epharaima;
6 E pera katoa rai oki kia Elia, taku i oronga atu i te taviri no te akaokianga mai i te au mea katoatoa tei tuatuaia mai e te vaa o te au peroveta tapu katoatoa mei te akamataanga mai o te ao nei, no runga i te au rā openga;
7 E pera katoa oki a Ioane, te tamaiti a Zakaria, ko Zakaria oki tana (ta Elia) i atoro atu ma te oronga atu i te taputou e ka rauka iaia tetai tamaiti, e ka tapa tona ingoa ko Ioane, e ka kī aia i te vaerua o Elia;
8 Ko taua Ioane ra oki teia taku i tono atu ki rotopu ia korua, e taku nga tavini ko Iosepha Timeti e Oliver Cowdery, kia akataonga ia korua ki te kautaunga mua tei rauka oki ia korua, kia kapikiia oki korua ma te akataonga katoa ia mei ia Aarona te tu;
9 E pera katoa a Elia te peroveta, taku i oronga atu i te au taviri no te mana o te akaariuanga i te ngakau o te au metua ki te au tamariki, e te ngakau o te au tamariki ki te au metua, kia kore oki te ao katoa nei e pāiaia ki tetai taumaa;
10 E pera katoa kia Iotepa e Iakoba, e Isaaka, e Aberahama, to kotou au Metua, tei vai teia au taputouanga nei;
11 E pera katoa kia Mikaela, me kore ra ko Adamu, te metua o te katoatoa rava, te ariki o te katoatoa, to te au rā taito ra;
12 E pera katoa kia Petero, Iakobo, e Ioane, taku i tono atu kia korua, e na roto ia ratou kua akataonga oki au ma te akatinamou ia korua ei nga aposetolo, e ei nga kite katoa no toku nei ingoa, e ma te mou i te au taviri o ta korua angaanga, e no taua au mea katoa taku i eeu atu kia ratou;
13 E kia ratou taku i oronga atu i te au taviri o toku basileia, e te tuatau o te evangelia no te taime openga; e no te kīanga o te tuatau, koia oki te tuatau e taokotai au i te au mea katoa, to roto i te ao ra, e to te enua katoa nei.
14 E ki te katoatoa ta taku Metua i oronga mai kiaku i vao ake i te ao nei.
15 No reira, e akateitei i to kotou ngakau ma te rekareka, e ma te tatua i to kotou taukupu, e ma te tuku ki rungaʼo ia kotou i taku paruru, kia rauka oki ia kotou kia autu i te rā kino, e me oti pouroa ia kotou i te rave, kia rauka i reira ia kotou kia tu.
16 E tu i reira, ma te tatua i to kotou taukupu ki te tuatua-mou, ma te tapoki umauma o te tuatua-tika, e kia akatamakaia to kotou vaevae ma te teateamamao o te evangelia o te au, taku oki i tono atu i taku au angela kia oronga atu kia kotou;
17 Ma te apaianga i te paruru o te akarongo kia rauka ia kotou te tamate katoatoa i te au tao aʼi a te aronga kino.
18 E ma te apai katoa i te pare o te akaoraanga, e te koke o taku Vaerua, taku oki ka riringi atu ki rungaʼo ia kotou, e taku tuatua katoa ka eeu atu kia kotou, e taokotai ia kotou i te au mea katoatoa ta kotou e pati mai kiaku, kia vai akarongo uatu rai kotou e tae ua mai au, e ka apainaia mai kotou ki runga, e te ngai e nooia e au ra, ei reira katoa oki kotou. Amene.