Tuanga 85
Te eeuanga tei orongaia mai na roto ia Iosepha Timeti te Peroveta, i Kirtland, Ohio, i te rā 27 o Noema, 1832 (History of the Church, 1:298–299). Ko teia tuanga nei mei roto mai i te pepa a te Peroveta kia W. W. Phelps, e noo ra i Independence, Missouri. Kua orongaia mai teia ei pau i te au uianga no runga i te aronga tapu tei neke atu ki Ziona, kare ra oki i rauka ake to ratou au ipukarea kia tau ki tei akatumuia i roto i te Akonoanga.
1–5, Ka rauka mai te au ipukarea i Ziona na roto i te akatapuanga; 6–12, Na tetai ma te ririnui e te maroiroi e oronga ki te aronga tapu i to ratou ipukarea i Ziona.
1 Ko te angaanga a te karaka o te Atu, tana i iki, kia akono i tetai tua, e te akapapaanga tua katoa o te akonoanga no te au mea katoatoa te ka tupu i Ziona, e te au aronga katoa tei akatapu i tetai au tuanga apinga, e kua rauka te ipukarea kia tau ki te ture e no ko mai i te episekopo;
2 E pera katoa te tu o to ratou oraanga, to ratou akarongo, e te angaanga; e pera katoa ratou tei akaruke i te akonoanga i muri ake i te raukaanga o to ratou ipukarea.
3 Kare oki i aiteite ki te anoano e te akaueanga a te Atua e ko ratou tei kore i rauka to ratou ipukarea na roto i te akatapuanga, kia tika ki tana ture, tana oki i oronga mai, e kia tuku atu aia i te tuanga ngauru ki runga i tona iti tangata, no te akateateamamao atu ia ratou no te rā akautungaanga e te kāanga, kia kapitiia oki to ratou au ingoa ki te iti tangata o te Atua.
4 Auraka katoa oki to ratou akapapaanga kia vai, e me kore ra kia vaioia ki te ngai ka kiteaia mai ki runga i tetai uatu o te au tataanga me kore ra te tua o te akonoanga.
5 Kare oki to ratou au ingoa e kiteaia, e pera katoa te ingoa o to ratou au metua tane, e pera katoa te ingoa o te au tamariki e tataia ki roto i te puka ture a te Atua, te tuatua maira te Atu Sabaota ra.
6 Ae, te tuatua maira te reo iti poepoe, ko tei koumuumu mai e tei koputa mai i te au mea katoatoa, i tetai au taime e riro ana te reira ei akakeukeu i toku au ivi kia tae ki te akakiteanga mai e:
7 E ka tae akera e naku, na te Atu ko te Atua, e tono ei i tetai ma te maroiroi e te ririnui, e te mouanga i te sepeta o te mana ki tona rima, e kua kakauia ki te mārama ei tapokianga, ka tuatua mai tona vaa i te au tuatua, koia te tuatua mutukore; kareka tona au ngakau e vairanga ïa o te tuatua-mou, ei akamako i te ngutuare o te Atua, e kia akatakaia na roto i te kelero te au ipukarea o te aronga tapu tei kitea to ratou ingoa, e te ingoa o to ratou au metua, e ta ratou au tamariki, tei tataia ki roto i te puka ture a te Atua;
8 E ko taua tangata ra, tei kapikiia e te Atua e tei ikiia, ko tei tuku atu i tona rima ei tapū i te araka a te Atua, ka inga aia ki te koke o te mate, mei te pu rakau tei korapaia e te mārama ririnui o te uira.
9 E ko ratou katoatoa tei kore i tataia ki roto i te puka akamaaraanga, kare rai o ratou ipukarea a taua rā ra, i na ra ka tipupuia ratou kia pou, e ko to ratou tuanga ka ikiia mai no ratou i rotopu i te aronga irinaki kore, tei reira te aueanga e te pakatianga nio.
10 Kare au e tuatua atu nei i teia au mea e naku uaorai; no reira, mei ta te Atua e tuatua ra, ka akatupu katoa aia.
11 E ko ratou e mou nei i te Kautaunga Teitei, tei kore i kitea to ratou ingoa i te tataangaia ki roto i te puka o te ture, me kore ra kua kitea mai e kua akaruke i te akonoanga, me kore ra kua tipuia ki vao i te akonoanga, e mei roto katoa i te kautaunga akaaka, me kore ra te au mema, a taua rā ra kare rai e kitea to ratou ipukarea i rotopu i te aronga tapu a Tei Teitei Roa ra;
12 No reira, ka raveia te reira mei tei raveia ki te au tamariki a te taunga, mei tei tataia ki roto i te pene rua e te irava ono ngauru ma tai e te ono ngauru ma rua o Ezera.