Tuanga 137
Te orama tei orongaia mai kia Iosepha Timeti te Peroveta, i roto i te iero o Kirtland, Ohio, i te rā 21 o Tianuare, 1836 (History of the Church 2:380–381). Ko te akakoroanga koia oki te akaaereanga o te angaanga oroa o te orongaanga tapu mei tei eeuia mai.
1–6, Kua kite te Peroveta i tona tuakana ia Alvin i roto i te basileia tiretiera; 7–9, Kua eeuia mai te apiianga o te akaoraanga o tei mate; 10, Kua akaoraia te au tamariki katoatoa i roto i te basileia tiretiera.
1 Kua akatueraia mai te au rangi kia matou, kite akera au i te basileia tiretiera o te Atua, e tona kakā katoa, kare e rauka iaku kia tuatua, e mei tei roto i te kopapa me kare.
2 Kite atura au i te manea aitekore o te ngutupa e tomo atu ei te au tangata o te reira basileia ki roto, mei te tu rai o te aʼi mura taka punupunu ua ra;
3 Pera katoa te terono kakā o te Atua e noo ra te Metua e te Tamaiti.
4 Kua kite au i te manea o te au mataara o taua basileia mei te tu rai e kua tapokiia ki te auro.
5 Kua kite atu au i te Metua ia Adamu e Aberahama; e toku papa e toku mama; toku tuakana ko Alvin, kua roa tona moeanga;
6 E kua umere tikai e peea aia i raukaʼi tetai nooanga nona i taua basileia, i na oki kua takake atu aia mei teia oraanga i mua ake i tae mai ei te rima o te Atu no te akaputuputu ia Iseraela no te rua o te taime, e kare oki aia i bapetizoia no te akakoreanga o te au ara.
7 Kua tae maira te reo o te Atu kiaku, na ko maira: Pouroa te aronga tei mate kare i kite i teia evangelia, e mei te mea ra e ka ariki ratou naringa e kua akatikaia ratou kia noo mai, ka riro ratou ei au aronga tuanga no te basileia tiretiera o te Atua;
8 Pera katoa te katoatoa te ka mate mei teia nei ma te kore e kite no te reira, e mei te mea ra e ka ariki ratou ma to ratou ngakau katoa, ka riro ratou ei aronga tuanga no taua basileia;
9 Naku oki, na te Atu, e akava i te au tangata katoatoa kia tau ki ta ratou au angaanga, kia tau katoa ki te anoano o to ratou au ngakau.
10 Kua kite katoa atu au e pouroa te tamariki tei mate i mua ake ka tae ei ki te au mataiti mārama tikai kua ora i roto i te basileia tiretiera o te rangi.