1 No tei eeu mai oki te Atu kiaku e ko toku au enemi, i Missouri e i teia Enua katoa, e aru akaou mai ra iaku; no te aruaru ratou iaku ma te kore e tumuanga, e ma te kore rava e tikaanga o ta ratou au akaapaanga iaku; e no ta ratou au akaapaanga tarevakē kino tikai, kua manako au e e mea tau kia akaruke au i reira no tetai tuatau poto, no toku uaorai ora e pera no teia iti tangata. Ka tuatua au kia ratou katoatoa me e pirianga angaanga ta matou e kua akaruke au i taku au angaanga ki te au mata e te au karaka, kia akono meitaki, e kia tutakiia atu taku au kaiou na roto i te okoanga atu i toku enua, me e kua tau, e me te au tupuanga e akatika. Me kite au e kua peke atu te uriia, ka oki akaou mai au i reira kia kotou.

2 E no te au tumatetenga tei ikiia au kia na roto, kua aite ïa ki tetai mea meangiti kiaku, tei raro au i te vareae e te riri o te tangata i te au rā o toku nei oraanga; eaa ra te tumu kare au i mārama, penei kua akataongaia i mua ake ka akamouiaʼi te tango o te ao nei no tetai tumu meitaki, me kore ra e kino, i ta kotou ua ka karanga. E akava kotou no kotou uaorai. Kua kite oki te Atua i teia au mea pouroa, noatu e meitaki e me e kino. Kareka ra, kua matau oki au i te kau ki roto i te vai oonu. Kua matau takiri i teia nei; e kua aite au kia Paulo, i te rekareka i roto i te tumatetenga; i teia rā oki te Atua o toku au metua i akaoraʼi iaku mei roto mai ia ratou pouroa, e ka akaora rai iaku i te au tuatau ki mua; e i na, ka autu au ki rungaʼo i toku au enemi katoatoa, na te Atu oki na te Atua i tuatua mai i te reira.

3 No reira kia rekareka te aronga tapu katoatoa, e kia mataora tikai; ko te Atua oki o Iseraela to ratou Atua, ka oronga mai oki aia i tetai utunga tau ki rungaʼo i te upoko o te aronga kino katoatoa.

4 E pera katoa, tika tikai te tuatua maira te Atu: Ko te angaanga o toku nei iero, e te au angaanga katoatoa taku i iki kia kotou, kia raveia rai te reira e auraka e akamotu; e kia taruaia to kotou angaanga meitaki, te maroiroi, e te akakoromakianga, e ta kotou au angaanga katoa, te tuatua maira te Atu Sabaota. E me takingakino mai ratou ia kotou, kua pera katoa ratou i te takingakinoanga i te au peroveta ma te au tangata tuatua-tika i muake ia kotou. E tutaki oki to teia au mea pouroa i te rangi ra.

5 E pera katoa, te oronga atu nei au kia kotou i tetai tuatua no runga i te bapetizoanga i to kotou aronga i mate.

6 Tika tikai, te tuatua maira te Atu kia kotou no runga i to kotou aronga i mate: Me bapetizoia ake tetai o kotou no to kotou aronga i mate, ei tangata tata tuatua tetai, kia riro katoa aia ei kite mata no ta kotou bapetizoanga; kia akarongo meitaki aia ki tona taringa, e kia rauka oki iaia i te akapapu ma te tika, te tuatua maira te Atu;

7 Ko ta kotou au akapapaanga tuatua katoatoa, kia akamouia te reira i te ao ra; ko taau e topiri i te enua nei, e topiri katoa ia ïa i te rangi, ko taau e tuku i te enua nei, e tuku katoa ïa i te ao ra;

8 Te vaitata nei oki au i te akaoki mai i te au mea e manganui ki te enua nei, kia tau ki te kautaunga, te tuatua maira te Atu Sabaota.

9 E pera katoa, kia tata meitaki ia atu te au akapapaanga pouroa, e kia tuku ratou i te reira ki roto i te ngai vairanga o toku nei iero tapu, kia vai ei akamaaraanga mei tetai uki ki tetai uki, te tuatua maira te Atu Sabaota.

10 E ka tuatua oki au ki te aronga tapu katoatoa, e kua anoano au, ma te inangaro maata tikai, kia tuatua atu kia ratou mei runga mai i te ngai akoanga no runga i te tumu tuatua o te bapetizoanga no tei mate, a teia Sabati ki mua nei. I te mea ra oki e kare oku mana no te rave i te reira, ka tata atu au i reira i te tuatua a te Atu i te au atianga, no runga i taua tumu tuatua ra, e ka tuku atu ei kia kotou na roto i te meere, e pera katoa ki tetai au mea ke atu e manganui.

11 Te topiri nei au i taku reta no teia taime, no te rava kore o te taime; te tiaki ua nei oki te enemi, e mei ta te Akaora oki i tuatua mai, te aere mai nei te tama ariki o te ao nei, i na ra, kare ra ana iaku nei.

12 I na, ko taku pure ki te Atua koia oki kia akaoraia kotou katoatoa. E te tuku nei oki au iaku ei tavini no kotou ki roto i te Atu, ei peroveta e te akara no Te Akonoanga a Iesu Mesia o te Aronga Tapu i te Au Rā i Muri Nei.