Scriptures
Te Apiianga E Te Au Koreromotu 78


Tuanga 78

Te eeuanga tei orongaia mai na roto ia Iosepha Timeti te Peroveta, i Hiram, Ohio, Mati 1832. Te akanooanga ta te Atu i oronga mai kia Iosepha Timeti no te akakoroanga kia akatumu i te are vairanga no te putaua. (History of the Church, 1:255–257). Kare oki i te mea tau ua rai kia kite to te ao nei i te au tangata tatakitai ta te Atu i tuatua mai ana na roto i te eeuanga, e i roto i reira i te neneianga o teia e tetai au eeuanga i muri mai kua karangaia mai ana te au taeake ki tetai ingoa ke e kare i to ratou ingoa tikai. Kia oti te tuatau no te akonoanga i te au ingoa kia kare e kiteaia, ko to ratou ingoa tikai, kua tataia mai te reira ki roto i te nga akairo []. No te mea e kare e anoanoia i teia tuatau nei kia taangaanga i te au ingoa muna, kua tata anake ia te au ingoa tikai i roto nei, mei tei orongaia mai i roto i te tataanga rima mua.

1–4, Kia teateamamao e kia akatumu te aronga tapu i tetai are vairanga, 5–12, Ko te taangaanga ma te pakari i to ratou au apinga ka arataki te reira ki te akaoraanga; 13–14, Kia takake te Akonoanga mei te mana o teia nei ao; 15–16, Kua tavini a Mikaela (Adamu) i raro ake i te akatereanga a Tei Tapu (Iesu Mesia); 17–22, Kia akameitakiia tei akarongo tikai, ka rauka ia ratou te au mea katoatoa.

1 Kua tuatua atura te Atu kia Iosepha Timeti, Tamaiti, i te na ko anga e: E akarongo mai kiaku, te tuatua maira te Atu to kotou Atua, ko tei akataongaia ki te kautaunga teitei o taku nei akonoanga, ko tei uipa mai ia kotou ki te ngai okotai;

2 E akarongo atu ki te ako a tei akataonga ia kotou mei runga mai, ko te ka tuatua mai ki roto i to kotou nga taringa i te au tuatua o te pakari, kia rauka ia kotou te akaoraanga na roto i te mea ta kotou i tuku mai ki mua iaku, te tuatua maira te Atu ko te Atua.

3 E tika tikai taku e karanga atu kia kotou, kua tae te tuatau, e kua vaitata rava; e i na, ka anoanoia tetai taokotaianga no toku iti tangata, i roto i te akaaereanga e te akatinamouanga i te au angaanga o te are vairanga no tei putaua o toku iti tangata, i roto i teia ngai nei e i roto katoa i te enua ko Ziona—

4 No tetai ngai tinamou tikai e te mutukore e te akanooanga o taku akonoanga, kia tere te akakoroanga ta kotou i papau, ki te akaoraanga o te tangata nei, e ki te kakā o to kotou Metua i te ao ra;

5 Kia aiteite oki kotou i roto i te tapekaanga o te au mea o te ao ra, ae, e pera katoa te au mea o te enua nei, no te raukaanga mai i te au mea o te ao ra.

6 No te mea, me kare kotou e aiteite i roto i te au mea o te enua nei, kare katoa oki kotou e aiteite i te arikianga mai i te au mea o te ao ra;

7 E me ka anoano kotou kia oronga atu au i tetai ngai no kotou i roto i te ao tiretiera, ka akateateamamao oki kotou ia kotou e tikaʼi na roto i te raveanga i te au mea taku i akaue atu e i anoano ia kotou.

8 E teianei, tika tikai te tuatua maira te Atu, e mea tau rava kia raveia te au mea i raro ake i toku kakā, na roto ia kotou tei topiriia i roto i teia akanooanga nei;

9 E me kore e koia oki, kia tika i taku tavini ia Newel K. Whitney e taku tavini katoa ia Iosepha Timeti, Tamaiti, e taku tavini ko Sidney Rigdon kia noo ki roto i te pupu konitara a te aronga tapu i roto ia Ziona;

10 Me kare, te kimi nei oki a Satani i te taruri ke i to ratou ngakau mei te tuatua-mou, kia akamatapo ia ratou e kia kore katoa oki e mārama i te au mea tei akateateamamaoia no ratou.

11 No reira, e akaueanga teia taku e oronga atu nei kia kotou, kia akapapa e kia akataokotai ia kotou uaorai na roto i tetai tapekaanga me kore ra koreromotu mutukore te ka kore rava e matara.

12 E ko te ka aati i te reira, ka ngere aia i tona taonga e tona turanga katoa i roto i te akonoanga, e ka orongaia atu oki ki te pāpāanga a Satani e tae uatu ki te rā o te akaoraanga.

13 I na, teia oki te akapapaanga taku e akateateamamao atu nei ia kotou, e te tango, e te akaraanga taku e oronga atu nei kia kotou, kia rauka oki ia kotou i te rave i te au akaueanga tei orongaia atu kia kotou;

14 E na roto oki i toku mana, e noatu i te au tumatetenga te ka tae ki rungaʼo ia kotou, kia tu takake mai te akonoanga koia anake ua ki rungaʼo i te au mea ora katoatoa tei angaia i raro ake i te ao tiretiera;

15 Kia rauka oki ia kotou kia aere mai ki te korona tei akateateamamaoia no kotou, e kia akariroia ei au tutara ki rungaʼo i te au basileia e manganui, te tuatua maira te Atu ko te Atua, Tei Tapu i Ziona nei, tei akatumu i te au tango o Adamu-Onidi-Amana;

16 Ko tei iki ia Mikaela ei tama ariki no kotou, e kua akatumu i tona vaevae, e kua akanoo iaia ki runga roa, e kua oronga atu kiaia i te au taviri o te akaoraanga i raro ake i te ako e te akaaereanga a Tei Tapu, e kare oki ona akamataanga rā e kare oki e openga o tona ora.

17 Tika, tika tikai, taku e karanga atu kia kotou, e au tamariki rikiriki ua kotou, e kare ake rai kotou i mārama ake i te maataanga o te au akameitakianga a te Metua i roto i tona rima tana i akateateamamao no kotou;

18 E kare oki e rauka ia kotou kia akakoromaki i te au mea katoatoa i teia taime; kareka ra, kia mataora kotou, e ka arataki oki au ia kotou. No kotou oki te basileia e te au akameitakianga katoa no kotou ïa, e te au apinga nui o te mutukore no kotou ïa.

19 E ko tei ariki mai i te au mea katoatoa ma te akameitakianga tikai ka akakakāia aia; e ka kapitiia atu te au mea o teia enua nei kiaia, e anere uatu te maata, ae, kia maata atu.

20 No reira, e rave i te au mea taku i akaue atu ia kotou, te tuatua maira to kotou Akaora, koia te Tamaiti Amana, ko tei akateateamamao i te au mea katoa i mua ake ka apai ei aia ia kotou;

21 Ko kotou oki te akonoanga a te Tama Mua, e ka apai oki aia ia kotou ki runga ki roto i te tiao, e ma te iki atu i te au tangata tatakitai ki ta ratou tuanga.

22 E ko te tavini akarongo tikai e te pakari ka riro iaia te au mea katoatoa. Amene.