Tuanga 119
Te eeuanga tei orongaia mai na roto ia Iosepha Timeti te Peroveta, i Far West, Missouri, i te rā 8 o Tiurai, 1838, i te pauanga mai i tana patianga akaaka: “E te Atu! E akaari mai ki toou tavini i te maata taau i anoano i te au apinga o to iti tangata no te tuanga ngauru” (History of the Church, 3:44). Ko te ture o te tuanga ngauru, mei tei māramaia i teia tuatau nei, kare oki i orongaia mai na ki te Akonoanga i muake i teia eeuanga. Ko te tuatua “tuanga ngauru” i roto i te pure tei taikuia e i roto i te au eeuanga i mua na (64:23; 85:3; 97:11) kua māramaia e kare i te ngauruanga anake, ko te au orongaanga ngakau tae, koia te au oronga, ki te pute o te Akonoanga. Kua oronga mai te Atu i mua na ki te Akonoanga i te ture o te akatapuanga e te akaaereanga o te apinga, ta te au mema (ko te au ereta arataki tikai) i tomo atu na roto i te koreromotu te ka riro ei mea opengakore. No tei kore tetai pae ia ratou i akono i teia koreromotu, kua kiriti ke mai te Atu i te reira no tetai tuatau, e kua oronga mai i reira i te ture o te tuanga ngauru ki te katoatoa o te Akonoanga. Kua ui atu te Peroveta ki te Atu i te maata o ta ratou apinga tana i anoano no te au akakoroanga tapu. Ko te pauanga ko teia eeuanga ïa.
1–5, Kia tutaki te aronga tapu i te tuanga tere o ta ratou apinga e kia oronga katoa, ei tuanga ngauru, i te ngauruanga o te au tere ka rauka ia ratou i te mataiti; 6–7, Ka riro teia akakoroanga ei akatapu i te enua o Ziona.
1 Tika tikai te tuatua maira te Atu, te anoano nei au i ta ratou au apinga tere katoatoa kia tukuia ki roto i te rima o te episekopo o taku akonoanga i Ziona,
2 Ei akatu i toku nei are, e no te tukuanga i te tango o Ziona e no te kautaunga katoa, e no te kaiou a te Ruru Peresideni o taku nei Akonoanga.
3 E ko teia oki te akamataanga o te tuanga ngauru a toku nei iti tangata.
4 E i muri ake i te reira, ko te aronga pouroa tei tutaki, ka tutaki ratou e tai tuanga ngauru i roto i te ngauru o te au apinga tere pouroa i te mataiti; e ka riro oki teia ei ture mou kia ratou e tuatau uatu, no taku nei kautaunga tapu, te tuatua maira te Atu.
5 Tika tikai taku e karanga atu kia koe, ka tae akera e ko ratou pouroa te ka uipaia mai ki te enua ko Ziona, ka tutaki ratou i te tuanga ngauru i te au tere o ta ratou au apinga, e kia akonoia teia ture nei, ko te kore ratou e tau kia noo ki rotopu ia kotou.
6 E te karanga atu nei au kia kotou, me kare toku iti tangata e akono i teia au ture nei, e kia akatapuia, e na teia ture e akatapu i te enua ko Ziona kiaku, kia akonoia oki taku au ture e taku au tukuanga tika, kia vai ki reira ei mea tapu tikai, i na, tika tikai taku e karanga atu kia koe, kare i reira e riro ei enua Ziona kia kotou na.
7 E ka riro teia ei akaraanga ki te au titi katoatoa o Ziona. Koia ïa. Amene.