Scriptures
Te Apiianga E Te Au Koreromotu 87


Tuanga 87

Te eeuanga e te totou no runga i te tamaki, tei orongaia mai na roto ia Iosepha Timeti te Peroveta, i te rā 25 o Titema, 1832 (History of the Church, 1:301–302). Kua rauka mai teia tuanga nei i te tuatau i te au tungane e akarakara e i uriuri ra no runga i te akatuikaanga i te iti tangata Africa i te enua i Marike e te akatuikaa i te au tamariki a te tangata i roto i te ao nei.

1–4, Kua totouia mai te tamaki i rotopu i te Tuanga Tokerau e te Tuanga Tonga; 5–8, E kino maata te ka tupu ki runga i te katoatoa o te iti tangata o te enua nei.

1 Tika tikai, te tuatua maira te Atu no runga i te tamaki te ka tupu mai a teia au tuatau nei te ka akamata mai i te tuanga South Carolina, te ka akatupu i te mate e te mii maata ki te au tangata e manganui;

2 E ka tae mai te tuatau e maringi ua mai ei te tamaki ki rungaʼo i te au pa enua katoatoa, e ka akamata oki ki teia ngai nei.

3 E i na, ka akatakakeia te au Tuanga Tokerau e te au Tuanga Tonga, e ka kapiki atu te Tuanga Tonga ki tetai au pa enua ke, e ki te pa enua katoa ko Paretane, mei tei tuatuaia, e ka kapiki katoa atu ratou ki tetai au pa enua ke atu, ei paruru oki ia ratou uaorai mei tetai pa enua ke; ei reira e totoa atu ei te tamaki ki rungaʼo i te au pa enua katoatoa.

4 E ka tae akera, i muri ake i te au rā e manganui, ka tu mai te au tuikaa e ka tamaki atu ki to ratou au pu, ko te ka teateamamaoia atu e tei apiiia atu no te tamaki.

5 E ka tae katoa akera e ko te toenga ko tei toe mai o te enua, ka teateamamao atu ia ratou uaorai, e ka riri otooto ratou, e ka akakino atu i te au Etene ki tetai ririanga mamae tikai.

6 E no reira, na roto oki i te koke e te akamaringianga toto e mii ei te au tangata o te enua nei; e na roto katoa i te onge, e te maki mate, e te ngaruerue enua, e te mangungu o te rangi, e te korapaanga ririnui o te uira, ka riro oki teia ei kiteanga no te tangata i te riri, e te kino, e te rima akautungaanga o te Atua Mana Katoatoa, e tae uatu ki te akaotianga i akaueia ei takore pouroa i te au pa enua katoa;

7 E ko te aue a te aronga tapu, e te toto o te aronga tapu, ka akamotu te reira e kare e tae akaou mai ki roto i te taringa o te Atu Sabaota, mei te one mai, ei akaoko i to ratou au enemi.

8 No reira, e tu ki te au ngai tapu, e auraka e akaatea; e tae ua atu ki te rā e tae mai ei te Atu; e i na, ka aere viviki mai, te tuatua maira te Atu. Amene.