Tuanga 48
Te eeuanga tei orongaia mai na roto ia Iosepha Timeti te Peroveta, i Kirtland, Ohio, Mati 1831 (History of the Church, 1:166–167). Kua ui atu a Iosepha ki te Atu kia kite e ka akapeea ratou i te raukaanga mai tetai au enua ei nooanga no te aronga tapu. E tumu puapinga tikai teia, no te mea tei te teretere tetai au mema mei te itinga mai o te Enua Marike, no to ratou kauraro ki te au akaueanga a te Atu, kia noo ua ratou ki Ohio (akara ki te Tuanga 37:1–3; 45:64).
1–3, Kia oronga atu te aronga tapu i Ohio i tetai o to ratou au enua ki to ratou au taeake; 4–6, E mea tau i te aronga tapu kia oko i te enua, kia akatu i te oire, e kia aru i te tuatua o to ratou tangata akaaere.
1 E mea tau kia noo kotou i teia taime nei ki to kotou ngai e noo nei i teianei, kia tau rai teia i ta kotou au nooanga.
2 E mei te mea e e au enua to kotou, kia oronga atu kotou i tetai ki te au taeake no te pae itinga mai.
3 E mei te mea e kare o kotou enua, e oko mai ratou mei roto mai i te au tuanga i te au ngai e pini uake, no te reira taime kia tau meitaki ia ratou, i na, ka anoanoia oki tetai ngai nooanga no ratou i teia taime nei.
4 E ka anoanoia oki kia akaputuputu mai kotou i te moni e tikaʼi te ka rauka ia kotou, e kia rave kotou i te reira na roto i te tuatua-tika, e raukaʼi ia kotou a tetai taime kia oko i te enua ei ipukarea, koia oki ei oire maata.
5 Kare te ngai e eeuia mai ake; i na ra, i muri ake i te taeanga mai to kotou au taeake mei te itinga mai, e au tangata tetai ka ikiia, e ka akakiteia mai te ngai kia ratou, me kore ra ka eeuia mai kia ratou te reira ngai.
6 E ka ikiia ratou kia oko mai i te enua, e kia akamata atu i te akanoo i te tango o te oire; ei reira kotou e akamataʼi i te akaputuputu ma to kotou au ngutuare tangata, te au tane katoatoa e to ratou ngutuare tangata, kia tau ki to ratou tu, e mei tei ikiia kiaia e te ruru peresideni ma te episekopo o te akonoanga, kia tau ki te au ture ma te au akaueanga tei rauka ia kotou, e te ka rauka mai ia kotou a muri ake. Koia ïa. Amene.