Tuanga 77
Te eeuanga tei orongaia mai kia Iosepha Timeti te Peroveta, i Hiram, Ohio, Mati 1832 (History of the Church, 1:253–255). Kua tata te Peroveta, “I te akaurianga i te au Irava Tapu, kua rauka mai iaku teia au akamāramaramaanga i te eeuanga o Ioane Pipi” (History of the Church, 1:253).
1–4, E vaerua to te au manu vaevae ā e ka noo ratou ma te mataora mutukore ki runga i te enua matekore; 5–7, Ko teia enua, e 7,000 mataiti tona oraanga i te pae kopapa; 8–10, Maata uatu rai te au angela tei akaoki mai e tei tutu i te evangelia ki runga i te enua; 11, Te topiriangaia o te 144,000; 12–14, Ka oki mai te Mesia i te akamataanga o te itu tauatini mataiti; 15, Ko te nga peroveta te ka tamateia i te enua o te Ngati Iuda.
1 Uianga. Eaa te tai io e tuatuaia nei e Ioane, i roto i te pene 4, e te irava 6 o te Apokalupo?Pauanga. Ko te enua nei, i roto i tona tu akatapuia, te pe kore, e te turanga mutukore.
2 U. Eaa ta tatou ka mārama atu no runga i te nga mea ora e ā e tuatuaia nei i roto i taua irava rai?P. E tutu akatauanga ua te reira na te Tangata Eeu, ko Ioane, i te akakiteanga i te rangi, te paradaiso o te Atua, te rekareka o te tangata nei, e no te manu vaevae ā, e te au mea totoro aere, e no te au manu o te reva; ko te mea i te pae vaerua i te tutu o te kopapa nei; e to te tutu kopapa nei tei aite ki te mea vaerua; te vaerua o te tangata nei i roto i tona uaorai tutu tangata, e pera katoa te vaerua o te manu vaevae ā, e tetai uatu mea ora ta te Atua i anga.
3 U. Kua akakotingaia ainei teia nga mea ora e ā nei ki tetai au manu tatakitai, e me kore ra e mata ainei ratou no tetai pupu manu, me kore ra tetai akanooanga?P. Kua akakotingaia ratou ki te au manu vaevae ā tei akaariia atu kia Ioane, ei mata no te kakā o te au pupu takake i roto i to ratou akanooanga tikai, me kore ra i to ratou angaia anga, i roto i te mataoraanga o to ratou nooanga mutukore.
4 U. Eaa ta tatou ka mārama atu no runga i te mata e te peau o teia nga mea ora nei?P. Ko to ratou au mata e kauono te reira no te mārama e te kite, koia oki, kua kī ratou i te kite; e ko to ratou au peau e kauono te reira no te mana, kia oriori, kia angaanga, e pera atu.
5 U. Eaa ta tatou ka mārama atu no runga i nga ereta e rua ngauru ma ā e tuatuaia nei e Ioane?P. Kia mārama oki tatou e ko teia au ereta ta Ioane i kite nei, e au ereta tu akarongo te reira i roto i te angaanga, e kua mate; no roto mai oki ratou i nga akonoanga e itu, e tei roto oki ratou i teianei i te paradaiso o te Atua.
6 U. Eaa ta tatou ka mārama atu no runga i te puka ta Ioane i kite, ko tei topiriia a muri ki nga akairo e itu ra?P. Kia mārama oki tatou e tei roto i reira te anoano, te au mea muna, e te angaanga a te Atua, mei tei eeuia mai; ko te au mea uunaia no tona kite no runga i teia ao nei i nga mataiti e itu tauatini o tona tupuanga, me kore ra tona oraanga i te pae kopapa.
7 U. Eaa ta tatou ka mārama no runga i teia au akairo e itu nei i topiriaʼi te reira?P. Kia mārama tatou e ko te topirianga mua tei roto i reira te au mea no te tauatini mataiti mua, e ko te rua, tei roto katoa i reira te au mea no te rua o te tauatini mataiti e tae uatu ki te itu o te tauatini mataiti.
8 U. Eaa ta tatou ka mārama no runga i nga angela e ā, tei tuatuaia i roto i te pene 7 e te irava 1 o te Apokalupo?P. Kia mārama tatou e ko ratou nga angela e ā tei tonoia mai mei ko i te Atua, e kua orongaia kia ratou te mana no nga tuanga e ā o te ao nei, kia akaora e kia takore i te oraanga; ko ratou oki teia tei a ratou te evangelia mutukore kia oronga atu ki te au iti tangata, ki te au kopu, ki te au reo e te au tangata; e tei a ratou oki te mana kia tapiri i te rangi, kia topiri i te oraanga, me kore ra kia titiri ki roto i te au tuanga poiri.
9 U. Eaa ta tatou ka mārama no runga i te angela i te kakeanga i te itinga o te rā, Apokalupo pene 7 irava 2?P. Kia mārama tatou e ko te angela tei kake atu i te itinga o te rā ra, tei aia te akairo a te Atua ora ki rungaʼo i nga kopu tino ngauru ma rua o Iseraela; no reira, kua kapiki maira ma te reo maata ki nga angela e ā e tei a ratou te evangelia mutukore, i te na ko anga e: Auraka e rave kino atu i te enua, e te tai, e te au rakau, kia ope ra te au tavini a to tatou Atua i te akairoia e matou to ratou rae. E me ka ariki mai kotou, ko Elia oki teia te ka aere mai kia akaputuputu i te au kopu o Iseraela ki te ngai okotai e kia akaoki mai i te au mea katoatoa.
10 U. Eaa te tuatau e akatupuiaʼi teia au mea nei tei tuatuaia i roto i teia pene nei?P. Ka raveia oki te reira i roto i te ono tauatini mataiti, me kore ra i te akatueraangaia o te ono o te akairo.
11 U. Eaa ta tatou ka mārama i te akairoangaia te tai anere e ā ngauru ma ā tauatini, mei roto mai i te au kopu katoatoa o Iseraela——e tai ngauru ma rua tauatini mei roto mai i te au kopu?P. Kia mārama tatou e ko tei akairoia e au taunga teitei ratou, tei akataongaia ki raro i te akaaereanga tapu a te Atua, kia akatere i te evangelia mutukore; ko ratou oki tei akataongaia mei roto mai i te au iti tangata, i te au kopu, i te au reo, e te au tangata, na roto i te au angela tei orongaia te mana ki rungaʼo i te au iti tangata o te enua nei, kia apai mai ia ratou ravarai te ka rauka ia ratou ki te akonoanga a te Tama Mua.
12 U. Eaa ta tatou ka mārama no runga i te tangi pu, tei taikuia mai i roto i te pene 8 o te Apokalupo?P. Kia mārama tatou e mei ta te Atua i anga i te ao nei i roto i nga rā e ono ra, e i te rā itu ra kua oti tana angaanga, e kua akatapu iora i te reira, e kua anga katoa i te tangata mei roto mai i te one pueu, koia katoa, i te akamataanga o te itu tauatini mataiti ka akatapu te Atu ko te Atua i te enua nei, e ka akaoti i te akaoraanga o te tangata nei, e ma te akava i te au mea katoatoa, e ka akaora oki i te au mea katoatoa, mari ua ra ko tana kare i tuku ki roto i tona mana, i te taime ka oti ei aia i te topiri i te au mea katoatoa, ki te openga o te au mea katoatoa; e te tangi pu a nga angela e itu ra ko te akateateamamaoangaia e te akamutuanga o tana angaanga, i roto i te akamataanga o te itu tauatini mataiti—te akateateamamaoanga i te mataara i mua ake ka aere mai ei aia.
13 U. Aea te au mea e akatupuiaʼi tei tataia i roto i te pene 9 o te Apokalupo?P. Ka akaotiia ratou i muri ake i te akatueraanga o te itu o te akairo, i mua ake i te okianga mai o te Mesia.
14 U. Eaa ta tatou ka mārama no te puka meangiti tei kaingaia e Ioane, mei tei taikuia i roto i te pene 10 o te Apokalupo?P. Kia mārama tatou e e angaanga teia tei akatakaia, e te angaanga oroa, kia akaputuputu mai aia i te au kopu o Iseraela; I na, ko Elia teia, mei tei tataia, te ka aere mai e ka akaoki mai i te au mea katoatoa e tikaʼi.
15 U. Eaa ta tatou ka mārama no runga i te nga kite e rua, i roto i te pene tai ngauru ma tai o te Apokalupo?P. E rua oki nga peroveta ïa te ka tu mai ki roto i te ngati Iuda i te au rā openga, me tae ki te tuatau o te akaokianga mai, e ka totou ki te ngati Iuda i muri ake i to ratou akaputuputuangaia e te otianga o te oire ko Ierusalema i te akatuia i roto tikai i te enua o to ratou ai metua.